‘Esilefeili Än Kot Kapas Fän Pwora’

‘Ir meinisin ra urela ren ngünmifel o ra popuetä le asilefeili än Kot kapas fän pwora.’​—FÖF. 4:31.

1, 2. Pwata sipwe achocho le lipwäköchülo lon ach angangen afalafal?

 ÜLÜNGÄT rän mwen än Jises mälo, a ereni nöün kewe chon käeö: “Iwe, aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.” Mwen än Jises feitä läng, a awisa ngeni nöün kewe chon käeö: ‘Oupwe feila o asoulängala chon ekewe mwü meinisin, oupwe afalafaleer pwe repwe aleasochisi meinisin mine üa allük ngenikemi.’ A pwon ngeniir pwe epwe etiir “fansoun meinisin tori lesopolan fanüfan.”​—Mt. 24:14; 26:1, 2; 28:19, 20.

² Kich Chon Pwäratä Jiowa, sia tinikken le fiti ewe angang a fen poputä lon fansoun Jises we. Ei angangen afalafala ewe Mwu me föralo chon käeö a lamot seni meinisin pun a tongeni amanaua aramas. Iwe, a ifa me watteen lamoten ach sipwe angangöch lon ena angang! Lon ei lesen, sipwe küna ifa usun ach nom fän emmwenien ewe ngün mi fel epwe älisikich le afalafal fän pwora. Ekkewe ruu lesen mwirin ei repwe äiti ngenikich ifa usun än Jiowa ngün mi fel a tongeni elipwäköchükich lon ach asukula aramas me älisikich le akkafalafal iteitan.

A Lamot Ngenikich Pwora

3. Pwata mi lamot pwora lon ach angangen afalafal?

³ Ese wor och angang mi aüchea lap seni ewe angang Kot a ngenikich, ach sipwe chon esilefeili ewe Mwu. Nge fän ekkoch a weires. Ekkoch ra etiwa ewe kapas allim usun Mwuun Kot, nge chommong ra usun ekkewe aramas lon fansoun Noa. Jises a apasa: “Rese meefi och, tori fansoun ewe noter a fis, o a uweiirelo meinisin.” (Mt. 24:38, 39) Iwe, mei pwal wor chokkewe ra esiitakich me oputakich. (2 Pit. 3:3) Chon oputakich ra tongeni popu seni ekkewe sou nemenem, chienach chon sukul, are chon angang, pwal mwo nge chon ach famili. A pwal wor pwisin ach kewe apwangapwang, äwewe chök ren nisässäü are lolilen ika aramas repwe oputakich. Mi chommong ekkewe mettoch ra äweiresi ach sipwe “pwora” le apasatä än Kot kapas. (Ef. 6:19, 20) A lamot pwora lon ach likiitü le afalafala ewe kapasen Kot. Met epwe tongeni älisikich pwe sipwe pwora?

4. (a) Met weween pwora? (b) Pwata ewe aposel Paul a tufichin fos ngeni chon Tesalonika fän pwora?

⁴ Ewe Kapasen Krik mi afföüni “pwora” a wewe ngeni “mesemaü, kapas mi wenechar me fataffatöch.” Ena kapas a pwal wewe ngeni “tipepwora, lükülük, . . . ese niuokkus.” Pwora ese wewe ngeni kapas pöchökkül are süfölüngaw. (Kol. 4:6) Inaamwo ika sipwe pwora, nge sipwe pwal kinamwefengen me aramas meinisin. (Rom 12:18) Lon ach angangen afalafal, a lamot ach sipwe pwora, nge sipwe pwal kapas pwetete me tümünüöchü ach föfför pwe  site asonga aramas. Ren ach sipwe pwora, a lamot sipwe achocho le ämääraatä pwal ekkoch napanap nge ese longolong woon pwisin ach tufich. Mwirin än Paul me chienan kewe “küna riaföü me itengau lon Filipai,” pwata ra tufichin fos ngeni chon Tesalonika fän “pwora”? Paul a makkeei: “Kot a ngenikem pwora.” (Älleani 1 Tesalonika 2:2.) Jiowa Kot a pwal tongeni amoielo ach niuokkus me apworaikich.

