Akkapöchökkülatä Chon Ewe Mwichefel
Akkapöchökkülatä Chon Ewe Mwichefel
“Oupwe apöchökülafengenikemi o alilisfengen lefilemi.”—1 TES. 5:11.
1. Ikkefa feiöchün ach choni ewe mwichefelin Chon Kraist? Nge met sokkun osukosuk sia chüen kükküna?
ACH choni ewe mwichefelin Chon Kraist mi enlet, ina eü feiöch watte. A wor ach ririöch ngeni Jiowa. Ach lükülükü än Paipel emmwen a tümünükich seni feiengawen ewe esin manau mi imu seni Kot. A wor chommong chiechiach mi mochen sipwe manauöch. Ewer, sia küna chommong feiöch. Iwe nge, lape ngeni Chon Kraist ra küna sokkopaten osukosuk. Ekkoch leir ra osupwangen älillis le weweiti ekkewe pworaus mi alollool lon än Kot we Kapas. Pwal ekkoch ra semwen, äpilükülüküngaw, are küna sopwongawen ar filingaw. Iwe, a weires ngenikich meinisin le nonnom lon ei otot mi towau seni Kot.
2. Met sipwe föri lupwen pwiich kewe ra küna weires, iwe, pwata?
2 Sise mochen pwe pwich kewe Chon Kraist repwe riäfföü are osukosuk. Ewe aposel Paul a apöpööü ewe mwichefel ngeni eü inis, iwe, a erä: “Are eu kifet a riaföü, ekewe lusun kifet meinisin ra eti le riaföü.” (1 Kor. 12:12, 26) Sipwe achocho le apöchökkülatä pwiich kewe mi küna osukosuk. A wor ekkoch pworaus lon Paipel usun än chon ewe mwichefel älisi pwiir kewe le ataweei ar kewe osukosuk. Iei, sipwe käeö ekkena pworaus, iwe, kopwe ekieki ika ifa usun kopwe tongeni awora ena esin älillis. Ifa usun kopwe apöchökkülatä än Jiowa we mwichefel ren om älisi pwiich kewe pwe repwe akkangang ngeni?
“Ra Uweela Lon Imwer”
3, 4. Ifa usun Akwila me Prisila ra älisi Apollos?
3 Atun Apollos a feilo me nonnom Efisus, a fen emön chon afalafal mi tinikken. Ewe puken Föför a apasa: “Seni pöchökülen pwapwan letipan a afalafal o aiti ngeni aramas ekewe mettoch mi enlet usun Jesus, nge a chök silei usun än Johannes angangen papatais.” Eli, nöün Jon Papatais kewe chon käeö are nöün Jises kewe chon äppirü ra afalafal ngeni Apollos me mwen Pentikos 33 C.E. Ina popun, ese silei usun ewe papatais “fan iten ewe Sam, me ewe Nau, me ewe Ngun mi Fel.” Inaamwo ika Apollos a tinikken, nge a wor ekkoch pworaus mi lamot ese kon lien weweiti. Ifa usun a küna älillis seni an chiechi ngeni chienan kewe chon lükü?—Fof. 1:4, 5; 18:25; Mt. 28:19, TF.
4 Akwila me Prisila, eü pwüpwülü Chon Kraist, ra rongorong än Apollos afalafal fän pwora lon ewe imwenfel, iwe, ra uwealo lon imwer me äwewefichi ngeni ewe alen Kot. (Älleani Fofor 18:24-26.) Ar na föfför a pwäratä tong. Ese mwääl, ra kapas pwetete le älisi Apollos, nge rese äkkäpii ren an ese silei uruwoon ewe popun mwichefelin Chon Kraist. Ese mwääl Apollos a kilisou ren än chienan kana minefö apworausa ngeni ekkena pworaus mi aüchea. Mwirin an silefichi ekkena pworaus, a “fokun alisi” pwiin kewe lon Akaia ren an kapasen pwäratä.—Fof. 18:27, 28.
