Ämi Mwän Kana, Foffot Lon Ngün Mi Fel Me Akkachocho!

“Ika [emon] epwe fotukatiw minne ewe Ngunupin a mochen, iwe epwe kini ewe uwan manau esemuch.”​—KAL. 6:8, Ewe Kapasen God.

1, 2. Ifa usun Mattu 9:37, 38 a pwöppwönütä iei, me ifa ewe osupwang a fisitä lon ekkewe mwichefel?

 IEI ka kükküna mettoch mi amwarar ra fiffis! A pwönütä ewe angang Jises a fen fos usun, a pwal chöüfetäl me a mwittir feffeitä ikenäi. Jises a erä: “Ewe räs a fokun watte, nge ekewe chon angangen räs ra chokükün. Iei mine oupwe tüngorei ewe Samolun räs pwe epwe tinala chon angang pwe repwe angang ngeni ewe räs.” (Mt. 9:37, 38) Jiowa Kot a fokkun aüselinga ena iotekin tingor. Lon ewe 2009, a lapolo woon 2,031 ekkewe mwichefelin Chon Pwäratä Jiowa woon unusen fönüfan pwe iei a tori 105,298. Orun 757 ra papatais iteiten rän!

² Pokiten a chommongolo ekkewe mwichefel, a nafangaw brother mi tufichin tümünü me asukula chon ekkewe mwichefel. (Ef. 4:11) Lon ekkewe ier ra lo, Jiowa a fen awora mwän mi wisen tümünü osupwangen nöün kewe siip, iwe, sia lükülük pwe Jiowa epwe pwal sopwelo le awora ei sokkun älillis. Ewe oesini lon Mika 5:5 a alükülükükich pwe lon ekkewe ränin le sopwoloon, epwe wor ekkewe “souemwen mi fokun pöchökül,” weween, chommong mwän mi lipwäköch repwe wisen emmweni nöün Jiowa kewe aramas.

3. Äweweei ei itiitin kapas, “fotukatiw minne ewe Ngunupin a mochen.”

³ Ika en emön Chon Pwäratä Jiowa mwän mi papatais, met epwe älisuk pwe kopwe mochen eäni pwal ekkoch angang lon ewe mwichefel? Mi lamot om kopwe “fotukatiw minne ewe Ngunupin a mochen.” (Kal. 6:8, KG) Kopwe föri ena ren om mut ngeni än Kot ngün mi fel epwe ekkemmweni manauom. Kosap ‘fotukatiw pwisin mochenin netipom.’ Kopwe tümünü pwe kinamween manauom, kukkunou, me minen apwapwa rete ekisikisaalo om mochen achocho le angang ngeni Kot. Chon Kraist meinisin repwe “fotukatiw minne ewe Ngunupin a mochen,” iwe, eli mwirin och fansoun, ekkewe mwän repwe tufich ngeni ekkoch angang lon ewe mwichefel. Pokiten sia fokkun osupwang ren ministerial servant me elter ikenäi, ei lesen a äkkäeüin mak fän iten ekkewe Chon Kraist mwän. Ina minne, ämi kana brother, sia pesekemi le ekipwichi ei lesen fän iotek.

Achocho Ngeni Eü Angang mi Aüchea

4, 5. (a) Sia pesei ekkewe brother mi papatais ar repwe achocho ngeni met sokkun angang lon ewe mwichefel? (b) Met ekkewe brother repwe föri pwe repwe tufichin wiseni ekkena wis?

⁴ Ese chök pükün fis pwe ekkewe Chon Kraist mwän repwe wiseni ewe wis sou emmwen. A lamot repwe achocho ngeni ei “angang mi aüchea.” (1 Tim. 3:1) A kapachelong ar repwe wesewesen angang fän iten osupwangen chiener kewe chon lükü. (Älleani Aisea 32:1, 2.) Emön mwän mi achocho le eäni ei wis ese kütta pwisin itetekian, nge a pennüküolo pwisin mochenin fän iten feiöchün ekkewe ekkoch.

⁵ Ren an epwe fich ngeni emön ewe wis  ministerial servant are elter, epwe achocho le napanapeni ekkewe napanap ewe Paipel a affata fän iten ekkena wis. (1 Tim. 3:1-10, 12, 13; Tait. 1:5-9) Ika en emön brother mi papatais, kopwe pwisin eisinuk: ‘Ua tinikken le fiffiti ewe angangen afalafal me äkkälisi ekkewe ekkoch chon afalafal? Ua apöchökküla chienei kewe chon lükü ren ai chchüngüür? Ua käeöfichi ewe Kapasen Kot? Üa angöchüei le pölüweni kapas eis? Ua apwönüetäöchü ekkewe angang ekkewe elter ra awisa ngeniei?’ (2 Tim. 4:5) A lamot kopwe ekiekifichi ekkeei kapas eis.

