“Ikenai Fokun Fansoun Fich”
“Ikenai Fokun Fansoun Fich”
“Nengeni, ikenai fokun fansoun fich, nengeni, ikenai ränin küna manau!”—2 KOR. 6:2.
1. Pwata a lamot ach sipwe silei ifa ewe angang mi lamot seni meinisin sipwe föri?
“REN mettoch meinisin a wor ar fansoun. A pwal wor fansoun iteiten angang won fanüfan.” (SalAf. 3:1) Salomon a mak usun lamoten ach sipwe mirititi ewe fansoun mi fokkun fich ngeni sokkopaten angang sipwe föri, äwewe chök ren atake, säi, pekin business are pwopworaus me aramas. Iwe nge, a pwal lamot sipwe silei menni angang mi lamot seni meinisin pwe epwe ffat met sipwe akkomwa lon manauach.
2. Pwata sia silei pwe Jises a fokkun mirititi nonnomun ewe fansoun a manau lon?
2 Lupwen Jises a nom woon fönüfan, a fokkun mirititi nonnomun ewe fansoun a manau lon me met a lamot epwe föri. Pokiten a ffat ngeni met epwe akkomwa lon manauan, a silei pwe ina ewe fansoun ekkewe oesini usun ewe Messaia repwele pwönüetä. (1 Pit. 1:11; Pwar. 19:10) A lamot epwe ännetatä pwe i ewe Messaia mi pwonetiw, afalafala ewe enlet usun ewe Mwu, me ionifengeni chokkewe repwe fiti le nemenem lon an we Mwu. Epwe pwal föratä longolongun ewe mwichefelin Kraist pwe epwe sopwelo ewe angangen afalafal me föralo chon käeö woon unusen fönüfan.—Mark 1:15.
3. Ifa usun än Jises mirititi an we fansoun a kküü föfförün?
3 Än Jises mirititi atapwalapwalen an we fansoun, a amwökütü le ekipwich lon an föri letipen Seman we. A ereni nöün kewe chon käeö: “Ewe räs a fokun watte, nge ekewe chon angang lon ra chokükün. Iei mine oupwe tüngor ngeni samolun ewe räs, pwe epwe tinala chon angang lon ewe räs.” (Luk 10:2; Mal. 4:5, 6) Jises a akkomw filatä 12, mwirin a pwal filatä chommong me lein nöün kewe chon käeö me a affataöchü ngeniir met repwe föri, iwe, a tiniirelo pwe repwe afalafala ei pworaus mi ämmeseik: “Ewe Mwün Läng a arapoto.” Nge Jises pwisin, iei met a föri: “Lupwen Jesus a wes le öüröüra nöün kewe chon kaiö, a feila seni ikenan pwe epwe aiti ngeni aramas kapasen Kot o afalafaleer lon ekewe telinimw mi arap.”—Mt. 10:5-7; 11:1; Luk 10:1.
4. Ifa usun Paul a äppirü Jises Kraist?
4 Än Jises ekipwich me tuppwöl lon an angang a eü leenien äppirü mi fokkun mürinnö ngeni nöün kewe chon käeö. Aposel Paul a pesei chienan kewe chon lükü: “Oupwe apirüei usun ngang üa apirü Kraist.” (1 Kor. 11:1) Ifa usun Paul a äppirü Kraist? Äkkäeüin ren an afalafala ewe kapas allim ren ükükün an tufich. Lon nöün kewe taropwe ngeni ekkewe mwichefel a mak ekkeei sokkun kapas, “achocho le angang, nge ousap chipwang,” “angang ngeni ewe Samol” “alapalafochei ämi achocho lon ewe angangen ach Samol,” me “meinisin mine oua föri, oupwe angang ngeni ren unusen letipemi usun itä nge oua angang ngeni ach Samol.” (Rom 12:11; 1 Kor. 15:58; Kol. 3:23) Paul ese mönükalo än Jises Kraist we chuuri woon ewe al lon Tamaskus me alon Jises we ngeni Ananias: “Ei mwän üa filätä pwe epwe angang ngeniei, epwe asilefeili itei ngeni chon lükün Israel, ngeni ekewe king pwal ngeni chon Israel.”—Fof. 9:15; Rom 1:1, 5; Kal. 1:16.
