A Atufichikich Le Pworacho Ngeni Sokkopaten Sossot

“Ngang mi tufich ren mettoch meinisin lon ewe emon mi apochokkulaei.”​—FIL. 4:13, TF.

1. Pwata nöün Jiowa kewe aramas ra küna chommong sossot?

NÖÜN Jiowa kewe aramas ra kan kükküna sokkopaten sossot. Ekkoch sossot a feito seni pwisin ach kewe apwangapwang are seni ototen ei fönüfan. Ekkoch a fis pokiten ewe koput lefilen chon ü ngeni Kot me chon angang ngeni Kot. (Ken. 3:15) Seni chök loom, Kot a fen älisi nöün kewe mi tuppwöl pwe repwe pworacho ngeni än aramas eriäfföür pokiten ar lükü, etipetipaen chiechi mi ngaw pwal sokkopaten weires. Än Kot we manaman a tongeni pwal apworaikich.

Pworacho ngeni än Aramas Föfförün Eriäfföü

2. Pwata aramas ra eriäfföü chon eü lamalam pokiten minne ra lükü, me ifa usun ra eriäfföür?

² A kan fis riäfföün chon eü lamalam pokiten minne ra lükü. Ewe popun a fis ena riäfföü pokiten än aramas mochen amoielo ekkewe mettoch ra lükü, eppeti chöüfetälin ar lükü are atai ar tuppwöl. Ra tongeni mauner ren ar wenee ngeniir are assoläniir. Ewe Paipel a apöpööi än Setan kewe raüangaü ngeni raüangaüen emön laion are emön serepenit.—Älleani Kölfel 91:13.

3. Ifa napanapen än Setan raüangaü usun emön laion me usun emön serepenit?

³ Usun chök emön laion mi mwocho, Setan a maunei nöün Kot aramas ren an wenee ngeniir le eriäfföür, kalapuser are pinei ar angang me ren allük. (Kölf. 94:20) Ewe Yearbook a repotei pworausen Chon Pwäratä Jiowa ikenäi mi küna ekkena sokkun riäfföü. Ekkoch kümien aramas fän emmwenien nöüwisin lamalam are mwu ra kirikiringaw ngeniir lon sokkopaten fönü. Ekkena sokkun raüangaü ra fen ächepeteki ekkoch le ükütiw seni ar fel ngeni Jiowa. Nge, usun  chök emön serepenit, ewe Tefil a assolä le poisonü ekiekiir me otupuur le föri letipan nge sap fen letipen Jiowa. A föri ena pwe epwe apwangapwangaalo are angawalo ach riri ngeni Jiowa. Nge ren än Kot we manaman, sia tongeni pworacho ngeni ekkeei ruu sokkun eriäfföü.

4, 5. Met sipwe fokkun föri le mmolnetä fän iten riäfföü mwääl, me pwata? Äweweei.

⁴ Ese fokkun öch ach sipwe akkanchangei ekkewe sokkopaten riäfföü eli epwe tongeni torikich. Pokiten ese ffat ewe sokkun riäfföü sipwe wesewesen küna, iwe esor lamoten ach sipwe aüreki mettoch eli esap fen fis. Iwe nge, sipwe tongeni föri och mettoch ren ach sipwe mmolnetä. Lap ngeni chokkewe mi likiitü fän riäfföü mwääl ra sopwöch ren ar ekilonei pworausen ekkewe mi tuppwöl lon Paipel, än Jises leenien äppirü me an kewe afalafal. A atufichiir le alolloolaalo ar tongei Jiowa. Ena tong a älisiir le pworacho ngeni sossot meinisin mi toriir.

⁵ Ekieki mwo pworausen rüüemön pwiich fefin lon Malawi. Aramas mi kirikiringaw ra aumwesiir le mööni ewe taropwe mi esissillatä pwe iir chon peni eü pekin mwu. Iwe ra awater, kamwei seniir üfer me afanger pwe repwe achou manauer. Ra otupuur pwe ekkewe chon Bethel ra fen kamö nöür ena esin taropwe. Nge met pwiich kana ra erä? “Aua angang ngeni Jiowa chök. Nge meit ika ekkewe chon Bethel ra kamö ena taropwe. Nge äm ausap mööni nge meit ika oupwe nikemilo!” Mwirin ar föri ena fän pwora, pwiich kana ra musolo.

6, 7. Ifa usun Jiowa a apworai nöün kewe aramas fän riäfföü mwääl?

