Jiowa mi Lapalap Seni Letipach

JIOWA a “pwapwa ren chokewe mi niuokusiti i,” ina alon ewe sou mak kölfel. Pwüngün, ewe Chon Föratä a pwapwa le nennengeni emön me emön nöün chon angang lon ar achocho le älleasochisi an kewe allük. Kot a efeiöchü nöün kewe mi tuppwöl, apöchökküler me aururuur lon fansoun riäfföü. A silei pwe rese unusöch ina minne a chök kütta seniir met a ki rer.​—Kölfel 147:11.

Eli a mecheres ach sipwe lükü pwe Jiowa a fokkun tongei nöün kewe chon angang meinisin. Iwe nge, ekkoch ra fokkun ekilonei apwangapwangen futuker ina popun rese lükü pwe Jiowa a tonger. Ra erä: “Ngang emön mi fokkun tipis, ifa usun Jiowa epwe tongeiei.” Pwüngün, fän ekkoch kich meinisin sia ekiekmwääl usuch. Nge ren ekkoch aramas ra fiffiu ngeni ena ekiek pwe iir mi lamotongaw.

Meefi Letipeta

Lon ewe Paipel a mak pworausen ekkoch mi tuppwöl loom ra fokkun riäfföü ren ar letipeta. Hiop a oput manauan me a meefi pwe Kot a likitalo. Hana, ewe a wiliti inen Samuel, a mmen weires letipan me a kechiw pokiten a rit. Tafit a “wesewesen pworetiu o chapala,” me Epafrotitus a chüpwül lupwen a silei pwe pwiin kewe chon lükü ra letipeta ren ar rongorong pwe a samau.​—Kölfel 38:6; 1 Samuel 1:7, 10; Hiop 29:2, 4, 5; Filipai 2:25, 26.

Nge ifa usun ekkewe Chon Kraist ikenäi? Eli samau, chinnapelo are pwal ekkoch osukosuk a eppeti ar mochen alapalo ar angang ngeni Jiowa. Iwe, repwe ekieki pwe ra elichippüngü Jiowa me chiener kewe chon Kraist. Are ekkoch ra chüen ekketipisiir ren ar kewe föfförmwääl loom, me ra tipemwaramwar ika Jiowa a wesewesen omuserelo. Pokiten ekkoch nonnomun ar famili mi weires, ra lükü pwe ese fich ngeniir än emön epwe tonger. Pwata a ina usun?

Ekkoch ra määritä lon eü famili ese wor tong, nge a chök wor esiit, niuokkus me tongei pwisin iir. Eli rese silei ifa usun emön sam mi alükülükü an famili, fokkun tonger, mwareitiir, apöchökküler, ese nennengeni föfför mwäällir, me mwittir omusalo pwal mwo nge ar tipis watte. Pokiten semer kewe rese tonger, a weires ar repwe weweiti ifa usun semer lon läng epwe fokkun tonger.

Äwewe chök, Fritz a makkeei: “Än semei we ese pwäratä tong a kküü manauei lekükküni me lesäräfööi. * Esap mwo nge fän eü a apüngaei me use meefi pwe ua chiechi ngeni. Ren enletin ua niuokkusiti fän chommong.” Ina popun, iei a 50 ierin Fritz nge a chüen meefi pwe a lipwäkingaw. Pwal iei meefien Margarette: “Semei kewe me inei rese sile tong. Ina minne, lupwen ua poputä le käeö Paipel, a mmen weires ai upwe anchangei napanapen emön sam mi tong.”

Ekkena memmeef a tongeni wewe ngeni pwe fän ekkoch ach angang ngeni Kot esap ren ach tongei nge pokiten chök lape ngeni sia mengiringir are niuokkus. Inaamwo ika sia föri ükükün ach tufich nge usun itä ese fen naf. Ach mochen apwapwaai Jiowa me  pwiich kewe mi tongeni achoukich pun sia meefi pwe sia resin achocho nge esap ki rech. Iwe, neman pokiten sise tikeri minne sia achocho ngeni sia etipisi pwisin kich me lichippüng.

Met sipwe tongeni föri? Eli mi lamot sipwe pwisin ächema ngenikich ükükün watteen än Jiowa tong. Aposel Jon a weweiti napanapen Kot ei.

