Mi Tufich Ach Sipwe Menemenöch?

“Menemenöch a efisi än emön mi osupwang epwe wöüöch, nge menemenemmang a efisi än emön mi wöüöch epwe osupwang.”​—Iei alon Benjamin Franklin.

ENA mwitün a pwäratä pwe a chommong aramas ra weweiti pwe sise tongeni mööni menemenöch usun chök ach mööni och pisek. Menemenöch ina ewe napanap a nom lon lelukach mi atoto pwapwa. Ina minne ekkewe mi mochenian pisek, mochen iteföülo, are mocheniaiti nonnomöchün emön, resap tongeni meefi menemenöch! Mi wor eü me lein ekkeei pworaus fan a weneituk?

• Ekkewe chon sitowa ra kan ämmeef ngonuk pwe ika ka kamö ar kewe minen amömö, iwe kopwe fokkun menemenöch.

• Akkuffengen lon leenien angang are lon sukul a apöchökküla om meefi pwe kopwe chök aüchea ika ka pwal föri met ekkewe ekkoch ra föfföri.

• Aramas rese kan meefi kilisou ren met ka föri fän iter.

• Chiechiom kewe ra efisi om kopwe lolowoiti met a wor rer.

• Kese küna pölüwen om kewe kapas eis mi lamot usun manau.

Pokiten sia kükküna ekkena minen etipetip, epwe tufich ach sipwe menemenöch? Aposel Paul a affata ewe mettoch epwe atoto “menemenöch.” A wor atun a wöüngaw me a pwal wor atun a wöüöch. A wor atun ekkoch chienan kewe ra ingeiti, me ekkoch ra turunufasa. Nge iei met a apasa: “Üa asipaei [käeö] ai üpwe menemenöch ren mine a wor rei.”​—Filipai 4:11, 12.

Menemenöch a monolo seni ekkewe rese mochen eäni ena napanap, nge ewe aposel Paul a apasa pwe sia tongeni käeö ach sipwe menemenöch. Sia etiwok le käeö ekkewe nimu napanap repwe atoto menemenöch me ren än Kot we Kapas, ewe Paipel.