Köl Ngeni Jiowa!

“Üpwe kölün mwareiti ai Kot lupwen fansoun ai manau.”​—KÖLF. 146:2.

1. Met a amwökütü ewe alüwöl Tafit an epwe föri ekkoch an köl?

 LE KÜKKÜNÜN Tafit, a kan sou nonnom lon ekkewe masies arapakkan ngeni Petleem lupwen a tümünü nöün seman kewe man. Lupwen a mammasa ekkewe siip, Tafit a tongeni ekieki usun förien Jiowa kewe mi amwarar ren ekkewe füü lon läng, “ekkewe manmwachon lemäl,” me “ekewe mansüsü.” A fokkun kküü letipan ren met a küna, ina popun a föri ekkewe köl mi achüngü letip nge a mwareiti ewe Chon Föri ekkeei mettoch mi amwarar. Chommong förien Tafit kewe köl sia küna lon puken Köl Fel. *​—Älleani Kölfel 8:3, 4, 7-9.

2. (a) Ifa usun nikättik a tongeni kküü letipen emön? Äweweei. (b) Met sipwe tongeni käeö seni än Tafit riri ngeni Jiowa lon Kölfel 34:7, 8 me 139:2-8?

² Ese mwääl seni ena atun Tafit a angöchülo ettikin ekkewe minen nikättik.  A fokkun sipeöch, ina popun a ketiw an epwe etikki ewe arp fän iten King Saul. (SalF. 22:29) Ekkewe nikättik Tafit a ettiki ra mmen ekinamwei ewe King mi osukosuk le möküran, a pwal ina usun ekkewe nikättik ikenäi ra tongeni ekinamwei ekiekin aramas. Iteiten än Tafit ettiki nöün we arp, “Saul a kinamwela o chikaresefäl.” (1 Sam. 16:23) Tori ikenäi, a chüen aüchea ekkewe köl förien ewe sou mak köl mi tuppwöl, Tafit. Ekieki mwo, iei a lap seni 3,000 ier mwirin uputiwen Tafit, nge fite million aramas mi sokkopat nonnomur woon unusen fönüfan ra chüen äkkälleani an kewe köl pwe epwe aururu letiper me eäni äpilükülüköch.​—2 Kron. 7:6; älleani Kölfel 34:7, 8; 139:2-8; Amos 6:5.

Lamoten Nikättik lon ewe Fel mi Enlet

3, 4. Ikkefa kokkotun kölün ekkewe köl mi pin lon ränin Tafit kewe?

³ Tafit a fokkun angöch lon pekin nikättik me a unusen äeä tufichin na le elingalo Jiowa. Mwirin an wiliti kingen Israel, a akkota angangen ewe imwen fel kapachelong ekkewe nikättik mi fokkun öch. A wor 38,000 chon Lifai ra angang lon imwenfel, nge 4,000 leir ra “wisen mwareiti” Kot ren nikättik me 288 leir ra “sile o ngiöch le köl ngeni ewe Samol mi Lapalap,” nge ra pwal chüen käkkäeö.​—1 Kron. 23:3, 5; 25:7.

⁴ Chommong me lein ekkewe köl chon Lifai ra eäni fiti nikätikkin förien Tafit. Ese mwääl, a chchüng letipen ekkewe chon Israel lupwen ra rongorong än Tafit kana köl. Mwirin, lupwen ra uwei ewe pworofel ngeni Jerusalem, “Tafit a pwal allük ngeni ekewe samolun chon ewe ainangen Lefi, pwe repwe filätä chon köl me lein pwiir kana, pwe repwe köl o ettiki sokopaten pisekin ettik fän pwapwa, repwe ettik kitar me ükülele o aea pisekin kaktai.”​—1 Kron. 15:16.

5, 6. (a) Fän än Tafit nemenem, pwata ra awora watteen fansoun fän iten nikättik? (b) Pwata sia silei pwe Chon Israel loom ra aücheani nikättik lon ar fel ngeni Kot?

