Met Chommong Ra Niuokkusiti?
Met Chommong Ra Niuokkusiti?
“Emön mwo ese fiti lamalam epwe mirititi pwe sia fetäl ngeni kitetter.”—STEPHEN O’LEARY, EMÖN SENSE LON EWE UNIVERSITY OF SOUTHERN CALIFORNIA. *
KA TIPEEÜ ngeni ena pworaus asan? Ikeei fitu pworaus repwe äweweei ekkoch popun aramas ra niuokkusiti met epwe fis lon mwachkkan. Nge epwe pwal äiti ngonuk pwata kopwe lükülük pwe esap rosolo mettoch meinisin mi manau woon fönüfan. Inaamwo ika ekkeei pworaus kopwele älleani mi alolilen, nge a wor popun kopwe tongeni äpilükülüköch.
A chüen watte lolilen ren maun woon kensi pakutang. Lon 2007, ewe Bulletin of the Atomic Scientist a öüröüra: “Iei a kon watte niuokkus ren maun woon kensi pakutang seni ewe fansoun a kerän äeüin koturutiw kensi pakutang woon Japan.” Pwata a alolilen? Ewe simpung a apasa pwe lon 2007 mei wor 27,000 kensi pakutang, nge 2,000 leir mi fen mmolnetä pwe repwe “mwittir koturutiw” woon ekkan fönü. Ikaamwo fiteföü chök repwe apüngü nge a tongeni efisi watte feiengaw!
Seni 2007 a itä kükkünülo än aramas lolilen ren maun woon kensi pakutang? Me ren ewe SIPRI Yearbook 2009, * * ekkewe nimu mwu mi chommong nöür kensi pakutang seni meinisin, weween, China, France, United Kingdom, me Merika, ra fen “föratä mineföön kensi pakutang, are ra ekiekin föratä.” A pwal apasa pwe mei pwal wor ekkoch fönü ra nöüni ena sokkun pakutang. Ekkewe sou käeö ra ekieki pwe India, Pakistan me Israel a wor en me nöün 60 ngeni 80 kensi pakutang. Ra pwal apasa pwe woon unusen fönüfan a wor 8,392 kensi pakutang mi chök mmolnetä fän iten maun.
Siwilin weather a tongeni efisi watte feiengaw. Me ren Bulletin of the Atomic Scientists, “ewe feiengaw mi tongeni fis seni siwilin weather a usun chök ewe feiengaw epwe tongeni fis seni kensi pakutang.” A pwal ina usun ekiekin ekkewe scientist mi iteföülo usun Stephen Hawking, emön sense lon University of Cambridge, me Sir Martin Rees, meilapen ewe Trinity College lon University of Cambridge. Ra ekieki pwe än aramas äeämwäälli tipatchemen computer me aingawalo fönüfan a tongeni siwili manauen mettoch meinisin woon fönüfan are fen arosalo aramas meinisin.
Chommong ra lolilen usun pworausen taloon fönüfan. A mmen chommong pworausen ekiekin aramas usun sopwoloon fönüfan lon 2012 woon ewe Internet. Pwata a ina usun ar ekiek? Pun meefier pwe nöün chon Maya pwinin maram minen loom epwe much lon 2012, iwe, ra niuokkus pwe ra ekieki pwe ina esissillen taloon ei otot.
Chommong chon lamalam ra lükü pwe ewe Paipel a erä pwe wesewesen ei fönüfan epwe talo. Ra ekieki pwe meinisin chon lükü repwe feitä läng, nge ekkewe lusun repwe riäfföü lon ei fönüfan mi ur ren fitikoko are koturulong lon ell.
Mei pwüng pwe Paipel a erä pwe ei fönüfan epwe unusen kitetterilo? Aposel Jon a öüröürakich: ‘Ousap lükü chokewe meinisin mi apasa pwe ra eäni manamanen Kot, nge oupwe sotuniir o küttaöchü are . . . ra feito seni Kot.’ (1 Jon 4:1) Kosap chök mwittir lüküolo alon aramas nge pwata kese fen pwisin suki noum Paipel me ppii met Paipel a apasa usun sopwoloon ei fönüfan? Neman kopwe fen mäirü ren met Paipel a apasa.
[Ekkewe pwóróus fan]
^ Pworaus seni ewe MSNBC woon Internet minen October 19, 2005 usun än aramas ekieki taloon ei fönüfan pokiten ekkewe osukosuk mi efeiengaw a fiffis.
^ SIPRI a wewe ngeni Stockholm International Peace Research Institute.
^ Ewe repot lon SIPRI Yearbook 2009, makkeien ekkewe sou käeö usun pakutang ren Shannon N. Kile, Vitaly Fedchenko, me Hans M. Kristensen.
[Credit Line]
Mushroom cloud: U.S. National Archives photo; hurricane photos: WHO/League of Red Cross and U.S. National Archives photo