Ka Älisatä Ekkewe Mwich Pwe Repwe Minen Apöchökkül Ngeni Meinisin?

“Fansoun oua mwichfengen, . . . oupwe chok fori mettoch meinisin pwe oupwe aufichikemita.”​—1 KOR. 14:26, TF.

1. Me ren 1 Korint sopwun 14, ifa eü popun a kawor än Chon Kraist kewe mwich?

 ‘EI MWICH a mmen apöchökkülaei!’ A pwal ina usun meefiom mwirin om fiti mwich lon ewe Kingdom Hall? Ese mwääl ewer! Esap minen ämäirü pwe än ewe mwichefel kewe mwich iir wesewesen minen apöchökkül. Usun chök ekkewe Chon Kraist loom, a kan wor ar mwich pwe epwe apöchökkülatä meinisin lon ar lükü. Nengeni ifa usun Paul a menlapei ewe popun mi lamot a kawor ekkewe mwich lon nöün we äechöön taropwe ngeni chon Korint. Fän fitu an apasa lon unusen sopwun 14 pwe meinisin kinikinin lon ekkewe mwich ‘epwe aufichietä’ emön me emön lon ewe mwichefel.​—Älleani 1 Korint 14:3, 12, 26. *

2. (a) Ekkewe mwich mi apöchökkül ra fis pokiten met? (b) Ifa ewe kapas eis sipwe pworaus woon?

² Sia mirititi pwe ekkewe mwich mi apöchökkülakich me asukulakich ra äkkäeüin fisöch fän emmwenien än Kot manaman. Ina popun, ra kan poputä ren iotekin tingor pwe Jiowa epwe efeiöchü ren an we manaman. Nge sia silei pwe chon ewe mwichefel ra tongeni älisatä ekkewe mwich pwe repwe eü minen apöchökkül. Iwe, met sipwe pwisin föri pwe ach kewe mwich iteiten wiik repwe tongeni apwapwakich me apöchökkülakichetä?

3. Met lamoten än Chon Kraist kewe mwich?

³ Ren an epwe pölü ena kapas eis, sipwe nengeni ekkoch napanapen ekkewe mwich ekkewe chon emmwen repwe ekieki usun. Sipwe pwal nengeni met unusen ewe mwichefel epwe tongeni föri pwe ewe mwich epwe apöchökküla meinisin chon fiti. Ei pworaus a mmen fokkun lamot pokiten ach kewe mwich ra pin. Enlet, ach fiti me uwawu meefiach atun ekkewe mwich ra lamot lon ach fel ngeni Jiowa.​—Kölf. 26:12; 111:1; Ais. 66:22, 23.

Eü Mwich mi Kkotolo fän iten Käeöön Paipel

4, 5. Met popun a kawor ewe käeöön Leenien Mas?

⁴ Kich meinisin sia mochen unusen küna feiöch seni ach käeö ewe Leenien Mas iteiten wiik. Ina minne, ren ach sipwe weweöchüti ewe äkkäeüin popun a kawor ena mwich, sipwe enniwili ewe popun sia käeö ewe Leenien Mas me ekkewe siwil lon ekkoch lesen sia käkkäeö.

⁵ A kawor ewe käeöön Leenien Mas pwe epwe älisikich le käeö ewe Paipel. Usun chök lon fansoun Nehemia loom, ewe Leenien Mas a “aföüü o aweweni” ewe Kapasen Kot.​—Ne. 8:8; Ais. 54:13.

6. (a) Ifa ewe siwil lon ewe käeöön Leenien Mas? (b) Met sipwe chechchemeni ren ekkewe wokisin mi kan mak “älleani”?

 ⁶ Pokiten sia wesewesen käeö ewe Paipel, a wor och siwil lon ach mwichen käeöön ewe Leenien Mas. A kan mak “älleani” ekkoch wokisin lon ekkewe lesen. Weween, sipwe fiti älleaan ekkewe wokisin lon pwisin nöüch Paipel atun emön a wisen älleani. (Fof. 17:11) Pwata? Pun lupwen sia pwisin küna än Kot fön lon nöüch Paipel, epwe fokkun achchüngükich. (Ipru 4:12) Ina minne, mwen älleaan ekkewe wokisin, ewe chon emmwen epwe awora naföchün fansoun pwe meinisin chon mwich repwe tongeni küna me fiti älleaan.

