Feiöchün Achocho!

EWE kokkotun famili fel a lamot ngeni ekkewe nau ika sam me in repwe “fönöör o öüröürer lon ach Samol.” (Ef. 6:4) Nge, ika en emön sam are in, ka weweiti pwe ekkewe säräfö me kükkün ra kan mwittir meefi chipwang. Ifa usun kopwe älisiir pwe resap chipwang? Nengeni met ekkoch sam me in ra föri.

Iei alon George seni Merika: “Lupwen nöüm kewe ra chüen kükkün äm me pwülüwei we aua achocho pwe äm famili käeö Paipel epwe ämmeseik. Fän ekkoch aua pwomweni me foffout fout mi usun fouten chon ewe pworaus aua älleani seni ewe puk Nei Puken Porausen Paipel. Aua pwal mwo nge föri pisekin äm pwoomw choweän ketilas, wokun king, pasikit, me met kan. Aua pwal urumwot ewe ‘esissil esissil ngang iö’ ren pworausen lon Paipel, me pwal och urumwot le äeä sokkopaten kapas eis mi weneiti Paipel. Aua pwal föri liosun ewe waimw are föri tettelin fansoun fisitään eü me eü ekkoch pworaus lon Paipel. Fän ekkoch aua chüngaani emön are och pworaus lon Paipel. Iei, aua ekiekin chüngaani unusen ekkewe pisekin maun mi mak lon Efisus 6:11-17, iwe aupwe äweweei met eü me eü ekkena pisek a liosuetä. Ei sokkun napanapen käeö a älisikem le pwapwaiti äm famili käeö.”

Debi emön in seni Merika, a erä: “Aua weires ren nöüm we nengngin lupwen a ülüngät ierin pwe ese kan aüseling atun äm käeöfengen. Nge eü rän lupwen ua älleani pworausen Aisek me Repeka seni ewe puk Nei Puken Porausen Paipel ua nöünöü rüüemön ningngio le pwomweni ewe pworaus. Iwe nöüm we nengngin a fokkun aüselingöch! Lon ekkewe maram mwirin, aua nöünöü ekkena ningngio le pwomweni ekkewe sokkopaten aramas lon äm käeö. Mwirin äm älleani eü pworaus, nöüm we nengngin a meseik le kütta pwal ekkoch ningngio are pisek aupwe nöünöü le pwomweni ewe pworaus. Äwewe chök, eü pworun suus, itä kan ina imwen Reap we mi wor och säl mi par woon. Efoch achen pirum aua efitatä emön liosun serepenit nimu fiit ttaman woon pwe itä liosun ewe serepenit kapa lon Numperis 21:4-9. Aua isoni ekkeei pisek lon eü watteen pwotou. Aua pwapwa pun fän ekkoch nöüm ei, a kan chüpeii ekkewe pisek lon ewe pwotou me pwisin pwomweni ekkoch pworaus lon Paipel.”

Ese mecheres emiritin semirit nge mi lamot sam me in repwe älisiir ar repwe mochen angang ngeni Jiowa. Repwe föri ei iteiten rän ren ar äeä sokkopaten minen käit. Ewe famili fel me käeöön Paipel iteiten wiik epwe älisiir le apwönüetä ena wis. Enlet, achocho epwe atoto feiöch!