5. Ifa usun Jiowa a apworai Piter, Jon, me pwal ekkoch chon käeö?

⁵ Lupwen “ekewe souemwenin chon Juta, ekewe souakom me ekewe Sensen Allük” ra kapasen ü ngeni Piter me Jon, ekkena aposel ra ereniir: “Oupwe püsin apwüngü are a pwüng mwen mesen Kot ach sipwe aleasochis ngenikemi mwen ach aleasochisi Kot. Pun äm aisap tongeni ükütiu le kapas won met aia püsin küna o rongorong.” Rese iotek ngeni Kot an epwe awesalo ar riäfföü, nge iei ar iotek me pwiir kewe chon lükü: “Äm Samol, iei kopwe ekieki ar kapasen eniweniw o atufichi noumw kei chon angang pwe repwe afalafala om kapas fän pwora.” (Fof. 4:5, 19, 20, 29) Ifa usun Jiowa a pölüweniir? (Älleani Fofor 4:31.) Jiowa a apworar ren an we ngün mi fel. Än Kot ngün mi fel a pwal tongeni apworaikich. Nge ifa usun sipwe tongeni angei ena ngün mi fel pwe epwe emmwenikich lon ach angangen afalafal?

Ifa Usun Sipwe Pwora

6, 7. Ifa usun sipwe tongeni mwittir angei älillisin än Kot ngün mi fel? Apworausa pworausen ekkoch.

⁶ Sia tongeni mwittir angei älillisin ewe ngün mi fel ren ach tingorei Kot. Jises a ereni ekkewe mi aüseling ngeni: “Iwe, are mwo ämi aramas mi ngau oua silei ämi oupwe fang ngeni nöümi lifang mi mürina, epwe fen ifa me watten än Sememi lon läng fangela Ngünmifel ngeni chokewe mi tüngorei!” (Luk 11:13) Pwüngün, mi lamot sipwe tittingor än Kot ngün mi fel. Ika sia pireir le fiti ekkoch sokkun afalafal, äwewe chök, afalafal woon al, lon sitowa me ofes, afalafal sereseröch, iwe, sipwe iotek ngeni Jiowa ren an ngün mi fel pwe sipwe pwora.​—1 Tes. 5:17.

⁷ Ina met emön fin Kraist itan Rosa a föri. * Eü rän lon an leenien angang, chienan we sense a älleani eü repot usun ewe föfförün kirikiringaw ngeni semirit. A fokkun osukosuk ren met a älleani, iwe, a kötä, “Mwa met ei a fis ngeni aramasen ikenäi?” Rosa ese etiwalo ena fansoun a fen suuk ngeni an epwe tongeni afalafal. Met a föri pwe epwe pwora? Iei alon: “Ua iotek ngeni Jiowa me tingor älillisin an ngün mi fel.” Iwe, a afalafal ngeni me akkota pwal eü fansoun repwe sopwelo ar pworausfengen. Pwal iei pworausen emön nengnginin New York, nimu ierin, itan Milane. A erä: “Me mwen ai lo sukul, äm me mama aua kan iotek ngeni Jiowa.” Met ra tingor? Ra tingor pwora pwe Milane epwe tongeni afalafal usun an we Kot! Inan we a erä: “Ei mettoch a älisi Milane le äweweei an lükü usun apwapwaan ränin uputiw me ekkewe ränin pin” me ewe popun ese fitiir. Ekkena pworaus ra äiti ngenikich manamanen iotek ika sia mochen sipwe pwora.

8. Met a älisi Jeremaia pwe epwe pwora, nge met sia tongeni käeö seni?

⁸ Pwal ekieki met a älisi Jeremaia pwe epwe pwora. Lupwen Jiowa a awisa ngeni an epwe wisen soufos ngeni ekkewe mwu, Jeremaia a pölüweni: “Üsap sile fos, pun ngang eman mi chök ier kükün.” (Jer. 1:4-6) Iwe nge mwirin, Jeremaia a fokkun tinikken  me pworacho lon an angangen afalafal, ina popun, chommong ra kör ngeni sou uwei pworausen efeiengaw. (Jer. 38:4) Lon lap seni 65 ier, a pwora le esilefeili än Jiowa kewe kapwüng. Jeremaia a fokkun iteföülo lon Israel ren an pwora le afalafal, ina popun, 600 som ier mwirin, lupwen Jises a afalafal fän pwora, ekkoch ra lükü pwe i Jeremaia, nge a manausefäl. (Mt. 16:13, 14) Ifa usun Jeremaia a akkufu an nisässäü le poputään? Iei alon: “Om kapas a usun chök ekkei mi kü me lon lelukei, a pwourur me lechüi. Üa resin apwosalong, nge üsap chüen tongeni.” (Jer. 20:9) Ewer, manamanen än Jiowa kapas a achchüngü Jeremaia me amwökütü le kapas.