“Kot mi Lapalap Seni Letipach”

Le sopwoloon ewe aeuin senturi, iei makkeien Jon ngeni chienan kewe chon lükü: “Iwe, epwe chok iei usun ach sipwe sinei are kich noun ewe mi enlet, o sipwe achipa letipach fan mesan, are letipach epwe apungukich; pun Kot mi lapalap seni letipach, o a fen sinei mettoch meinisin.” Pwata Jon a makkeei ekkeei kapas?​—1 Jon 3:19, 20, TF.

Jon a fokkun silei pwe emön nöün Jiowa chon angang a tongeni meefi pwe letipan a apwüngü. Neman Jon a fen pwisin meefi ena. Le alüwölün a nuwepwora, iwe fän ekkoch Jises a apwüngü ren an tunosikesik ngeni aramas. Ina popun, Jon me pwiin we Jemes, Jises, “a aita ngeniir ‘Poanerkes’ a wewe ngeni ‘Nöün Chopulap.’”​—Mark 3:17; Luk 9:49-56.

Lon ekkewe 60 ier, Jon a mosonosonolo me a wiliti emön chon Kraist mi tipemirit, tongei aramas me ümöümöch. Lupwen a makkeei nöün we aeuin taropwe fän emmwenien Kot, a silei pwe Jiowa ese titchiki eü me eü mwäällin nöün kewe chon angang. Nge, i emön Sam mi ur ren tong, kisäseü, me ümöümöch ngeni meinisin mi tongei me fel ngeni lon enlet. Jon a makkeei: “Kot mi tong.”​—1 Jon 4:8, TF.

Jiowa a Pwapwaiti Ach Angang Ngeni I

Jiowa a silei ach kewe apwangapwang me a ekiekikich. Iei makkeien Tafit: “Pun a silei sokosokuch, a chemeni pwe kich pwül echök.” Jiowa a mirititi pwe nonnomuch a tongeni anapanapakich. A sileiöchükich lap seni pwisin kich.​—Kölfel 103:14.

A silei pwe sia mochen siwili napanapach mi ngaw nge sise chök tongeni akkufu apwangapwangen futukach. Sia pwal meefi meefien ewe aposel Paul ei: “Ngang üsap föri mine a mürina usun üa mochen, nge üa föri mine a ngau, ewe sokun föför ngang üsap mochen pwe üpwe föri.” Kich meinisin sia meefi ei sokkun weires. Nge ren ekkoch, letiper a apwüngüür.​—Rom 7:19.

Sipwe chechchemeni iteitan: Än Jiowa ekiek usuch a lamot lap seni met sia pwisin ekieki usuch. Iteiten an a küna pwe sia älleasochisi i, a fokkun lulo an pwapwa. (Än Salomon Fos 27:11) Inaamwo ika me rech ese kon watte ewe angang sia föri, nge Jiowa a pwapwa ren pokiten sia achocho me föri seni letipach. A mirititi met sia mochen fori me met sia tipeni nge ese chök nengeni met sia föri. Jiowa a tongeni älleani letipach.​—Jeremaia 12:3; 17:10.

Äwewe chök, chommong Chon Pwäratä Jiowa ra pükün nisässäü me rese mochen nom lein aramas. A weires ngeniir ar repwe afalafal imw me imw. Nge pokiten ra mochen angang ngeni Kot me älisi chon orun kewe ra achocho le fos ngeni chon orur usun ewe Paipel. Neman ra meefi pwe ese kon watte met ra föri ina minne rese pwapwa. Ra ekieki lon letiper pwe esor lamoten ar repwe fiti ewe angangen afalafal. Nge Jiowa a fokkun pwapwa ren än emön föri ena angang ükükün an tufich. Me rese tongeni silei ineet me ia pwikilin ewe enlet epwe pukutä, määritä me uwa ie.​—Än Salomon Afalafal 11:6; Mark 12:41-44; 2 Korint 8:12.

Ekkoch Chon Pwäratä ra weires ren ar semwen fitu ier are ar chinnapelo. Iteiten ar fiti mwich lon ewe Kingdom Hall ra meefi metek me aürek. Lupwen ra rongorong eü afalafal usun ewe angangen afalafal a cheme  ngeniir met ra föri loom me met ra chüen mochen föri nge rese tufich pun ra apwangapwang. Iwe ra mengiringir pokiten rese tongeni apwönüetä ewe pesepes lon ükükün met ra mochen föri. Nge, Jiowa a fokkun aücheani ar tuppwöl me likiitü. Ika repwe akkamwöchü ar tuppwöl, I esap tongeni mönükalo ar angang ngeni.​—Kölfel 18:25; 37:28.

