Sipwe Ekipwichi Fel Mi Enlet

“Ewe räs a fokun watte, nge ekewe chon angangen räs ra chokükün.”​—MAT. 9:37.

1. Ifa usun kopwe äweweei atapwalapwal?

 MET kopwe föri ika mi wor nöüm taropwe a lamot emön epwe sainei lon chök ena ränin? Kopwe makkeei woon pwe mi “ATAPWALAPWAL!” Ka lo ngeni om appointment mi fokkun lamot, nge ka mmangeiti. Met kopwe föri? Ka ereni ewe chon ünteng, “Kese mochen emwittiri, pun ua ATAPWAL!” Pwüngün, ika a wor om angang mi lamot epwe chök tawe lon ena atun nge ese chüen naf fansoun, kopwele fokkun kitipöpö. A poputä le pwüngüpwüng fän mwärum me ka fokkun angang weires me emwittiri. Ina weween atapwalapwal!

2. Ikenäi ifa än chon Kraist we angang mi kon atapwalapwal lap seni meinisin?

² Ren Chon Kraist mi enlet ikenäi ese pwal wor eü angang mi kon atapwal lap seni ewe angangen afalafala ewe kapas allim me föralo chon käeö seni mwu meinisin. (Mt. 24:14; 28:19, 20) Ewe chon künö Mark a aloni alon Jises pwe ei angang epwe “akom” pwönütä mwen warotoon ewe sopwoloon. (Mark 13:10) Pwüngün, itä ürürün epwe ina usun. Jises a apasa: “Ewe räs a fokun watte, nge ekewe chon angangen räs ra chokükün.” Ewe fansoun räs epwe muchulo, a lamot epwe mwuutiir kinikin uwaan.​—Mt. 9:37.

3. Met chommong ra föri pokiten ei angangen afalafal mi atapwal?

³ Pokiten ewe angangen afalafal a fokkun lamot ngenikich, a öch sipwe awora ach fansoun me pöchökkül ükükün ach tufich. Sia pwapwa pwe chommong ra föri ena. Ekkoch ra amecheresi nonnomun manauer ren ar repwe pioneer, misineri are angang lon Bethel. Ra fokkun angang weires lon mettochun lükü. Ra fen pennüküolo chommong mettoch me küna chommong minen eppet. Nge Jiowa a fokkun efeiöchüür, ina minne sia fokkun pwapwa rer. (Älleani Luk 18:28-30.) Ekkoch rese tufichin pioneer full-time, nge ra achocho ükükün ar tufich le fiti ei angang mi amanaua aramas, kapachelong angangen älisi nöüch kewe ar repwe küna manau.​—Tut. 6:6, 7.

4. Pwata ekkoch rese chüen meefi atapwalapwalen ei fansoun?

⁴ Usun met sia fen küna, sipwe meefi atapwalen och mettoch ika mi wor kaükün ttaman me titchikin ineet epwe much. A chommong pisekin ännet seni Paipel me uruwo mi änneta pwe sia nonnom lon ränin lesopwoloon. (Mt. 24:3, 33; 2 Tim. 3:1-5) Iwe nge, ese wor emön mi silei ineet ewe sopwoloon epwe war. Lupwen Jises a pwärawu titchikin “asisilen . . . ewe fansoun sopolan,” a erä: “Esap wor eman a silei ewe rän are ewe kulok ekei mettoch repwe fis lon, sap mwo nge ekewe chon läng are ewe Nau, nge ewe Sam echök a silei.” (Mt. 24:36) Pokiten sise silei ena rän, a weires ngeni chommong ar repwe ekkekieki atapwalapwalen ei fansoun iteitan, äkkäeüin ika ra fen eäni ena ekiek ren fansoun langattam. (SalF. 13:12) A pwal ina usun meefiom fän ekkoch? Met epwe tongeni älisikich le ämääraatä are ekkekieki atapwalapwalen ewe angang Jiowa me Jises ra ewisa ngenikich ikenäi?

