Asukula Noum Kewe Semirit

Jeremaia Ese Ükütiw le Angang ngeni Kot

KA FEN meefi letipechou me mochen ükütiw le angang ngeni Kot?​— * Chommong ra pwal meefi ena, äwewe chök, Jeremaia le alüwölün. Iwe nge, ese ükütiw ren minne aramas ra apasa are fför ngeni. Sipwele ppii ifa usun a sokkolo aüchean Jeremaia me ren Kot, pwal mwo nge atun a mochen fangetä.

Mwen än Jeremaia uputiw, Jiowa, ewe Kot mi enlet, a fen filatä pwe epwe emön soufos le öüröüra aramas rese apwapwaai Kot. Ka silei met Jeremaia a ereni Jiowa mwirin fitu ier?— “Usap sile fos, pun ngang eman mi chök ier kükün.”

Om ekiek nge ifa usun Jiowa a pölüweni Jeremaia?— A tipeppos, nge fän kirekiröch, a ereni: “Kosap apasa pwe en eman mi chök ier kükün. Pun kopwe feila ren chokana meinisin üpwe tinukela rer, nge kopwe apasa meinisin mine üa akünö ngonuk. Kosap niuokusitiir.” Pwata? Pun Jiowa a apasa: “Ngang üpwe etuk o tümwünuk.”​—Jeremaia 1:4-8.

Iwe nge, sia fen küna pwe Jeremaia a meefi letipechou pun aramas ra esiita ren an angang ngeni Kot. Iei alon: ‘Aramas ra chök tattakiriei me turunufaseei iteiten rän.’ Ina popun, a ekiekin ükütiw. A pwal apasa: “Usap chüen föüni iten ewe Samol mi Lapalap [Jiowa] ika kapas fän itan.” Nge met, a wesewesen ükütiw?

Jeremaia a apasa: ‘Alon Jiowa a usun chök ekkei mi kü me lon lelukei, a pwourur me lechüi. Üa resin apwosalong, nge üsap chüen tongeni.’ (Jer. 20:7-9) Inaamwo ika Jeremaia a niuokkus fän ekkoch, nge ese tongeni ükütiw pokiten an tongei Jiowa. Sipwe ppii ifa usun Jeremaia a küna tümün pokiten ese fangetä.

Jiowa a ereni Jeremaia epwe öüröüra aramas pwe ika rese kul seni ar kewe föfföringaw, Jerusalem epwe talo. Nge lupwen Jeremaia a öüröürer, ra song  ngeni, iwe, ra apasa: “A pwüng ngeni ei mwän an epwe mäla.” Iwe nge, Jeremaia a tingormaü ngeniir pwe repwe “aleasochis ngeni alon ewe Samol mi Lapalap.” A pwal apasa: ‘Oupwe chök silei pwe ika oua nieilo, oupwe atoto womi chan eman esor tipisin, pun Kot a tinieito pwe upwe esile ngenikemi ekkeei kapas.’ Ka silei met a fis mwirin?—

Ewe Paipel a apasa: “Mürin, ekewe nöüwis me ekewe aramas meinisin ra üreni ekewe souasor me ekewe soufos, ‘Ese pwüng ngeni ei mwän an epwe mäla, pun a kapas ngenikem fän alon ewe Samol mi Lapalap ach we Kot.’” Iwe, Jiowa a tumunu Jeremaia pun ese fangeta ren an niuokkus. Sipwele ppi met a fis ngeni Uria, pwal emön nöün Jiowa soufos mi sokko seni Jeremaia.

Ewe Paipel a apasa pwe Uria ‘a osuni usun feiengawen Jerusalem lon itiitin alon Jeremaia kewe.’ Nge ka silei met Uria a föri lupwen King Jehoiakim a song ngeni? —A niuokkus, a ükütiw le föri letipen Kot, me a sülo Isip. Iwe, ewe king a tinalo ekkoch mwän pwe repwe kütta me eliwinalo. Lupwen ra tori ewe king mi ngaw, ka silei met a föri?— A nielo Uria ren efoch ketilas!​—Jeremaia 26:8-24.

Om lükü nge pwata Jiowa a tümünü Jeremaia nge ese tümünü Uria?— Iwe, Jeremaia a niuokkus usun chök Uria, nge Jeremaia ese ükütiw le angang ngeni Jiowa, ese pwal sülo. Ese fangetä. Ifa ewe lesen sia tongeni käeö seni än Jeremaia leenien äppirü?— Eli fän ekkoch, sia meefi pwe mi weires ach sipwe föri met Jiowa a apasa, nge sipwe chök lükülük me älleasochisi i.

[Pwóróus fan]

Kapas eis:

○ Ifa ewe angang Kot a awisa ngeni Jeremaia?

○ Pwata Jeremaia a ekiekin ükütiw seni an angang?

○ Pwata Jeremaia a küna tümün, nge Uria ese?

○ Met ka käeö seni än Jeremaia leenien äppirü?