A Wattelo Fansoun Ach Sipwe Uwawu Meefiach

7. Met a suuk ngenikich atun ewe käeöön Leenien Mas?

⁷ Kkanoto chök a chokisikisilo me mwocholo ekkewe parakraf lon ewe Leenien Mas. Ina minne, atun ewe käeöön Leenien Mas, a mwoch älleaan ekkewe parakraf nge a wattelo ewe fansoun memmeef. Iei a suuk ngeni chommong lon ewe mwichefel ar repwe pwäratä ar lükü ren ar pölüweni kapas eis, äweweei ifa usun sipwe tongeni apwönüetä eü wokisin, are apworausa pworausen ekkoch pwiich kewe mi älleasochisi än Paipel kewe kapasen emmwen, me metakkan. Sipwe pwal memmeef woon ekkewe lios.​—Älleani Kölfel 22:22; 35:18; 40:9.

8, 9. Ifa wisen ewe chon emmweni ewe käeöön Leenien Mas?

⁸ Iwe nge, epwe tufich än chommong repwe uwawu meefier ika pwe meinisin repwe amwocha meefier me ewe chon emmwen esap kon kapas chommong. Ina minne, met epwe älisi ewe chon emmwen pwe epwe aüküküöchü meefian me meefien chon ewe mwichefel pwe ewe mwich epwe apöchökküla meinisin?

⁹ Ren ach sipwe pölüweni ena, nengeni ei kapas äwewe. Ewe käeöön Leenien Mas a usun epa mwaramwar mi ling ren pöön irä me chöön irä. Usun chök ewe mwaramwar mi fför seni sokkopaten pöön irä, ewe käeöön Leenien Mas a pwal fis ren sokkopaten memmeef. Epö me epö ekkewe pöön irä mi sokkopat saisir me anüwer, iwe, a ina usun ekkewe memmeef a pwal sokkopat me sokkofesen ttamer. Nge met wisen ewe chon emmwen? Fän ekkoch, meefian a usun ekkewe fitachö chöön irä mi pititä woon ewe mwaramwar. Ekkena chöön irä rese kon chommong pwe rete fen pwölüolo ekkewe pöön irä, nge ra chök sopwetä lingen me napöchün ewe mwaramwar. Pwal ina usun ren än ewe chon emmwen kewe memmeef, esap kon chommong pwe ete pwölüolo meefien chon ewe mwichefel, nge a chök ochufengeniir. Ewer, lupwen a ririöchfengen meefien ewe chon emmwen me meefien chon ewe mwichefel, iwe, ewe käeö epwe usun chök epa mwaramwar mi ling mi apwapwaai meinisin.

“Sipwe Iseta Ach Asoren Mwareiti Kot”

10. Met ekiekin ekkewe popun Chon Kraist usun ar kewe mwich?

¹⁰ Än Paul äwewe mi mak lon 1 Korint 14:26-33 a emiritikich usun kokkotun ekkewe mwich lon fansoun ekkewe popun Chon Kraist. Iei meefien emön sou käeö Paipel usun ekkena wokisin: “A fokkun pwälo pwe lap ngeni chon fiti än chon Kraist kewe mwich loom ra ekieki aüchean wiser le älisatä ewe mwichefel. Emön ese chök fiti pwe epwe aüseling. Ese chök ekiekin angei nge epwe pwal  fangolo.” Pwüngün, chon Kraist loom ra ekieki pwe ar kewe mwich, ina fansoun repwe pwäratä ar lükü.​—Rom 10:10.

11. (a) Met a fokkun älisatä ekkewe mwich pwe repwe apöchökkülakich, iwe, pwata? (b) Ikkefa ekkewe pesepes sipwe apwönüretä pwe epwe öchülo meefiach lon mwich? (Nengeni ewe footnote.)

¹¹ Ach pwäratä ach lükü lon ekkewe mwich a “aufichieta ewe mwichefel.” Ese mwääl kopwe tipeeü pwe inaamwo ika ka fiffiti mwich ren fite, fite ier, nge ka chüen pwapwaiti le aüseling ngeni meefien pwiich kewe. A chchüng letipach ren meefien emön chinnap mi tuppwöl, sia pöchökkületä ren miritin meefien emön elter, me sia pwal emelimel ren än emön semirit mwittir apasawu met chök a piitä lon ekiekin le pwäratä an enletin tongei Jiowa. A ffat pwe ren ach uwawu meefiach, kich meinisin sia älisatä ach kewe mwich pwe repwe apöchökküla ach lükü. *

12. (a) Met sipwe tongeni käeö seni Moses me Jeremaia? (b) Ifa usun iotek a tongeni älisikich le uwawu meefiach?

