Kükkütta Akkomw “An Pung”

“Nge oupwe kuttafichi lom an mu o an pung; iwe, ekkeei mettoch meinisin repwap kapach ngenikemi.”​—MAT. 6:33, TF.

1, 2. Met weween än Kot pwüng, iwe, met a longolong woon?

 “KÜTTAFICHI lom an mu.” (Mt. 6:33) Chon Pwäratä Jiowa ikenäi ra silefichi än Jises ei kapasen pesepes lon an afalafal woon ewe Chuuk. Lon meinisin kinikinin manauach, sia achocho le pwäri pwe sia tongei me tuppwöl ngeni ena Mwu. Nge sipwe pwal chechchemeni ewe oruuen kinikinin ena wokisin mi erä, “o an pung.” Met weween än Kot pwüng, iwe, met weween ach sipwe küttafichi akkomw?

² Jiowa, ewe Chon Föratä, a wor an pwüüng le filatä met mi öch me ngaw, me met mi pwüng me mwääl. (Pwar. 4:11) Iwe nge, än Kot pwüng ese äweires are titchikietiw chommong sokkopaten allük. Nge a longolong woon met sokkun Kot i me ekkewe napanap mi nom ren, usun choweän pwüng, tong, tipatchem, me manaman. Än Kot pwüng a riri ngeni letipan me an akkot. A kapachelong met a kütta seni chokkewe mi mochen angang ngeni.

3. (a) Met weween ach kütta akkomw än Kot pwüng? (b) Pwata sipwe etipeeüfengeni manauach ngeni ekiekin Jiowa usun minne mi pwüng?

³ Met weween ach kütta akkomw än Kot pwüng? A wewe ngeni ach föri letipen Kot pwe sipwe apwapwaai i. A pwal wewe ngeni ach achocho le manaueni manauach me ren ekiekin Kot mi unusöch nge esap ren pwisin ekiekich. (Älleani Rom 12:2.) A riri  ngeni ach pacheöch ngeni Jiowa. Sap minne sipwe älleasochisi an kewe allük pokiten chök ach niueiti liwinin älleasolap. Nge ach tongei Kot a amwökütükich pwe sipwe apwapwaai i ren ach etipeeü manauach ngeni ekiekin usun minne mi pwüng me mwääl, nge esap pwisin ekiekich. Sia mirititi pwe mei pwüng ach sipwe föri ena pun ina popun sia fförütä. Sipwe usun Jises Kraist, ewe Kingen än Kot we Mwu, le tongei minne mi pwüng.​—Ipru 1:9.

4. Pwata a fokkun lamot ach sipwe kütta än Kot we pwüng?

⁴ A ifa me aüchean ach sipwe kütta akkomw än Jiowa pwüng? Sipwe etittina ei pworaus: Ewe äkkäeüin sossot lon ewe mälämälen Ichen a longolong woon än Atam me If repwe etiwa ika resap etiwa än Jiowa pwüüng le filatä met mi pwüng me mwääl. (Ken. 2:17; 3:5) Ar filingaw a atoto ngeni mwirimwiriir kewe riäfföü me mälo. (Rom 5:12) Iwe nge, än Kot we Kapas a apasa: “Eman mi eäni pwüng me kirikiröch epwe manauatam, epwe küna pwüng me iteüöch.” (SalF. 21:21) Pwüngün, ach kütta akkomw än Kot pwüng a emmwen ngeni ach ririöch ngeni Jiowa me ach amanau.​—Rom 3:23, 24.

Feiengawen Ach Apwönüetä Pwisin Ach Pwüng

5. Ifa eü minen efeiengaw sipwe tümünükich seni?

⁵ Lon nöün Paul we taropwe ngeni ekkewe Chon Kraist lon Rom, a menlapei lamoten sipwe tümünükich seni eü minen efeiengaw ika sipwe kütta akkomw än Kot pwüng. Iei alon Paul usun chienan kewe chon Jus: “Ua tongeni pwarata usur pwe ra achocho fan asengesin Kot, nge sap ren tipatchem. Pun rese mo sinei ewe pung mi popu seni Kot, o ra sotuni apwonueta pwisin ar pung, iwe, rese mo alleasochisi ewe pungun Kot.” (Rom 10:2, 3, TF) Me ren Paul, chon ewe lamalamen Jus rese weweiti pwüngün Kot pun ra sotun apwönüetä pwisin ar pwüng.