⁶ Aposel Paul a erä pwe ekkewe chon Kraist lon Tesalonika ra etiwa ewe enlet “lon watten riaföü,” nge “fän pwapwa mi feito seni [än Kot we manaman].” (1 Tes. 1:6) Pwüngün, chommong chon Kraist loom me ikenäi ra apworausa pwe ra pworacho lupwen a toriir ekkewe sokun sossot mi kon ssenük, iwe fen ina ewe atun a kinamwe letiper, ina eü me lein napanapen Kot kewe. (Kal. 5:22) Ena napanap kinamwe a tümünü letiper me ekiekiir. Pwüngün, Jiowa a äeä an we manaman le apöchökküla nöün kewe chon angang ar repwe pworacho ngeni ekkewe sossot me miritöch fän weires. *

⁷ Aramas ra mäirü atun ra küna än nöün Kot aramas tipeppos le akkamwöchü ar enletin tuppwöl pwal mwo nge fän watteen riäfföü mwääl. Me rer a usun itä a nom ren Chon Pwäratä Jiowa och pöchökkül mi kkolo pöchökkülan. A pwüng ena, pun ewe aposel Piter a alükülükükich ren an erä: “Oua feiöch are oua küna turunufas pokiten ämi tapwela mürin Kraist, pun . . .  [än Kot we manaman] epwe nonom lomi.” (1 Pit. 4:14) Ach küna riäfföü mwääl pokiten ach penatä minne mi pwüng a ännetatä pwe Jiowa a pwapwaitikich. (Mt. 5:10-12; Jon 15:20) A ifa me pwapwaach pokiten sia silei pwe Jiowa a efeiöchükich!

Pworacho ngeni Etipetipaen Chiechi mi Ngaw

8. (a) Met a atufichi Josua me Kalep le ü ngeni ekiekin chiener kewe? (b) Met sia käeö seni Josua me Kalep?

⁸ Ekkewe chon Kraist repwe fiu ngeni etipetipaen chiechi mi ngaw. A weires ach sipwe mwittir esilla ena sokkun sossot. Iwe nge, pokiten än Jiowa manaman a kon pöchökkül seni ekiekin fönüfan, sia tongeni ü ngeni chon esiitakich, chon pwenikich are chon aumwesikich le eäni ar ekiek. Äwewe chök, met a atufichi Josua me Kalep le ü ngeni ekiekin ekkewe engol spai mi titiilo ngeni Kenaan? Än Kot we manaman a efisi an epwe ‘sokola ekiekin leluker.’—Älleani Numperis 13:30; 14:6-10, 24.

9. Pwata chon Kraist resap säü ren ar repwe sokkolo seni aramas?

 ⁹ Än Kot we manaman a apöchökküla nöün Jises kewe aposel le älleasochisi Kot lap seni ekkewe nöüwisin lamalam aramas ra asüfölüür pwe itä iir mi enlet. (Fof. 4:21, 31; 5:29, 32) Chommong ra chök fitalo ekiekin aramas pwe ete wor osukosuk. Iwe nge, chon Kraist mi enlet ra ü pöchökkül fän iten minne mi pwüng. Nge kilisou ngeni ewe pöchökkül seni än Kot manaman, iwe rese säü ar repwe sokkolo. (2 Tim. 1:7) Ppii ei pworaus fan usun ach sisap kkuf ren chiechi mi ngaw.

10. Ifa ewe osukosuk ekkoch chon Kraist ra küna?

¹⁰ Ekkoch kükkün eli repwe osukosuk ika ra silei pwe emön chiener a föri och tipis. Ra meefi pwe ika repwe kütta älillis seni ekkewe elter fän iten chiener na epwe ta ar pwonen chiechi. Ra eäni ekiek mwääl pwe ra pwäratä tuppwöl lon ar chiechi ika resap akkaffat. Eli ewe chon tipis epwe mwo nge eriäniir pwe resap oturu. Pwüngün, pwe ei sokkun osukosuk ese chök fis ngeni ekkewe kükkün. Ekkoch ekkewe watte eli repwe pwal meefi weiresin ar repwe chuuri ekkewe elter usun föfförmwäälin emön chiener are chon ar famili. Nge, met emön chon Kraist epwe föri fän ei sokkun osukosuk?

11, 12. Met sipwe föri ika emön chon ach we mwichefel a pesekich ach sisap pwäri an tipis? Iwe, pwata?