9. Pwata än Kot kapas a tongeni achchüngükich usun an achchüngü Jeremaia?

⁹ Lon nöün aposel Paul we taropwe ngeni ekkewe chon Ipru, a erä: “Pun än Kot kapas a manau o manaman, a ken seni efoch ketilas mi seisei me rüepek. A tililong lon manauach o aimwüfeseni letipach me ngünüch, pwal lekupukupun lon chü me fituken lon chü. A pwal apwüngü mochen me ekiekin letipen aramas.” (Ipru 4:12) Än Kot kapas a tongeni achchüngükich usun chök an achchüngü Jeremaia. Chechchemeni pwe inaamwo ika aramas ra makkeei ewe Paipel, nge masouan a feito seni Kot nge esap seni tipatchemen aramas. Lon 2 Piter 1:21, a erä: “Pun esap wor och kapasen osuni a feito seni letipen aramas, nge ekkewe aramas ra nom fän nemenien ewe Ngünmifel ra apasatä ewe kapas a feito seni Kot.” Lupwen sia awora fansoun le pwisin käeöfichi ewe Paipel, sia aüralo ekiekich ren ewe pworaus mi pop seni ewe ngün mi fel. (Älleani 1 Korint 2:10.) Ena pworaus epwe usun chök “ekkei mi kü” me lelukach, sise tongeni pwouru.

10, 11. (a) Epwe ifa usun napanapen ach käeö pwe sipwe pwora le afalafal? (b) Apasa met kopwe föri pwe kopwe amürinnölo om pwisin käeö.

¹⁰ Ren an epwe achchüngükich ach pwisin käeö Paipel, a lamot epwe mürinnö napanapan pwe minne sia käeö epwe tikilong le alolloolun letipach. Äwewe chök, lon künaen ewe soufos Isikiel, Kot a ereni an epwe äni ewe taropwe mi num, mi masou ren pworaus mi pöchökkül, me epwe wisen esile ngeni ekkewe aramas mi tipeförea. Isikiel epwe unusen äni me lefareni ewe pworaus pwe epwe wesewesen kküü meefian. Ika ina, än Isikiel esilefeili ewe pworaus epwe eü minen apwapwa usun chök apwapwaan nennen chönün pulech.​—Älleani Isikiel 2:8–3:4, 7-9.

 ¹¹ Ikenäi, sia pwal küna met Isikiel a küna. Chommong rese mochen rongorong met ewe Paipel a apasa. Ika sia mochen likiitü le afalafala kapasen Kot, a lamot pwe napanapen ach käeö Paipel epwe atufichikich ach sipwe unusen weweiti met sia käeö me lükülük woon. Ach käkkäeö Paipel epwe fiffis iteitan, esap chök ewe atun sia tawe ngeni. Sipwe eäni ekiekin ewe sou köl, a kölü: “Amwo kapasen awei me ekiekin lelukei epwe mürina me fän mesom, ai Samol mi Lapalap, ai achau me ai chon amanau.” (Kölf. 19:14) A ifa me lamoten ach awora fansoun le ekilonei met sia älleani pwe ewe enlet epwe fotolong lon letipach! Ewer, sipwe achocho le amürinnölo napanapen ach pwisin käeö. *

12. Pwata än chon Kraist kewe mwich ra älisikich le küna emmwen seni ewe ngün mi fel?

¹² Sipwe pwal tongeni feiöch seni än Jiowa ngün mi fel ren ach “ekiekifengeni usun ach sipwe tongeni alollolätai chienach ren ach eäni chen me föför mürina. Sisap likiti ach eti ach mwichfengen.” (Ipru 10:24, 25) Ewe ngün mi fel a tongeni emmwenikich ika sia akkachocho le fiti mwich iteitan, aüselingöch, me apwönüetä met sia fen käeö. Pwüngün, esap pwe än Jiowa ngün mi fel a awora emmwen me ren ewe mwichefel?—Älleani Pwarata 3:6.

Feiöchün Ach Angei Pwora

13. Met sia käeö seni än ekkewe chon Kraist angangen afalafal lon fansoun ekkewe aposel?

¹³ Ewe ngün mi fel, ina eü manaman mi pöchökkül lap seni meinisin, a tongeni älisi aramas le föri letipen Jiowa. Fän emmwenien ena ngün mi fel, chon Kraist lon fansoun ekkewe aposel ra föri watteen angang, ra afalafal “ngeni aramas meinisin won fanüfan.” (Kol. 1:23) Lap ngeniir ‘rese fiti sukul,’ ina popun, a ffat pwe eü manaman mi kon pöchökkül a amwökütüür.—Fof. 4:13.