6. Ifa eü ekiek mi mwääl sipwe tümünükich seni, iwe, pwata?

⁶ Ese pwüng ach sipwe sotun apwönüetä pwisin ach pwüng ren ach ekiekin akkuf me apöpökich ngeni ekkewe ekkoch lon ach angang ngeni Kot. Ena sokkun ekiekmwääl a mecheresin emmwen ngeni ach sipwe kon ekieki pwisin ach tipatchem me tufich. Nge ika sia ina usun, sia mönüki än Jiowa pwüng. (Kal. 6:3, 4) Ach föri minne mi pwüng epwe pop seni ach tongei Jiowa. Ika sia sotun apwönüetä pwisin ach pwüng, iwe, mi mwääl ach erä pwe sia tongei Kot.​—Älleani Luk 16:15.

7. Ifa usun Jises a äweweei mwäällin än aramas kon lükü pwisin ar pwüng?

⁷ Jises a lolileniesini chokkewe “mi lükü püsin ar pwüng o aücheangaua aramas.” A äweweei mwäällin ar ekieki pwisin ar pwüng ren an ei kapas äwewe: “A wor ruoman mwän mi feitä lon ewe imwenfel pwe repwe iotek, eman, eman Farisi, nge ewe eman, eman chon ioni takises. Iwe, ewe Farisi a ütä, a iotek lon lelukan o üra, ‘Ai Kot, üa kilisou ngonuk, pwe üsap usun ekewe ekoch aramas, ir chon solä, chon pwüngingau, chon lisowu, ika fen pwal usun ei chon ioni takises. Ngang üa echikefel fän ruu lon eu wiik, üa pwal fangala leengolun meinisin minne üa eäni.’ Nge ewe chon ioni takises a ütä me toau, esap fen mwo nge netä läng, nge a pisiri fän mwärin o apasa, ‘Ai Kot, kopwe ümöümöch ngeniei, ngang eman chon tipis.’” Jesus a apasa, “Üpwe ürenikemi, ei chon ioni takises a küna pwüng fän mesen Kot lupwen a liwinla lon imwan, nge sap ewe Farisi. Pun iö a püsin atekiatä epwe küna tekison, nge iö  a püsin atekisonatiu epwe küna tekia.”​—Luk 18:9-14.

Sisap ‘Ekiekin Tipetekia seni Mine a Fich’

8, 9. Met weween ach ‘ekiekin tipetekia seni mine a fichitikich,’ me met mwiriloon?

⁸ Rom 12:3a a äweweei usun pwal eü minen efeiengaw sipwe tümünükich seni, a erä: “Ousap ekiekin tipetekia seni mine a fichitikemi, nge oupwe tipetekison lon ämi ekiek.” Lon SalAf. 7:20, ewe soumak a äiti ngenikich ewe popun sipwe tümünükich seni ena ekiek, a erä: “Ellet, esap fokun wor eman chon pwüng won fanüfan a chök föri mine a pwüng fansoun meinisin, nge esap wor an tipis.” Emön mi kon ‘ekiekin tipetekia seni mine a fichiti’ a apwüngü ekkewe ekkoch ren pwisin ekiekin usun met mi pwüng me mwääl. Nge ren an föri ena, ese mirititi pwe a ätekiatä ekiekin woon ekiekin Jiowa, ina minne, me ren Kot, emönna ese fokkun pwüng.

⁹ Ika sia ‘ekiekin tipetekia seni mine a fichitikich,’ a tongeni efisi ach tipemwaramwareiti napanapen än Jiowa ataweei osukosuk. Iwe nge, sipwe chechchemeni pwe ika sia tipemwaramwareiti pwüngün än Jiowa kefil, weween, sia poputä le ätekiatä pwisin ekiekich usun minne mi pwüng me mwääl woon ekiekin Jiowa. Epwe usun itä nge sia sotuni Jiowa me apwüngü ren pwisin ekiekich usun met mi pwüng me mwääl. Nge Jiowa chök ewe a wor an pwüüng le filatä met mi pwüng me mwääl nge esap kich!​—Rom 14:10.

10. Ren met a fis ngeni Jop, met epwe tongeni efisi ach sipwe apwüngü Kot?

¹⁰ Inaamwo ika esor emön leich a mochen apwüngü Kot, nge pokiten sise unusöch, a tongeni fis atun sia küna mettoch ese pwüng are sia pwisin küna riäfföü. Pwal mwo nge ewe mwän mi tuppwöl Jop a mwäällilo. Akkomw, Kot a äweweei pwe Jop “a pwüng o wenechar, a niuokusiti Kot o kul seni föför mi ngau.” (Hiop 1:1) Iwe nge, atun sossotun Jop kewe ra chök ouwotapw, a ekieki pwe ese pwüng an küna ekkena riäfföü. Ena mettoch a amwökütü Jop le apasa “pwe i a pwüng, nge Kot a mwäl.” (Hiop 32:1, 2) A lamot pwe emön epwe äwenechara ekiekin Jop. Iwe, sisap mäirü ika epwe pwal ina usuch fän ekkoch. Ika a fis ena, met epwe tongeni älisikich le äwenasefäli ach ekiek?