Nengeni Jises, Ach Leenien Äppirü

5. Ifa usun Jises a pwäratä pwe an angang ngeni Kot a atapwalapwal?

⁵ Jises Kraist i ewe äkkäeüin leenien äppirü ren an pwäratä pwe an angang ngeni  Kot a atapwalapwal. Eü popun a meefi ena pokiten a chommong met epwe föri lon chök ükükün ülüngät esopw ier. Iwe nge, Jises a föri chommong mettoch fän iten ewe fel mi enlet lap seni meinisin. A pwäralo iten Seman we me an kokkot, afalafala ewe kapas allim usun ewe Mwu, pwäralo likotuputupun me mwäällin än ekkewe nöüwisin lamalam afalafal me älisatä än Jiowa nemenem pwal mwo nge tori an a mälo. A fokkun achocho le afalafala, älisi me echikaratä ekkewe aramas ekis meinisin. (Mt. 9:35) Ese pwal wor emön a föri ena ükükün watteen angang lon chök fansoun mwochomwoch. Jises a fokkun angang weires.​—Jon 18:37.

6. Met Jises a ekilapei lon manauan?

⁶ Met a amwökütü Jises le angang weires? Ese mwääl Jises a silei seni än Taniel oesini ükükün ttamen ewe fansoun epwe apwönüetä an angang me ren otaen Jiowa. (Tan. 9:27) Ina minne, ena oesini a affata pwe än Jises angang woon fönüfan epwele muchulo “lukalapen ekewe fisu ier” are mwirin ülüngät esopw ier. Ekiselo chök mwirin an tolong lon Jerusalem lon ewe ier 33 fansoun Pasofer, Jises a apasa: “A war ewe fansoun pwe Nöün Aramas epwe angei lingan.” (Jon 12:23) Inaamwo ika Jises a silei pwe epwele mälo, nge esap ina met a kon ekilapei lon manauan, esap ina ewe äkkäeüin popun a angang weires. A ekilapei an epwe föri letipen Seman fansoun meinisin me pwäratä tong ngeni aramas. Ena tong a amwökütü Jises le kütta, asukula nöün kewe chon käeö me tiniirelo ar repwe afalafal, pwe repwe sopwelo ewe angang a fen poputääni me föri angang mi lap seni minne a föri.​—Älleani Jon 14:12.

7, 8. Ifa ekiekin nöün Jises kewe chon käeö atun a limeti ewe imwan fel me pwata Jises a föri ena?

⁷ Eü pworaus lon manauen Jises mi fokkun pwäratä pwe a ekipwich lon an angang, ina lon ewe fansoun Pasofer, atun a kerän poputä an angang. Jises me nöün kewe chon käeö ra lo Jerusalem me ra küna “ekkewe chon amomolo kou me siip me lisom, pwal ekkewe chon siwili moni” lon ewe imwen fel. Met Jises a föri me ifa ekiekin nöün kewe chon käeö usun?​—Älleani Jon 2:13-17.

⁸ Minne Jises a föri me apasa lon ena atun a ächema ngeni nöün kewe chon käeö ewe oesini lon än Tafit ei köl: “Pun ai ekipwichi imwom mi pin a küküri leüti usun ekkei.” (Kölf. 69:9) Pwata? Pokiten met Jises a föri a tongeni feiengaw ren, pun ekkewe samol fel, sou mak me pwal ekkoch, fen iir meilapen ewe imwen fel mi apöchökküla ena angang mi pworoingaw. Lupwen Jises a atai me pwäralo ngawen ar kokkot, a wiliti chon koputer. A pwüng met nöün kewe chon käeö ra ekieki ren minne a fis lon ena atun pwe Jises a ‘ekipwichi imwen Kot,’ are ekipwichi  fel mi enlet. Iwe nge, met weween ewe kapas ekipwich? Mi sokkolo seni ewe kapas atapwalapwal?

Ekipwich mi Sokko Seni Atapwalapwal

9. Met weween ewe kapas ekipwich?

⁹ Eü puken äweween kapas a äweweei pwe “ekipwich” a wewe ngeni “fokkun mochen föri mettoch.” A pwal tongeni löllö ngeni ekitekit are fokkun mwasangasang le föri och mettoch. Ekkena kapas ra weneiti napanapen än Jises angangen afalafal. Ina minne, lon Ewe Kapasen God a apasa: “Ai aucheani om we Imwenipin a ussun och ekkei mi ngetenget non netipei.” Itiitin ewe kapas “ekipwich” lon ekkoch fos, ina “letip mi pwichipwich” usun itä eü letip a ngetenget. Ina popun lupwen nöün Jises kewe chon käeö ra küna met a föri lon ewe imwen fel a cheme ngeniir alon Tafit kewe. Iwe nge, met a küküri letipen Jises are met a amwökütü i le föri ena?