“Fokkun Fansoun Fich”
5. Met a amwökütü Paul le ekitekit le apwönüetä an angangen afalafal?
5 Ach älleani ewe puken Fofor a affata än Paul pwora me ekitekit le apwönüetä an angangen afalafal. (Fof. 13:9, 10; 17:16, 17; 18:5) Paul a mirititi lamoten ewe fansoun a manau lon. A erä: “Nengeni, ikenai fokun fansoun fich, nengeni, ikenai ränin küna manau!” (2 Kor. 6:2) Lon ewe ier 537 B.C.E., ina ewe fansoun mi fich fän iten ekkewe chon Israel mi eolo lon Papilon ar repwe liwiniti pükün fönüer. (Ais. 49:8, 9) Nge Paul a kapas usun menni fansoun? Ekkewe epwipwiin wokisin repwe älisikich le weweiti alon Paul na.
6, 7. Menni wis mi aüchea Kot a ewisa ngeni ekkewe Chon Kraist mi kepit ikenäi, iwe, iö kewe ra angangfengen me ekkena mi kepit?
6 Paul a mak akkomw usun ewe wis mi aüchea i me chienan kewe mi kepit repwe wiseni. (Älleani 2 Korint 5:18-20.) A äweweei pwe Kot a köriir fän iten eü popun mi lamot, ar repwe föri ewe “angangen achächä,” ar repwe tingorei aramas le “chäfengen me Kot.” Weween pwe aramas repwe chiechifengensefäl are etipeeüfengeni manauer me letipen Kot.
7 Seni ewe föfförün ü ngeni lon Ichen, meinisin aramas ra towauolo seni Jiowa. (Rom 3:10, 23) Pokiten aramas ra imu seni i, ra nonnom lon rochopwak, riäfföü me mälo. Paul a apasa “Pun sia silei pwe tori ikenai förien Kot kewe meinisin ra ngüngü fän cheuch usun cheuchen fam.” (Rom 8:22) Nge Kot a fen akkota le peseer pwal mwo nge “tüngormau” ngeni aramas ar repwe chäsefäl ngeni. Ina ewe angang Kot a ewisa ngeni Paul me ekkewe chon Kraist mi kepit lon ena fansoun. Ena “fansoun fich” epwe tongeni “eü ränin küna manau” fän iten chokkewe repwe lükü Jises. Meinisin ekkewe Chon Kraist mi kepit me chiener kewe ‘pwal ekkoch siip’ ra angangfengen me ekketiwa aramas le küna feiöch lon ewe “fansoun fich.”—Jon 10:16.
8. Pwata ewe kökköön achäsefäl a amwarar?
8 A ifa me amwararen ena kökköön achäsefäl, inaamwo ika aramas ra atai ar riri ngeni Kot lupwen ra u ngeni lon Ichen, nge fen Kot pwisin a akkomw mwöküt le försefälli ewe ririöch lefiler. (1 Jon 4:10, 19) Met Kot a föri? Paul a pölüweni “Kot a nonom lon Kraist o achäsefäli chon fanüfan ngeni püsin i. Esap chüen chechemeni ar tipis, pwe a awisakich pwe sipwe afalafala ewe kapasen achächä.”—2 Kor. 5:19; Ais. 55:6.
9. Ifa usun Paul a pwäratä an kilisou ren ümöümöchün Kot?
9 Ren kaworen ewe möön kepich, Jiowa a atufichi chokkewe mi lükü an epwe musolo ar tipis me chiechiöchsefäl ngeni i. Pwal och, a tinato nöün kewe chon angang ar repwe pesei aramas meinisin le kütta kinamwe lefiler me Kot lon ei fansoun mi chüen fich ngeniir. (Älleani 1 Timoti 2:3-6.) Paul a weweiti letipen Kot me mirititi ewe fansoun a manau lon, ina minne, a achocho lon ei “angangen achächä.” Jiowa ese siwil, a chüen mochen pwe iir kewe mi imu seni repwe chäsefäl ngeni i. Alon Paul keei “ikenai fokun fansoun fich” me “ikenai ränin küna manau” ra chüen weneiti ei fansoun. Jiowa a fokkun ümöümöch me tong!—Eks. 34:6, 7.