Fän Chommong Sise Silei Titchikin ewe Pworaus

11, 12. (a) Met sipwe chechchemeni ika sia meefi pwe ese pwüng och mettoch? (b) Pwata ekkoch ra meefi pwe a fis och mettoch ese pwüng lon än Jises we kapas äwewe usun ekkewe chon angang lon ewe tänipi?

¹¹ Sipwe äkkäeüin chechchemeni pwe fän chommong, sise silei titchikin ewe pworaus. Äwewe chök, Jop ese silei usun än Setan tipimwääl ngeni atun ekkewe chonläng ra mwichfengen lon läng. (Hiop 1:7-12; 2:1-6) Ese mirititi pwe wesewesen efisien Setan an kewe osukosuk. Ese ffat ika Jop  a silei iö ena Setan! Ina minne, a mwääl le ekieki pwe an kewe osukosuk, efisien Kot. A mecheres ach sipwe ekiek mwääl atun sise silei titchikin ewe pworaus.

¹² Äwewe chök, sipwe ppii än Jises we kapas monomon usun ekkewe chon angang lon ewe tänipi. (Älleani Mattu 20:8-16.) Jises a erä pwe minne kä an ewe tänipi a chök alöllööi liwinin nöün kewe chon angang, ese lifilifil ika ra angang unusen rän ika eü chök awa. Met meefiom usun ena pworaus? Mi pwüng me reom? Eli, ka mwittir meefi attongen ekkewe ra angang unusen rän fän akkar. Me reom, a pwüngü ngeniir pwe epwe watte liwiniir seni ekkewe ra kerän angang! Me ren ena ekiek, usun itä nge esor än ewe masta tong me ese pwüng napanapen an peioffei nöün kana chon angang. Usun itä a pwal mwo nge äeämwäälli an nemenem ren napanapen an pölüweni än ekkewe chon angang ngününgününgaw. Nge sia weweiti titchikin ena pworaus?

13. Ifa pwal eü äweween än Jises we kapas äwewe usun ekkewe chon angang lon ewe tänipi?

¹³ Sipwe pwal ekieki usun ei pworaus. Esor tipemwaramwar pwe ewe masta a esilla lamoten än ekkewe chon angang meinisin repwe amöngööni chon ar famili. Lon ränin Jises we, chon angang ra kan peiof iteiten rän, iwe, ar kewe famili ra tufich seni. Ekieki usun chokkewe ewe masta a kerän küner lekuniol, ina popun, ra chök angang eü awa. Ra fokkun mochen angang me witiwit unusen rän pwe repwe künökün ar angang. Nge rese tufichin amöngööni chon ar famili ren peioffur lon eü chök awa. (Mt. 20:1-7) Esor popun sipwe ekieki pwe ra chipwang le angang pun sap minne tipisiir ar rese angang unusen rän. Anchangei mwo ika fen en ena ka witiwit unusen rän, nge ka silei pwe chon om famili ra lükülükü peioffum lon ena rän. A ifa me kilisoum le küna eü angang me nenneirukum ren naföchün peioffum pwe kopwe tongeni amöngööni om famili!

14. Ifa ewe lesen mi aüchea sia käeö seni ewe kapas äwewe usun ewe tänipi?

¹⁴ Iei sipwe ekiekisefäli föfförün ewe masta. Ese akükkünü peioffun nöün kewe chon angang meinisin. Nge a annafa peioffur pwe repwe tongeni atufichi ar famili. Pokiten a wor chommong ra küt ar angang, ewe masta a tongeni akükkünatiw peioffur, nge ese ina usun. Meinisin nöün kewe chon angang ra liwiniti imwer fän naföchün met repwe amöngöön ngeni chon ar famili. Eli, epwe siwil ekiekich usun föfförün ewe masta ika sia pwal wewefichiti titchikin ekkeei pworaus. Minne a föri a pwäratä tong, nge ese nemenemengaw. Ifa ewe lesen sia tongeni käeö? Ika ese unus ach silei ewe pworaus, eli epwe mwääl ach ekiek. Pwüngün, ei kapas äwewe a menlapei ükükün mürinnöön än Kot pwüng, ewe ese  chök alongolong woon ika aramas ra fich ngeni are woon allük.

