Älisi Noum kewe Ar Repwe Ataweöchü Ar kewe Sossot

NÖÜCH kewe ra küna chommong sossot mi fokkun weires. Ra küna etipetipaen än Setan ei otot mi ngaw me pwal “ekkewe mochenia-ingauen aluwol.” (2 Tim. 2:22, TF; 1 Jon 5:19) Iwe, aramas ra turunufaseer are ü ngeniir pun ra achocho le ‘chechemeni ewe mi foriir.’ (SalAf. 12:1) Emön brother itan Vincent a chechchemeni atun a määritä, a apasa: “Pokiten ngang emön Chon Pwäratä, aramas ra kan aosukosukaei, tiiniei, are mochen fiu ngeniei iteitan. Fän chommong, use mochen feilo sukul pun a kon weires.” *

Me lükün ekkewe sossot ekkewe nau ra küna seni ei otot mi ngaw, eli ra pwal fiffiu ngeni pwisin mocheniir le nikäppirü täppiir kewe. Iei alon emön säräfö itan Cathleen: “Ese mecheres äi upwe sokko seni täppi kewe.” Pwal iei alon emön säräfö itan Alan, “Me loom, fän chommong, chienei kewe ra kan etiwaei le lo kunou lon wiikent, iwe, ua fokkun mochen fitiir.” Ekkoch säräfö ra fokkun mochen fiti ekkewe pekin urumwot lon sukul, iwe, ra tongeni feiengaw ren chiechi mi ngaw. Emön sister itan Tanya a erä: “Ua fokkun efich pekin urumwot. Ekkewe kouch lon äm we sukul ra kan sotun papaniei le fiti ekkewe kümiin urumwot. A weires ai upwe apasa aapw.”

Ifa usun kopwe älisi noum kewe le ataweei ar kewe sossot? Jiowa a awisa ngeni sam me in ar repwe awora kapasen emmwen ngeni nöür kewe. (SalF. 22:6; Ef. 6:4) Sam me in mi süföliti Kot ra kan achocho le fotukalong lon letipen nöür kewe ar mochen älleasochisi Jiowa. (SalF. 6:20-23) Ena mettoch a tongeni älisi ekkewe nau le ü ngeni etipetipaen ei fönüfan pwal mwo nge atun semer me iner rese küner.

A weires ngeni ekkewe sam me in le ochchupa tümünün ar famili me föfföri angangen ewe mwichefel. A ina usun ekkoch sam are in mi lipich are chokkewe pwülüwer rese fiti ar lükü. Iwe nge, Jiowa a chüen awisa ngeni sam me in ar repwe akkota fansoun le asukula me älisi nöür kewe. Ina minne, met ka tongeni föri le älisi noum kewe ar repwe pwisin tümünüür seni etipetipaen chiener kewe, sossotur kewe, me osukosuk ra kükküna rän me rän?

Ririöch Ngeni Jiowa

A lamot seni meinisin än ekkewe säräfö repwe silei pwe Jiowa I wesewesen emön. Sipwe älisiir pwe repwe ‘küna ewe Kot rese tongeni küna.’ (Ipru 11:27) Vincent, ewe sia fen pworaus usun, a chechchemeni ifa usun seman kewe me inan ra älisi le ämääratä an riri ngeni Jiowa. A apasa: “Ra äiti ngeniei lamoten iotek. Ua chechchemeni pwe seni chök lekükküni, ua kan ikkiotek ngeni Jiowa iteiten lepwin me mwen upwe annut. Jiowa I wesewesen emön me rei.” Oua kan ikkiotekfengen me nöümi kewe? Pwata ouse kan aüseling ngeni met ra apasa ngeni  Jiowa lon ar iotek? Ra kan chök epinipini met ra apasa? Are ra pwäratä lon ar iotek enletin meefier usun Jiowa? Ren ämi akkaüseling ngeni ar kewe iotek, oua tongeni esilla ika a määritä ar riri ngeni Jiowa.

Än ekkewe säräfö äkkälleani än Kot Kapas epwe pwal älisiir le arap ngeni Jiowa. Cathleen, ewe sia fen pworaus usun, a erä: “Äi äkkälleani Paipel seni lekükküni a fokkun älisiei. A alükülüküei pwe inaamwo ika aramas ra ü ngeniei, nge Jiowa a älisiei.” Noum kewe ra kan pwisin äkkälleani Paipel?​—Kölf. 1:1-3; 77:12.

