Iotek

1 Pwata A Lamot Iotek?

IOTEK. Iei ewe itelap lon Paipel chommong aramas ra pwapwaiti le pwoppworaus usun. Nengeni ekkewe nimu kapas eis usun iotek aramas ra kan eäni, mwirin sipwe etittinafengeni pölüwer me ren Paipel. Ekkeei pworaus repwe älisuk lon om iotek, äwewe chök, om kopwe poputä le iotek are eäni ewe sokkun iotek Kot epwe etiwa.

WOON unusen fönüfan, lon eü me eü eöreni me lamalam, aramas ra iotek. Ra iotek atun ra kan äläemönülo are nom lein chommong aramas. Ra iotek lon imwenfel, sinakok, imwen felin chon Muslim me Bhuddist. Ra tongeni nöünöü rosario, puken iotek, lios are ululun.

Iotek a asokkalo aramas seni ekkewe mönümanau woon fönüfan. Pwüngün, aramas me man ra löllö woon ekkoch mettoch. A lamot ngenikich möngö, äsepwäl, me konik pwal usun chök man. Sia pwal uputiw, manau, iwe mwirin mälo. (Än Salomon Afalafal 3:19) Nge aramas chök ra iotek. Pwata?

Eli pokiten iotek a lamot ngeni aramas. Chommong ra meefi pwe ina ewe alen ar repwe arap ngeni och mettoch mi pin, mi manau feilfeilo chök. Ewe Paipel a pwäratä pwe Kot a föri aramas pwe repwe tipeni ekkena mettoch. (Än Salomon Afalafal 3:11) Jises a pwal apasa: ‘Ra feiöch chon silei pwe ra wöüngau lon pekin lükü.’​—Mattu 5:3.

Pokiten aramas ra meefi osupwanger le silei Kot, ina ewe popun a wor sokkopaten minen angangen lamalam me aramas ra äeä watteen fansoun le iotek. Pwüngün, ekkoch aramas ra lükülük woon pwisin iir are chiener kewe ar repwe sileöchü Kot. Iwe nge, kese meefi pwe aramas rese tongeni älisuk? Pun kich sia apwangapwang, sise manauattam me sise kon lien mirit. A lamot ngenikich emön mi fen tipatchem senikich, emön mi fokkun manaman me a manau feilfeilo. Ikkefa ekkewe mettoch sia osupwangan le silei usun Kot me a amwökütükich le iotek?

Ekieki ekkeei mettoch: Ka fen äneänei pwe kopwe küna emmwen, tipatchem are silei pölüwen ekkewe kapas eis mi kon weires än aramas repwe pwisin pölüweniir? Ka osupwangen emön epwe aururuk pokiten mäloon attongom, are emmwenuk pun a wor om kefil mi chou, are omusalo om tipis pun ka riäfföü ren om mengiringir?

Me ren ewe Paipel, ikkena ekkewe popun mi lamot kopwe iotek. Ewe Paipel ina eü puk mi tongeni awora emmwen mi alükülük usun ei mettoch iotek me a mak lon chommong än ekkewe mi tuppwöl iotek. Ra iotek fän iten aurur, emmwen, omusomusen tipis, me pölüwen ekkewe kapas eis mi kon weires.​—Kölfel 23:3; 71:21; Taniel 9:4, 5, 19; Apakuk 1:3.

Mi sokkopat ekkena iotek, nge ra löllö woon eü mettoch. Chon eäni ekkena iotek ra silei met repwe föri pwe Kot epwe etiwa ar iotek, iwe nge aramasen fönüfan ra tunalo ena mettoch. Ekkewe mi tuppwöl ra silei iö ena emön repwe iotek ngeni.