¹¹ Ekieki ei kapas äwewe. Sipwe erä pwe emön alüwöl itan Alek, a küna chienan we Steve lon an we mwichefel pwe a sou katol sasingin kapas ingaw. Iwe, Alek a ereni Steve pwe a lolileniesini met a föfföri. Iwe nge, Steve ese afaani alon. Lupwen Alek a pesei ngeni an epwe chuuri ekkewe elter, Steve a erä pwe ika ra wesewesen pwipwiöch, iwe, Alek esap oturu. Itä Alek epwe lolilen ika resap chüen chiechi? Eli epwe ekieki iö me leir, ekkewe elter repwe lükü ika Steve ese pwäri tipisin na. Iwe nge, esap pwäk ena osukosuk ika Alek epwe chök fanafanelo. Pwüngün, epwe tongeni eselipa pöütüloon än Steve riri ngeni Jiowa. Mi öch ika Alek epwe chechchemeni pwe ‘niuokusiti aramas, iei eu sär fän itan, nge are a apilükülükü ewe Samol mi Lapalap, esap feiengau.’ (SalF. 29:25) Met Alek epwe pwal tongeni föri? Epwe chuursefäli Steve fän tong me äwena ngeni an na föfför mwääl. A lamot epwe pwora. Nge iei, neman Steve epwe tipemecheres le pwärawu an we osukosuk. Iwe, pwal lon ei fansoun epwe mürinnö än Alek epwe pesesefäli Steve an epwe fos ngeni ekkewe elter. Epwe pwal ereni pwe ika ese fos ngeniir mwirin och fansoun, iwe i epwe wisen ereni ekkewe elter.—Lif. 5:1.

¹² Ika ka fen küna ei sokkun osukosuk, neman le poputään chienom esap aücheani om mochen älisi. Nge lo, lo, lo epwe mirititi pwe ka ekieki met a öchiti. Ika ewe mi tipis a  etiwa om älillis, neman epwe fokkun kilisou ngonuk ren om pwora me tuppwöl. Nge ika a chüen song ngonuk, ka ekieki kopwe sani ena sokkun chiechi? A äkkäeüin lamot sipwe apwapwaai Jiowa, Chiechiach mi lapalap seni meinisin. Lupwen sipwe akkomwa Jiowa, chokkewe mi tongei i repwe pwal süföliti ach tuppwöl me wiliti chiechiach mi enlet. Sisap wääsi leenien ewe Tefil lon ewe mwichefelin Chon Kraist. Ika sia föri ena, sia ü ngeni angangen än Jiowa we manaman. Iwe nge, sia tipeeü ngeni angangen än Kot manaman ika sia tümünü limöchün ewe mwichefel.—Ef. 4:27, 30.

Likitü Fän Sokkopaten Weires

13. Met sokkun weires nöün Jiowa kewe aramas ra kan kükküna, nge pwata a chöüfetäl ekkena mettoch?

¹³ Mi sokkopat ekkewe weires sia tongeni küna, äwewe chök ren osupwangen moni, towu seni angang, mäloon attongach, semwen, taifun, söön, me metakkan. Pokiten sia nonnom lon “fansoun weires” sia lükü pwe ekiselo kich meinisin sipwe küna och sokkun weires. (2 Tim. 3:1) Ika a fis ena, sisap kon lolilen. Än Kot we manaman a tongeni apworaikich fän sokkopaten weires.

14. Met a älisi Hiop le likitü fän an kewe sossot?

¹⁴ Ekkewe weires mi tori Hiop ra chök akkatapw. A pöüt seni wöün, nöün kewe, chienan kewe, pöchökkülen inisin me pwülüwan we ese chüen lükülük woon Jiowa. (Hiop 1:13-19; 2:7-9) Nge Hiop a küna auruur seni Elihu. Met Elihu a apasa, pwal ina chök usun än Jiowa kapas ngeni Hiop: “Kopwe üla o ekieki usun än Kot angang mi amwarar.” (Hiop 37:14) Met a älisi Hiop le likitü fän an kewe sossot? Nge kich met a tongeni älisikich? Ach chechchemeni me ekilonei sokkopaten angangen än Kot we manaman mi pwäralo an pöchökkül. (Hiop 38:1-41; 42:1, 2) Eli sia chechchemeni ewe atun sia pwisin küna lon manauach än Jiowa wesewesen äfännikich. A chüen tongekich.

15. Met a apöchökküla Paul le likitü fän sossot?

¹⁵ Ewe aposel Paul a likitü fän sokkopaten weires mi efeiengaw fän iten an lükü. (2 Kor. 11:23-28) Ifa usun a tipemirit me anüküchara meefian fän ekkena mettoch mi äweires? Ren an iotek me eäni lükülük woon Jiowa. Lon manauen Paul a küna chommong sossot tori a mälo fän iten minne a lükü nge iei makkeian: “Ach Samol a nom rei, a atufichiei pwe üpwe tongeni arongafeili unusen ewe Kapasen Kot, pwe ekewe chon lükün Israel meinisin repwe rongorong. Iwe, üa ngas seni ar apwüngüei ngeni mäla.” (2 Tim. 4:17) Pokiten Paul a pwisin küna än Jiowa tümün ngeni, a tongeni alükülükü pwiin kewe chon lükü pwe esor popun repwe “lolilenäsini och mettoch.”—Älleani Filipai 4:6, 7, 13, TF.