6. Ifa usun emön epwe tufichin wiseni ekkewe wis lon ewe mwichefel?

⁶ Ren ar repwe tufichin wiseni ekkena wis, ekkewe brother repwe pwal “pochokul ren manamanen Ngunun [Kot] we.” (Ef. 3:16, TF) Sise kan üttüt ren än ekkewe brother repwe wiseni ekkena wis, nge a chök alongolong woon lapoloon ar ririöch ngeni Jiowa. Ifa usun kopwe alapalo om ririöch ngeni Jiowa? A lamot kopwe tipeni pwe ewe ‘Ngünmifel epwe emwenuk,’ me kopwe ämääraatä uwaan. (Kal. 5:16, 22, 23) Atun ka pwäralo ekkewe napanap mi affata pwe ka fich ngeni pwal ekkoch angang, me ka apwönüetä ekkewe fön pwe kopwe lipwäköchülo, iwe, “om fefeita epwe pwapwalo ngeni aramas meinisin.”​—1 Tim. 4:15, TF.

A Lamot Pennüküolo Pwisin Mochenich

7. Met a kapachelong lon ach älisi aramas?

⁷ Ach älisi aramas a wewe ngeni ach sipwe angang weires me pennüküolo pwisin mochenich. Pokiten ekkewe chon Kraist elter iir sou emmwen, ra fokkun lolileniesini osukosuken ekkewe siip mi nom fän ar tümün. Ekieki meefien Paul usun an tümünü ewe mwichefel. Iei alon ngeni pwiin kewe lon Korint: “Üa mak ngenikemi fän watten weires me riaföün letipei, pwal fän watten chönün mesei. Üsap mochen pwe oupwe küna letipeta, nge üa mochen pwe oupwe mefi alololun ewe  chen üa eäni ngenikemi meinisin.” (2 Kor. 2:4) A ffat pwe Paul a angang ren unusen letipan.

8, 9. Apworausa pworausen ekkoch mwän lon Paipel ra achocho le angang weires fän iten aramas.

⁸ Fansoun meinisin, ewe ekiekin pennüküolo pwisin mocheniir, ina esissillen ekkewe mwän mi angang weires fän iten nöün Jiowa kewe aramas. Äwewe chök, sap minne Noa a ereni chon le imwan kewe: ‘Ou pwisin föri ena waimw, iwe, ika a wes, oua ereniei pwe upwe etikemi.’ Moses ese ereni ekkewe chon Israel me lon Isip: ‘Sipwap chu ika oua tori ewe Setipar. Ou le pwisin ekieki met oupwe tikelo ren.’ Josua ese apasa: ‘Oua esileto ineet ekkewe tittin Jeriko ra turutiw.’ Aisea ese itini emön me apasa: ‘Ina i! Tinalo.’​—Ais. 6:8.

⁹ Jises a isetiw eü leenien äppirü mi mürinnö seni meinisin ren an mut ngeni än Kot ngün mi fel epwe emmweni. A tipemecheres le etiwa wisan we Chon Amanau. (Jon 3:16) Än Jises pennüküolo pwisin mochenin fän tong esap amwökütükich pwe sipwe pwal pennüküolo pwisin mochenich? Emön brother mi wiseni ewe wis elter fansoun langattam a uwawu meefian usun ewe mwichefel. A erä: “Alon Jises we ngeni Piter pwe epwe ‘tümünü nöün kewe siip’ a fokkun achchüngü letipei. Ren fite ier, ua küna pwe ekis mwo kapas mi fiti tong are föfförün kirekiröch a ianan me an apöchökküla emön. Ua fokkun pwapwaiti ei angangen tümünü ekkewe siip.”​—Jon 21:16.

10. Met a tongeni amwökütü ekkewe Chon Kraist mwän pwe repwe äppirü Jises le angang fän iten aramas?

¹⁰ Lupwen ekkewe mwän ra tümünü nöün Kot kewe siip, repwe mochen äppirü ekiekin Jises lupwen a apasa: “Üpwe asösökemi.” (Mt. 11:28) Än ekkewe brother lükü Kot me tong ngeni ewe mwichefel a amwökütüür ar repwe achocho le eäni wis aüchea. Resap ekieki pwe a kon weires me chou ena angang. Iwe nge, epwe ifa usun ika emön ese lien mochen wiseni ekkena wis? A tongeni ämääraatä an mochen angang fän iten ewe mwichefel?