10. Ifa weween ewe kapas “ekipwich” me ren ewe Paipel?

¹⁰ Ewe kapas “ekipwich” lon än Tafit we köl a feito seni eü kapasen Ipru mi afföü ngeni “lukomong” lon ekkoch kinikin lon Paipel. Fän ekkoch lon ewe New World Translation a afföüni ena kapas ngeni än emön “kütta seni emön an epwe chök unusen tuppwöl ngeni.” (Älleani Ekistos 20:5; 34:14; Josua 24:19.) Eü puken äweween kapas lon Paipel a apasa: “Ra kan nöünöü ewe kapas ren ewe riri lon pwüpwülü . . . Usun emön mwän are fefin mi lukomong woon pwülüwan, pwal ina chök usun ren Kot a lukomong me epwe fiu fän iten an pwüng woon nöün kewe aramas.” Ina minne, lon Paipel ekipwich a kon lap seni än emön epwe chök mwasangasang le föri och mettoch, usun chök än aramas mwasangasangeiti och urumwot mi apwapwa. Än Tafit ekipwich usun chök a lukomong ren an ese mochen pwe ewe ling fän iten Jiowa epwe pwal lo ngeni emön kot. Ina ewe sokkun ekipwich epwe amwökütü emön le tümünü iteöchün emön are äwenecharasefäli och föfför ese pwüng a weneiti emön na.

11. Met a amwökütü Jises an epwe fokkun ekipwich?

¹¹ Mi pwüng an nöün Jises kewe chon käeö ekieki pwe föfförün Jises lon ewe imwen fel a weneiti alon Tafit kewe. Jises ese chök achocho pokiten a silei pwe a mwochomwoch an fansoun nge pokiten a ekipwich are lukomong woon iten Seman we me fel mi enlet. Lupwen a küna än aramas eitengawa me ösüfölüngawa iten Kot, a fokkun ekipwich are lukomong me a äwena ekkena mettoch. Lupwen Jises a küna än ekkewe nöüwisin lamalam eriäfföü me kirikiringaw ngeni ekkewe aramas mi tekison, an ekipwich a amwökütü i le älisiir me tuwenewen le apwüngü ekkena nöüwis mi ngaw.​—Mt. 9:36; 23:2, 4, 27, 28, 33.

Ekipwichi Fel mi Enlet

12, 13. Met ekkewe nöüwisin lamalam mi erä pwe iir Chon Kraist ikenäi ra fför ngeni: (a) Iten Kot? (b) Mwuun Kot?

¹² Ekiekin aramas ikenäi mi erä pwe iir chon fel ngeni Kot a löllö ngeni are fen ngaw seni ekiekin aramas lon fansoun Jises we. Äwewe chök, chechchemeni än Jises äiti ngeni nöün kewe chon käeö ar repwe äkkäeüin iotek usun iten Kot: “Itom epwe pin.” (Mt. 6:9) Ekkewe nöüwisin lamalam, äkkäeüin iir kewe mi erä pwe iir Chon Kraist, ra äiti ngeni aramas le silei Kot ren itan me epinalo ena it? Aapwi, pun ra fen tupunimwääli Kot ren ar afalafal chofona usun choweän ekkein ell, ülümön kot lon emön me ngünün aramas esap tongeni mälo. Ra föri pwe Kot emön mi monomon mi weires än aramas repwe sileöchü, pwal mwo nge emön mi kirikiringaw. Ra eitengawa Kot ren föfförür mi ässäü, me likotuputup. (Älleani  Rom 2:21-24.) Pwal och, ra achocho le tükümalo iten Kot we, pwal mwo nge tölawü seni nöür Paipel. Ina minne, ra eppeti aramas ar repwe arap me pacheöch ngeni Kot.​—Jem. 4:7, 8.

¹³ Jises a pwal äiti ngeni nöün kewe chon käeö ar repwe iotek fän iten Mwuun Kot: “Mwum epwe war, letipom epwe fis won fanüfan usun chök lon läng.” (Mt. 6:10) Inaamwo ika ekkewe nöüwisin lamalam mi erä pwe iir Chon Kraist ra äkkeäni ena iotek, nge ra pesei aramas ar repwe älisatä mwuun fönüfan me ekkoch mwicheichen aramas. Pwal och, ra esiita ekkewe chon afalafala ewe Mwuun Kot. Ina popun, chommong me lein ekkewe mi erä pwe iir Chon Kraist, rese chüen pwoppworaus usun Mwuun Kot, are pwal mwo nge lükü.

