Kot A Wesewesen Tongekich Ifa Usun Sia Silei

IEI eü kapas eis mi lamot aramas ra fen ekkeis ren fite ngeröü ier: Ika pwe Kot a tongekich, iwe, pwata sia küna chommong riäfföü? Ika ka tongei emön, kosap tipeeü ngeni an epwe küna riäfföü, iwe, ika a osukosuk, kopwe achocho le älisi. Iwe, pokiten fönüfan a chök ur ren riäfföü, chommong ra meefi pwe Kot ese chchüngükich. Ina popun, a lamot ach sipwe akkomw nengeni ekkewe pisekin ännet pwe Kot a wesewesen tongekich me chchüngükich.

Förien Kot kewe Ra Pwäratä an Tong

Jiowa Kot a “föri läng me fanüfan me matau o meinisin mine a nom lor!” (Fofor 4:24) Ach ekieki usun förien Kot kewe a kan alükülükükich pwe a tongekich. Ren chök äwewe, ekieki mwo usun ekkewe mettoch mi apwapwaok. Ka kan sani möngö annö? Jiowa a tongeni awora eü chök sokkun möngö mi amanauakich. Nge a föratä chommong sokkopaten möngö sia tongeni pwapwaesini. Pwal eü, Jiowa a amasoua ei fönüfan ren chommong sokkopaten irä, pöön irä, masies, chuuk, me metakkan pwe sipwe pwal pwapwa ren.

Pwal ekieki mwo ekkewe mettoch rese lamot fän iten manau nge iir liffang seni Kot mi apwapwakich, äwewe chök, ach tufichin meefi atakirikirin pworaus, pwapwaesini köl, me aücheani mettoch mi lingöch. Pwal ekieki om riri ngeni aramas. Itä iö esap pwapwaesini an pwipwiöch ngeni chiechian kewe are an foropachei emön a tongei? Ach tufichin  meefi tong, ina eü liffang seni ewe Kot mi tong! Pokiten Kot a förikich pwe sipwe tufichin meefi tong, sia silei pwe tong, ina eü napanapan.

Ewe Paipel A Alükülükükich usun Än Kot Tong

Paipel a erenikich pwe Kot mi tong. (1 Jon 4:8) An tong a pwälo lon förian kewe me pwal lon an we Kapas. Ren chök äwewe, ewe Paipel a awora kapasen emmwen fän iten pöchökkülen inisich, a pwal pesekich le aüküküöchü mettoch meinisin, me a öüröürakich le tümünü seni ünnümmong me möngömmong.—1 Korint 6:9, 10.

Paipel a pwal awora kapasen fön mi tipatchem usun ach föfför ngeni aramas, a pesekich ach sipwe tongfengen lefilach me pwäri süföl, fäiro, me kirekiröch. (Mattu 7:12) A apwüngü föfför me ekiek mi efisi riäfföü, äwewe chök tipemmong, uwoufos, lolowo, lisowumwääl, me nimanau. Ika aramas meinisin ra achocho le apwönüetä än Paipel kewe kapasen fön mi mürinnö, epwe kisikisilo riäfföü ekis meinisin.

Iwe nge, Kot a pwäralo an tong mi lapalap seni meinisin ren an fangolo Nöün we Jises pwe epwe penmanauen aramas. Jon 3:16, TF, a apasa: “A chok iei usun an Kot tongei fonufan, pwe a fangelo Noun we Alaemon pwe iteiten aramas meinisin mi luku i esap poutmwalilo, nge epwe kuna manau esemuch.” Jiowa a fen akkota pwe epwe amoielo mälo me sokkun riäfföü meinisin.—1 Jon 3:8.

Iwe, mei wor chommong pisekin ännet pwe Kot a tongekich. A ffat pwe Kot ese pwapwa le kükküna pwe sia riäfföü. Epwe wesewesen asopwalo riäfföü meinisin. Esor lamoten ach sipwe chök äseser pun Paipel a fen affata ifa usun Kot epwe föri ena.

[Sasing lon pekin taropwe 4]

Ach tufichin meefi tong, ina eü liffang seni ewe Koten tong