Ämääraatä Om Mochen Angang fän iten Aramas

11. Ifa usun emön a tongeni ämääraatä an mochen angang fän iten ewe mwichefel?

¹¹ Ika om meefi lipwäkingaw a pinei om achocho ngeni ekkena wis, iwe, mi öch kopwe tingor än Kot ngün mi fel. (Luk 11:13) Epwe älisuk le pworacho ngeni met ka lolileniesini. Ewe ngün mi fel epwe amwökütü ekkewe brother le alapalo ar mochen angang fän iten ewe mwichefel, iwe mwirin, epwe apöchökküleretä fän iten ena angang mi fel. (Fil. 2:13; 4:13) Ina minne, ka tongeni tingorei Jiowa epwe älisuk le ämääraatä om mochen etiwa ekkena wis.​—Älleani Kölfel 25:4, 5.

12. Ifa usun emön epwe angei tipatchem pwe epwe tongeni föri wisan kewe lon ewe mwichefel?

¹² Pokiten emön brother a küna pwe ewe angangen tümünü mwichefel mi weires me epwe pennüküolo chommong mettoch, iwe, eli epwe filatä an esap achocho le wiseni eü wis lon ewe mwichefel. Are a meefi pwe a nafangaw an tipatchem. Ika ina, eli a tongeni alapalo an tipatchem ren an käeöfichi ewe Paipel me ekkewe puken äweween Paipel. A tongeni pwisin eisini, “Ua kan awora fansoun le käeö ewe Paipel me iotek fän iten tipatchem?” Jemes a makkeei: “Nge are eman leimi a osun tipachem, epwe tüngor ngeni Kot, iwe, i epwe fang ngeni, pun Kot a fangafangöch ngeni aramas meinisin, nge esap laleiti eman.” (Jem. 1:5) En mi lükü alon Jemes ei? Kot a pölüweni än Salomon iotek me fang ngeni “eu leluk mi mirit o tipachem” mi atufichi an epwe alefila minne mi ngaw me minne mi öch lupwen a föri kapwüng. (1 King 3:7-14) Pwüngün, pworausen Salomon ei mi kkolo aüchean. Nge, sipwe tongeni lükülük pwe Kot epwe pwal etipatchemalo ekkewe brother mi wor wiser lon ewe mwichefel pwe repwe tongeni tümünüöchü ekkewe siip.​—SalF. 2:6.

13, 14. (a) Äweweei ifa usun “än Kraist we chen” a emmweni Paul. (b) Ürürün ifa usun “än Kraist we chen” epwe achchüngükich?

 ¹³ Emön a pwal tongeni ämääraatä an mochen angang fän iten ewe mwichefel ika epwe ekilonei meinisin met Jiowa me Nöün we ra föri fän itach. Äwewe chök, ekieki mwo 2 Korint 5:14, 15. (Älleani.) Ifa usun “sia nom fän nemenien än Kraist we chen”? Än Kraist tong le fangolo manauan fän itach a fokkun amwarar, ina minne, atun a wattelo ach meefi kilisou, iwe, epwe achchüngü letipach. Än Kraist na tong a emmweni Paul. A tümünü i an esap ekieki pwisin mochenin nge epwe akkomwa an angang ngeni Kot, me pwal chon ewe mwichefel me ekkewe chon lükün.

¹⁴ Ach ekilonei än Kraist tong ngeni aramas a amwökütükich le meefi kilisou. Ina minne, sia mirititi pwe ese fokkun öch ach ‘fötukatiw pwisin mochenin netipach’ ren ach chechchei ekkewe mettoch epwe chök pwisin apwapwaaikich. Nge sipwe siwili kokkotun manauach pwe sipwe akkomwa ewe angang Kot a awisa ngenikich. Pokiten sia tongei pwiich kewe, a chchüng letipach le ‘angang’ fän iter. (Älleani Kalesia 5:13.) Ika sia ekieki pwe kich nöür kewe chon angang mi akkangang fän tipetekison, sipwe pwäratä süföl ngeniir. Sisap eäni ewe ekiek Setan a apöchökküla, weween, ewe ekiekin ännefota mwäällir, esiiter, me mwittir apwüngüür.​—Pwar. 12:10.

Älillisfengen lon Famili

15, 16. Ifa wisen chon än ewe mwän we famili le älisatä an epwe fich ngeni ewe wis ministerial servant are elter?

¹⁵ Ika emön brother mi pwüpwülü me a wor nöün, ekkewe elter repwe pwal nengeni nonnomun an famili le ppii ika mi fich ngeni ekkewe wis. Pwüngün, än emön epwe wiseni ewe wis a longolong woon nonnomun ewe famili lon pekin lükü, itöchür are itengawer. A menlapei lamoten wisen ewe famili le älisi än ewe mwän achocho fän iten ewe mwichefel usun emön ministerial servant are elter.​—Älleani 1 Timoti 3:4, 5, 12.

