“Upwe Ünümi Pwal Efoch Chök”

ALLEN a poputä le äeämwääli sakaw lupwen a 11 ierin. * Atun ra kukkunou lemal me chienan kewe, ra kan nikäppirü aramas lon kachito. Ekkewe aramas, iir chon pwomweni chök, nge esap wesewesan, nge ewe sakaw Allen me chienan kewe ra ünümi, wesewesen sakaw.

Mesemwan Tony a ünümi eü are ruu kap sakaw iteiten pwin, nge lupwen a 40 ierin, a lapolo ngeni nimu are wonu kap. Iwe, lo, lo, lo, ese chüen silei fitefoch a fen ünümi unusen rän.

Allen a kütta älillis ren an na osukosuk. Tony ese mochen etiwa älillis seni an we famili me chiechian kewe. Iwe ikenäi, Allen mi chüen manau, nge Tony a mälo fitu ier loom ren an aksiten woon waan we pun a sakaw.

Inaamwo ika emön a chök äläemön le ünnümmong, nge mwiriloon epwe kküü pwal fitemön, me fän chommong, a efisatä watteen feiengaw. Äeämwäällin sakaw a efisi kawetengaw, kapas pöchökkül, achöü manau, nni manau, aksiten lon leenien angang, aksiten atun ssä, me sokkopaten semwen. A pwal asolapaalo fitu billion chala iteiten ier, iwe, a pwal äweiresi me eriäfföü letipen ewe sou sakaw me chon an famili.

Nge iei alon ewe Ofesin Health lon Merika: “Esap meinisin mi ün sakaw ra osukosuk, me esap meinisin sou sakaw ra ün iteiten rän.” Chommong esap iir sou sakaw ra fen eörenalo le ünnümmong sakaw, nge rese meefi. Nge ekkoch rese ükkün iteitan nge lupwen ra ün, ra ünümi lap seni nimu kap.

Ika ka ün sakaw, ifa ükükün a kon watte ngonuk? Ifa usun kopwe silei ika ineet kosap chüen ünümi pwal efoch chök? (Än Salomon Fos 23:29, 30) Ekkewe lesen mwirin ei repwe äweweei pworaus mi älillisöch.

[Pwóróus fan]