Akkachocho Le Kükkütta Feiöch Seni Jiowa

“[Kot] a liwini ngeni ir ekkewe mi [akkachocho le] kukutta i.”​—IPRU 11:6, TF.

1, 2. (a) Ifa usun aramas ra kükkütta feiöch seni Kot? (b) Pwata a lamot ngenikich ach sipwe angei ewe feiöch seni Jiowa?

 LON ekkoch fönü, ika emön a mwesi, aramas ra ereni “Kot epwe efeiöchuk!” Ekkewe nöüwisin sokkopaten lamalam ra kan efeiöchü aramas, man, me pisek. Aramas ra säi ngeni ekkoch leeni ra ekieki pwe mi pin, pwe repwe angei och feiöch. Ekkewe sou nemenem ra kan tingorei Kot pwe epwe efeiöchü ar kewe mwu. Om ekiek pwe mi pwüng ar kana tingor? Kot a aüselinga alor? Iö kewe Kot a wesewesen efeiöchüür, me pwata?

² Jiowa a oesini pwe lon ekkewe ränin le sopwoloon epwe wor nöün kewe aramas mi limelimöch me kinamwe seni sokkopaten fönü, repwe afalafala ewe kapas allimen ewe Mwu woon unusen fönüfan, inaamwo ika repwe küna koput. (Ais. 2:2-4; Mt. 24:14; Pwar. 7:9, 14) Ren kich mi fen etiwa ena wis a fokkun lamot ewe feiöch seni Kot, pwe sipwe sopwöch lon ach apwönüetä letipan. (Kölf. 127:1) Nge ifa usun sipwe tongeni angei ena feiöch?

Ekkewe Feiöch Repwe Akkomw Mwen Chokkewe mi Älleasochis

3. Ika ekkewe chon Israel ra fen älleasochis, itä met mwiriloon?

³ Älleani Än Salomon Fos 10:6, 7. Mwen  än chon Israel tolong lon ewe Fönü mi Pwonetiw, Jiowa a ereniir pwe ika repwe älleasochisi, epwe fokkun awöüür me tümünüür. (Tut. 28:1, 2) Ekkewe feiöch seni Jiowa rese chök tori nöün kewe aramas nge repwe fen “akom” mwer. Weween, ren chokkana mi älleasochis, repwe wesewesen küna ekkena feiöch.

4. Met weween älleasochis mi enlet?

⁴ Itä epwe ifa napanapen än chon Israel älleasochis? Än Kot allük a erä pwe Kot a pwapwaiti än aramas angang ngeni ‘fän meseik me pwapwaan leluker.’ (Älleani Tuteronomi 28:45-47.) Ese öch än emön epwe chök osenimu le älleasochisi ekkewe allük, usun chök met ekkewe chonläng mi ngaw me man ra föri. (Mark 1:27; Jem. 3:3) Älleasochis seni letip a pwäratä än emön tongei Kot. A fiti ewe sokkun chengel mi popu seni an lükülük pwe ese chou än Jiowa kewe allük me a “liwini ngeni ir ekkewe mi [akkachocho le] kukutta i.”​—Ipru 11:6, TF; 1 Jon 5:3.

5. Ifa usun än emön lükülük woon än Jiowa pwon epwe älisi le älleasochisi ewe allük lon Tuteronomi 15:7, 8?

⁵ Nengeni ifa usun älleasochis fän lükülük epwe tongeni pwälo fän iten ewe allük lon Tuteronomi 15:7, 8. (Älleani.) Ika emön a älleasochisi ena allük fän chök osenimu, eli epwe ekis älisi ewe chon mwelele nge epwe weires an epwe wor tong me pwipwiöch lefilen ewe chon liffang me ewe chon mwelele. Nge lap seni ena, rese pwäratä lükülük woon än Jiowa tufichin tümünü nöün kewe chon angang, me rese aücheani ar repwe tongeni äppirü kisäseün Jiowa. Kot a äfänni chokkewe mi fangafangöch seni letiper me a pwon ngeniir an epwe efeiöchü mettoch meinisin ra föri. (Tut. 15:10) Ar lükü ena pwon epwe efisatä föfförün kisäseü, iwe mwirin, epwe atoto feiöch mi somwolo.​—SalF. 28:20.

