“Iö A Silei Ekiekin Ewe Samol?”

“‘Iö a silei ekiekin ewe Samol? Iö a tongeni öüröüra?’ Nge kich sia eäni ekiekin Kraist.”​—1 KOR. 2:16.

1, 2. (a) Ifa eü mettoch a weires ngeni aramas? (b) Met sipwe chechchemeni usun ekiekich me ekiekin Jiowa?

 KA FEN meefi pwe a weires om kopwe weweiti ekiekin aramas? Neman ka kerän chök pwüpwülü, me ka meefi pwe kese tongeni unusen weweiti ekiekin pwülüwom we. Pwüngün, a pwal mwo nge sokkofesen än mwän me fefin ekiek me fos. Lon ekkoch fönü, a sokkofesen napanapen än mwän me fefin fos lon fosun fönüer! Pwal eü, sokkofesenin eöreni me kapas a efisatä sokkofesenin ekiekin me föfförün aramas. Iwe nge, ewin om sissileelo aramas, a ina me lapoloon om weweiti napanapen ekiekiir.

² Ina minne, sisap nenneiruk pwe ekiekin Jiowa a wesewesen tottowau seni ekiekich. A ereni chon Israel ren nöün we soufos Aisea: “Ai ekiek resap wewe ngeni ämi ekiek kana, nge ämi al resap wewe ngeni ai al kana.” Mwirin, a äweweei ei pworaus ren an erä: “Pun usun läng a tekia seni fanüfan, iei usun ai al ra tekia seni ämi al kana, nge ai ekiek seni ämi ekiek kana.”​—Ais. 55:8, 9.

3. Ikkefa ekkewe ruu mettoch sipwe föri pwe sipwe tongeni “chiechi ngeni” Jiowa?

³ Iwe, itä weween nge sisap achocho le weweiti ekiekin Jiowa? Aapw. Inaamwo ika sisap tongeni unusen weweiti meinisin ekiekin Jiowa kewe, nge ewe Paipel a pesekich pwe sipwe “chiechi ngeni” Jiowa. (Älleani Kölfel 25:14, TF; Än Salomon Fos 3:32.) Sipwe tongeni arap ngeni Jiowa ren ach äfänni pworausen föfförün kewe lon an we Kapas, ewe Paipel. (Kölf. 28:5) Sipwe pwal tongeni arap ngeni Jiowa ren ach sileelo “ekiekin Kraist,” ewe mi “lapalapeni lapalapen Kot.” (1 Kor. 2:16; Kol. 1:15) Ren ach awora fansoun le käeö ekkewe pworaus seni Paipel me ekkekiloneer, sia tongeni poputä le weweiti ekiekin Kot kewe me ekkewe napanap mi nom ren.

Tümünü Seni Ekiek mi Mwääl

4, 5. (a) Ifa ewe ekiek mi mwääl sipwe tümünükich seni? Äweweei. (b) Ifa än chon Israel ekiek mwääl?

⁴ Atun sia ekilonei föfförün Jiowa kewe, sipwe tümünü pwe site apwüngü Kot me ren ekiekin aramas. Jiowa a kapas usun ei ekiek mwääl lon Kölfel 50:21: “Ka ekieki pwe ngang usun chök en.” Iei alon emön sou tipatchem 175 ier loom: “Aramas ra kan ekiekin apwüngü Kot me ren pwisin ar ekiek me ar kewe allük.”

⁵ Sipwe tümünü pwe ekiekich me mochenich resap anapanapa ekiekich usun Jiowa. Pwata? Pun atun sia käeö ewe Paipel, eli esap pwüng me rech ekkoch föfförün Jiowa kewe pun mi chök aükük ekiekich me ese unusöch. A ina usun chon Israel loom, ina popun, a mwääl ar ekiek usun föfförün Jiowa ngeniir. Nengeni met Jiowa a ereniir: “Oua apasa, ‘Än ewe Samol föför esap pwüng.’ Iwe, oupwe rongorong, ämi chon Israel. Ifa usun, ngang ewe eman esap föri mine a pwüng, nge sap fen ämi?”​—Is. 18:25.

