A Fen Siwil Ach Ekiek Usun ewe Mettoch Tipis?

KKANOTO chök, chon fel ra kan rongorong seni nöür kewe nöüwis ar afalafal fän leüwommong usun ngawen tipisin mocheniaiti emön, tipemmong, mochenian moni me pisek, chipwang, song, lolowo, me lamalam tekia. Fän chommong, ekkena chon afalafal ra äweweei watteen pwününgawen tipis me pesei chon aüseling le aier. Nge emön sou mak a apasa: “Ikenäi, lap ngeni ekkewe afalafal rese chüen kapas usun tipis pwe rete eletipengawa aramas, nge ra fen menlapei met epwe ekinamwei letiper.”

Ikkeei ekkoch pworaus lon simpung mi pwäratä pwe a ina usun ekiekin aramas ikenäi:

▪ “Aramas ra chipwang le rongorong afalafal usun tipis, aier, me musoloon tipis, nge ra chök sani kapas epwe alapalo ar pwisin tonger.”​—Star Beacon, Ashtabula, Ohio.

▪ “Aramas rese chüen lolilen are ekieki pwe iir chon tipis.”​—Newsweek.

▪ “Aramas rese chüen eis ‘Met Kot a mochen upwe föri,’ nge ra fen eis, ‘Met Kot a tongeni föri fän itei?’”​—Chicago Sun-Times.

Ikenäi, pokiten aramas seni sokkopaten einang me lamalam ra nomfengen, ra pireir le apwüngüfengenir usun minne mi pwüng me minne mi mwääl, pun me rer, ese pwäratä süföl. Usun itä än aramas apwüngü föfförün emön, ina ewe tipis mi watte seni meinisin. Ina minne, a iei usun ekiekin aramas: ‘Eli met ka lükü a öchituk, nge kosap pwal eriäni aramas le eäni om ekiek. Ikenäi, aramas ra akkota manauer woon en me an ekiek usun met mi aüchea. Sap en chök ka silei met mi pwüng are mwääl, nge a pwal pwüng ekiekin ekkewe ekkoch.’

Ena sokkun memmeef a siwili än aramas ekiek usun ewe mettoch tipis. Rese chüen ekieki choun ewe kapas “tipis,” nge ra fen eäni minen urumwot. Rese chüen ekieki pwe mi watte tipisin än aramas nonnomfengen nge rese pwüpwülü, än ekkewe mi pwüpwülü kütta pwal emön pwülüwer, me än mwän me mwän, fefin me fefin sikefengen.

A ffat pwe a fen siwil än aramas ekiek usun minne mi öch me minne mi “tipis.” Nge pwata a siwil? Met a fis ngeni ewe mettoch tipis? Mi lamot met ka eäni ekiek usun tipis?