16, 17. Apworausa ifa usun Jiowa a elikiitü nöün kewe aramas fän ekkewe weires ikenäi.

¹⁶ Emön pioneer itan Roxana a pwisin küna ifa usun Jiowa a tümünü nöün kewe aramas. A tingorei meilapen an we angang  an epwe mwo asösö fitu rän fän iten ewe mwichelap. Nge fän an song a ereni Roxana pwe ika epwe lo epwe atowu seni an angang. Roxana a chök lo fiti nge a tingormaü ngeni Jiowa pwe amwo esap towu seni an angang, iwe a kinamweelo letipan. Nge Särinfel, wesin ewe mwichelap, Roxana a katowu seni an angang. A fokkun lolilen pun an angang a lamot ngeni an famili inaamwo ika a chök kükkün peioffun. Iwe, a ioteksefäl me a lükülük pwe Kot a fen tümünü me apöchökküla an lükü ren ewe mwichelap, iwe epwe pwal tümünü i lon pekin aion. Lupwen Roxana a fetäl ngeni imwan, a küna eü esissil woon eü kompeni fän iten angang mi suuk ngeni emön mi sipeöch lon angangen tete, iwe, a tingor ika epwe tongeni angang. Ewe manager a küna pwe Roxana ese sile ena angang nge a chüen etiwa, iwe, peioffun a fen wattelo arapakkan fän ruu seni an we angang akkomw. Roxana a meefi pwe Jiowa a pölüweni an iotek. Iwe nge ewe feiöch seni meinisin, a afalafal ngeni chommong chienan kewe chon angang. Nimmön leir, kapachelong ewe manager ra etiwa ewe enlet me papatais.

¹⁷ Fän ekkoch, me rech sia meefi pwe usun itä nge ach iotek ese mwittir pölü are ese pölü lon ewe napanap sia ekieki. Ika ina, ese mwääl a wor popun mi mürinnö an ese pölü, nge Jiowa a silei. Eli epwap ffatengenikich mwirin. Nge sipwe lükülükü pwe Kot esap tongeni likitalo nöün kewe mi tuppwöl.—Ipru 6:10.

Pworacho ngeni Ekkewe Sossot

18, 19. (a) Pwata sisap mäirü pwe sipwe chök kükküna sossot? (b) Ifa usun sipwe pworacho ngeni ekkewe sossot?

¹⁸ Nöün Jiowa kewe aramas rese mäirü atun a toriir minen otuputup, letipengaw, riäfföü mwääl, me etipetipaen chiechi mi ngaw. Ewe fönüfan a oputakich. (Jon 15:17-19) Nge än Kot we manaman a apöchökkülakich le ü ngeni ekkewe mettoch mi eppeti ach angang ngeni Kot. Jiowa esap mut ngenikich eü sossot esap ki rech. (1 Kor. 10:13) Esap fokkun tongeni likitikichelo. (Ipru 13:5) Älleasochis ngeni an we Kapas epwe tümünü me apöchökkülakich. Pwal och, än Kot we manaman epwe tongeni amwökütü chienach kewe chon lükü ar repwe älisikich lon ewe atun sia fokkun osupwangen älillis.

¹⁹ Amwo sipwe kükkütta älillisin än Kot we manaman ren ach iotek me käeö ewe Paipel. Amwo sipwe ‘pöchökülela ren sokun tufich meinisin mi pop seni an manaman me ling, pwe sipwe tongeni likitü o mosonotam.’—Kol. 1:11.

[Pwóróus fan]

Ifa Usun Kopwe Pölüweni?

• Ifa usun kopwe mmolnetä le pworacho ngeni riäfföü mwääl?

• Met kopwe föri ika emön a erenuk pwe kosap pwäri an tipis?

• Met kopwe tongeni lükülükü atun ka küna sokkopaten weires?

[Kapas Eis fán Iten ewe Lesen]

[Sasing lón pekin taropwe 30]

Met sia tongeni käeö seni Josua me Kalep?

[Sasing lón pekin taropwe 31]

Ifa usun sipwe älisi emön chienach mi föri och tipis?