Pwüngün, a sokkofesen än ekkewe nau ekiek usun emmwenien semer kewe me iner. Pwal eü, ar feffeitä lon ar lükü a alongolong woon ieriir. Nge, ika esor kapasen emmwen ngeni ekkewe nau, epwe weires ar repwe silei pwe Jiowa wesewesen Emön. Ekkewe sam me in repwe fotukalong alon Kot lon letipen nöür kewe pwe usun itä nge repwe rongorong än Jiowa kapas, ese lifilifil ia ra nom ie. (Tut. 6:6-9) A lamot noum kewe repwe lükü pwe Jiowa a enletin chchüngür.

Pworausfengen mi Aüchea

Akkapworausfengen a pwal lamot ren om kopwe älisi noum kewe. Ese chök wewe ngeni om foffos ngeniir. Kopwe pwal kapas eis me mosonottam le akkaüseling ngeniir, inaamwo ika pölüwan me rer a sokkolo seni met ka mochen rong. Emön in itan Anne, mi wor rüüemön nöün ät, a erä: “Ua kan kakkapas eis ngeniir tori ai weweiti met ra ekieki me met a fis lon manauer.” Noum kewe ra meefi pwe ka wesewesen aüseling ngeniir atun ra uwawu meefier? Tanya, ewe sia fen pworaus usun, a apasa: “Inei kewe me semei ra fokkun aüseling ngeniei me chechchemeni met ewe äm aua pworausfengen woon. Ra silei iten chienei kewe lon  sukul. Ra kan eis pworauser me kakkapas usun ekkewe mettoch aua fen pworaus usun.” A lamot akkaüseling me chechchemeni ren sopwöchün pwoppworausfengen.

Chommong famili ra küna pwe a mürinnö ar pwoppworausfengen atun ra möngöfengen. Vincent a äweweei: “Äm möngöfengen a wesewesen lamot ngeni äm famili. Aua alükülükü pwe aupwe nom atun möngö iteitan ika mei tufich. Ese mumutä katol kachito, aüseling reitio, me ällea puk atun möngö. Äm akkaasoos a ekinamweei letipei me älisiei le likiitü fän ekkewe fitikoko me osukosuk ua kükküna lon sukul.” A pwal erä: “Ai eöreni le foffos ngeni semei kewe me inei atun äm möngöfengen a älisiei le meefi kinamwe le foffos ngeniir atun a fis ngeniei osukosuk watte.

Kopwe pwisin eisinuk, ‘Fän fite aua kan möngöfengen me chon ai we famili iteiten wiik?’ Iwe, ka kan pesei noum kewe oupwe pwoppworausfengen atun oua möngöfengen?

Aüchean Praktis

Än ewe Famili Fel iteiten wiik a pwal suuki alen pwoppworausfengen, me a älisi ekkewe nau le ü ngeni sossotur kewe. Alan, ewe sia fen pworaus usun, a erä: “Semei kewe me inei ra kan älisikem le uwawu meefiem atun äm Famili Fel. Aua pwoppworaus woon met a weneiti äm osukosuk.” Inen Alan we a erä: “Aua äeä ekkewe fansoun käeö le praktis. A älisi nöüm kewe le käeö met repwe apasa ika ra küna sossot pwe repwe änneta enletin ar lükü. A alükülükü ngeniir pwe repwe tongeni ataweei ekkewe sossot ra küna.”

Atun ekkewe nau ra küna sossot seni täppir kewe, fän chommong, a lamot resap chök apasa aapw me feilo seniir. A lamot repwe tufichin pölüweni kapas eis usun choweän pwata me pwata kese mochen. A pwal lamot repwe meefi nükünüköch ren met repwe föri atun repwe küna sossotun ar lükü. Ika rese tongeni pölüweni kapas eis usun ar lükü, iwe, epwe weires ngeniir ar repwe nüküchar fän iten fel mi enlet. Ewe fansoun praktis a tongeni älisiir le eäni lükülük.

Lon ewe pwoor lon pekin taropwe 30, a makketiw ekkoch pwoomw oua tongeni pworaus woon atun ämi Famili Fel. Pwomweni pwe itä a kan wesewesen fis ren om appölüwa met noum kewe ra pölüweni. Me lükün ämi praktis, pwoppworaus woon met sia käeö seni pworausen aramas lon Paipel. Ena esin käit epwe elipwäköchü nöümi kewe le ataweei ekkewe sossot lon sukul me metakkan.

Imwach, Eü Leeni mi Nükünüköch?