Ekiekich A Tongeni Mwääl are Üküngaw

15. Pwata ach ekiek a tongeni mwääl are üküngaw?

¹⁵ Iei ewe oruuen mettoch sipwe chechchemeni pwe ach ekiek a tongeni mwääl are üküngaw atun a torikich osukosuk nge sia ekieki pwe ese pwüng. Sia tongeni ekiek mwääl pun sise unusöch, are pokiten eörenien lewooch kewe are lifilifil aramas. Ekiekich a pwal aükük pokiten nafangawen ach weweiti me silei wesewesen masouen letipen aramas. Nge Jiowa me Jises ra sokkolo pun a unusöch ekiekiir me sileier.​—SalF. 24:12; Mt. 9:4; Luk 5:22.

16, 17. Pwata Jiowa ese apwönüetä an we allük usun liwinin lisowumwääl atun Tafit a tipis ngeni Patsipa?

¹⁶ Sipwe etittina pworausen än Tafit lisowumwääl ngeni Patsipa. (2 Sam. 11:2-5) Me ren ewe Allükün Moses, a fich ngeniir ar repwe ninniilo. (Lif. 20:10; Tut. 22:22) Iwe nge, inaamwo ika Jiowa a apwüngüür, nge ese niirelo me ren pwisin an allük. Itä ese pwüng än Jiowa na föfför? Itä Jiowa a kon echeni Tafit, iwe, a atai pwisin pwüngün an we allük? A ina usun meefien ekkoch chon älleani Paipel.

¹⁷ Iwe nge, Jiowa a ngeni ekkewe sou kapwüng rese unusöch ewe allükün lisowumwääl, iwe, rese tongeni älleani letipen aramas. Iwe, ena allük a atufichiir le akkapwüngü aramas iteitan. Iwe nge, Jiowa a tongeni älleani letipen aramas. (Ken. 18:25; 1 Kron. 29:17) Ina popun, sisap ekieki pwe än Jiowa kapwüng epwe aükük me ren eü allük i a föri fän iten ekkewe sou kapwüng rese unusöch. Ika ina, esap pwe a usun nge sia aumwesi emön mi öch mesan an epwe mesemes kilasen chun? Jiowa a tongeni älleani letipen Tafit me Patsipa, iwe, a tongeni küna pwe ra enletin aier. A äfänni met a küna lon letiper, iwe, a pwäratä tong me ümöümöch lon an apwüngüür.

Sopwelo le Kükkütta än Jiowa Pwüng

18, 19. Met epwe älisikich ach sisap fokkun apwüngü Jiowa me ren pwisin ekiekich usun minne mi pwüng me mwääl?

¹⁸ Ina popun, ika sia küna och pworaus lon Paipel are lon pwisin manauach, nge sia meefi pwe ese pwüng met Jiowa a mutatä are föri, sisap apwüngü I me ren pwisin ekiekich usun minne mi pwüng me mwääl. Chechchemeni pwe sise silei titchikin ewe pworaus, me ekiekich a tongeni mwäällilo are üküngaw. Sisap fokkun mönüki pwe “än aramas song esap apwönüetä ewe pwüng Kot a mochen.” (Jem. 1:19, 20) Epwe ina usun än letipach esap “lingeringeriiti Jiowa.”​—SalF. 19:3.

¹⁹ Sipwe usun chök Jises le mirititi fansoun meinisin pwe Jiowa chök a wor an pwüüng le föratä allük usun minne mi pwüng me mürinnö. (Mark 10:17, 18) Sipwe achocho le “silei usun mine a let” usun än Kot allük. (Rom 10:2; 2 Tim. 3:7) Sia pwäri pwe sia “kuttafichi an [Jiowa] pung” ren ach etipeeüfengeni manauach ngeni letipan.​—Mt. 6:33.

Ka Chechchemeni?

• Pwata a lamot sipwe kükkütta än Jiowa pwüng?

• Ikkefa ekkewe ruu mettoch sipwe tümünükich seni?

• Ifa usun sipwe kütta akkomw än Kot pwüng?

[Ekkewe Kapas Eis Fan Iten Ewe Lesen]

[Sasing lon pekin taropwe 17]

Ifa ewe lesen sia käeö seni än Jises kapas äwewe usun ekkewe rüüemön mwän mi iotek lon ewe imwen fel?

[Sasing lon pekin taropwe 18]

Mei pwüng än ewe masta alöllööi peioffun ekkewe mi angang eü chök awa me ekkewe mi angang unusen rän?