Alamotaöchü Om Fansoun Lipich
Alamotaöchü Om Fansoun Lipich
“Iö a tongeni etiwa ei afalafal epwe etiwa.”—MAT. 19:12.
1, 2. (a) Ifa ekiekin Jises, Paul me ekkewe ekkoch usun lipich? (b) Pwata ekkoch rese fen ekieki pwe lipich a usun eü liffang?
EWE kokkotun pwüpwülü, ina eü me lein än Kot kewe liffang mi fokkun aüchea fän iten aramas. (SalF. 19:14) Nge, chommong chon Kraist lipich ra pwal sopwöch me pwapwa. Iei alon Harold, emön pwiich mi lipich, 95 ierin: “Inaamwo ika ua pwapwa le chiechi me awasölaöchü aramas, nge lupwen ua äläemönülo esap mwo fän eü ua tipitipingaü. Enlet, ua tongeni apasa pwe a nom rei ewe liffangen lipich.”
2 Pwüngün pwe Jises Kraist me aposel Paul ra äweweei pwe lipich ina eü tufich are liffang seni Kot, usun chök pwüpwülü. (Älleani Mattu 19: 11, 12; 1 Korint 7:7.) Iwe nge, sanne meinisin ra pwisin filatä ar repwe chök lipich. Ekkoch a weires ar repwe künökün pwülüwer mi mürinnö. Are ekkoch ra pwal lipichsefäl pokiten mufesen are mälo. Iwe, ifa usun än emön lipich epwe tongeni eü liffang? Pwal ifa usun ekkewe chon Kraist mi lipich repwe alamota ar fansoun lipich me küna feiöch seni?
Eü Liffang mi Sokkolo Aüchean
3. Ikkefa ekkewe feiöch chon Kraist mi lipich ra pwapwaiti?
3 Fän chommong, a watte än emön mi lipich fansoun me tufichin filatä mettoch lap seni emön mi pwüpwülü. (1 Kor. 7:32-35) Ra feiöch pun ra tongeni alapalo ar angangen afalafal, ar chiechi ngeni ekkewe ekkoch, me arap ngeni Jiowa. Ina minne, chommong chon Kraist ra mirititi feiöchün lipich me filatä ar repwe mwo lipich, eli ren ekis fansoun. Ekkoch rese fen ekieki ar repwe lipich, nge lupwen a siwil nonnomun manauer, ra ekieki nonnomur fän iotek me mirititi pwe ren än Kot älillis ra tongeni kinamwe inaamwo ika ra lipich. Ina minne, ra etiwa ei siwil lon manauer me ra pwal äeäöchü ar fansoun lipich.—1 Kor. 7:37, 38.
4. Met popun emön Chon Kraist mi lipich epwe tongeni meefi pwe a unus lon an angang ngeni Kot?
4 Chon Kraist mi lipich ra silei pwe iir mi aüchea me ren Jiowa me an we mwicheich inaamwo ika rese pwüpwülü. Kot a tongei emön me emön leich. (Mt. 10:29-31) Ese wor emön are och mettoch epwe tongeni äimukichelo seni än Kot tong. (Rom 8:38, 39) Ina popun, ese lifilifil ika kich mi pwüpwülü are lipich, sia tongeni meefi pwe sia unus lon ach angang ngeni Kot.
5. Met a lamot ren än emön epwe unusen küna ewe feiöchün lipich?
5 Nge, usun chök ekkoch liffang are tufich ren pekin köl me pekin urumwot, mi lamot emön epwe angang weires pwe epwe tongeni alamotaöchü ewe liffangen lipich. Iwe, ren ekkewe chon Kraist mi lipich ikenäi, mwän are fefin, säräfö ika chinnap, iir kewe mi filatä ar repwe lipich are resap, ifa usun repwe tongeni äeäöchü ar fansoun lipich? Sipwe ppi me käeö seni ekkoch leenien äppirü seni ewe mwichefelin chon Kraist loom.
Lipich le Atun Säräfö
6, 7. (a) Ifa wisen nöün Filip kewe fömön föpwül lon ar angang ngeni Kot? (b) Ifa usun Timoti a alamota an fansoun lipich? Ikkefa ekkewe feiöch a küna pokiten an tipemecheres le angang ngeni Kot le alüwölün?
6 Ewe chon afalafal Filip a wor fömön nöün föpwül ra pwal tinikken le afalafal usun chök i. (Fof. 21:8, 9) Ewe angangen oesini, ina eü me lein ekkewe liffang seni än Kot we manaman, me ekkena föpwül ra oesini me ren pwönüetään Sowel 2:28, 29.