6. Met Ipru 11:6 a alükülükü ngenikich?

⁶ Ipru 11:6 a menlapei pwal eü napanap mi lamot ren ach sipwe tufichin angei feiöch seni Jiowa me lükün ach chök lükü pwe I Chon Efeiöchü nöün kewe chon angang. Nengeni, Jiowa a efeiöchü iir kewe mi “[akkachocho le] kukutta i.” Ewe populapen fos ren ei kapas a wewe ngeni än emön öttüres le föri och angang. A fen alükülükükich pwe ika sia akkachocho le angang, Jiowa epwe efeiöchükich! Pun I ewe emön chök Kot mi enlet, “esap chofona.” (Tait. 1:2) A pwäri lon fitu ngeröü ier pwe mi unusen alükülük an kewe pwon. Meinisin an kewe kapas ra chök pwönüetä. (Ais. 55:11) Ina popun, ika sia pwäratä lükü mi enlet, sipwe wesewesen lükülük pwe Jiowa epwe efeiöchükich.

7. Ifa usun sipwe tongeni angei feiöch seni “mwirimwirin” Eperiam?

⁷ Jises Kraist i äkkäeüin “mwirimwirin” Eperiam. Ekkewe mi kepit, iir oruuen kinikinin ena “mwirimwir.” Wiser, repwe ‘arongafeili än Kot kewe föför mi manaman, i ewe mi köriiriwu [ekkewe mi kepit] seni rochopwak, pwe repwe tolong lon an saram mi amwarar.’ (Kal. 3:7-9, 14, 16, 26-29; 1 Pit. 2:9) Sise tongeni ririöch ngeni Jiowa ika sise aüseling ngeni iir kewe Jises a filiretä le tümünü pisekin kewe. Ika esor älillisin ewe “chon angang mi allükülük o tipachem” sise tongeni unusen weweiti me apwönüetä met sia älleani seni än Kot Kapas. (Mt. 24:45-47) Ren ach akkapwönüetä met sia käeö, sipwe tongeni angei ewe feiöch seni Jiowa.

 Akkakkomwa Letipen Kot

8, 9. Ifa usun än Jekop achocho a tipeeü ngeni än Kot pwon?

⁸ Pworausen Jekop a ächema ngenikich lamoten än emön epwe fokkun öttüres le angei ewe feiöch seni Kot. Ese silei ifa usun epwe pwönütä än Kot we pwon ngeni Eperiam, nge a lükü pwe Jiowa epwe achommongaalo mwirimwirin semelapan na, pwe repwe wiliti eü mwu mi lap. Ina popun, lap seni ülüngät ngeröü ier loom, Jekop a säi ngeni Haran an epwe küt pwülüwan. Ese chök kütta emön epwe chiechiöch ngeni, nge a kütta emön fefin mi ririöch ngeni Jiowa me epwe emön inelap mi mürinnö.

⁹ Sia silei pwe Jekop a chuuri märärin we Rechel. Iwe a tongei, ina minne a angang ngeni seman we Lapan fisu ier pwe epwe tongeni pwülüweni. Ei pworaus esap chök pworausen än rüüemön tongfengen. Jekop a fokkun silei än Kot we pwon ngeni semelapan we Eperiam, me pwal ngeni seman we Aisek. (Ken. 18:18; 22:17, 18; 26:3-5, 24, 25) Iwe, Aisek a ereni Jekop: “Ewe Kot mi Unusen Manaman epwe afeiöchuk, epwe pwal aupwuk o achomongokola pwe kopwe wiliti eu mwichen aramas mi chomong. Amwo epwe afeiöchuk me mwirimwirum kana usun an afeiöchü Apraham, pwe kopwe fanüeni ewe fanü ka wasöla lon, ewe fanü Kot a fen ngeni Apraham!” (Ken. 28:3, 4) Ina popun, än Jekop achocho le kütta pwülüwan mi mürinnö me föratä eü famili a pwäratä an lükülük woon än Jiowa pwon.

10. Pwata Jiowa a pwapwa le efeiöchü Jekop?

¹⁰ Jekop ese kütta wöün fän iten tufichin an famili. A chök ekieki än Jiowa pwon fän iten mwirimwirin kewe me pwönütään. Inaamwo ika a chommong minen eppet, nge a tipeppos le föri ükükün an tufich ren an epwe angei ekkewe feiöch seni Kot. Tori an a chinnap a chök ina usun ekiekin, ina minne Jiowa a efeiöchü i.​—Älleani Keneses 32:24-29.