6. Ifa ewe lesen Jop a käeö, iwe, ifa usun sia tongeni feiöch seni minne a fis ngeni?

 ⁶ Ach esilla pwe mi aükük are fen mwääl ekiekich epwe älisikich le tümünü pwe site apwüngü Jiowa me ren pwisin ekiekich usun met mi pwüng me mwääl. A lamot pwe Jop epwe käeö ei lesen. Atun a küna riäfföü, a fokkun letipengaw me ekieki chök pwisin i. Ese chechchemeni pwe an kewe osukosuk ra lamot kisikis seni mettochun Kot. Nge Jiowa a älisi le äwena ekiekin. Jiowa a eisini Jop lap seni 70 kapas eis mi sokkofesen, nge tufichingawen Jop le pölüweniir a affata nafangawen an wewe. Iwe, Jop a tipetekison me ekkesiwili ekiekin.​—Älleani Hiop 42: 1-6.

Eäni “Ekiekin Kraist”

7. Pwata ach etittina föfförün Jises kewe a älisikich le weweiti ekiekin Jiowa?

⁷ Jises a unusen äppirüfichi Seman we lon meinisin minne a apasa me föri. (Jon 14:9) Ina minne, ach etittinafichi föfförün Jises kewe epwe älisikich le weweiti än Jiowa ekiek. (Rom 15:5; Fil. 2:5) Iwe, iei sipwele etittina ruu pworaus lon puken Kapas Allim.

8, 9. Me ren Jon 6:1-5, ifa ewe osukosuk a efisi än Jises kapas eis ngeni Filip, iwe, pwata Jises a föri ena?

⁸ Anchangei mwo ei pworaus. Me mwen chök ewe Pasofer lon 32 C.E, nöün Jises kewe aposel ra kerän chök liwin seni ar afalafal mi amwarar lon Kalili. Pokiten ra pekkus, Jises a uweirelo ngeni eü leeni orossetin ötiwefengin ewe noomun Kalili. Iwe nge, ngeröün aramas ra tapwelo mwiriir ikena. A ppiitä eü osukosuk mwirin än Jises apöchökülatä chommong me asukuler. Ifa usun ekkeei aramas repwe künökün ener lon ei leeni mi towau seni sopw? Jises a mirititi ar osupwang, iwe, pokiten Filip i chon ena leeni, Jises a eisini: “Ia sipwe tongeni kamö mongö me ie, pwe epwe naf ach sipwe amongöni ekei aramas meinisin?”​—Jon 6:1-5.

⁹ Pwata Jises a eisini Filip ena? Itä Jises ese silei met epwe föri? Aapw. Met a wesewesen ekieki? Ewe aposel Jon a pwal nom, iwe, a äweweei: “Jesus a eäni ei kapas ais an epwe sotuni Filip, pun i a fen silei met epwe föri.” (Jon 6:6) Jises a ppii ika ifa ükükün feffeitään lüküen nöün kana chon käeö. Ren an eäni ena kapas eis, a achchüngü ekiekiir me atufichiir le pwäri lüküer usun met a tongeni föri. Nge solapan, pun ese naf ar lükü nge a pwal ffat üküngawen ar ekiek. (Älleani Jon 6:7-9.) Iwe, Jises a pwäri pwe a tongeni föri och mettoch rese mwo nge ekieki. A amöngööni ngeröün aramas mi echik ren eü manaman.​—Jon 6: 10-13.

10-12. (a) Akkomwan, pwata Jises ese mwittir atufichi än ewe fin Krik we tingor? Äweweei. (b) Met sipwele etittina?

¹⁰ Eli ei pworaus epwe älisikich le weweiti ekiekin Jises lon pwal eü fansoun. Mwirin chök än Jises we amöngööni ewe pwiin aramas, iir me nöün kewe aposel ra säi ngeni ennefenin kiänin Israel orun Tyre me Sidon. Me ikkena ie, ra chuuri emön fin Krik mi tingormaü ngeni Jises pwe epwe echikaratä nöün we nengngin. Akkomwan, Jises ese äteneki ena fefin. Nge neminna a achocho le tingor, iwe, Jises a ereni: “Sipwe akomwen amongöü ekewe semirit, pun esap pwüng ach sipwe angei anen ekewe semirit o mone ngeni ekewe kolak.”​—Mark 7:24-27.

¹¹ Me mwan, pwata Jises ese älisi neminna? Itä a sotuni, usun met a föri ngeni Filip, pwe epwe silei met neminna epwe föri me atufichi le pwäri an lükü? Inaamwo ika ena wokisin ese affata napanapen ngingiin, nge ese pinei neminnewe le tingor. Än Jises nöünöü ewe itiitin kapas kükkün “kolak” a  pwäratä kirekiröch. Eli Jises a usun ekkan sam me in rese mwittir pwäri pwe repwe apwönüetä än nöür we tingor pun ra sotuni ika a wesewesen mochen angei minne a tingor. Atun neminna a pwäri an lükü, iwe, Jises a atufichi an tingor.​—Älleani Mark 7:28-30.

