Nöüch We Souemmwen Mi Tinikken Ikenäi
Nöüch We Souemmwen Mi Tinikken Ikenäi
“A feila, a pwora o win.”—PWÄR. 6:2.
1, 2. (a) Ifa usun ewe Paipel a äweweei met Jises a föri atun a wiliti king lon ewe ier 1914? (b) Met a föri mwirin an a wiliti king?
KRAIST a seikitä pwe Kingen än Jiowa we Mwuun Messaia lon ewe ier 1914. Met ekiekich usun Jises iei? Sia itä ekieki pwe i emön king mi mommot woon an we leenien motun king, iwe, fän ekkoch a nennetiw me ppii pworausen an mwichefel? Ika ina, sipwe siwili ach ekiek pun ese pwüng. Ekkewe puken Kölfel me Pwäratä ra äweweei pwe i emön king mi pöchökkül a wawa oris, iwe, “a feila, a pwora o win.”—Pwar. 6:2; Kölf. 2:6-9; 45:1-4.
2 Mwirin än Jises wiliti king, a akkomw akkufu ewe “trakon me nöün kewe chon läng.” Lon wisan we meilapen chonläng itan Mikael, Kraist a oturatiw Setan me nöün kewe chonläng mi ngaw seni läng, iwe, ese chüen mumutä ngeniir le liwintä läng. (Pwar. 12:7-9) Jises a eti Seman we le etittina an we imwen fel lon wisan we nöün Jiowa we “chon künön ewe pwon.” (Mal. 3:1) A apwüngü Kristentom, kinikinin “Papilon mi Lapalap,” mi tipisilap, pun a tipisin nimanau me a limengaw an chiechi ngeni ekkewe mwuun fönüfan.—Pwar. 18:2, 3, 24.
Jises A Elimöchü Nöün we Chon Angang woon Fönüfan
3, 4. (a) Ifa ewe angang Kraist a apwönüetä lon wisan we “chon künön ewe pwon”? (b) Met a pwälo ren etittinen ewe imwenfel, iwe, lon wisan we möküren ewe mwichefel, Jises a seikatä iö?
3 Atun Jiowa me nöün we “chon künö” ra etittina ewe imwenfel woon fönüfan, ra küna lon kiänin we eü mwichen chon Kraist mi enlet rese fiti ekkewe lamalamen Kristentom. Iwe nge, a pwal lamot repwe limelim ekkena Chon Kraist mi kepit are “chon ewe ainangen Lefi.” A ina usun met ewe soufos Malakai a fen oesini: “I [Jiowa] epwe mot usun eman chon ketel mächä me eman chon limelim silifer. Epwe limeti chon ewe ainangen Lefi o alimöchüür usun eman a limeti kolt me silifer, tori repwe uwato ekewe asor mi fich ngeni ewe Samol mi Lapalap.” (Mal. 3:3) Jiowa a nöünöü Kraist Jises, ewe “chon künön ewe pwon,” le limeti ekkewe chon Israel lon kapas monomon.
4 Iwe nge, Kraist a küna pwe ekkena Chon Kraist mi kepit ra achocho le awora möngö lon pekin lükü lon fansoun mi fich fän iten chon le imwen Kot kewe. Seni 1879 feito, ra fen esilefeili ewe enlet usun Mwuun Kot seni ewe Paipel lon nöüch ei puk lon fansoun mi fich me fansoun ese fich. Jises a fen oesini pwe “lupwen a feito” pwe epwe etittina nöün kewe chon angang le “sopolon ei fansoun,” epwe küna emön slave mi awora “aner mongo lon fansoun fich.” Epwe erä pwe ena chon angang a pwapwa, iwe, epwe “seikata i won pisekin meinisin” woon fönüfan. (Mt. 24:3, 45-47, TF) Jises i möküren ewe mwichefelin Chon Kraist a nöünöü ena “chon angang mi allükülük o tipachem” le tümünü mettoch meinisin mi weneiti an we Mwu me woon fönüfan. A awora emmwen fän iten “chienan kewe” mi kepit me chiener kewe pwal “ekkoch siip” ren eü mwichen Sou Pwüngüpwüng.—Jon 10:16, TF.
Angangen Räs woon Fönüfan
5. Met ewe king a föri lon künaen Jon we längipwi?
5 Lon künaen Jon we längipwi, a küna pwal och mettoch ewe Messaia epwe föri lon “ränin ach Samol,” mwirin an a wiliti king lon 1914. Jon a makkeei: “Üa nenengeni o üa küna pwe a wor eu kuchu mi pwech, nge eman a mot won ewe kuchu usun itä nge eman nöün aramas, a mwärämwär epa mwärämwär seni kolt won möküran, a pwal amwöchü lepöün efoch kama mi ken.” (Pwar. 1:10; 14:14) Jon a rong än emön chonlängin Jiowa ereni ewe Chon Kinikin pwe epwe nöünöü nöün we kama pun “ewe fansoun kinikinin räs a war.”—Pwar. 14:15, 16.
