Arüänüün Napanap

Filiöchü Chiechiom kewe

IFA ALON EWE PAIPEL? “Eman mi chiechi ngeni aramas mi tipachem epwe tipachemela.”​—Än Salomon Fos 13:20.

IFA EWE MINEN EPPET? Chiechiach kewe ra tongeni älisikich le menemenöchülo are fen ekisikisaalo ach meefi menemenöch. Napanaper me ar kapas epwe tongeni kküü ekiekich usun manau.​—1 Korint 15:33.

Sipwe ppi pworausen ekkewe engol me rüüemön mwän atun ra liwin seni Kenaan. Lap ngeniir “ra apworausa ngeni ekewe aramasen Israel pworaus mi mwäl fän iten ewe fanü ra operi.” Inaamwo ika a ina usun ar repot, nge rüüemön me leir ra apworausa pwe Kenaan a “eu fanu mi unusen murino.” Nge än ekkewe engol spai pworaus mi ngaw a chöüfetäl lein ekkewe aramas. Ewe Paipel a erä: “Ekewe aramasen Israel meinisin ra leüömong le puchör . . . Iwe, ra lal ngeni Moses.”​—Numperis 13:30–14:9.

A ina usun ikenäi, chommong aramas “ra chök lal o atipisi aramas.” (Juta 16) A weires ach sipwe memenemenöch ika sia chichiechi ngeni aramas rese menemenöch iteitan.

MET KOPWE TONGENI FORI? Etittina ämi pworausfengen me chienom kewe. Fän chommong chienom kewe ra kan einga pisekiir kewe are ra lalal iteitan ren met ese wor rer? Nge en, ifa napanapom ngeniir? Ka kan föri pwe repwe lolowoituk are ka peseer pwe repwe menemenöch ren met mi wor rer?

Nengeni pworausen Tafit, ewe a fen seikitä pwe epwe emön king, me Jonatan, nöün King Saul we. Tafit a sü seni Saul me op lon fönüpöön. King Saul a meefi pwe epwele pöüt seni ewe wis king pokiten Tafit me a mochen Tafit epwe mälo. Itä Jonatan epwe wii seman we lon ewe wis king, nge i a wiliti emön chiechien Tafit mi ächengicheng. Jonatan a mirititi pwe Kot a filatä Tafit pwe epwe king me i a chök pwapwa le älisatä chienan na.​—1 Samuel 19:1, 2; 20:30-33; 23:14-18.

A lamot an epwe ina usun chienom, emön mi chök menemenöch me ekieki met epwe öchituk. (Än Salomon Fos 17:17) Nge, ren om kopwe küna ei sokkun aramas, a lamot kopwe pwal pwäratä ekkena sokkun napanap.​—Filipai 2:3, 4.

[Sasing lon pekin taropwe 7]

Chiechiom kewe ra efisi om kopwe menemenöch are fen menemenemmang?