11. Met sipwe achocho ngeni pwe sipwe tipeeü ngeni letipen Kot?

¹¹ Usun chök Jekop, sise pwal silei titchikin pwönütään än Jiowa we kokkot.  Nge ren ach käeö an Kapas sia tongeni weweiti met epwe fis lon “ränin ewe Samol.” (2 Pit. 3:10, 17) Äwewe chök, sise silei titchikin ineet epwe war ena rän nge sia silei pwe a arapoto. Sia lükü än Kot Kapas lupwen a erä pwe ika sia aunusalo ach angangen afalafal lon ei fansoun a chök mwochomwoch, sipwe pwisin amanauakich me chokkewe mi aüselingakich.​—1 Tim. 4:16.

12. Met sipwe tongeni lükülük woon?

¹² Sia mirititi pwe ewe sopwoloon epwe tongeni war lon ekkeei rän, warotoon ränin Jiowa we esap witiwit tori emön me emön aramas woon unusen fönüfan epwe rongorong ewe pworaus seni Paipel. (Mt. 10:23) Sia küna emmwen mi mürinnö ren ifa usun sipwe apwönüetäöchü ach angangen afalafal. Fän lükülük, sia föri ei angang ren ükükün ach tufich me äeä ekkewe minen älillis mi kawor. Sisap chök akkafalafal lon ekkewe leeni chommong aramas ra etiwakich, pun sise silei ika ia epwe uwaöch me ie. (Älleani Än Salomon Afalafal 11:5, 6.) Wisach sipwe chök afalafal me lükülük pwe Jiowa epwe efeiöchü ach angang. (1 Kor. 3:6, 7) Esor tipemwaramwar pwe Jiowa a küna ach angang weires, nge ren an manaman epwe emmwenikich lupwen sia osupwangan.​—Kölf. 32:8.

Tittingor än Kot Manaman

13, 14. Ifa usun sia küna angangen än Kot manaman le elipwäköchü nöün kewe aramas?

¹³ Ifa usun ika sia meefi lipwäkingawach le afalafal? Mi lamot sipwe tingor än Jiowa manaman pwe epwe elipwäköchükichelo lon an we angang. (Älleani Luk 11:13.) Än Kot manaman epwe tongeni atufichi emön le wiseni eü wis are angang ese lifilifil met nonnomun me künaen manauan. Äwewe chök, ekiselo mwirin än chon Israel sü seni Isip, än Kot manaman a atufichi ekkeei chon masen siip me slave le akkufu chon oputer kewe inaamwo ika rese sile maun. (Eks. 17:8-13) Mwirin, än Kot manaman a pwal asipeöchü Pesalel me Oholiap le föri sokkopaten angang mi amwarar fän iten än Kot we imwen fel mangaku.​—Eks. 31:2-6; 35:30-35.

¹⁴ Än Kot manaman a pwal älisi nöün kewe chon angang ikenäi ar repwe pwäkini osupwangen ewe mwicheich lupwen ra poputä le pwisin peresei nöür kewe puk. Iei makkeien Brother R. J. Martin, sou emmwenin ewe leenien peres ren met ra fen föri lon 1927: “Lon ewe fansoun, ewe Samol a suuki ewe asam me a torikem ewe watte mwesinen peres nge ause sile nöünöün. Nge ewe Samol a silei ifa usun epwe etipatchema chokkewe mi angang ngeni seni letiper. . . . Mwirin chök fitu wiik, aua tongeni nöünöü ewe mwesin me aöchüolo angangan, a pwal mwo nge föri ekkoch angang ekkewe chon föri ena mwesin rese silei.” Jiowa a chüen ekkefeiöchü ekkewe mi achocho tori ikenäi.

15. Ifa usun Rom 8:11 a tongeni apöchökküla iir kewe mi küna sossot?

¹⁵ Än Jiowa manaman a sokkopat angangan. A kawor ngeni meinisin nöün kewe chon angang me a älisiir le pworacho ngeni ekkewe sossot watte. Ifa usun ika eü sossot a chounikichetiw? Sipwe pöchökkül ren alon Paul keei lon Rom 7:21, 25 me 8:11. Ewer, än Kot manaman “mi amanauasefäli Jesus seni mäla” a tongeni apöchökkülakich le pworacho ngeni  apwangapwangen futukach. Ena wokisin fän iten ekkewe Chon Kraist mi kepit nge ewe kapasen emmwen a pwal weneiti meinisin nöün Kot chon angang. Meinisin kich sia küna manau ren ach anganga ach lükü Kraist, ren ach achocho le amäloi ekkewe mochenin fönüfan me ren ach manau fän emmwenien än Kot manaman.