7 Ewe alüwöl Timoti, a alamota an fansoun lipich. Seni lemonukolun, inan we Iunis, me inan chinnap Lois ra äiti ngeni “kapasen ekewe Toropwe mi Pin.” (2 Tim. 1:5; 3:14, 15) Nge ese mwääl ra kerän wiliti chon Kraist atun än Paul we äeüin chuuri wesetään telinimwer we Listra orun engol me nimu ier mwirin mäloon Jises. Iwe mwirin ruu ier, atun än Paul oruuen chuuriir, eli a orun rüwe ierin Timoti. Inaamwo ika a chök kükkün ierin me kerän chök fiti ewe enlet, nge “a iteüöch” me ren ekkewe chon Kraist elter lon Listra me Ikonium. (Fof. 16:1, 2) Ina popun, Paul a etiwa Timoti an epwe fiti lon an säifetäl. (1 Tim. 1:18; 4:14) Ese ffat ika lon änein manauen Timoti a chök lipich. Nge a ffat pwe a pwapwa le etiwa än Paul etiwetiw, me mwirin fite fite ier, a pwapwaiti ewe wis misineri mi lipich me emön sou emmwen.—Fil. 2:20-22.
8. Met a atufichi Jon Mark le achocho le isetiw met epwe föri fän iten Kot me met liwinin an achocho?
8 Le alüwölün, Jon Mark a pwal alamota an fansoun lipich. Iir me inan we Meri, pwal tettelin pwiin we Parnapas, ra akkomw choni ewe mwichefel lon Jerusalem. An we famili a nonomwööch pokiten a pwisin wor imwer me nöür chon angang. (Fof. 12:12, 13) Iwe nge, inaamwo ika a ina usun nonnomun ena alüwöl Mark, nge ese kütta pwisin pwapwaan me kinamween manauan. Are ese chök menemenöch an epwe wor an famili. Ese mwääl an chiechi ngeni ekkewe aposel a amwökütü an epwe mochen fiti ewe angangen misineri. A pwapwa le älisi Paul me Parnapas lon ar we äeüin säi ren ewe wis misineri. (Fof. 13:5) Mwirin, ra pwal mwin me Parnapas lon ar säi, lo, lo, lo, ra pwal angangfengen me Piter lon Papilon. (Fof. 15:39; 1 Pit. 5:13) Sise silei ifa ükükün ttamen än Mark lipich. Nge a fokkun itöch pwe i a pwapwa le älillis ngeni ekkewe ekkoch me alapalo an angang ngeni Kot.
9, 10. Ikkefa ekkewe angang a suuk ngeni ekkewe säräfö chon Kraist lipich le alapalo ar angang ngeni Kot? Äweweei mwo.
9 Chommong säräfö lon ekkewe mwichefel ikenäi ra pwapwa le alamota ar lipich pwe repwe alapalo ar angang ngeni Kot. Usun chök Mark me Timoti, ra aücheani ar lipich mi atufichiir le ‘fangala unusen manauer ngeni än ach Samol angang, nge resap rik seni.’ (1 Kor. 7:35) Wesewesen ina eü feiöch. A suuk ngeni ekkewe mi lipich ar repwe pioneer, älisi ikewe mi wor osupwangen chon afalafal ie, käeö eü fosun ekis, älisi kaütään Kingdom Hall are ekkewe keangen ofes, fiti ewe Ministerial Training School me angang lon Bethel. Ika en säräfö lipich, ka alamotaöchü om lipich le fiti ekkena angang mi suuk ngonuk?
10 Emön pwiich itan Mark a pioneer me mwen an a 20 ierin, mwirin a fiti ewe Ministerial Training School me eäni sokkopaten angang lon chommong fönü. Iei alon lupwen a lesöküriiti an angangen full-time ren ükükün 25 ier: “Ua achocho le älisi chon ewe mwichefel, fiffitiir le afalafal, apöchökküler lon pekin lükü, etiwer le möngö lon imwei, me akkota ekkoch kunoufengen mi apöchökküla äm riri ngeni Jiowa. Ekkeei mettoch ra fokkun apwapwaaei.” Meefien Mark keei ra pwäratä pwe pwapwa wachemwuk a pop seni fangafangöch nge a suuk ngenikich chommong atun ach sipwe fangafangöch ika sia unusen äeä manauach le angang ngeni Kot. (Fof. 20:35) Ese lifilifil met ka fokkun sani le föri, tufichum are künaen manauom, nge a suuk ngeni säräfö ikenäi chommong angangen ach Samol.—1 Kor. 15:58.
11. Ikkefa ekkoch feiöchün än emön esap atapwal le pwüpwülü?
11 Inaamwo ika lap ngeni säräfö ra ekiekin pwüpwülü, nge a wor popun mi mürinnö resap atapwal. Paul a pesei ekkewe säräfö ar repwe mwo witi tori epwe wesilo ‘mochenin letiper a fokun pwichikar,’ ewe atun a kon pöchökkül ar mochen pwüpwülü. (1 Kor. 7:36) A lamot fansoun om kopwe pwisin weweiti napanapom me äsimaüolo pwe kopwe filiöchü pwülüwom. Ewe pwonen pwüpwülü a fokkun aüchea pwe itä epwe nomofoch tori mälo.—SalAf. 5:2-5.