6. Met Jises a apasa epwe fis mwirin och fansoun?
6 Ei “räsin fanüfan” a ächema ngenikich än Jises we kapas monomon usun ekkewe irään wit me pötöwölingaw. Jises a alöllööü pwisin i ngeni emön mwän a amorafeili pwikil mi mürinnö lon an tänipi, nge a ekiekin kinikin wit mi mürinnö, weween, “chon ewe Mwün Kot,” ekkewe Chon Kraist mi enlet ra kepit pwe repwe eti i le nemenem lon an we Mwu. Nge lon eü pwin, emön chon oput, ina i “ewe Tefil,” a amorafeili pötöwölingaw, weween, “nöün ewe mi Ngau.” Ewe chon amwora a ereni nöün kewe chon angang ar repwe likitalo ekkewe wit me pötöwölingaw ar repwe märfengen tori ewe fansoun kinikin, weween, lon “fansoun lesopolan.” Lon ena atun, epwe tinalo nöün kewe chonläng pwe repwe äimufeseni ekkewe wiich seni pötöwölingaw.—Mt. 13:24-30, 36-41.
7. Ifa usun Kraist a apwönüetä angangen “räsin fanufan”?
7 Ren pwönütään künaen Jon we, Jises a ekkemmweni ewe angangen kinikin woon unusen fönüfan. A poputä ewe “räsin fanüfan” ren ioifengenin lusun ekkewe 144,000, weween, “chon ewe Mwün Kot,” “ekewe wit” lon än Jises we kapas monomon. A kon pwäpwälo sokkofesenin chon Kraist mi enlet me iir mi chofona mwirin ewe Äeüin Maunen Fönüfan, iwe, a efisi ewe oruuen kinikinin ewe “räsin fanüfan,” weween, ionfengenin ekkewe ekkoch siip. Esap iir “nöün ewe Mwün Kot,” nge eü “mwich mi fokun chocho” mi nom fän ena Mwu. Ra kinikin seni “ainang, mwü, me kapas meinisin.” Ra anomuur fän nemenien Mwuun Messaia, weween, Kraist Jises me ekkewe 144,000 “chon pin” repwe eti i lon ena mwu lon läng.—Pwar. 7:9, 10; Tan. 7:13, 14, 18.
Emmwenin ekkewe Mwichefel
8, 9. (a) Met a pwäratä pwe Kraist ese chök nennengeni föfförün unusen ewe mwichefel, nge a pwal nennengeni nonnomun manauen emön me emön? (b) Met sokkun “alololun monomonen ekiekin Satan” sipwe tümünükich seni usun sia küna lon pekin taropwe 31?
8 Sia küna lon ewe lesen mwen ei ifa usun Kraist a etittinafichi nonnomun ekkewe mwichefel lon fansoun ekkewe aposel. Lon ach ei fansoun, “nemenem meinisin won läng me fanüfan” ra nom ren Kraist, nöüch Souemmwen, iwe, a nemeni ekkewe mwichefel me ekkewe chon emmweniir meinisin woon unusen fönüfan. (Mt. 28:18; Kol. 1:18) Jiowa a awisa ngeni pwe epwe “mokuren mwichefel o nemeni mettoch meinisin.” (Ef. 1:22) Lon wisan na, a küna mettoch meinisin mi fiffis lon ekkewe 100,000 som mwichefelin Chon Pwäratä Jiowa.
9 Jises a tinalo ei pworaus ngeni ewe mwichefelin Taiataira: “Iei alon ewe Nöün Kot, mesan ra wewe ngeni pulopulen ekkei, . . . ‘Üa silei om kewe föför.’” (Pwar. 2:18, 19) A apwüngü chon ena mwichefel ren manauer mi limengaw, iwe, a ereniir: “Ngang ewe eman mi silei ekiek me letipen aramas meinisin. Iwe, üpwe liwini ngeni eman me eman ükükün liwinin an föför.” (Pwar. 2:23) Ena pworaus a affata pwe Kraist ese chök nennengeni föfförün unusen ewe mwichefel, nge a pwal nennengeni nonnomun manauen emön me emön. Jises a apünga ekkewe Chon Kraist lon Taiataira pun rese “kaiö met ekewe ekoch ra aita ngeni ‘alololun monomonen ekiekin Satan.’” (Pwar. 2:24) Ikenäi, Jises a pwal pwapwaiti ekkewe kükkün me watte mi tümünüür seni “alololun monomonen ekiekin Satan” kewe mi nom woon ewe Internet, ekkoch video game mi akkachofesa, are ekiekingawen aramas. A ifa me pwapwaan Jises le küna öttüresin chommong Chon Kraist ikenäi ren ar pennüküolo manauer me achocho le älleasochisi an emmwen lon kinikinin manauer meinisin!