14. Met epwe tongeni älisikich pwe sipwe “pwichipwich” ren än Kot ngün mi fel?

¹⁴ Ika sia manaueni ewe sokkun manau mi nom fän emmwenien ewe ngün mi fel, iwe a pwal tongeni amwökütükich le apwönüetä ach angang fän pwora. Ach tittingor ewe ngün mi fel, achocho le pwisin käkkäeöfichi Paipel, ekilonei met sia älleani fän iotek, me fiffiti ach kewe mwich iteitan epwe älisikich pwe sipwe “mwökütüküt” fän emmwenien ewe ngün mi fel. (Rom 12:11, TF) Ewe Paipel a apasa: “Emon re Jews itan Apollos, a uputiw non Alexandria, a feito Ephesus. Atei emon mi sinenap ne afanafan . . . non an pwichipwich, [ren än Kot ngün mi fel, NW] a aronga fetanei me afanafana ekkewe mettoch mi ennet ussun Jesus.” (Fof. 18:24, 25, Ewe Kapasen God) Ika sia “pwichipwich” ren ewe ngün mi fel, sipwe tongeni alapalo ach pwora le afalafal imw me imw me afalafal sereseröch.—Rom 12:11.

15. Ifa usun lapoloon ach pwora le afalafal a efeiöchükich?

¹⁵ Lapoloon ach pwora lon ewe angangen afalafal a efeiöchükich. A amürinnölo ach ekiek pun sia weweöchüti lamoten me feiöchün ach angang. A lapolo ach mwasangasang me pwapwa lupwen sia lipwäköchülo le afalafal. A pwal lapolo ach tinikken pun sia meefi atapwalapwalen ewe angangen afalafal.

16. Met sipwe föri ika a kisikisilo ach tinikken le afalafal?

¹⁶ Nge sipwe fet ika sise chüen tinikken are mwasangasang le afalafal usun chök  me loom? Iwe, sipwe etittinafichi pwisin kich. Paul a makkeei: “Oupwe püsin sotunikemi o apwüngükemi, pwe oupwe silei ika oua wesewesen lükü Kraist.” (2 Kor. 13:5) Pwisin eisinuk: ‘Ngang mi chüen mwasangasang ren älillisin ewe ngün mi fel? Ua tingorei Jiowa an ngün mi fel? Ai kewe iotek ra pwäratä pwe ua lükülük woon fän iten ai upwe apwönüetä letipan? Ua pwal apasatä ai kilisou lon iotek ren ewe angangen afalafal a awisa ngenikich? Ifa usun napanapen ai pwisin käeö? Ifa ttamen ai ekiekifichi met ua älleani me rongorong? Ua aüselingöch me uwawu meefiei lon ekkewe mwich?’ Om ekiekifichi ekkeei kapas eis epwe älisuk le esilla om kewe apwangapwang me angang woon.

Mut Ngeni Ngünün Kot Epwe Apworak

17, 18. (a) Ifa ükükün watteen ewe angangen afalafal a fiffis iei? (b) Ifa usun sipwe “pwora le kapas” lon ach afalafala ewe kapas allim usun Mwuun Kot?

¹⁷ Lupwen Jises a manausefäl, a ereni nöün kewe chon käeö: “Oupwe angei ewe manaman lupwen Ngünmifel epwe feitiu womi, iwe, oupwe pwäriei lon Jerusalem, lon unusen Jutea me Samaria tori lon unusen fanüfan.” (Fof. 1:8) Ewe angang mi poputä lon na fansoun a fokkun wakkattelo iei. Lap seni fisu million Chon Pwäratä Jiowa ra esilefeili ewe Mwu lon lap seni 230 fönü, nge ra nöüni arapakkan eü billion nimepükü million aua iteiten ier lon ewe angangen afalafal. A mmen apwapwa ach sipwe tinikken le fiti ei angang esap chüen fissefäl!

¹⁸ Ewe angangen afalafal ikenäi a fis fän emmwenien än Kot ngün mi fel usun chök lon fansoun ekkewe aposel. Ika sia etiwa än ewe ngün mi fel emmwen, sipwe “pwora le kapas” lon ach angangen afalafal. (Fof. 28:31) Ina minne, sipwe anomukich fän emmwenien ewe ngün mi fel lupwen sia arongafeili ewe kapas allim usun Mwuun Kot!

[Ekkewe pwóróus fan]

Met Ka Käeö?

• Pwata a lamot ach sipwe pwora le afalafala ewe kapasen Kot?

• Met a älisi ekkewe chon käeö loom ar repwe pwora le afalafal?

• Ifa usun sipwe angei pwora?

• Ifa usun ach eäni pwora a efeiöchükich?

[Ekkewe Kapas Eis Fan Iten Ewe Lesen]

[Sasing lon pekin taropwe 13]

Ifa usun ekkewe sam me in repwe älisi nöür kewe pwe repwe pwora?

[Ekkewe sasing lón pekin taropwe 15]

Iotek mi mwochomwoch epwe tongeni apworak lon ewe angangen afalafal