Iotek

3 Ifa Usun Sipwe Iotek?

EÖRENIEN chommong lamalam atun iotek, ra kan chök ekieki usun napanapen inisiir, tettelin ar kewe iotek me amwöchülükün kapasan. Iwe nge, Paipel a älisikich ach sisap aosukosukakich ren ekkena mettoch me menlapei minne mi kon lamot usun ei kapas eis: “Ifa usun sipwe iotek?”

Ewe Paipel a äiti ngenikich pwe nöün Kot kewe chon angang mi tuppwöl ra iotek lon sokkopaten leeni me ese lifilifil napanapen inisiir. Ra kan iotek le monomon are leüwommong met chök a fichiiti nonnomur. Ra netä are pworetiw. Rese nöünöü puken iotek, ululun, rosario, nge ra iotek seni letiper me pwisin apasawu met ra mochen iotek usun. Pwata Kot a aüselinga ar iotek?

Pun ra iotek ngeni ewe emön chök Kot, weween Jiowa, usun met sia fen pworaus woon lon ewe lesen me mwan. A pwal wor eü popun mi fokkun lamot. A mak lon 1 Jon 5:14, a erä: “A wor ach apilükülüköch lon ach churi Kot, pun sia silei pwe are sia tüngor och mine a fich ngeni letipan, a aüselingakich.” A lamot pwe ach kewe iotek epwe tipeeü ngeni letipen Kot. Met weween ei?

A lamot sipwe silei met letipen Kot pwe ach iotek epwe tipeeü ngeni letipan. Ina minne, ren än Kot epwe aüselinga ach iotek a fokkun lamot ach sipwe käeö Paipel. Weween pwe Kot esap aüselinga ach iotek ika sise sileöchü meinisin masouen ewe Paipel? Aapw, nge Kot a mochen sipwe silei, weweiti me apwönüetä letipan. (Mattu 7:21-23) A lamot pwe ach iotek epwe tipeeü ngeni met sia käeö.

Ach käeö usun Jiowa me letipan, epwe apöchökkülalo ach lükü, ina pwal eü mettoch a lamot fän iten iotek. Jises a apasa: “Are oua lükülük, oupwe angei mettoch meinisin mine oua tüngor lon ämi iotek.” (Mattu 21:22) Lükü ese wewe ngeni ach sipwe lükülük woon mettoch meinisin, nge a wewe ngeni ach änneta minne sia äpilükülükü inaamwo ika sise küna. (Ipru 11:1) Ewe Paipel a ur ren kapasen ännet pwe inaamwo ika sise küna Jiowa, nge i wesewesen emön mi alükülük me a pwal mochen pölüweni iotekin chokkewe mi lükü i. Pwal och, sia tongeni tingorei Jiowa an epwe alapalo ach lükü pun i a fokkun mochen fang ngenikich met sia osupwangan.​—Luk 17:5; Jemes 1:17.

Pwal iei ewe mettoch mi lamot ren ifa usun sipwe iotek. Jises a apasa: “Esap wor eman epwe tongeni feila ren Semei me lüki.” (Jon 14:6) Jises ewe al ach sipwe tongeni tikeri  Semach we, Jiowa. Ina popun, Jises a ereni nöün kewe chon käeö ar repwe iotek fän itan. (Jon 14:13; 15:16) Esap itä wewe ngeni ach sipwe iotek ngeni Jises. Nge, ach iotek fän iten Jises, a affata pwe i ewe popun sia tongeni arap ngeni Semach we mi pin me unusöch.

Fän eü nöün Jises kewe chon käeö, ra ereni Jises : “Äm Samol, kopwe aiti ngenikem iotek.” (Luk 11:1) Esap weween pwe ra mochen silei ifa usun repwe iotek, nge ra fokkun mochen silei met repwe apasa lon ar iotek, usun itä ra eis: ‘Met aupwe iotek usun?’

[Ekis Pwóróus lón pekin taropwe 6]

Kot epwe aüselinga än emön iotek ika mi fich ngeni letipan, ika a lükülük woon Jiowa me ika a iotek fän iten Jises