 ¹² A weires ngeni ekkewe mi nisässäü ar repwe uwawu meefier. Ika a ina usum, iwe, om silei pwe chommong ra pwal nisässäü usum chök epwe älisuk. Ren enletin, pwal mwo nge nöün Kot kewe chon angang mi tuppwöl, usun choweän Moses me Jeremaia, ra pwal meefi lipwäkingawer le fos lein aramas. (Eks. 4:10; Jer. 1:6) Nge Jiowa a älisiir le mwareiti I lein aramas, iwe, Kot epwe pwal älisuk le isetä om asoren mwareiti. (Älleani Ipru 13:15.) Ifa usun kopwe ngüüri än Jiowa älillis pwe kesap chüen niuokkus le uwawu meefiom? Akkomw, ammolnatä fän iten ekkewe mwich. Mwirin, mwen kopwe lo ngeni ewe Kingdom Hall, iotek ngeni Jiowa me tingorei an epwe apworok le uwawu meefiom. (Fil. 4:6) Om tingorei “mine a fich ngeni letipan” epwe alükülükuk pwe Jiowa epwe pölüweni om iotek.​—1 Jon 5:14; SalF. 15:29.

Ekkewe Mwich mi ‘Älisikich, Apöchökkülakich o Echipakich’

13. (a) Ifa usun ach kewe mwich epwe achchüngü chon fiti? (b) Ifa ewe kapas eis mi fokkun lamot fän iten ekkewe elter?

¹³ Paul a affata pwe eü popun mi lamot a kkotolo ekkewe mwich pwe repwe ‘älisi, apöchökküla . . . o echipa’ chon fiti. * (1 Kor. 14:3) Ifa usun ekkewe elter ra tongeni tümünü pwe ar kewe kinikin lon mwich repwe aüfichietä me aururu letipen pwiir kewe? Ren an epwe pölü ei kapas eis, sipwe nengeni ewe mwich Jises a emmweni mwirin chök an manausefäl.

14. (a) Ikkefa ekkewe mettoch ra fis me mwen Jises a emwicher? (b) Pwata ekkewe aposel ra meefi ngaselor lupwen “Jesus a kan ngeniir” me kapas ngeniir?

¹⁴ Akkomw, nengeni met a fis me mwen ena mwich. Mwen chök än Jises epwele ninniilo, ekkewe aposel ra ‘likitala o süla,’ me “toropasfeil lon en me lenian,” usun met a fen oesini. (Mark 14:50; Jon 16:32) Iwe, mwirin an manausefäl, Jises a etiwa nöün kewe aposel mi letipengaw le fiti eü mwich mi kkolo aüchean. * “Mürin ekewe engol me eman chon kaiö ra feila Kalilea won ewe chuk, ewe ia Jesus a üreniir pwe repwe feila ie.” Atun ra war, “Jesus a kan ngeniir” me kapas ngeniir. (Mt. 28:10, 16, 18) Anchangei ükükün watteen ngaselor  lupwen Jises a akkomw fos ngeniir! Nge, met Jises a fos ngeniir usun?

15. (a) Ikkefa ekkewe mettoch Jises a fos usur, nge met ese föri? (b) Ifa usun ena mwich a achchüngü letipen ekkewe aposel?

¹⁵ Jises a poputä ren eü esilesil: “Nemenem meinisin . . . a toriei.” Iwe, a awisa ngeniir eü angang: “Oupwe feila o [föralo chon käeö].” Mwirin, a alükülüküür: “Ngang üpwe etikemi fansoun meinisin.” (Mt. 28:18-20) Nge en mi silei ika met Jises ese föri? Ese apwüngüür, ese pwal ämmeef ngeniir pwe ese kon pwüng ewe popun ra angang ngeni Kot are alapalo ar mengiringiriiti met ra föri pokiten nafangawen ar lükü. Nge a alükülüküür pwe iir me Seman we ra fokkun tonger ren ar awisa ngeniir eü wis mi fokkun lamot. Ifa usun napanapen än Jises fos ngeniir a achchüngüür? A fokkun älisiir, apöchökküler me echiper, ina popun ekiselo chök mwirin ar we mwichfengen, ra pwal “aiti ngeni aramas ewe Pworausen Manau.”​—Fof. 5:42.

16. Ifa usun ekkewe elter ikenäi ra äppirü napanapen än Jises föri ewe sokkun mwich mi apöchökküla ekkewe chon fiti?

¹⁶ Ekkewe elter ikenäi ra äppirü Jises ren ar äeä ekkewe fansoun mwich le alükülükü ngeni pwiir kewe pwe Jiowa a tonger me tuppwöl ngeniir. (Rom 8:38, 39) Ina minne, lupwen ekkewe elter ra afalafal lon mwich, ra menlapei öchün pwiir kewe, nge esap ar kewe apwangapwang. Rese ekiekingaw usun ewe popun pwiir kewe ra angang ngeni Kot. Nge minne ra eäni afalafal a pwäratä ar lükülük woon än pwiir kewe tongei Jiowa me ar mochen föri minne mi pwüng. (1 Tes. 4:1, 9-12) Pwüngün, fän ekkoch, a lamot pwe ekkewe elter repwe fönöü me apwüngü unusen ewe mwichefel atun mwich. Nge, ika ena fön a lamot ngeni ekkoch chök, iwe, ekkewe elter repwe chök pwisin fos ngeniir. (Kal. 6:1; 2 Tim. 2:24-26) Lupwen ekkewe elter ra fos ngeni unusen ewe mwichefel, ra apünger ika mi fich ngeni. (Ais. 32:2) Ra achocho pwe napanapen ar fos epwe apöchökküla me apwapwaai meinisin chon fiti.​—Mt. 11:28; Fof. 15:32.