⁵ Lon fansoun Tafit we, pwata ra awora watteen fansoun fän iten nikättik? Pokiten chök ewe king emön sou köl mi silei ettikin nikättik? Aapw, a pwä pwal eü popun fitepükü ier mwirin än King Hiskia a akkotasefäli angangen ewe imwen fel. Iei met 2 Kronika 29:25 a erä:“King Hiskia a alenia ekewe mwän seni ewe ainangen Lefi lon imwen ewe Samol mi Lapalap fän pisekin kaktai, fän kitar me ükülele, usun mine Tafit me Kat nöün ewe king we soufos, pwal ewe soufos Natan ra allük, pun ei allük ekewe soufos ra apasa fän alon ewe Samol mi Lapalap.”

⁶ Pwüngün, Jiowa a nöünöü nöün kewe soufos le emmweni chon fel ngeni ar repwe mwareiti I ren köl. A pwal mwo nge mumu ngeni ekkewe chon köl seni ewe einangen samol fel ar resap mwo angang lon ewe imwen fel pwe epwe wor ar fansoun le fför köl me praktis.​—1 Kron. 9:33.

7, 8. Lon ach eäni ach kewe Kölün mwareiti Jiowa, met a kon lamot lap seni angöchüch?

⁷ Eli kopwe apasa, “Ika ü nom lon ena fansoun, usap ketiw le fiti ekkewe mi angöch le köl lon imwen fel pun use ngiiöch!” Nge esap meinisin chon Lifai sou ettik iir mi silelap. Me ren 1 Kronika 25:8 mei wor leir “chon kaiö.” Sipwe pwal chechchemeni pwe chommong me lein ekkewe ekkoch einangen Israel chon ettik me sou köl mi fokkun angöch, nge Jiowa a chök ewisa ngeni chon Lifai ar repwe tümünü ewe nikättik. Sia lükü pwe ra apwönüetäöchü wiser, ese lifilifil ika iir sou sile are ‘chon kaiö’ chök.

⁸ Tafit a fokkun pwapwaiti nikättik me a pwal sipeöch le ettik. Nge Kot a chök aücheani angöchün emön? Lon Kolose 3:23 a erä: “Meinisin mine oua föri, oupwe angang ngeni ren unusen letipemi usun itä nge oua  angang ngeni ach Samol.” A ffat pwe ewe a lamot, ach sipwe föri ükükün ach tufich lon ach mwareiti Jiowa.

Lamoten Nikättik Mwirin Fansoun Tafit

9. Äweweei met ka tongeni küna me rongorong ika ka nom atun efinünün ewe imwen fel lon fansoun Salomon we.

⁹ Fän än Salomon nemenem, a watte lamoten nikättik lon fel mi enlet. Lon efinünün ewe imwen fel, a fokkun chocho ewe kümien chon nikättik, mi kapachelong 120 chon ettik rappwa. (Älleani 2 Kronika 5:12.) Ewe Paipel a erä pwe “ekkewe chon ettiki rappwa [iir meinisin samol fel] me ekewe chon köl ra chietäpök le mwareiti ewe Samol mi Lapalap o kilisou ngeni, . . . ‘Kot a kirikiröch, an tong ellet a nonom tori feilfeilachök.’” Lupwen ena nikättik mi apwapwa a ttik, ewe imwen fel “a urela ren eu kuchu” mi änneta pwe Jiowa a pwapwaiti. A ifa me amwararen an rongorong tikitikin ekkewe rappwa me fite ngeröü chon köl mi chiepök!​—2 Kron. 5:13.

10, 11. Met a pwäratä pwe ekkewe popun chon Kraist ra nöünöü nikättik lon ar fel?

¹⁰ Ekkewe popun Chon Kraist ra pwal nöünöü nikättik me köl lon ar fel. Lon ena atun ra kan mwichfengen lon imwen aramas esap lon imwen fel. Inaamwo ika a weires ar mwichfengen pokiten ra küna koput me riäfföü, nge ekkena chon Kraist ra chüen mwareiti Kot ren köl.

¹¹ Iei met ewe aposel Paul a pesei ngeni pwiin kewe chon Kraist lon Kolose: “Oupwe aiti ngeni eman me eman lefilemi ei kapas, . . . oupwe kölü ekewe kölfel, ekewe kölün lamalam me ekewe köl mi pin. Oupwe köl ngeni Kot fän kilisou lon letipemi.” (Kol. 3:16) Atun Paul me Silas ra kalapus, ra “iotek o köl kölün mwareiti Kot” inaamwo ika esor nöür puken köl. (Fof. 16:25) Ika ka kalapus, fitachö ach kewe Kölün mwareiti Jiowa ka chemeni kopwe tongeni eäni?

