Napanapen Än Jises Pwäralo Än Kot Pwüng

“Kot a fangala Kraist, pwe ren an mäla a fis amusamusen än aramas tipis ren chaan pokiten ar lükü i. Kot a föri ei an epwe pwärätä pwe i a pwüng.”​—ROM 3:25.

1, 2. (a) Met ewe Paipel a äiti ngenikich usun nonnomun aramas? (b) Ikkefa ekkewe kapas eis sipwe käeö lon ei lesen?

 CHOMMONG aramas ra silei pworausen ewe föfförün älleasolap lon Ichen. Mi fen affat lon ekkeei kapas pwe pwününgawen tipisin Atam a kküükich meinisin: “Iwe, ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.” (Rom 5:12) Inaamwo ika sia achocho le föfföri met mi pwüng, nge sia chök mwämwäälilo, ina popun, a lamot pwe Kot epwe omusakichelo. Pwal mwo nge ewe aposel Paul a lolilen le apasa: “Ngang üsap föri mine a mürina usun üa mochen, nge üa föri mine a ngau, ewe sokun föför ngang üsap mochen pwe üpwe föri. Ngang eman aramas mi attong o weiresikis!”​—Rom 7:19, 24.

² Pokiten kich chon tipis, a piitä ekkeei kapas eis: Pwata a tufich ngeni Jises ewe re Nasaret an epwe uputiw nge ese älemwiri tipis, me pwata a papatais? Ifa usun alen manauen Jises a pwäralo än Jiowa we pwüng? Met a pwönütä ren än Jises mälo? Iei ewe kapas eis mi lamot seni meinisin.

Ekkoch Ra Ü ngeni än Kot Pwüng

3. Ifa usun Setan a otupu If?

³ Popuch kewe, Atam me If, ra pöpööni än Kot pwüüng le nemenem ren ar anomuur fän nemenien “ewe serepenitin lom mi iteni Tefil are Satan.” (Pwar. 12:9) Sipwe ppi ifa usun a fis ena. Setan a epiietä kapas eis usun pwüngün än Jiowa Kot nemenem, ren an eisini If: “Ifa usun, Kot a wesewesen apasa pwe ousap fokun mongö seni ekewe irän ei tanipi?” Nge If a ereni än Kot allük mi ffat pwe resap attapa ewe efoch irä, pun ika ra  attapa, repwe mälo. Setan a apasa pwe Kot a chofona ren an erä: “Apwi, ousap fokun mäla.” A pwal otupu If ren an ämmeef ngeni pwe Kot a amwöchü seni och mettoch mi mürinnö, nge ika epwe ocheei ewe föün irä, epwe wewe ngeni Kot me pwisin nemenemeni.​—Ken. 3:1-5.

4. Met a efisi än aramas nom fän nemenien Setan?

⁴ Setan a ämmeef ngeni pwe epwe lapolo pwapwaan aramas ika repwe pwisin nemenemeniir me lükün Kot. Atam ese apöchökküla pwüngün än Kot nemenem, nge a fen aüseling alon pwülüwan we me fiti le ocheei ewe irä mi pinepin seniir. Atam a pöütalo unusöchün an üöch mwen mesen Jiowa me uweikichelong fän weiresin tipis me mälo. Seni ena atun, aramas ra nom fän nemenien Setan, “ewe koten ei fanüfan.”​—2 Kor. 4:4; Rom 7:14.

5. (a) Ifa usun Jiowa a pwäri pwüngün alon? (b) Ifa ewe äpilükülük Kot a ngeni mwirimwirin Atam me If kewe?

⁵ A pwüngü ngeni alon Jiowa we pwe Atam me If repwe mälo. (Ken. 3:16-19) Nge saminne a sopwongaw minne Kot a fen aotalo. Atun Jiowa a apwüngü Atam me If, a ngeni mwirimwiriir kewe eü äpilükülüköch. A föri ena ren an akkota pwe epwe awora emön ‘mwirimwir,’ ewe Setan epwe kküü epinipinin pechen. Iwe nge, ena Mwirimwir esap unusen feiengaw me i “epwe puri [möküren Setan].” (Ken. 3:15) Ewe Paipel a äweweei ena pworaus ren an apasa ei usun Jises Kraist: “Iei popun pwe Nöün Kot a war an epwe atala än Tefil angang.” (1 Jon 3:8) Nge ifa usun föfförün Jises me an mälo ra pwäralo än Kot pwüng?