5. Ifa ewe älillis mi fiti tong fitu ngeröü chon afalafal ra awora, iwe, met mwiriloon?
5 Chommong lon ewe mwichefelin Chon Kraist ikenäi ra fokkun kilisou ngeni chokkewe mi älisiir le weweiti ewe Paipel. A fen fis chommong chiechiöch lefilen ekkewe chon käeö me chokkewe mi asukuler. Lon ach älisi aramas le weweiti ewe enlet, sia akkota fansoun le pwoppworausfengen iteiten wiik ren fitu maram. Iwe nge, ekkewe chon asukul ra tipemecheres le pennüküolo ar fansoun pun ra esilla pwe manauen aramas a alongolong woon ar silei ewe enlet. (Jon 17:3) A ifa me apwapwaan ach küna än aramas mirititi ewe enlet, etipeeüfengeni manauer ngeni, me äeä manauer le föri letipen Jiowa!
“A Iteüöch”
6, 7. (a) Pwata Paul a filatä Timoti pwe epwe fiti le säifetäl? (b) Met a älisi Timoti le feffeitä?
6 Atun än ekkewe misineri Paul me Sailas oruuen säi ngeni Listra, ra küna ewe alüwöl Timoti, neman a orun 20 ierin. “A iteüöch me ren ekewe chon lükü . . . lon Listra me Ikonium.” Inen Timoti we Iunis me inan we chinnap Lois, iir chon Kraist mi fen fangolo manauer, nge seman we ese fitiir lon ar lükü. (2 Tim. 1:5) Eli, Paul a chuuri ena famili lon an we äeüin säi ngeni ena leeni orun ruu ier me mwan. Nge iei, Paul a wesewesen chchüngü Timoti pun i emön alüwöl mi fokkun mürinnö. Ina popun, ewe mwichen elter lon Listra ra tipeeü pwe Timoti epwe älisi Paul lon an angangen misineri.—Älleani Fofor 16:1-3.
7 A wor chommong mettoch Timoti epwe käeö seni chienan we mi äsimaü. Mwirin och fansoun, Timoti a fokkun feffeitä, iwe, Paul a lükülük le tinalo an epwe tupuni le chuuri ekkewe mwichefel. Lon ekkewe 15 ier Timoti a pwapwa le chiechi ngeni Paul, a feffeitä ngeni emön elter mi fokkun lipwäköch nge ese chüen nisässäü.—Fil. 2:19-22; 1 Tim. 1:3.
8, 9. Met chon ewe mwichefel ra tongeni föri le apöchökkülatä ekkewe säräfö? Apworausa pworausen emön pwiich.
8 Ikenäi, chommong säräfö lon ewe mwichefelin Chon Kraist ra tufichin lipwäköchülo me feffeitä. Ika ekkewe mi äsimaü repwe chchüngüür me isetiw eü leenien äppirü mi mürinnö, ekkena säräfö repwe mochen achocho lon ar angang ngeni Jiowa. Nennefetäl lon om mwichefel! Ka küna ekkoch säräfö mi tufichin äppirü Timoti le alapalo ar mochen angang? Ika ka älisiir me apöchökküleretä, eli repwe wiliti pioneer, chon angangen Bethel, misineri, are eäni ewe wis circuit overseer. Met kopwe tongeni föri le älisiir ar repwe tikeri ekkena wis?
9 Martin, emön chon angangen Bethel lon ükükün 20 ier, a chemeni pwe emön circuit overseer a chchüngü i lupwen ra mwin le afalafal 30 ier me loom. Ewe overseer a meseik le apworausa ngeni usun an angang lon Bethel lealüwölün. A pesei Martin an epwe ekieki ika a pwal tufichin älisatä angangen än Jiowa mwicheich. Martin a meefi pwe ar na pworausfengen a amwökütü le fili an epwe angang lon Bethel. Ka pwal tongeni föri ena ren om pesei ekkewe säräfö ar repwe achocho ngeni ekkena angang.
“Oupwe Apöchöküla Letipen Chon Niuokus”
10. Met meefien Epafrotitus, iwe, pwata?
10 Epafrotitus a fokkun pekkus le säi towau seni Filipai ngeni Rom pwe epwe chuuri ewe aposel Paul, atun a nom lon kalapus pokiten an lükü. Epafrotitus a tupuni chon ewe mwichefelin Filipai. Ese chök uwei ar liffang ngeni Paul, nge a pwal meefatä an epwe nom ren pwe epwe älisi lon an weires. Iwe nge, atun Epafrotitus a nom Rom, a üri eü semwen mi chou, “arap ngeni an epwe mäla.” Iwe, a fokkun letipechou pun ese fis mochenin.—Fil. 2:25-27.