¹² Ekkeei ruu pworaus ra älisikich le mirititi “ekiekin Kraist.” Iei sipwe ppii ifa usun ekkeei pworaus ra tongeni älisikich le wewefichiti pwisin ekiekin Jiowa.

Föfförün Jiowa Ngeni Moses

13. Ifa usun ach alapalo sileach usun ekiekin Jises epwe älisikich?

¹³ Ach alapalo sileach usun ekiekin Jises epwe älisikich le wewefichiti ekkoch wokisin mi weires ach sipwe weweitiir. Äwewe chök, sipwe ppii alon Jiowa ngeni Moses mwirin än ekkewe chon Israel föratä emön liosun kou mi fför seni kolt pwe repwe fel ngeni. Kot a apasa: “Üa küna ekei aramas pwe ir aramas mi tipepöchökül o ülöförea. Iei mine kopwe mwüt ngeniei pwe üpwe aroserela, pun üa fokun song ngeniir. Mürin üpwe föri senuk eu mwichen aramas mi chomong.”​—Eks. 32:9, 10.

14. Met meefien Moses usun alon Jiowa?

¹⁴ Ena wokisin a pwal erä: “Moses a tütüngor ngeni an we Kot ewe Samol mi Lapalap fän iten ekewe chon Israel o apasa, ‘Ai Samol mi Lapalap, pwota ka fokun song ngeni noum kei aramas ka emwenirewu seni lon ewe fanü Isip ren om manaman, pwal ren poum mi fokun manaman? Ifa usun, ka mochen pwe ekewe chon Isip repwe apasa, “A chök emwenirewu, pun a ekiekin afeiengaueer. A mochen nirela won ekewe chuk o aroserela seni won fanüfan?” Kopwe likitala om song mi pöchökül, kopwe pwal siwili om ekiekin afeiengaua noum kewe aramas. Kopwe chechemeni noum kewe chon angang Apraham, Isaak, me Israel, pun ka pwon fän akapel ngeniir fän püsin itom o üreniir pwe kopwe achomongala mwirimwirir usun fün läng, kopwe pwal ngeni mwirimwirir unusen ewe fanü, pwe repwe fanüeni tori feilfeilachök usun ka fen pwon ngeniir.’” Mürin, ewe Samol mi Lapalap a siwili an ekiekin afeiengaua nöün aramas.”​—Eks. 32:11-14. *

15, 16. (a) Met Moses a tufichin föri pokiten minne Jiowa a apasa? (b) Met weween än Jiowa “siwili an ekiek”?

¹⁵ Itä a lamot pwe Moses epwe apwüngü ekiekin Jiowa? Aapw! Inaamwo ika Jiowa a fen äweweei met a ekiekin föri, nge esap ina  säingonoon an kapwüng. Weween, lon na atun, Jiowa a sotuni Moses usun chök Jises a sotuni Filip me ewe fin Krik. A mut ngeni Moses an epwe pwäri an ekiek. * Jiowa a filatä Moses pwe epwe chon afför lefiler me chon Israel, iwe, a chüen süföliti wisen Moses na. Itä Moses epwe kkuf ren an letipengaw? Itä epwe pesei Jiowa le likitalo chon Israel me försefäli eü mwu mi pöchökkül seni pwisin mwirimwirin kewe?

¹⁶ Än Moses kapas a pwäri an lükü me lükülük woon än Jiowa pwüng. An memmeef a änneta pwe ese achöchööi pwisin meefian, nge a chchüngü iten Jiowa we. Ese mochen pwe Jiowa epwe itengaw. A ina usun än Moses pwäratä pwe a weweiti ‘ekiekin Jiowa’ usun ena osukosuk. (1 Kor. 2:16) Met mwiriloon? Pokiten Jiowa ese wesewesen apwüngalo met epwe föri, ewe Paipel a apasa pwe a ‘siwili an ekiek.’ Lon fosun Ipru, a tongeni wewe ngeni pwe inaamwo ika Jiowa a ekiekin efeiengawa unusen ewe mwu, nge ese föri.