Weween än Jises Papatais

6. Pwata sia silei pwe Jises ese älemwiri tipis seni Atam?

⁶ Atun Jises a mwän, a wesewesen löllö ngeni le unusöchün Atam. (Rom 5:14; 1 Kor. 15:45) Weween pwe Jises a unusöch seni le uputiwan. Pwata a tufich ena? Ewe chonläng Kapriel a affataöchü ngeni Meri, inen Jises we, a ereni pwe än Kot manaman “epwe feitiu womw, nge manamanen ewe mi Unusen Tekia epwe nom womw. Iei mine ewe mi pin epwe uputiu ngonuk, epwe iteni Nöün Kot.” (Luk 1:35) Eli seni le kükkünün Jises, Meri a apworausa ngeni pworausen an uputiw. Ina minne, lon eü fansoun le ätin we, Meri me Josef ra küna Jises lon ewe imwenfelin Kot, iwe, a eisiniir: “Ousap silei pwe ngang üpwe fokun nonom lon imwen Semei?” (Luk 2:49) Neman, seni chök le kükkünün Jises, a silei pwe i nöün Kot. Ina minne, a fokkun alamota an pwäralo än Kot pwüng.

7. Ikkefa ekkewe mettoch mi aüchea a nom ren Jises?

⁷ Jises a pwäri an chchüngü mettoch mi apöchökkülatä an pacheöch ngeni Kot ren an fiffiti ekkewe mwich fän iten an fel ngeni Kot. Pokiten a unusöch ekiekin, iwe, a weweiti meinisin minne a rong me älleani seni ewe Tesin Ipru. (Luk 4:16) A nom ren pwal eü mettoch mi aüchea, ina inisin mi unusöch a tongeni fangolo fän iten aramas. Atun a papatais, a iotek me eli a ekieki usun ekkewe kapasen oesini lon Kölfel 40:6-8.​—Luk 3:21; älleani Ipru 10:5-10. *

8. Pwata Jon Papatais a sotun eppeti än Jises epwe papatais?

⁸ Akkomwan, Jon Papatais a mochen eppeti än Jises epwe papatais. Pwata? Pun än Jon papataisi chon Jus a liosuetä ar aier seni ar tipis ngeni ewe Allük. Pokiten  Jon, i aramasen Jises, iwe, a silei pwe Jises emön mi pwüng me ese pwal lamot ngeni an epwe aier. Jises a äweweei ngeni Jon pwe mi fich ngeni an epwe papatais. A ereni: “Pun iei usun a fich ngenikich sipwe apwonueta mettoch mi pung meinisin.”​—Mt. 3:15, TF.

9. Met än Jises papatais a liosuetä?

⁹ Pokiten Jises emön aramas mi unusöch, a tongeni ekieki pwe a tufichin oupwatiw mwirimwirin mi unusöch usun chök Atam. Iwe nge, Jises ese ekieki ena pun esap ina letipen Jiowa. Kot a tinato Jises ngeni fönüfan an epwe apwönüetä wisan, wisen ewe mwirimwir mi pwonetiw are Messaia. A kapachelong an fangolo manauan we mi unusöch. (Älleani Aisea 53:5, 6, 12.) Weween än Jises papatais ese löllö ngeni weween ach papatais. Jises, i chon ewe mwuun Israel mi fen nom fän ewe pwon lefiler me Kot, ina popun ese pwal lamot an epwe fangolo manauan ngeni Jiowa. Nge än Jises papatais a liosuetä an mwe ngeni Kot manauan pwe epwe föri letipan, usun met oesini a fen erä usun ewe Messaia.

10. Met a kapachelong lon än ewe Messaia föri letipen Kot, me met meefien Jises usun?

¹⁰ Letipen Jiowa pwe Jises epwe afalafala ewe kapas allim usun ewe Mwuun Kot, föralo chon käeö, me ammolneeretä pwe repwe pwal föri ena angang lon fansoun mwer. Jises a pwal tipeeü ngeni an epwe küna riäfföü mwääl me mälo pwe epwe pwäratä an tuppwöl ngeni än Jiowa nemenem mi pwüng. Pokiten Jises a enletin tongei Seman we lon läng, a pwapwaiti an föri letipan me a meefi aüchean an mwei pwisin i usun eü asor. (Jon 14:31) A pwal pwapwa le silei pwe a tongeni mwe ngeni Kot aüchean manauan we mi unusöch usun eü möön kepich le angasakichelo seni tipis me mälo. Itä Jiowa a pwapwa ren än Jises mwei pwisin i pwe epwe apwönüetä ekkena wis mi lap? Fokkun ewer!