11. (a) Pwata sisap mäirü ika ekkoch lon ewe mwichefel ra letipechou? (b) Met Paul a pesei chon Filipai ar repwe föri le älisi Epafrotitus?
11 Ikenäi, a wor sokkopaten popun a üri aramas ewe semwenin letipechou. Eü repot seni ewe mwichen etittina pekin pöchökkülen inis a erä pwe a tongeni üri 20 percent aramas ewe semwenin letipechou fän ekkoch. A pwal tongeni fis ngeni nöün Jiowa kewe aramas. Aramas ra meefi letipechou pokiten aürekin tufichin ar famili, apwangapwangen inis, lichippüng, me metakkan. Met ekkewe chon Filipai ra föri le älisi Epafrotitus? Paul a makkeei: “Iwe, oupwe etiwa i fän pwapwa usun eman pwimi lon ach Samol. Oupwe meniniti ei sokun aramas, pun a fangala manauan o arapakan ngeni an epwe mäla fän iten än Kraist angang, pwe epwe siwilikemi le alisiei, lupwen ämi ousap tongeni.”—Fil. 2:29, 30.
12. Ifa usun sipwe aururu chokkewe mi letipechou?
12 Sipwe pwal apöchökkülatä pwiich kewe mi letipechou are letipeta. Ese mwääl sia tongeni mwareiti ar angang ngeni Jiowa. Neman ra fen ekkesiwili nonnomun manauer fän iten ar repwe wiliti Chon Kraist are fiti ewe angangen pioneer. Sia aücheani ar achocho, me sia tongeni alükülüküür pwe Jiowa a pwal aücheaniir. Inaamwo ika ekkoch rese tufichin föri met ra föri me loom pokiten ar samau are chinnap, nge sia chüen süfölitiir ren ar angang ngeni Jiowa fite ier. Ese lifilifil nonnomuch, nge iei än Jiowa fön ngeni meinisin nöün kewe mi tuppwöl: “Oupwe apöchöküla letipen chon niuokus, oupwe alisi ekewe chon apwangapwang, oupwe pwal mosonotam ngeni aramas meinisin.”—1 Tes. 5:14.
“Oupwe Amusala Tipisin Ätewe o Echipa Letipan”
13, 14. (a) Met ewe mwichefelin Korint a föri, iwe pwata? (b) Met mwiriloon ar atowu ewe chon tipis?
13 Lon ewe popun mwichefelin Korint, a wor emön mwän mi tipisin lisowu mwääl nge ese aier. Föfförün na a tongeni elimengawa ewe mwichefel, iwe, pwal mwo nge ekkewe chon lükün ra mäirü ren. Ina popun, a fich än Paul apasa pwe repwe atowu ätena seni ewe mwichefel.—1 Kor. 5:1, 7, 11-13.
14 A sopwöch ar apwüngü. Ena mwichefel a küna tümün seni limengawen ewe föfföringaw, me ewe chon tipis a miritilo me aiersefäl. Iwe, lon nöün Paul we arüüachöön taropwe ngeni ena mwichefel, Paul a peseer pwe repwe atolongasefäli ätena pun föfförün a pwäratä aier. Iwe nge, esap ina chök met Paul a ereniir ar repwe föri. A pwal ereniir: “Oupwe amusala tipisin ätewe o echipa letipan, pwe esap tolong lon letipeta mi fokun watte.”—Älleani 2 Korint 2:5-8.
15. Itä epwe ifa ekiekich usun ekkewe mi enletin aier me tösefälilong lon ewe mwichefel?
15 Met sia käeö seni ena pworaus? Sia lolilen lupwen ekkoch ra katowu. Eli ra eitengawa Jiowa me ewe mwichefel are pwal mwo nge tipis ngeni pwisin kich. Iwe nge, lupwen ekkewe elter ra apwüngalo fän emmwenien Jiowa pwe ewe chon tipis mi aier epwe tongeni tösefälilong lon ewe mwichefel, a wewe ngeni pwe Jiowa a fen omusalo tipisin. (Mt. 18:17-20) Itä sisap äppirü än Jiowa tongei chokkewe mi aiersefäl? Ika sise mochen omuserelo, usun itä nge sia ü ngeni Jiowa. Epwe fen öch ach sipwe ‘pwarsefalli ach tong’ ngeni chokkewe mi enletin aier me tösefälilong pwe sipwe alapalo kinamween me tipeeüin än Kot we mwichefel me angei an chen.—Mt. 6:14, 15; Luk 15:7.