“Sisap Alomotongauei än Kot Ümöümöch”
10. Met weween ewe “ränin küna manau” fän iten ekkewe Chon Kraist mi kepit loom me ikenäi?
10 Ekkewe ra “nonom lon Kraist” ra akkomw küna feiöch seni än Kot ümöümöch. (2 Kor. 5:17, 18) Ewe “ränin küna manau” a poputä fän iter lon Pentekos 33 C.E. Seni ena atun, Kot a ewiser ar repwe aronga ewe “kapasen achächä.” Ikenäi ekkewe lusun Chon Kraist mi kepit ra chüen föri ei “angangen achächä.” Ra mirititi pwe ekkewe fömön chon läng aposel Jon a küner lon eü längipwi ra “amwöchü ekewe rüanü asepwäl, pwe esap chüen wor asepwäl a enien won fanüfan.” Ina minne, lon ach ei fansoun mi chüen “ränin küna manau” me a “fokun fansoun fich.” (Pwar. 7:1-3) Ren ei popun seni le poputään ewe ier 1900, ekkewe mi kepit ra tinikken le apwönüetä ewe “angangen achächä” woon unusen fönüfan.
11, 12. Orun ewe ier 1900, ifa usun ekkewe Chon Kraist mi kepit ra mirititi ewe fansoun ra manau lon? (Nengeni ewe lios lon pekin taropwe 17.)
11 Äwewe chök, ewe puk Jehovah’s Witnesses—Proclaimers of God’s Kingdom a erä pwe orun ewe ier 1900, “C. T. Russell me chienan kewe ra fokkun lükü pwe ra manau lon fansoun räs me a lamot ngeni aramas ar repwe rongorong ewe enlet mi tongeni angaserelo.” Met ra föri? Pokiten ra mirititi pwe ar fansoun ina ewe a “fokun fansoun fich” ewe atun räs, iwe, rese chök menemenöch le etiwa aramas ar repwe fiti fel, usun met ekkewe nöüwisin lamalam ra fen föfföri seni loom. Nge, ekkewe mi kepit ra poputä le ekiekifichi ifa usun repwe achöüfetälei ewe kapas allim. Ra pwal mwo nge nöünöüöchü ekkewe mineföön mwesin mi emwittiri ar angang.
12 Ren an epwe esilefeil ewe kapas allim, ena kükkün kümiin chon afalafal mi tinikken a nöünöü ekkewe kükkün taropwe me sokkopaten puk. Ra pwal ammolnatä me föri ekkoch afalafal pwe repwe peres lon fite ngeröü simpung. Ra pwal ettiki lon reitio woon unusen fönüfan ekkewe prokram seni Paipel. Ra föri kachito mi fiti möngüngü are fos me mwen än ekkewe kompenien fför kachito poputä le föri ena sokkun kachito. Ifa mwiriloon ar ekitekit le föri ar angang fän tinikken? Ikenäi, a wor fisu million aramas ra fen etiwa ewe kapas allim me fiti ewe angangen afalafala ewe pworaus: “Oupwe chäfengen me Kot.” Pwüngün, nöün Jiowa kewe chon angang loom ra isetiw eü leenien äppirü ren ar ekitekit lon ar angang inaamwo ika ra chökükkün me a aükük ar tufich.
13. Ifa ewe mettoch a lamot sipwe lefareni?
13 Minne Paul a apasa pwe “ikenai fokun fansoun fich,” mi chüen weneiti ei fansoun. Kich mi fen küna ümöümöchün Jiowa, sia kilisou pun a fen suuk ngenikich ach sipwe rongorong me etiwa ewe pworausen achächä. Sisap tenechepwäk nge sipwe lefareni alon Paul ei: “Aia tüngormau ngenikemi, pwe ousap alomotongauei än Kot ümöümöch oua angei.” (2 Kor. 6:1) Ewe popun Kot a pwäralo an ümöümöch, pwe epwe “achäsefäli chon fanüfan ngeni püsin i” ren Kraist.—2 Kor. 5:19.
14. Met a suuk lon chommong fönü?
14 Lap ngeni aramas mi fen chunulo ren Setan ra chüen towau seni Kot me rese silei ewe popun Kot a pwäralo an ümöümöch. (2 Kor. 4:3, 4; 1 Jon 5:19) Iwe nge, ngawoloon napanapen ei fönüfan a amwökütü chommong le etiwa chon afalafal atun ra äiti ngeniir pwe än aramas imu seni Kot, ina ewe popun ra föfföringaw me küna riäfföü. Pwal mwo nge lon ekkewe fönü aramas rese kon pwapwaiti ewe angangen afalafal ie, iei a chommong ra etiwa ewe kapas allim me mwökütüküt pwe repwe chäsefäl ngeni Kot. Iwe met, sisap pwal alamota ei fansoun le alapalo ach ekitekit le esilefeili ei tingor: “Oupwe chäfengen me Kot”?
