Ngase seni Ekiekin Pwisin Nielo

WESIN chök än fitemön Chon Pwäratä Jiowa afalafal lon eü kükkün sopw, ra chuuri emön chinnap mwän fän eü nöün Paipel. Ra achocho le äiti ngeni ewe “kapas allim,” nge a chök epin ngeniir, ‘Ua chök mochen äläemönülo.’ Iwe nge mwirin, a tipeeü ngeni än emön leir etiwa le fiti le möngöön lekuniol. Sorotään, pwal emön Chon Pwäratä Jiowa a chuuri me lon imwan we, imwen chinnap, pwe epwe afalafal ngeni.

Ena chinnap a ereni ewe chon afalafal: “Ka seläniei seni ai ekiekin pwisin nieilo. Nänew ua feilo ren peiasen pwülüwei we . . . me ikena ie itä upwele pwisin nieilo. Mwen ach we chufengen nänew, ua fetälfeil lemal ren ükükün rüanü awa. Ua kütta aurur seni nei we puken kölün lamalam nge ese aururuei. Ua mmen fokkun kilisou ngeni Kot ren seröchün om chuuriei.”

Mwirin och fansoun, a pwä pwe ekkewe chonläng mi ngaw ra amwökütü ei chinnap mwän an epwe pwisin nielo. Nge an silei ewe Paipel a atufichi le ngaselo seni etipetipaen ekkena chonläng mi ngaw. (Ef. 6:11-18) A pwal fokkun aururu letipan an silei pwe “epwe fis ewe manausefal ren ekkewe mi pung pwal ekkewe rese pung.” (Fof. 24:15, TF) Mwirin och fansoun, a fangolo manauan me papatais atun a 81 ierin. Föfför mürinnö me kapas pwetete, fitifengen me “aurur seni ewe Paipel” a seläni ewe chinnap seni an ekiekin pwisin nielo me apöchökküla letipan ren ewe äpilükülükün manau esemuch.—Rom 6:23; 15:4.