Lipich lon An Mwukolo
12. (a) Met Ana, ewe mi mä seni pwülüwan, a föri lupwen a lipichsefäl? (b) Ifa ewe feiöch a küna?
12 Ese mwääl Ana, ewe a mak pworausan lon puken Luk, a fokkun letipechou lupwen pwülüwan we a mä mwirin chök fisu ierin ar pwüpwülü. Sise silei ika ra nöünöü are a ekiekin pwüpwülüsefäl fän eü. Nge ewe Paipel a äiti ngenikich pwe Ana a chüen lipich atun a 84 ierin. Me ren ewe Paipel sia tongeni apasa pwe Ana a äeä an fansoun lipichsefäl le arap ngeni Jiowa. I ese “feila seni ewe imwenfel, pwe a chök fel ngeni Kot lerän me lepwin fän echikefel me ikiotek.” (Luk 2:36, 37) Ina minne a kan akkakkomwa Jiowa lon manauan. Weween a fokkun achocho me tipeppos ina popun Jiowa a fokkun efeiöchü. A küna ewe kükkün ät, Jises me a pwal afalafal ngeni ekkoch usun ewe ngaselo ewe Messaia epwe atoto.—Luk 2:38.
13. (a) Met a pwäratä pwe Torkas a fokkun älisi ewe mwichefel? (b) Ifa usun än Torkas kirekiröch me föfföröch a uwaöch?
13 Emön fefin itan Torkas are Tapita, a nonnom lon Joppa, notouäfengin Jerusalem. Ewe Paipel ese fos usun pwülüwan, ese mwääl a lipich lon na atun. Torkas a “fang an fansoun meinisin le föri föför mürina o alisi chon wöüngau.” A tete üfen ekkewe fefin mi wöüngaw mi mä pwülüwer me pwal ekkewe ekkoch, ina popun ra fokkun tongei. Iwe lupwen a semwen me mälo, unusen ewe mwichefel ra tiiti Piter an epwe etto amanauasefäli attonger na. Lupwen a chöü lon unusen Joppa usun an na manausefäl, chommong aramas ra wiliti chon Kraist. (Fof. 9:36-42) Eli Torkas a fen älillisöch me kirekiröch ngeni ekkoch me leir.
14. Met a amwökütü ekkewe chon Kraist lipich ar repwe arap ngeni Jiowa?
14 Usun chök Ana me Torkas, chommong lon ekkewe mwichefel ra pwal lipich lon ar mwukolo. Eli, ekkoch rese küna emön mi pölüwöch ngeniir. Ekkoch ra mu seni pwülüwer are mä seniir pwülüwer. Pokiten esor pwülüwer repwe uwawu meefier ngeniir, fän chommong chon Kraist lipich ra käeö ar repwe fokkun lükülük woon Jiowa. (SalF. 16:3) Ina eü feiöch me ren Silvia, emön lipich mi angang lon Bethel lap seni 38 ier. Iei alon: “Fän ekkoch ua chipwang pwe ngang chök ua sou älisi aramas. Iö epwe apöchökkülaei?” Nge a pwal ekieki: “Ai lükü pwe Jiowa a fokkun silei ai osupwang lap seniei, ina met a älisiei le arap ngeni i. Iteitan Jiowa a älisiei ren ekkewe mettoch use fen ekieki ia a feito seni ia.” Ika sia arap ngeni Jiowa, epwe pwal arap ngenikich fän tong me kirekiröch.
15. Ifa usun Chon Kraist lipich repwe tongeni ‘suki letiper’ ar repwe tongei aramas?
15 A suuk ngeni ekkewe mi lipich ar repwe ‘suki letiper’ fän tong. (Älleani 2 Korint 6:11-13.) Jolene, emön pwiich mi pioneer ükükün 34 ier a erä: “Ua achocho le chiechiöch ngeni sokkopaten aramas nge esap chök pilooi kewe. A fokkun öch ewe fansoun lipich om kopwe angang ngeni Jiowa, chon om famili, mwichefel, pwal chon orum. Ewin ai chinnapelo, ewin lapoloon ai pwapwa ren ai lipich.” Ekkewe chinnap, mi semwen, sam are in lipich, säräfö me ekkoch lon ewe mwichefel ra fokkun aücheani än ekkewe mi lipich älillis. Ren enletin, sia pwapwa ika sia pwäratä tong ngeni aramas iteitan. Ka pwal tongeni ‘suki letipom’ le chiechi ngeni aramas fän tong?