Eü Leeni mi Ekinamwe

17. (a) Ikenäi, pwata a kon lamot pwe ach kewe mwich epwe eü leeni mi ekinamwe? (b) Met kopwe pwisin achocho le föri pwe ekkewe mwich epwe eü minen apöchökkül ngeni meinisin? (Nengeni ewe pwoor, “Engol Pesepes Kopwe Föri Pwe Ekkewe Mwich Repwe Aüfichietä Meinisin.”)

¹⁷ A weiresilo nonnomun manauen aramas lon än Setan ei otot, ina minne, a lamot än Chon Kraist kewe mwich pwe ina eü leeni mi ekinamwe, ikewe meinisin repwe küna aurur me ie. (1 Tes. 5:11) Iei alon emön sister, iir me pwülüwan we ra fen likiitü fän eü watteen sossot fitu ier loom: “Äm nonnom lon ewe Kingdom Hall a usun chök äm nonnom le pöün ewe Kot mi tong, Jiowa. Atun äm nom lein pwich kewe lon mwich, aua meefi pwe aua tongeni isetä ngeni Jiowa äm kewe osukosuk, iwe, a kinamwe letipem.” (Kölf. 55:22) Amwo meinisin mi fiti ach kewe mwich repwe pwal pöchökkületä me küna aururun letiper. Ina minne, sipwe pwisin achocho le älisatä ach kewe mwich pwe epwe eü minen apöchökkül ngeni meinisin.

[Ekkewe pwóróus fan]

Ifa Usun Kopwe Pölüweni?

• Met lamoten än Chon Kraist kewe mwich?

• Pwata meefien pwiich kewe ra uwawu lon mwich ra “aufichieta ewe mwichefel”?

• Met sipwe tongeni käeö seni ewe mwich Jises a föri fän iten nöün kewe chon käeö?

[Ekkewe Kapas Eis Fan Iten Ewe Lesen]

[Pwóór/​Ekkewe sasing lón pekin taropwe 30, 31]

ENGOL PESEPES KOPWE FÖRI PWE EKKEWE MWICH REPWE AÜFICHIETÄ MEINISIN

Ammolnatä. Lupwen ka ammolnatä ekkewe lesen oupwe käeö, kopwe unusen pwapwaiti me aücheani ekkewe mwich.

Fiffiti mwich iteitan. Meinisin ra kan pöchökkületä ika chommong ra fiti mwich. Ina popun, ka apöchökküla ewe mwichefel ika ka kan fiffiti mwich iteitan.

Warekkäi. Ika ka mommot mwen poputään ach mwich, ka tongeni fiti ewe kölün me iotekin le poputään pun iir kinikinin ach fel ngeni Jiowa.

Uwei noum kewe puk. Uwei noum we Paipel me ekkewe puk oupwe nöünöü lon mwich pwe ka tongeni suuki me fiti än ewe chon emmwen afalafal, iwe ka tongeni weweöchüti.

Tümünü seni ekkewe minen erikirik. Äwewe chök, atun mwich, kosap älleani ekkewe text lon noum cell fon. Ren om föri ena, ka alamota ekkewe mwich pwe ina fansoun feffel chök nge esap fän iten pwisin mochenum.

Uwawu meefiom. Ika chommong ra pölüweni, iwe, chommong repwe pwal pöchökkületä ren ekkewe sokkopaten memmeef mi pwäratä lükü.

Amwocha meefiom. Om föri ei epwe atufichi chommong le pwal uwawu meefier.

Apwönüetä wisom. Ammolnatäöchü me praktis me mwen om kinikin lon ewe Sukulen Afalafal are Service Meeting. Achocho pwe kosap etiwalo om kinikin.

Apünga chokkewe mi wor ar kinikin. Apasa om kilisou ngeni iir kewe mi uwawu meefier are mi wor ar kinikin ren ar achocho.

Chiechi. Pworausfengen mi apöchökkül me kapongfengen mwen me mwirin ekkewe mwich ra älisatä apwapwaan me feiöchün chon fiti.