14. Ifa usun ekkewe nöüwisin lamalam mi erä pwe iir Chon Kraist rese apöchökküla än Kot we Kapas?

¹⁴ Lon än Jises we iotek ngeni Kot, a erä: “Om kapas a let.” (Jon 17:17) Lupwen a nonnom woon fönüfan, Jises a pwäratä pwe epwe seikatä ewe “chon angang mi allükülük o tipachem” an epwe wisen awora möngö lon pekin lükü fän iten nöün kewe aramas. (Mt. 24:45) Inaamwo ika ekkewe nöüwis mi erä pwe iir Chon Kraist, ra mwittir apasa pwe ra asukula aramas usun än Kot Kapas, nge ra wesewesen apwönüetä alon Jises na? Aapwi. Fän chommong ra apasa pwe masouen ewe Paipel tutulap chök. Rese asukula aramas usun Kot an epwe aururuur me asaramer, nge, ra fen epwerika selinger ren tipatchemen fönüfan. Pwal och, rese apöchökküla än Kot emmwen usun minne mi pwüng me mwääl pwe ra chök mochen apwapwaai letipen aramas.​—2 Tim. 4:3, 4.

15. Met meefiom ren minne ekkewe nöüwisin lamalam ra föri nge ra erä pwe ina letipen Kot?

¹⁵ Pokiten ekkena nöüwisin lamalam ra föri ekkena mettoch me ra erä pwe ina letipen Kot me ewe Paipel, chommong aramas mi letip wenechar ra fen lichippüng are rese chüen lükü Kot me ewe Paipel. Ra tupulo ren Setan me an we otot mi ngaw. Met meefiom lupwen ka küna me rongorong ekkena mettoch iteiten rän? Pokiten en nöün Jiowa chon angang, ese mwöküt letipom le äwena ekkena mettoch mi eitengawa me ösüfölüngawa iten Kot? Ese mwöküt letipom le aururu ekkewe aramas mi letipwenechar mi küna riäfföü ren än emön kirikiringaw ngeniir me otupuur? Lupwen Jises a küna aramas mi “nom lon watteen osukosuk me weires  usun sip kana esap wor nöür chon mas,” ese chök pwäratä an tonger nge “a popuetä le afalafala ngeniir chommong mettoch.” (Mt. 9:36; Mark 6:34) A chommong popun mi lamot ach sipwe ekipwichi fel mi enlet usun chök Jises.

16, 17. (a) Met epwe amwökütükich le achocho lon ach angang ngeni Kot? (b) Met sipwe käeö lon en lesen mwirin ei?

¹⁶ Lupwen sia ekipwich lon ach angang, epwe kon aüchea alon aposel Paul we lon 1 Timoti 2:3, 4. (Älleani.) Sia angang weires le afalafal esap chök pokiten sia nonnom lon ränin le sopwoloon nge pokiten sia mirititi pwe ina letipen Kot. A mochen pwe aramas repwe silei ewe enlet, fel ngeni me küna feiöch. Sise chök achocho lon ei angang pokiten epwele muchulo ei fansoun, nge sia mochen elingalo iten Kot we me älisi aramas le silei letipan. Sia ekipwichi fel mi enlet.​—1 Tim. 4:16.

¹⁷ Pokiten kich nöün Jiowa, sia feiöch ren ach silei ewe enlet usun an kokkot fän iten aramas me fönüfan. Sia tongeni älisi aramas le küna pwapwa me äpilükülüköch usun mwach kkan me äiti ngeniir ifa usun repwe küna tümün atun kataloon än Setan we otot mi ngaw. (2 Tes. 1:7-9) Pokiten usun itä a mmangalo ränin Jiowa we, sisap meefi lichippüng are letipengaw nge sipwe fen pwapwa pun a chüen wor ach fansoun le ekipwichi fel mi enlet. (Mika 7:7; Ap. 2:3) Ifa usun sipwe alapalo ach ekipwichi? Sipwe käeö lon ewe lesen mwirin ei.

Ka Tongeni Äweweei?

• Met a amwökütü Jises le angang weires lon an angang ngeni Kot?

• Ifa weween ewe kapas “ekipwich” me ren ewe Paipel?

• Ikkefa ekkewe mettoch sia küna ikenäi itä repwe amwökütükich le ekipwichi fel mi enlet?

[Ekkewe Kapas Eis Fan Iten Ewe Lesen]

[Sasing lon pekin taropwe 10]

Jises a ekilapei le föri letipen Seman we me pwäratä tong ngeni aramas

[Sasing lon pekin taropwe 12]

A chommong popun mi lamot ach sipwe ekipwichi fel mi enlet