“A Tongeni Alisiei”
16. Pwata Paul a lichippüng ren Mark?
16 Pwal iei eü pworaus seni Paipel mi pwäri ach sisap akkamwöchü memmeef mi ngaw ngeni chokkewe mi elichippüngükich. Äwewe chök, ewe aposel Paul a fokkun lichippüng ren Mark. Pwata? Pun atun Paul me Parnapas ra poputääni ar äeüin säi, Mark a fitiir pwe epwe älisiir. Nge mwirin och fansoun, Mark a likitiirelo me liwiniti fönüan, nge ese ffat ewe popun. Paul a kon lien lichippüng pwe atun a akkota ar we oruuen säi, ra änini me Parnapas ika Mark epwe chüen fitiir are esap. Pokiten minne a fis me mwan, ina popun Paul ese chüen mochen Mark epwe fitiir.—Älleani Fofor 13:1-5, 13; 15:37, 38.
17, 18. Ifa usun sia silei pwe Paul me Mark ra ataweei ewe osukosuk lefiler, iwe, met sipwe tongeni käeö seni?
17 A ffat pwe Mark ese kon letipechou ren än Paul ese mochen epwe chüen fitiir, pun a sopwelo le fiti Parnapas le afalafal lon pwal eü leeni. (Fof. 15:39) Sia silei pwe Mark a likiitü lon an tuppwöl ren minne Paul a makkeei usun fitu ier mwirin. Lon ena atun, Paul a kalapus lon Rom, iwe, a tiiti Timoti ren an mak taropwe. Lon chök ena taropwe, Paul a apasa: “Kopwe angei Markus pwe epwe etuketo, pun a tongeni alisiei lon ai angang.” (2 Tim. 4:11) Iwe, Paul a lükü pwe Mark a äsimaüetä.
18 A wor eü lesen sia käeö seni ei pworaus. Mark a ämääraatä ekkewe napanap mi fichiiti emön misineri mi mürinnö. Ese chepetek ren än Paul ese mochen epwe etiir lon ewe fansoun. Iir me Paul ra pacheöch ngeni Jiowa, ina popun, rese amwöchü ar song. Lo, lo, lo, Paul a esilla pwe Mark emön mi älillisöch. Iwe, lupwen pwiich kewe ra ataweei osukosuk lefiler, a pwüng ar repwe feffeitä me sopwelo le älisi ekkewe ekkoch ar repwe pwal feffeitä. Ach afota ach ekiek woon öchün aramas epwe älisatä feffeitään ewe mwichefel.
En me ewe Mwichefel
19. Ifa usun meinisin chon ewe mwichefelin Chon Kraist repwe tongeni älillisfengen?
19 Lon ei “fansoun weires,” a lamot ngonuk älillisin pwiim kewe lon ewe mwichefel me om älillis ngeniir. (2 Tim. 3:1) Eli emön me emön chon Kraist esap silei ifa usun epwe ataweei an kewe osukosuk, nge Jiowa a silei. Iwe, a tongeni amwökütuk me chon ewe mwichefel le älisi ekkewe ekkoch ar repwe filatä ewe alen pwüng. (Ais. 30:20, 21; 32:1, 2) Ina popun, kopwe wesewesen lefareni me älleasochisi än Paul ei kapasen fön! Achocho le “apöchökülafengenikemi o alilisfengen lefilemi, usun oua fen föri iei.”—1 Tes. 5:11.
Ifa Pölüwen Ekkeei Kapas Eis?
• Pwata a lamot ach sipwe apöchökkülatä ekkewe ekkoch lon ewe mwichefelin Chon Kraist?
• Met sokkun osukosuk ka tongeni älisi ekkewe ekkoch ar repwe ataweei?
• Pwata a lamot ngenikich älillisin ekkewe ekkoch lon ach mwichefel?
[Ekkewe Kapas Eis Fan Iten Ewe Lesen]
[Sasing lon pekin taropwe 15]
Sia tongeni apöchökkülatä emön pwiich le ataweei an osukosuk
[Sasing lon pekin taropwe 16]
Chommong säräfö lon ewe mwichefelin Chon Kraist ikenäi ra tufichin lipwäköchülo me feffeitä