10. Met a liosuetä än Kraist ekkemmweni ekkewe elterin mwichefel, iwe nge, ifa ewe kokkot repwe mirititi?
10 Kraist a ekkemmweni ekkewe mwichefel woon fönüfan fän tong ren an awora ekkewe elter mi kefilitä. (Ef. 4:8, 11, 12) Lon fansoun ekkewe aposel, meinisin ekkewe souemmwen ra kepit ren än Kot manaman. Ewe puken Pwäratä a äweweei pwe ra usun chök ekkewe füü lepöüfichin Kraist. (Pwar. 1:16, 20) Ikenäi, lap ngeni ekkewe elterin mwichefel, iir seni ekkewe ekkoch siip. Mwirin än ewe mwichen elter iotekiir me filiretä fän emmwenien än Kot we manaman, iwe, sia tongeni lükü pwe ra pwal nom fän emmwenien Kraist. (Fof. 20:28) Iwe nge, ra mirititi pwe Kraist a akkota pwe ewe Mwichen Sou Pwüngüpwüng me lein ekkewe Chon Kraist mi kepit repwe ekkemmweni nöün kewe chon käeö woon fönüfan.—Älleani Fofor 15:6, 28-30.
“Kopwe Etto, Äm Samol Jesus”
11. Pwata sia mwötöres le küna än nöüch we Souemmwen mwittir etto?
11 Lon än Jises pwäratä ngeni Jon, fän fite a erä pwe epwe mwittir feito. (Pwar. 2:16; 3:11; 22:7, 20) A ffat pwe epwe feito pwe epwe apwüngü Papilon mi Lapalap me unusen än Setan we otot mi ngaw. (2 Tes. 1:7, 8) Le chinnapen Jon we, a mwötöres le küna pwönütään meinisin ekkena oesini mi amwarar, iwe, a erä: “Amen! Kopwe etto äm Samol Jesus!” Kich mi nonnom le sopwoloon ei otot mi ngaw sia pwal äneänei le küna än nöüch na Souemmwen me King etto fän pöchökkülen an na Mwu pwe epwe epinalo iten Seman we me ännetatä pwüngün an nemenem.
12. Ifa ewe angang Kraist epwe äwesalo me mwen pichiloon ekkewe äsepwälin kata?
12 Mwen än Jises epwe ataielo än Setan mwicheich woon fönüfan, repwe akkomw mechen ekkewe säingonoon me lein ekkewe 144,000 chon Israelin Kot. Ewe Paipel a affata pwe resap mwo pichilo ekkewe äsepwäl repwe atai än Setan otot me mwen epwe unus mechenin ekkewe 144,000.—Pwar. 7:1-4.
13. Ifa usun än Kraist nonnom epwe pwäpwälo atun ewe äeüin kinikinin ewe “riaffou lapalap”?
13 Än Kraist ‘nonnom’ seni 1914 a monomonolo seni lap ngeni chon fönüfan. (2 Pit. 3:3, 4, TF) Iwe nge, ekiselo chök, än Jises nonnom epwele pwäpwälo ren an apwönüetä än Jiowa kewe kapwüng woon meinisin kinikinin än Setan otot. Ninniiloon “ewe aramas mi Tipis,” weween, ekkewe nöüwisin Kristentom, epwe wesewesen ännetatä ‘lingen än [Jises] war.’ (Älleani 2 Tesalonika 2:3, 8.) Epwe awora pisekin ännet mi lüküchar pwe Kraist a fen wiseni wisan we, wisen Soukapwüng mi kefilitä me ren Jiowa. (Älleani 2 Timoti 4:1.) Akkomw, epwe talo Kristentom, ewe kinikin mi kon ngaw seni meinisin lon Papilon mi Lapalap, weween, ewe mwicheichen lamalam chofona meinisin mi liosutiw ren emön fin lisowu. Jiowa epwe atolonga lon letipen ekkewe nöüwisin mwu pwe repwe atatakkisielo ena fin lisowu lon kapas monomon. (Pwar. 17:15-18) Epwe ina poputään ewe “riaffou lapalap.”—Mt. 24:21, TF.
14. (a) Pwata epwe mwochomwocholo ewe äeüin kinikinin ewe riäfföü mi lapalap? (b) Epwe met weween “ewe asisilen Noun Aramas” ngeni nöün Jiowa kewe?