“Achipa Letipach”

Lupwen Jon a chinnapelo, a weweöchüti watteen än Kot tong. Chechchemeni pwe Jon a fen makkeei: “Kot mi lapalap seni letipach, o a fen sinei mettoch meinisin.” Pwal och Jon a pesekich ach sipwe “achipa letipach.” Met weween alon Jon na?

Me ren ewe Vine’s Expository Dictionary of Old and New Testament Words, ewe fosun Krik mi afföü ngeni “achipa” a wewe ngeni “peppesei are winneni letipen emön.” Weween, ren ach sipwe achipa letipach, mi lamot sipwe peppesei an epwe lükü pwe Jiowa a tongekich. Ifa usun?

Fritz, ewe sia pworausan mwan, a emön elter iei lon ewe mwichefelin Chon Pwäratä Jiowa 25 som ier. A küna pwe an pwisin käeö Paipel a tongeni alükülükü letipan usun än Jiowa tong, iei met a apasa, “Ua käeöfichi ewe Paipel me nöüch kewe puk iteitan. A älisiei ai usap ekkekieki met a fis ngeniei loom, nge upwe ännefota ekkewe mettoch epwe fis lon mwach mi amwarar. Fän ekkoch, ua chemenisefalli manauei loom, iwe ua meefi pwe Kot esap tongeni tongei ei. Nge, lap ngeni met ua käkkäeö iteitan a apöchökküla letipei, alapalo ai lükü me älisiei ai upwe pwapwa me tipemirit.”

Pwüngün, ach äkkällea Paipel me ekkekieki met sia älleani esap siwili nonnomuch, nge a tongeni siwili ach ekiek usun nonnomuch. Ach lefareni än Kot kapas lon letipach epwe älisikich le eäni an ekiek. Pwal och, ach käeö a atufichikich le alapalo ach weweiti watteen än Kot tong. Ekis me ekis sia tongeni weweiti pwe Kot ese etipisikich ren ach kewe apwangapwang me met a fis ngenikich le kükkünüch. A weweiti pwe sise pwisin efisatä ekkewe osukosuk mi chounikich lon pekin memmeef me apwangapwangen inisich.

Nge ifa usun Margarette, ewe sia pworaus usun me mwan? Lupwen a silei Jiowa, a küna watteen feiöch seni an käkkäeö Paipel. Usun chök Fritz, a pwal siwili an ekiek usun napanapen emön sam. Iotek a älisi Margarette an epwe apöchökkülalo met a käeö, iei alon: “Ua poputä ren ai ekieki pwe Jiowa i chiechiei, pun ua fen sileöchü ewe esin tong lefilen chiechi lap seni än emön sam tong. Ekis me ekis, ua silei ifa usun upwe pwär ngeni Jiowa meefiei, ai tipemwaramwar, ai aürek me osukosuk. Fän chommong ua iotek ngeni Jiowa me apachaalong ekkewe mineföön pworaus ua käeö usun i. Mwirin fitu fansoun, ai riri ngeni Jiowa a pöchökkülelo me ese kon chüen weires ai upwe ekieki pwe i semei mi tong.”

Ngaselo Seni Aürek Meinisin

Lupwen sia nonnom lon än Setan ei otot mi ngaw, sise tongeni unusen ngaselo seni ach kewe aürek. Weween pwe ekkoch chon Kraist ra weires pun ra chüen aürek are pwisin etipisiir. Nge sipwe lükülük pwe Jiowa a silei letipach mi mürinnö me ach angang weires. I esap mönükalo ewe tong sia pwäratä fän itan.—Ipru 6:10.

Lon ewe fönüfan sefö epwele feito fän ewe Mwuun Messaia, aramas meinisin mi tuppwöl repwe ngaselo seni än Setan ei otot mi chouniir. A ifa me watteen ach ngaselo! Iwe, sipwele küna chommong pisekin ännet usun watteen än Jiowa tong. Tori ena fansoun sipwele lükülük pwe “Kot mi lapalap seni letipach, o a fen sinei mettoch meinisin.”​—1 Jon 3:20.

[Pwóróus fan]