Nöümi kewe ra kan ösüküsükü le liwiniti imwemi särin ar sukul iteiten rän? Ika imwemi eü leeni mi nükünüköch, epwe älisi nöümi kewe le ataweei ar kewe sossot iteitan. Emön sister mi angang lon eü ofesilapen Bethel a erä: “Atun ua mämmääritä, ua meefi nükünüköch lon imwem we. Ese lifilifil met a fis ngeniei lon sukul, nge ua silei pwe atun ua liwiniti leimw, upwe chök kinamwe. Mei fet napanapen chon leimwom kewe? Ra kan “song, apangau, [me] tipefesen,” are ra kan pwäratä “chen, pwapwa, [me] kinamwe”? (Kal. 5:19-23) Ika esor kinamwe lon imwom, ka kan achocho le kükkütta met oupwe siwili pwe epwe wiliti eü leeni mi nükünüköch?

Kopwe pwal älisi noum kewe le ataweei ar kewe sossot ren om akkota pwe repwe chiechi ngeni chokkewe mi apöchökküleretä. Äwewe chök, ka tongeni etiwa ekkoch pwiich kewe mi äsimaü ar repwe fitikemi le  kukkunou? Are ka tongeni etiwa ewe elter mi etto älisi ewe mwichefel are ekkewe pioneer le etikemi le möngö? Ka sissilei ekkoch misineri are chon angangen Bethel noum kewe ra tongeni chiechi ngeniir, inaamwo ika ra chök mak fengen taropwe, e-mail, are fos fengen woon fon? Ena sokkun chiechiöch a tongeni älisi nöümi kewe ar repwe äwenechara aler me achocho lon ar angang ngeni Jiowa. Ekieki än ewe aposel Paul älisi Timoti le feffeitä. (2 Tim. 1:13; 3:10) Än Paul chiechiöch ngeni a älisi le afota ekiekin woon an angang ngeni Jiowa.​—1 Kor. 4:17.

Pwär Ngeni Noum Kewe Om Pwapwaitiir

Jiowa a pwapwa atun a küna än ekkewe säräfö nüküchar fän iten minne mi pwüng ren etipetipaen än Setan otot. (Kölf. 147:11; SalF. 27:11) Esor tipemwärämwär pwe ka pwal pwapwa le küna än ekkewe säräfö kefiliöch. (SalF. 10:1) Pwäri meefiom ngeni noum kewe fän kirekiröch me tong. Jiowa a isetiw leenien äppirü mi mürinnö fän iten ekkewe sam me in. Atun Jises a papatais, Jiowa a erä: “En nei mi fokun achengicheng, üa unusen pwapwa reöm.” (Mark 1:11) Än Seman we alükülük ngeni a apöchökkülatä Jises le ataweei chommong sossot epwele küna! Iwe, pwär ngeni noum kewe pwe ka tonger, me ka pwapwa ren met ra föri.

Pwüngün, kesap tongeni unusen tümünü noum kewe seni sossot, osukosuk, me turunufas. Iwe nge, ka tongeni älisiir. Ifa usun? Älisiir le ämääraatä ar chiechiöch ngeni Jiowa. Emecheresi ämi pwoppworausfengen. Ämi Famili Fel epwe älisiir le ataweei osukosuk rän me rän. Imwom epwe eü leeni mi nükünüköch. Om föfföri ekkeei mettoch epwe älisi nöüm kewe le ataweei ar kewe osukosuk.

[Pwóróus fan]

[Pwóór/​Sasing lón pekin taropwe 21]

ÄMI PRAKTISFENGEN EPWE ÄLISIIR

Ikkeei ekkoch sokkun osukosuk nöüch kewe ra kükküna. Pwata ouse praktis le pwomweni atun ämi we Famili Fel?

▸ Emön kouch a pesei noum we epwe fiti eü kümiin urumwot lon sukul are akkufun ssä fän iten apwapwaan mwuun fönüemi.

▸ Atun nöüm we a liwin seni sukul, emön a etipetipa pwe epwe nünü pu.

▸ Ekkoch ät ra takiri noum we atun ra küna an a afalafal.

▸ Emön sense a eisini noum we ika pwata ese eäni ewe kölün filäik me watä pöün fän mwärin le pwäratä an tuppwöl ngeni ewe mwu.

▸ Emön ät a sotun michi noum we nengngin ren an kökköri me text ngeni.

▸ Emön ät a sani noum we nengngin me tingorei pwe repwe ösüsü.

[Sasing lon pekin taropwe 23]

Nöümi kewe ra kan pwisin äkkälleani Paipel?