11. Ifa usun Jiowa a pwäratä pwe a pwapwa ren Jises, ewe Messaia mi pwonetiw, are Kraist?

¹¹ Ekkewe fömön chon makkeei ekkewe rüanü puken kapas allim ra affata pwe Jiowa Kot a pwapwa ren Jises atun a feitä seni ewe chanpupuun Jortan. Jon a pwäratä: ‘Ua kuna än Kot manaman mi fefeitiu seni lang, usun chok emon lisom, o a nonnom won [Jises] . . . Iwe, ngang ua fen kuna, o ua pwal pwarata pwe atei Noun Kot.’ (Jon 1:32-34) Iwe, lon ena atun, Jiowa a pwal apasa: “Iei i nei mi achengicheng, üa unusen pwapwa ren.”​—Mt. 3:17; Mark 1:11; Luk 3:22.

Jises a Tuppwöl Tori Mälo

12. Met Jises a föri ükükün ülüngät esopw ier mwirin an we papatais?

¹² Ren ükükün ülüngät esopw ier, Jises a afalafala aramas usun Seman we me pwüngün än Kot nemenem. A pekkus le afalafalfeil ekis meinisin lon ewe Fönüen Pwon, nge esor och mettoch a eppeti i le pwäratä ewe enlet. (Jon 4:6, 34; 18:37) A äiti ngeni aramas usun Mwuun Kot we. Ren an föri manaman le echikaratä ekkewe mi semwen, amöngööni eü pwiin aramas mi echik, me pwal mwo nge amanauatä ekkewe mi mälo, a pwäratä met ewe Mwu epwe föri fän iten aramas.​—Mt. 11:4, 5.

13. Met Jises a eäni asukul usun iotek?

¹³ Jises a isetiw eü leenien äppirü mi mürinnö ren an tipetekison le emmweni meinisin le mwareiti Jiowa, nge ese pwisin angei ling seni an angangen afalafal me echikaratä aramas. (Jon 5:19; 11:41-44) Jises a pwal affata met sipwe akkomwa lon ach iotek. Sipwe tingor pwe iten Kot we, Jiowa, “epwe pin,” me än Kot nemenem mi pwüng epwe siwili än Setan ei otot mi ngaw pwe ‘letipen [Kot] epwe fis won fanüfan usun chök lon läng.’ (Mt. 6:9, 10) Jises a pwal pesekich le etipeeüfengeni föfförüch ngeni ach iotek ren ach “kuttafichi lom an [Kot] mu o an pung.”​—Mt. 6:33.

14. Inaamwo ika Jises a unusöch, nge pwata a lamot an epwe achocho le apwönüetä wisan lon minne Kot a fen aotalo?

 ¹⁴ Atun a arap ngeni än Jises epwele mälo, a poputä le meefi choun wisan we. Pwönütään minne Seman we a aotalo me itöchün a longolong woon än Jises likitü fän riäfföü mwääl me mälo fän weires. Nimu rän me mwen än Jises we epwele mälo, a iotek: “Iei letipei a weires. Met ngang üpwe apasa? Ifa usun, üpwe apasa, ‘Semei, kosap mwüt ngeniei pwe üpwe tolong lon ei fansoun riaföü?’” Mwirin an apasa ena, a afota ekiekin woon ewe mettoch mi lamot seni, iwe, a iotek: “Semei, kopwe alinga itom!” Jiowa a mwittir pölüweni: “Üa fen alinga itei, nge üpwe pwal alingasefäli.” (Jon 12:27, 28) Ewer, Jises a tipemecheres le küna watteen sossotun an tuppwöl, ewe esin sossot esor emön a piin kükküna. Nge sia lükü pwe än Jises rongorong möngüngüün Seman we lon läng a fokkun apöchökküla an lükülük pwe epwe elingalo me pwäralo än Jiowa pwüüng le nemenem. Iwe, a apwönüetä!