12. Ifa usun sipwe pwäratä pwe sia aücheani ach kewe köl?

¹² Pokiten a watte lamoten ekkewe nikättik lon ach fel, sipwe pwisin eisinikich: “Ua pwäratä pwe ua aücheani ach kewe köl? Ua achocho le warekkäi ngeni ekkewe mwich me mwichelap pwe upwe tongeni fiti ewe kölün le poputään me ua köl seni letipei? Ua affata ngeni nei kewe pwe esap fansoun asösö me towu lükün ewe atun sia eäni köl lefilen ewe Sukulen Afalafal me ewe Service Meeting, are lefilen ewe Public Talk me Käeöön Leenien Mas? Ach eäni köl, ina kinikinin ach fel. Ewer, ese lifilifil ika sia fokkun sile are ‘chon kaiö,’ nge kich meinisin sia tongeni kölfengen lon ach mwareiti Jiowa.​—Apöpö ngeni 2 Korint 8:12.

Ffatoloon ewe Enlet a Efisi Siwil

13, 14. Ifa lamoten ach eäni köl seni letipach atun ach kewe mwich? Äweweei.

¹³ Lap seni ipükü ier ra lo, ewe Zion’s Watch Tower a äweweei eü popun a fokkun lamot ach kewe Kölün mwareiti Jiowa. A erä: “A mürinnö ach eäni ekkewe köl usun ewe enlet pwe epwe fotolo lon ekiekin me letipen nöün Kot kewe aramas.” Chommong kapasen ekkewe köl a longolong woon ewe Paipel, ina popun a öch ach käeö kapasan pwe epwe tolong le alolloolun letipach. Fän  chommong, a chchüng letipen emön mi kerän fiti ach kewe mwich pokiten a rongorong ach kewe köl.

¹⁴ Lon eü pwinin 1869, C. T. Russell a fetäl seni an leenien angang ngeni imwan we nge a rongorong än aramas köl lon eü imw fan. Lon ena fansoun, Russell a lichippüng me ekieki pwe esap tongeni küna ewe enlet usun Kot. Ina minne a filatä an epwe äeä unusen manauan le angang lon an business pwe ika a watte winnan, epwe mwaren älisi osupwangen aramas lon pekin aion inaamwo ika ese tongeni älisiir lon ar riri ngeni Kot. Pwiich we Russell a tötiw lon ena leeni mi ekis limengaw me a küna pwe ra föri ar fel. A mottiw me aüseling. Mwirin iei makkeian usun met a rongorong lon ena pwinin: “Ren än Kot älillis a fen naf, pwe a apöchökkülasefäli ai lükülük woon ewe Paipel mi feito seni Kot.” Nengeni pwe ar eäni köl ina met a äkkäeüin lukeato pwiich we Russell ngeni ewe mwich.

15. Pwata a lamot epwe wor ewe mineföön puken köl?

¹⁵ Lo, lo, lo, a siwil ach weweiti ekkewe pworaus lon ewe Paipel. Än Salomon Fos 4:18 a apasa: “Ewe al ekewe chon pwung ra fetal won a usun chok saramen unumweeran mi chok sasaramala tori a unusen ranila.” Saramoloon me ffateloon ekkewe pworaus mi enlet a efisi an epwe pwal siwil kapasen ach kewe köl. Rüwe me nimu ier ra lo, Chon Pwäratä Jiowa lon chommong fönü ra pwapwa le nöünöü ewe puken köl itelapan Sing Praises to Jehovah. * Seni ewe ier a kerän towu ewe puken köl tori ikenäi, a chommong pworaus lon Paipel a sasaramelo me ekkoch kapasen lon ena puken köl ese chüen pwüng. Äwewe chök, lon ewe puken köl lon fosun Merika minen loom a mak pwe iten Jiowa epwe “letelo” nge itä epwe “pinilo.” A ffat pwe pokiten a sasaramelo ewe enlet a lamot pwe epwe wor siwil lon nöüch kewe puken köl.

