Iotek

5 Kot Epwe Aüseling me Pölüweni Ach kewe Iotek?

ENA kapas eis a efisi ach mwasangasang le mochen silei pölüwan. Paipel a apasa pwe Jiowa a etiwa än aramas iotek ikenäi. Nge a longolong wooch ika Kot epwe aüselinga are esap aüselinga ach iotek.

Jises a apwüngü ekkewe nöüwisin lamalam pun ar iotek mi likotuputup, ra chök mochen pwäralo ngeni aramas pwe iir mi pwüng. Jises a erä pwe ekkena esin aramas “ra fen wes le angei liwiniir,” weween ra fen wes le angei met ra tipeni, än aramas ingeitiir. Nge rese angei met a kon lamot ngeniir, än Kot etiwa ar iotek. (Mattu 6:5) Ina chök usun ikenäi, chommong ra iotek fän iten chök ar mochen nge rese ekieki Kot. Ra tunalo ekkewe kapasen emmwen lon Paipel sia fen pworaus usun, ina popun Kot ese aüselinga ar iotek.

Nge en? Kot epwe aüseling ngeni om kewe iotek? Än Kot etiwa om iotek ese longolong woon om einang, fönüom, are nonnomun manauom. Ewe Paipel a alükülükükich pwe: “Kot esap lifilifil aramas, nge a etiwa aramas mi niuokusiti i o föri mine a pwüng.” (Fofor 10:34, 35) A iei usum? Ika en mi niuokkusiti Kot, ka asamolu i me niuokkus le eletipengawa. Om föri minne mi pwüng a wewe ngeni om kopwe achocho le apwönüetä met mi pwüng me ren Kot esap ren letipom are chienom kewe. Ka wesewesen mochen Kot epwe akkaüseling ngeni om kewe iotek? Ewe Paipel epwe älisuk le föri ena. *

Lap ngeni aramas ra tipeni pwe Kot epwe pölüweni ar iotek ren eü manaman. Iwe nge, pwal mwo lon fansoun ewe Paipel loom esap iteitan Kot a föri manaman, fän ekkoch a föri, iwe mwirin fitepükü ier epwap förisefäli manaman. Pwal och, ewe Paipel a äweweei pwe än aramas tufichin föri manaman a muchulo mwirin mäloon ekkewe aposel. (1 Korint 13:8-10) Iwe, itä weween pwe Kot esap chüen pölüweni än aramas iotek ikenäi? Aapwi! Nengeni ekkoch sokkun iotek a pölüweni.

Kot a awora tipatchem. Jiowa i ewe populapen tipatchem mi enlet meinisin. A kisäseü le fang ngeni iir mi mochen kükkütta an emmwen me manaueni manauer fan.​—Jemes 1:5.

Kot a liffang an we manaman me an kewe feiöch. Än Kot manaman a fokkun manaman seni meinisin. A tongeni elikiitükich, me ekinamwe letipach lupwen sia meefi riäfföü. A tongeni älisikich le ämääraatä ekkewe napanap mi mürinnö. (Kalesia 5:22, 23) Jises a alükülükü nöün kewe chon käeö pwe Kot a fangafangöch.​—Luk 11:13.

Kot a asarama iir mi kükkütta i. (Fofor 17:26, 27) Woon unusen fönüfan mi chüen wor aramas ra wesewesen kükkütta ewe enlet. Ra mochen silei usun Kot ren ifa itan, met an kokkot fän iten fönüfan me aramas me ifa usun repwe tongeni pacheöch ngeni i. (Jemes 4:8) Chon Pwäratä Jiowa ra fen chuchchuuri ekkena sokkun aramas me pwapwa le pölüweni seni ewe Paipel ar kewe kapas eis.

Iei ewe popun ka nöüni ei puk? En mi kükkütta Kot? Eli a iei usun än Kot pölüweni om iotek.

[Pwóróus fan]