15. Met sia mochen aramas meinisin repwe silei lap seni ach afalafaler pworaus mi chök apwapwaar?
15 Sise chök ereni aramas pwe ika ra kul ngeni Kot, i epwe älisiir lon ar kewe osukosuk me meefi pwapwa. Ina chök ewe popun chommong aramas ra fiffiti fel me nöür kewe nöüwisin lamalam ra chök mochen apwapwaar. (2 Tim. 4:3, 4) Nge esap ina ewe popun sia achocho le afalafal. Sia afalafala ewe kapas allim pwe Jiowa a tipemecheres le omusalo ach tipis ren Kraist pokiten a tongekich. Ina minne, emön me emön epwe tongeni chäsefäl ngeni Kot me ngaselo seni rochopwak. (Rom 5:10; 8:32) Iwe nge, arapakkan chök ewe “fansoun fich” epwele muchulo.
“Oupwe Pwichipwich ren än Kot Manaman”
16. Met popun Paul a pwora me ekipwich lon an angang?
16 Ifa usun sipwe alapalo ach ekkekipwichi fel mi enlet? Eli ekkoch mi pükün nisässäü are rese kon lien foffos, iwe mi weires ngeniir ar repwe chiechi ngeni aramas. Iwe nge, sipwe chechchemeni pwe ekipwich esap weween pwe emön epwe chök mwasangasang are alongolong woon pükün napanapan. Ren ach sipwe emön mi ekipwich, iei met aposel Paul a pesei ngenikich: “Oupwe pwichipwich ren än Kot manaman.” (Rom 12:11, NW) Än Jiowa manaman a fokkun älisi Paul an epwe pwora me likitü lon an angangen afalafal. Ren lap seni 30 ier, seni ewe atun än Jises köri Paul, tori an kalapus me mälo fän iten Kraist lon Rom, ese patapatelo an ekipwich lon an angang. A lükülük woon Kot fansoun meinisin, me an we manaman a apöchökküla i. Iei alon: “Ngang mi tufich ren mettoch meinisin lon ewe emon mi apochokkulaei.” (Fil. 4:13, TF) A ifa me feiöchüch ika sia äppirü Paul!
17. Ifa usun sipwe “pwichipwich ren än Kot manaman”?
17 Ewe kapas “pwichipwich” a wesewesen wewe ngeni “puppur.” (Kingdom Interlinear) Ren an epwe puppur ewe konik, mi lamot sipwe kan soni ekkeein fan. Pwal ina chök usun, ren än emön epwe “pwichipwich ren än Kot manaman,” a lamot epwe chök okkor än Kot manaman. Ren an epwe okkor, sipwe alamota ekkewe minen älillis Jiowa a kan awora pwe epwe apöchökküla ach riri ngeni. Weween sipwe föfföri ach pwisin käeö me än ewe famili käeöön Paipel, iotek, me fiffiti än Chon Kraist kewe mwich iteitan. Ina met epwe älisikich pwe ewe “ekkeei” epwe chök kükü, iwe epwe “puppur” pwe sipwe “pwichipwich ren än Kot manaman.”—Älleani Fofor 4:20; 18:25.
18. Itä met Chon Kraist repwe achocho le föri?
18 Emön mi fen fangolo manauan ngeni Kot a chök ännefota eü mettoch, nge ese mwittir riki seni are fangetä le angang woon minne a achocho ngeni. Usun Jises, kich Chon Kraist sia achocho le föri met chök Jiowa a kütta senikich. (Ipru 10:7) Ikenäi, letipen Kot pwe chommong aramas repwe chäsefäl ngeni i. Ina minne, sipwe usun chök Jises me Paul le ekipwich lon ei angang mi lamot seni meinisin me atapwalapwal an epwe pwönüetä iei.
Ka Chechchemeni?
• Ifa ewe “angangen achächä” Kot a ewisa ngeni Paul me ekkewe Chon Kraist mi kepit?
• Ifa usun ekkewe lusun Chon Kraist mi kepit ra alamotaöchü ei “fansoun fich”?
• Ifa usun ekkewe Chon Kraist chon angang repwe “pwichipwich ren än Kot manaman”?
[Ekkewe Kapas Eis Fan Iten Ewe Lesen]
[Sasing lon pekin taropwe 14]
Paul ese mönükalo ewe fansoun an Samol Jises Kraist chuuri