Lipich lon Unusen Änein Manauan
16. (a) Pwata Jises a filatä an epwe lipich? (b) Ifa usun Paul a alamotaöchü an fansoun lipich?
16 Jises ese pwüpwülü, a lamot epwe apwönüetä wisan lon angangen afalafal. A säifetäl ekis meinisin, angang seni lesossorusich tori lukenipwin, tori a asoresini manauan. Ina popun an lipich a älisi le apwönüetäöchü an angang. Ewe aposel Paul a säi fite fite mwail me küna watte weires lon an angangen afalafal. (2 Kor. 11:23-27) Inaamwo ika, eli Paul a pin pwüpwülü nge a filatä an epwe chök lipich mwirin an wiseni ewe wis aposel. (1 Kor. 7:7; 9:5) Pokiten ewe angangen afalafal, Jises me Paul ra pesei ekkoch ar repwe pwal äppirüür ika mi tufich ngeniir. Nge, rese allük ngeni nöün Kot kewe chon angang ar resap pwüpwülü.—1 Tim. 4:1-3.
17. Ifa usun ekkoch ikenäi ra äppirü Jises me Paul, iwe, pwata sia tongeni lükülük pwe Jiowa a aücheani chokkewe mi pennükü manauer?
17 Ikenäi ekkoch ra pwal filatä ar repwe chök lipich pwe repwe tongeni aunusalo ar angang ngeni Kot. Harold, ewe sia fen pworausan, a pwapwaiti an angang lon Bethel ükükün 56 ier. A erä, “Lupwen a tori engol ierin ai angang lon Bethel ua küna chommong pwüpwülü ra towu seni Bethel pokiten samau are ar repwe tümünü semer me iner chinnap. Semei kewe me inei ra fen mälo. Nge ua fokkun pwapwa le nonnom Bethel, ina popun use mochen pwe lon ai angang epwe wor och eppet mi tongeni fis ren pwüpwülü.” Pwal iei meefien Margaret a pioneer fansoun langattam: “A wor ekkoch fansoun ua tongeni pwüpwülü nge ua kon pwapwaiti ai angang, use kon lien ekieki ai upwe pwüpwülü. Nge ua tongeni äeä ai fansoun lipich le alapalo ai angang ngeni Kot me atoto rei pwapwa wachemwuk.” Pwüngün, Jiowa esap fokkun mönükalo emön mi pennükü manauan fän iten fel mi enlet.—Älleani Aisea 56:4, 5.
Alamotaöchü Nonnomun Manauom
18. Ifa usun ekkoch repwe tongeni apöchökküla me älisi chon Kraist mi lipich?
18 A fich ach sipwe apünga me apöchökküla ekkewe chon Kraist lipich mi angang ngeni Jiowa ükükün ar tufich. Sia fokkun tonger me kilisou ren ar älillisöch ngeni ewe mwichefel. Esap fän eü repwe meefi tipitipingaü ika sia wesewesen wiliti ‘pwiir, ika fefiner, ika iner, ika semer, ika nöür’ lon Kraist.—Älleani Mark 10:28-30.
19. Met kopwe föri pwe kopwe alamotaöchü om fansoun lipich?
19 Ese lifilifil ika ka pwisin filatä om kopwe lipich are pokiten nonnomum, amwo ekkeei pworaus sia käeö seni Paipel me seni pwiich kewe repwe alükülükük pwe ka tongeni küna pwapwa me sopwöch lon om lipich. Lon kapas äwewe, lipich a usun eü liffang. Ekkoch ra mwötöresiti le angei, nge ekkoch esap turun tiper ar repwe angei. Ekkoch ra mwittir aücheani nge ekkoch repwap aücheani mwirin och fansoun. Weween a chök alongolong woon ifa usun ach ekiek ren ena liffangen lipich, ika sipwe meefi pwe ina eü feiöch ngenikich are esap. Met kopwe föri pwe kopwe alamotaöchü om fansoun lipich? Arap ngeni Jiowa, alapalo om angang ngeni me suuki letipom om kopwe tongei ekkewe ekkoch. Lipich a usun chök pwüpwülü, ika sia eäni ekiekin Kot usun me alamotaöchü ena liffang, sipwe pwal fokkun feiöch.
Ka Chechchemeni?
• Ifa usun lipich a usun eü liffang?
• Ifa usun lipich a eü feiöch atun säräfö?
• Ikkefa ekkewe mettoch mi suuk ngeni chon Kraist lipich ar repwe arap ngeni Jiowa me suukalo letiper le tongei aramas?
[Kapas Eis fán Iten ewe Lesen]
[Ekkewe sasing lón pekin taropwe 23]
Ka alamota ekkewe angang mi suuk ngonuk lon om angang ngeni Kot?