16. Met sipwe föri pwe sipwe angei än Kot manaman?

¹⁶ Sia tongeni angei än Kot manaman inaamwo ika sise achocho? Aapw. Me lükün ach tingor an manaman, mi lamot sipwe mömmöngö seni än Kot Kapas. (SalF. 2:1-6) Pwal och, an na manaman a nonnom woon ewe mwichefelin Chon Kraist. Ach fiffiti mwich a pwäratä pwe sia mochen silei met än Kot we manaman a pwäri ngeni “ekewe mwichefel.” (Pwar. 3:6) Sipwe pwal tipetekison le etiwa met sia käeö. Än Salomon Fos 1:23 a fönökich: “Are oupwe aüselinga ai kewe kapasen fön, ngang üpwe pwärätä ngenikemi ai ekiek.” Pwüngün, Kot a ngeni “chokewe mi aleasochis” an we manaman.​—Fof. 5:32.

17. Sipwe tongeni apöpööi än Kot efeiöchü ach achocho ngeni met?

¹⁷ Pwüngün pwe a lamot achocho ren ach sipwe angei ewe feiöch seni Kot, nge sipwe chechchemeni pwe esap chök ina ewe popun nöün kewe aramas ra angei watte feiöch seni. Sia tongeni apöpööi än Kot efeiöchü ach achocho, ngeni ach küna feiöch seni ekkewe möngö sia äni. Kot a föri inisich pwe sipwe pwapwaiti möngö me pöchökkül seni. A pwal awora möngö. Sise unusen weweiti kokkotun fetälin möngö lon inisich ren ifa usun sia angei vitamin seni, are äweweei ifa usun inisich a pöchökkül seni. Nge sia chök silei pwe ach mömmöngö a älisatä ena kokkot. Ika sia filatä le möngö ekkewe mi watte vitaminin, a ina me fen öchüloon. Pwal ina chök usun, Jiowa a ngenikich met sipwe föri pwe sipwe küna manau esemuch me awora ekkewe älillis pwe sipwe tongeni apwönüetä. A ffat pwe ren an keei kokkot a fokkun älisikich me mi fich ngeni ach sipwe mwareiti. Nge, mi lamot sipwe älisatä an kokkot ren ach apwönüetä letipan pwe sipwe angei ewe feiöch.​—Akai 2:18, 19.

18. Met kopwe achocho ngeni, iwe pwata?

¹⁸ Kopwe achocho ükükün om tufich le apwönüetä wisom. Kükkütta än Jiowa emmwen. (Mark 11:23, 24) Kopwe lükülük pwe “iö a küküt epwe künakün.” (Mt. 7:8) Ekkewe mi kepit repwe feiöch ren ewe “mwärin manau” lon läng. (Jem. 1:12) Nöün Kraist kewe ‘pwal ekkoch siip,’ iir kewe ra achocho le angei ewe feiöch ren mwirimwirin Eperiam, repwe pwapwa le rongorong alon Jises ei: “Oupwe feito ämi mi feiöch me ren Semei! Oupwe mwüni ewe mwü mi molotä fän itemi seni lepoputän fanüfan.” (Jon 10:16; Mt. 25:34) Ewer, “chokewe mi feiöch me ren ewe Samol mi Lapalap repwe fanüeni ewe fanü, . . . o nonom won tori feilfeilachök.”​—Kölf. 37:22, 29.

Ka Tongeni Äweweei?

• Met weween älleasochis mi enlet?

• Met sipwe föri pwe sipwe angei feiöch seni Kot?

• Ifa usun sipwe angei än Kot manaman, me ifa usun a älisikich?

[Ekkewe Kapas Eis Fan Iten Ewe Lesen]

[Ekkewe sasing lón pekin taropwe 10]

Jekop a fiu ngeni emön chonläng ren an epwe angei feiöch seni Jiowa.

A pwal ina usun om achocho?

[Sasing lon pekin taropwe 12]

Än Kot manaman a elipwäköchü Pesalel me Oholiap