Met A Pwönütä ren Än Jises Mälo

15. Pwata Jises a apasa: “A wesila!” me mwen an we epwele mälo?

¹⁵ Iei säingoon alon Jises woon ewe irään ninni mwen an epwele mälo, a erä: “A wesila!” (Jon 19:30) A ifa me watteen lamoten ekkewe mettoch Jises a apwönüretä ren än Kot älillis atun ekkewe ülüngät esopw ier seni an papatais tori an mälo! Atun Jises a mälo, a fis eü watteen chechchech, iwe, ewe meilapen sounfiun Rom a apasa: “Ätei wesewesen Nöün Kot.” (Mt. 27:54) Ewe sounfiu a küna ekkewe aramas ar ra turunufaseei Jises pun a erä pwe i ewe nöün Kot. Inaamwo ika Jises a küna chommong riäfföü, nge a akkamwöchü an tuppwöl me änneta pwe Setan mi fokkun chofona. Setan a esiita meinisin mi peni än Kot we pwüüng le nemenem ren an erä: “Eman aramas epwe fangala meinisin mine a eäni fän iten manauan.” (Hiop 2:4) Ren än Jises tuppwöl, a pwäratä pwe Atam me If ra pwal tongeni tuppwöl fän ar we sossot mi mecheres seni än Jises na. Nge lap seni meinisin, än Jises manau me mälo ra pwäri me apöchökkülatä pwüngün än Jiowa nemenem. (Älleani Än Salomon Fos 27:11.) Än Jises mälo a apwönüetä pwal ekkoch mettoch? Fokkun ewer!

16, 17. (a) Pwata a tufich ngeni ekkewe chon lükü mi manau me mwen än Jises feitiw fönüfan ar repwe üöch mwen mesen Jiowa? (b) Ifa usun Jiowa a efeiöchü tuppwölün nöün we, me met ewe Samol Jises a sopwelo le föfföri?

¹⁶ Chommong nöün Jiowa kewe chon angang ra manau me mwen än Jises feitiw fönüfan. Ra üöch mwen mesen Kot me eäni ewe äpilükülükün manausefäl. (Ais. 25:8; Tan. 12:13) Epwe ifa usun Jiowa, ewe Kot mi pin, epwe tufichin efeiöchü ekkena aramas mi tipis, nge epwe fiti pwüngün allük? Ewe Paipel a äweweei: “Kot a fangala Kraist, pwe ren an mäla a fis amusamusen än aramas tipis ren chaan pokiten ar lükü i. Kot a föri ei an epwe pwärätä pwe i a pwüng, pun lon an mosonotam esap apwüngü än ekewe aramas tipis ra föri me mwan. Nge ikenai Kot a föri och fän iten än aramas tipis, pwe epwe pwärala an pwüng. Ren ei Kot a pwärätä pwe püsin i a pwüng, a pwal föri pwe ir mi lükü Jesus repwe küna pwüng.”​—Rom 3:25, 26. *

¹⁷ Jiowa a efeiöchü Jises ren an amanauasefälietä me awisa ngeni eü wis mi tekia seni ewe a fen wiseni me mwen an feitiw fönüfan.  Iei, Jises i emön ngün mi lingemwarar lon läng me esap chüen tongeni morolo. (Ipru 1:3) Jises, ewe Samolfel mi Lap me King, a sossopwelo le älisi chokkewe mi äppirü i le pwäralo än Kot pwüng. A ifa me kilisouch pwe Semach we lon läng, Jiowa, a kan efeiöchü meinisin mi föri ena me tuppwöl le angang ngeni ren ar äppirü Nöün we!​—Älleani Kölfel 34:3; Ipru 11:6.

18. Met sipwe pworaus usun lon en lesen mwirin?

¹⁸ Ekkena aramas mi tuppwöl seni Epel tori mwen fansoun Kraist ra tongeni ririöch ngeni Jiowa pun ra anganga ar lükü me lükülükü ewe mwirimwir mi pwonetiw. Jiowa a silei pwe nöün we epwe akkamwöchü pwüngün enletin an tuppwöl, me an mälo epwe unusen uwealo “tipisin chon fanüfan.” (Jon 1:29) Än Jises mälo a pwal efeiöchü aramas mi manau iei. (Rom 3:26) Iwe, ikkefa ekkewe feiöch sipwe küna ren än Kraist möön kepich? Epwe ina itelapen en lesen sipwap käeö.

[Ekkewe pwóróus fan]

Ifa Pölüwen Ekkeei Kapas Eis?

• Ifa usun ekkoch ra ü ngeni än Kot pwüng?

• Met än Jises papatais a liosuetä?

• Met a pwönütä ren än Jises mälo?

[Ekkewe Kapas Eis Fan Iten Ewe Lesen]

[Sasing lon pekin taropwe 9]

Ka silei met än Jises papatais a liosuetä?