Föfförün Jiowa Ngeni Eperiam

17. Ifa usun Jiowa a pwäri watteen an mosonottam ngeni Eperiam?

¹⁷ Än Eperiam tingor fän iten Sotom, ina pwal eü pworaus usun än Jiowa mut ngeni nöün kewe chon angang le pwäratä ar lükü me lükülük. Lon ena pworaus, Jiowa a pwäratä watteen an mosonottam ren an mut ngeni Eperiam an epwe kapas eis ngeni fän walu. Lon eü atun, iei alon Eperiam ngeni Jiowa: “Ese tufich om kopwe föri ina usun, pwe kopwe niela ekewe chon pwüng fiti chon pwüngingau, pwe chon pwüng repwe chök wewe ngeni chon pwüngingau. Ese tufich om kopwe föri ina usun. Ifa usun, ewe Souapwüngün unusen fanüfan esap eäni apwüng fän pwüng?”​—Ken. 18:22-33.

18. Met sia käeö seni föfförün Jiowa ngeni Eperiam?

¹⁸ Met sia käeö usun ekiekin Jiowa seni ei pworaus? Itä mi lamot pwe Eperiam epwe äweweei ngeni Jiowa ifa usun epwe föri minne mi pwüng? Aapw. Pwüngün pwe Jiowa a chök tongeni ereni Eperiam me mwan ewe popun a filatä met epwe föri. Iwe nge, ren an mut ngeni Eperiam an epwe eäni ekkena kapas eis, a awora ngeni fansoun le etiwa me weweiti ekiekin Jiowa. A pwal mut ngeni Eperiam an epwe weweiti ükükün watteen an kirekiröch me pwüng. Föfförün Jiowa ngeni Eperiam a ännetatä pwe i chiechian.​—Ais. 41:8; Jem. 2: 23.

Ekkewe Lesen fän Itach

19. Ifa usun sipwe äppirü Jop?

¹⁹ Met sia käeö usun ‘ekiekin Jiowa’? Sipwe mut ngeni än Kot we Kapas an epwe anapanapa ach tufichin weweöchüti än Jiowa ekiek. Sisap fokkun apwüngü Jiowa me ren pwisin ach ekiek mi üküngaw. Jop a apasa: “Kot esap eman aramas usun ngang pwe üpwe tongeni pälüeni, ika aipwe tongeni kapwüngfengen.” (Hiop 9: 32) Atun  sia poputä le weweiti ekiekin Jiowa, sipwe chchüng usun chök Jop le erä: “Nengeni, ekei lapalap ra chök eu kükün kinikinin an kewe föför. A chök eu kükün ngüngü mine sia rongorong seni Kot. Nge iö a tongeni weweiti pöchökülen an manaman?”​—Hiop 26:14.

20. Met sipwe föri ika sise weweiti eü pworaus lon Paipel?

²⁰ Atun sia älleani Paipel, met sipwe föri ika sise weweiti och pworaus, äkkäeüin, ika a weneiti ekiekin Jiowa? Mwirin ach resin kütta pölüwan nge sise küna, iwe, sia tongeni erä pwe ina eü sossotun ach lükülük woon Jiowa. Chechchemeni pwe ena sokkun pworaus a atufichikich le pwäri ach lükülük woon ekkewe napanap mi nom ren Jiowa. Sipwe tipetekison le mirititi pwe sise tongeni weweiti mettoch meinisin Jiowa a föri. (SalAf. 11:5) Epwe amwökütükich le tipeeü ngeni alon ewe aposel Paul ei: “A ifan me watten wöün Kot! A ifan me alololun an tipachem me silelap! Iö a tongeni awewei an apwüng? Iö a tongeni weweiti an kewe föför? Usun a mak lon ekewe Toropwe mi Pin, ‘Iö a silei ekiekin ewe Samol? Iö a tongeni öüröüra? Iö a ngeni och mettoch, pwe epwe wisen aliwinisefäli?’ Pun Kot a föri mettoch meinisin, mettoch meinisin ra manau ren o nom fänäsengesin. Kot epwe ling tori feilfeilachök! Amen.”​—Rom 11:33-36.

[Ekkewe pwóróus fan]

En mi Chechchemeni?

• Met epwe älisikich pwe sisap apwüngü Jiowa me ren pwisin ach ekiek usun met mi pwüng me mwääl?

• Ifa usun ach weweiti föfförün Jises a älisikich le “chiechi ngeni” Jiowa?

• Ikkefa ekkewe lesen ka käeö seni än Jiowa pworausfengen me Moses me Eperiam?

[Ekkewe Kapas Eis Fan Iten Ewe Lesen]

[Ekkewe sasing lón pekin taropwe 13]

Met sia käeö usun ekiekin Jiowa ren föfförün ngeni Moses me Eperiam?