Ifa Ekiekin Kot Usun Sakaw?

EWE Chon förikich a mochen met mi mürinnö seni meinisin fän itach, iwe, ese pinei ünnün sakaw ika mi üküköch. * Iwe, a fen awora “wain pwe aramas repwe ün o pwapwa, epwe wor lö pwe repwe emmisi ngeni won meser, pwal pilawa pwe repwe mongö o pöchökül ren.” (Kölfel 104:15) Lon eü fansoun, Jises Kraist a alapalo apwapwaan eü apwüpwülü ren an ewili ewe konik ngeni “wain mi fokun mürina.”​—Jon 2:3-10.

A pwüng ach sipwe ekieki pwe ewe Chon Förikich a silefichi met a fis ngeni angangen inisich me tupwuach ika sia ün sakaw. Me ren ewe Paipel, Semach lon läng a ‘aiti ngenikich mine sipwe feioch ren,’ me a fokkun öüröürakich ach sipwe tümünükich seni äeämwäällin sakaw. (Aisea 48:17) Nengeni ekkeei kapasen öüröür:

“Ousap apuchakemi ren wain, pun ei epwe afeiengauakemi.” (Efisus 5:18) “Chon ülüpuch, . . . resap mwüni mwün Kot.” (1 Korint 6:9-11) Me ren än Kot Kapas, a änioput “ünüpuch, mongömong me sokun föför mi wewe ngeni ekei.”​—Kalesia 5:19-21.

Iei, sipwe käeö ekkoch efeiengawen ünnümmong sakaw.

Efeiengawen Ünnümmong

Inaamwo ika ewe mettoch sakaw mei wor öchün, nge a wor manamanan an epwe siwili angangen ekiekich me inisich. Ünnümmong sakaw a tongeni efisatä ekkeei sokkun osukosuk:

Ünnümmong sakaw a angawa än emön tufichin apwüngü minne mi öch me ngaw pwe an “ekiek me fos esap fat.” (Än Salomon Fos 23:33) Allen, ewe mi ünnümmong sakaw sia fos usun lon ewe lesen mwen ei, a apasa: “Äeämwäällin sakaw esap chök eü semwenin inis nge a pwal eü semwenin ekiek me memmeef. Kese ekieki pwe ka ämeteki ekkewe ekkoch.”

Ünnümmong sakaw a pwal tongeni apworai emön. Ewe Paipel a öüröürakich: “Wainin lom me wain mi fö ra angeala mirit.” (Osea 4:11) Ifa usun? Pokiten sakaw, sia tongeni pwäralo  ekiekich me meefiach sia pwouru lon letipach pun me rech ese chüen ngaw ach sipwe pwärawu, nge usun itä ra fen öch. A tongeni apwangapwangalo ach mochen föri minne mi pwüng. Sakaw a pwal tongeni atai ekkewe mettoch mi tümünükich seni föfföringaw, iwe mwiriloon, epwe ta ach ririöch ngeni Kot.

Äwewe chök, John me pwülüwan we ra äninifengen, iwe, a lo lon imwen sakaw fän song. A fen ünümi fitefoch pwe epwe kinamweelo letipan, nge ekiselo, emön fefin a kineto ren. Mwirin än John pwal ünümi fitefoch, a fiti ewe fefin me föri ewe föfförün lisowu mwääl. Mwirin, a fokkun niamam pwe a föri eü mettoch mi ngaw ese ekiekin föri mwo fän eü nge pokiten ewe sakaw, ina met a fen apworai le föri.

Ünnümmong sakaw a tongeni angawa ach tufichin nemeni ach kapas me föfför. Ewe Paipel a eis: “Iö a afisätä fitikoko? Iö a lalapat?” Iwe, a pwal pölüweni: “Chokewe mi momototam le ün wain, chokewe mi chök kükütta ünümer wain mi nofit.” (Än Salomon Fos 23:29, 30) Ika ka ünnümmong, kopwe “usun chök eman mi nom lukalapen matau, a mailölö o chuwenewenfeil usun chök eman mi nom letonen efoch aü.” (Än Salomon Fos 23:34) Emön mi sakawelo a nelo nge a lulupuchon inisin usun emön a ‘awata, nge ese mefi.’​—Än Salomon Fos 23:35.

Ünnümmong sakaw a tongeni atai pöchökkülen inis. “Iwe, lesopolan om ün, epwe pwichipwich leutum usun pwichipwichin küwen eman serepenit mi poison.” (Än Salomon Fos 23:32) Ewe pekin säfei a fen apwüngalo tipatchemen ena pworaus. Watteen sakaw a usun chök poison, iwe, ikkeei ekkoch me lein ekkewe semwen ra tongeni fisitä ren sakaw: kanser, hepatitis, semwenin ammun, pwo lon luk (pancreatitis), nafangawen suke lon chchaan ekkewe mi semwenin suke, efeiengawa mönükol lon luken inan, stroke, me heart attack. Inaamwo ika fän eü chök än emön ünnümmong sakaw nge a tongeni pelo inisin are mälo. Nge ewe mettoch mi kon efeiengaw seni meinisin ese weneiti ekkeei feiengaw lon pekin inis.

Ewe efeiengaw mi lap seni meinisin. Inaamwo ika emön ese sakawelo, nge ünnümmong sakaw epwe tongeni ätai än emön riri ngeni Kot. Iei met Paipel a affata: “Feiengauemi, ämi mi pwätä lesosorusich pwe oupwe  popuetä le ün sakau, ämi mi motmwäl tori lepwin pwe oupwe puch ren wain.” Pwata? Aisea a äweweei ifa usun ünnümmong sakaw a tongeni angawalo ach fel ngeni Kot, a erä: “Ousap ekieki usun mine ewe Samol mi Lapalap a föri, ousap pwal ingeiti angangen pöün.”​—Aisea 5:11, 12.

Ewe Kapasen Kot a öüröürakich ach ‘sisap chiechi ngeni ekewe mi ünümong wain.’ (Än Salomon Fos 23:20) A pwal öüröüra ekkewe chinnap fefin pwe resap “nom fan nemenien wain.” (Taitos 2:3, TF) Met popun? Pun fän chommong, aramas rese meefi pwe ekis me ekis, ra ünnümmongolo me achommongaalo fansoun ar ükkün. Ekiselo, ewe sou sakaw epwe apasa: “Inet üpwe nennela? Mürin üpwe pwal ünsefäl.” (Än Salomon Fos 23:35) Ekkewe chon sakaw ra pwisin atolonger lon feiengaw ika ra fokkun mwoneiti sakaw sorotään ewe pwinin ra ünnümmong lon pwe epwe ekinamwer.

Ewe Paipel a eäni kapasen öüröür pwe iir kewe mi “ünüpuch, mongömong, mwichen ün sakau . . . repwe püsin peniir me mwen Kot usun meinisin mine ra föri. Kot ewe mi molotä an epwe apwüngü chon manau me chon mäla kana.” (1 Piter 4:3, 5) Iei alon Jises usun ekkeei fansoun weires sia nonnom lon: “Oupwe afälikemi, pwe lelukemi esap chouchou ren mongömong me ünüpuch, pwal ren öürekin manauen ikenai, pwe ewe rän [än Jiowa] esap müttiritikemi usun eu sär.”​—Luk 21:34, 35.

Iwe nge, ifa usun ekkewe chon ünnümmong repwe tümünüür pwe rete ‘chouchou ren ünüpuch’?

[Pwóróus fan]

[Ekkewe sasing lón pekin taropwe 4]

Ünnümmong sakaw a tongeni efisatä chommong osukosuk