14 Jises a apasa pwe epwe mwochomwocholo ränin ewe riäfföü mi lapalap “pokiten chokewe a filiiretä,” weween, ekkewe lusun Chon Kraist mi kepit mi chüen nonnom woon fönüfan. (Mt. 24:22) Jiowa esap mut ngeni kataan lamalam chofona an epwe arosalo ekkewe Chon Kraist mi kepit me chiener kewe ekkoch siip. Jises a pwal apasa pwe “mürin ewe fansoun riaföü,” epwe wor esissil lon ewe akkar, maram, me ekkewe füü, iwe, “asisilen Nöün Aramas epwe pwäla fän läng.” Ei mettoch epwe efisi än mwuun fönüfan “repwe kechü.” Nge esap ina usun ekkewe mi kepit mi eäni äpilükülükün manau lon läng me chiener kewe mi eäni äpilükülükün manau woon fönüfan. Repwe ‘ütä o awenatä mökürer, pun ar küna manau a arapoto.’—Mt. 24:29, 30; Luk 21:25-28.
15. Ifa ewe angang Kraist epwe föri atun epwe feito?
15 Me mwen än ewe Nöün aramas epwe unusen win lon an we maun, epwe wor pwal och weween an feito. A oesini: “Lupwen Nöün Aramas epwe war lon lingan o chon läng meinisin repwe eti, epwe mot won an lenien motun king mi ling. Iwe, chon ekewe mwü meinisin repwe mwichfengen me mwan. Mürin, epwe aimwüfeseniir lon ruu mwich, usun eman chon fol man a aimwüfeseni ekewe sip seni ekewe kuuch. Epwe anomu ekewe sip lepelifichin, nge ekewe kuuch epwe anomur lepelimöngun.” (Mt. 25:31-33) A kapas usun warotoon Kraist lon ewe wis Sou Kapwüng pwe epwe äimufeseni “mwü meinisin” lon ruu mwich, weween, “ekewe sip,” iir kewe mi älisi pwiin kewe (ekkewe Chon Kraist mi kepit woon fönüfan) me “ekewe kuuch,” chokkewe “rese aleasochis ngeni ewe Pworausen Manau usun ach Samol Jises.” (2 Tes. 1:7, 8) Ekkewe siip, weween, “ekkewe chon pung” repwe küna “manau esemuch” woon fönüfan, nge ekkewe kuuch, “repwe chok feilo lon ninni esemuch,” are kitetter.—Mt. 25:34, 40, 41, 45, 46, TF.
Jises A Win
16. Ifa usun Kraist, nöüch we Souemmwen, epwe win le maun?
16 Atun meinisin chienen Jises kewe samol fel ra fen wes le mechen me ekkewe siip ra sillelo me nom peliefichin pwe repwe küna amanau, Kraist a tongeni feilo me “win.” (Pwar. 5:9, 10; 6:2) Jises, meilapen ekkewe chonläng mi pöchökkül fengen me pwiin kewe mi manausefäl, repwe ataielo unusen än Setan otot lon pekin mwu, sounfiu, me sopai woon fönüfan. (Pwar. 2:26, 27; 19:11-21) Kraist epwe unusen win atun epwe ataielo än Setan otot mi ngaw. Iwe, epwe kalapusei Setan me nöün kewe chonläng mi ngaw lon apis ükükün engeröü ier.—Pwar. 20:1-3.
17. Ifa usun Kraist epwe emmweni ekkewe ekkoch siip atun ewe Engeröü Ier, iwe, met sipwe üppos le föri?
17 Atun Jon a fos usun ewe “mwich mi fokun chocho” seni ekkewe pwal ekkoch siip, chokkewe repwe manauewu seni ewe riäfföü mi lapalap, a pwal oesini pwe “ewe Lam mi nom lukanapan mwen ewe leenien motun king epwe pwisin tumunur, o epwe emmwenir ngeni ekkewe chanutuun konikin manau.” (Pwar. 7:9, 17) Pwüngün, le atun än Kraist Nemenem ükükün Engeröü Ier, epwe sopwelo le ekkemmweni ekkewe ekkoch siip, chokkewe mi enletin aüseling ngeni leüwan, iwe, epwe emmweniir ngeni manau esemuch. (Älleani Jon 10:16, 26-28.) Amwo sipwe tuppwöl le tattapwelo mwirin nöüch we Souemmwen iei me pwal tori lon än Jiowa we otot sefö!
Enniwilin Ei Lesen
• Met Kraist a föri mwirin an poputä le nemenem?
• Iö kewe Jises a nöünöü le ekkemmweni ekkewe mwichefel?
• Met weween pwe Kraist nöüch we Souemmwen epwe feito?
• Ifa usun Kraist epwe sopwelo le ekkemmwenikich lon ewe otot sefö?
[Ekkewe Kapas Eis Fan Iten Ewe Lesen]
[Sasing lon pekin taropwe 32]
Än Kraist nonnom epwe pwälo ren taloon än Setan otot