16. Ifa usun ewe mineföön puken köl epwe älisikich le apwönüetä än Paul we pesepes lon Efisus 5:19?

¹⁶ Pokiten ena me pwal ekkoch popun, ewe mwichen Sou Pwüngüpwüng a apwüngalo le föri eü mineföön puken köl itelapan Sing to Jehovah. * Ra fen achokükünalo ngeni 135 köl. Pokiten ese kon chüen chommong ekkewe köl sipwe käeö, itä epwe mecheres ach sipwe amwöchülükün kapasen ekkoch ekkewe mineföön köl, usun än Paul pesepes lon Efisus 5:19.​—Älleani.

Pwäratä Om Aücheani

17. Met epwe tongeni älisikich ach sisap pireir le eäni köl lon ach kewe mwich?

¹⁷ Itä ach meefi pireir epwe eppetikich le eäni köl lon ach kewe mwich? Kopwe ekieki  ei: Lon ach kapas esap pwe “sia mwälila fän chomong”? (Jem. 3:2) Nge inaamwo ika sise unusöch lon ach fos sia chüen mwareiti Jiowa ren ach fos ngeni aramas imw me imw. Iwe, itä pwata sipwe mut ngeni ach ngingaw le köl an epwe eppetikich le mwareiti Kot ren köl? Jiowa, ewe a “föri awen aramas,” a pwapwa le rongorong ika sia äeä ngingiich le eäni ekkewe kölün mwareiti.​—Eks. 4:11.

18. Met a älisi pwiich kewe ar repwe käeö ngingiin ekkewe mineföön köl?

¹⁸ Ekkewe CD itelaper Sing to Jehovah​—Piano Accompaniment ra älisi chommong pwiich kewe ar repwe käeö ekkewe mineföön köl. A mmen apwapwa ach sipwe aüseling ngeniir. Ika kopwe akkaüseling iteitan me lon imwom, iwe epwe älisuk le sile ngingiir.

19. Ifa usun ra ammolnatä ekkewe kokkotun nikättikin ach kewe Kölün mwareiti Jiowa?

¹⁹ A mecheres ach sipwe tunalo aüchean ekkewe nikättik lon ach kewe mwichelap. Nge a fokkun watte ar angangen ammolnatä fän itan. Mwirin ar filatä ewe nikättik, repwe föri kokkotun ifa usun ekkewe 64 aramas lon ewe kümien chon nikättik repwe ettiki. Ekkewe chon nikättik ra awora watteen fansoun le praktis tori ar rekotuni ekkewe nikättik lon New York, Merika. Engol me lein pwiich kana rese nom Merika. Nge iir meinisin ra aücheani wiser le awora ekkewe nikättik mi ngiingiöch fän iten ach kewe sokkopaten mwich. Sia tongeni pwäratä ach kilisou ren ar angang weires. Atun ewe sou ätettel lon ach kewe mwichelap a etiwakich le kütta leeniach, sipwe mwittir mommot me aüseling fän mosonoson ngeni ewe nikättik ra fen ammolnaöchü fän itach.

20. Met sipwe üppos le föri?

²⁰ Jiowa a akkaüseling ngeni ach kewe kölün mwareiti. Ra fokkun aüchea me ren. Sia apwapwaai letipan ren ach köluwu seni unusen letipach iteiten ach fel ngeni lon mwich. Pwüngün, ese lifilifil ika sia fokkun angöch le köl are sise kon lien nge sipwe “köl ngeni ewe Samol mi Lapalap”!​—Kölf. 104:33.

[Ekkewe pwóróus fan]

Met Om Ekiek?

• Ikkefa ekkoch pworaus lon Paipel mi pwäratä pwe a lamot nikättik lon ach fel?

• Ifa usun ach älleasochisi än Jises we allük lon Mattu 22:37 a weneiti ach eäni ekkewe Kölün mwareiti Jiowa seni unusen letipach?

• Ifa usun sia tongeni pwäratä ach aücheani ach kewe Kölün mwareiti Jiowa?

[Ekkewe Kapas Eis Fan Iten Ewe Lesen]

[Sasing lon pekin taropwe 31]

Ka emiriti nöüm kewe ar resap towu seni leenier ika esor popun atun ach köl?

[Sasing lon pekin taropwe 32]

En mi käkkäeö lon imwom ach kewe kölün mwareiti Jiowa?