¹⁶ Jiowa a pwapwa ika chon lon eü familien Chon Kraist ra angangfengen. (Ef. 3:14, 15) A lamot pwe ewe möküren famili epwe itepök me rüüepek lon an apwönüetä wisan ngeni ewe mwichefel me “emwenöchü” an we famili. Ina minne, a lamot emön elter are ministerial servant epwe käeöfengen me an famili ewe Paipel pwe iir meinisin repwe küna feiöch seni än ewe Famili Fel iteiten wiik. Repwe pwal mwin lon ewe angangen afalafal iteitan. Iwe, a pwal lamot chon ewe famili repwe tipemecheres le älleasochisi met möküren ewe famili a fen akkota.

Kopwe Pwal Wisenisefäli ewe Wis?

17, 18. (a) Ika ese chüen fich ngeni emön brother wisan, iwe, met a lamot epwe föri? (b) Met emön brother mi fen piin elter are ministerial servant loom epwe eäni ekiek?

¹⁷ Neman ka fen piin emön elter are ministerial servant me loom, nge iei kese chüen. Ka tongei Jiowa me ka pwal tongeni lükülük pwe I mi chök tongeok. (1 Pit. 5:6, 7) Ewe mwichen elter a fen erenuk pwe mi lamot kopwe siwili ekkoch föfförum? Kopwe tipemecheres le etiwa ewe fön, iwe, kopwe angang woon ren än Kot älillis. Tümünü pwe ete maraselo letipom. Kopwe pwäratä tipatchem me eäni  ekiek pwüng. Iei meefien emön mi piin elter ren fite ier nge a pöüt seni wisan: “Ua chök achocho le fiffiti mwich, afalafal, me älleani Paipel usun met ua fen piin föfföri atun ua emön elter, iwe, ua apwönüetä met ua achocho ngeni. Ua käeö mosonottam pun tittipei pwe upwe mwittir wisenisefäli wisei we mwirin chök eü ika ruu ier. Nge a kerän fich ngeniei ewe wis elter mwirin fisu ier. Atun ua witiwit, a fokkun älisiei ewe pesepes pwe usap achanü nge upwe akkachocho le angang fän iten ewe mwichefel.

¹⁸ Ika en emön brother nge mi weneituk ei pworaus, kosap letipengaw. Ekieki ifa usun Jiowa a efeiöchü om angangen afalafal me om famili. Apöchökküla än om famili ririöch ngeni Jiowa, äämwa ekkewe mi semwen, me aururu ekkewe mi apwangapwang. Nge äkkäeüin, kopwe aücheani wisom, wisen emön Chon Pwäratä Jiowa, le mwareiti I ren om esilefeili kapas allimen ewe Mwu.​—Kölf. 145:1, 2; Ais. 43:10-12.

Etittinasefäli Nonnomum

19, 20. (a) Ifa ewe pesepes ngeni meinisin ekkewe brother mi papatais? (b) Met sipwe käeö lon ewe lesen mwirin ei?

¹⁹ Ikenäi a nafangaw elter me ministerial servant. Ina minne, sia pesei meinisin ekkewe mwän mi papatais ar repwe etittinasefäli nonnomur me pwisin eisiniir, ‘Ika esap ngang emön ministerial servant are elter, pwata use etittina ewe popun use wiseni ekkena wis?’ Mut ngeni än Kot we ngün mi fel epwe älisuk le eäni ekiek mi pwüng usun ei mettoch.

²⁰ Meinisin chon ewe mwichefel repwe feiöch ren angangen chiener kewe chon lükü mi pennüküolo pwisin mocheniir. Ika sia pwäratä kirekiröch, eteneki osupwangen ekkewe ekkoch, iwe, sipwe küna ewe pwapwa mi pop seni ach angang fän iten aramas, me ach fotukatiw minne ewe Ngünüpin a mochen. Iwe, ewe lesen mwirin ei epwe äiti ngenikich pwe sisap ü ngeni emmwenien än Kot ngün mi fel. Ifa usun sipwe tümünükich seni ena?

Ifa Usun Kopwe Pölüweni?

• Met ewe oesini lon Mika 5:5 a alükülükü ngenikich?

• Äweweei met a kapachelong lon ach pennüküolo pwisin mochenich.

• Ifa usun emön epwe ämääraatä an mochen angang fän iten ewe mwichefel?

• Ifa ükükün lamoten än chon ewe famili repwe angangfengen ika ewe mwän epwe fich ngeni ewe wis ministerial servant are elter?

[Ekkewe Kapas Eis Fan Iten Ewe Lesen]

[Ekkewe sasing lón pekin taropwe 25]

Met ka tongeni föri le alapalo om angang?