Iö kewe Ra Afalafala ewe Kapas Allim?

“ . . . epwe esineifeili won unusen fonufan.”​—MATTU 24:14, TF.

EWE kapas allim a fen esilefeil woon unusen fönüfan ren Chon Pwäratä Jiowa. Ra föri ei lon sokkopaten napanap. Ikkeei ekkoch napanap, ra afalafal ren:

Kapas. Chon Pwäratä Jiowa ra äppirü Jises me nöün kewe chon käeö ren ar feilo me afalafala ngeni aramas ewe kapas allim. (Luk 8:1; 10:1) Rese ekieki pwe aramas repwe wisen feito rer. Meinisin Chon Pwäratä Jiowa ra akkafalafala aramas usun Mwuun Kot chochoor a lap seni fisu million. Ra afalafal imw me imw, woon ekkewe al, woon fon, me metakkan. Lon ewe ier, ra nöünöü lap seni eü esopw billion awa lon ei angang.

Rese chök asukula aramas usun Mwuun Kot nge pwal mettoch meinisin ‘mine [Jises] a allük ngeniir.’ (Mattu 28:20) Ra käkkäeö Paipel ngeni lap seni walu million aramas lon imwer nge ese kamö.

Chon Pwäratä Jiowa ra afalafal ngeni sokkopaten aramas woon unusen fönüfan lon 236 fönü. Ra afalafal lein telinimw me lemal, lon ekkewe wollap lon South America me Russia, lon ekkewe fönüpöönun Afrika me woon ekkewe chuuk mi fokkun tettekia lon Asia. Rese peiof, ra äeä pwisin ar fansoun me nöür moni lon ei angang pokiten ar tongei Kot me aramas.

Mak. Iteitan a peres ewe puk, Ewe Leenien Mas, A Esilefeili än Jiowa we Mwu, a kawor lon lap seni 42 million kapi lon 185 fosun fönü. Pwal ewe puk itan Awake!, a pwal esilefeili ewe Mwu, a peres lon 83 kapasen fönü me a kawor orun 40 million kapi iteiten maram.

Ekkewe puk, taropwe, CD me DVD mi äweweei äitien ewe Paipel mi kawor lon orun 540 fosun fönü. Chon Pwäratä ra fen föri me eineti lap seni 20 billion ekkeei mettoch lon ekkewe engol ier ra kerän lo. Weween, sia tongeni erä pwe usun itä emön me emön aramas woon ei fönüfan a tongeni nöüni ülüngät ekkena mettoch!

Ekkewe Chon Pwäratä ra pwal peresei sokkopaten Paipel mi afföü. Ra pwal afföüni, peresei me eineti ewe New World Translation of the Holy Scriptures, iwe iei a kawor unusen ena Paipel are kinikinin, lon 96 fosun fönü. Lap seni 166 million kapi ra fen eineti.

Ekkewe Mwich, Än Chon Kraist. Ekkewe mwich mi fiffis iteiten wiik lon ewe Kingdom Hall ra kawor pwe repwe asukula aramas nge esap chök och föfförün fel. A kan wor afalafal mi longolong woon Paipel. Me ra käeö Paipel ren älillisin ewe puk Leenien Mas me pwal ekkoch puk. Ra pwal käeö seni ekkena mwich ar repwe lipwäköchülo lon wiser chon afalafala ewe kapas allim.

 A chök löllöpök ewe puk Chon Pwäratä ra käeö lon lap seni 107,000 mwichefel woon unusen fönüfan, ina met a älisatä ar tipeeüfengen. Mi suuk ngeni aramas ese lifilifil le fiti ar kana mwich me esor fesin moni. Pwüngün pwe esap lamot meinisin ekkeei ika ekkewe Chon Pwäratä rese apwönüetä met ra eäni afalafal. Ina popun, ra pwal pwäratä ewe kapas allim ren ar manaueni manauer me ren äitien ewe Paipel.

Ar Leenien Äppirü. Ra achocho pwe föfförür kewe repwe leenien äppirü mi mürinnö ngeni ekkewe ekkoch ren ar fför ngeni aramas usun minne ra mochen repwe fför ngeniir. (Mattu 7:12) Inaamwo ika rese unusöch me ra mwäällilo fän ekkoch, nge ra enletin mochen föfföröch ngeni aramas meinisin esap chök ren ar afalafaler ewe kapas allim, nge ra pwal älisiir lon ekkoch mettoch.

Chon Pwäratä Jiowa ra afalafal ngeni aramas nge rese ekiekin ewilaalo meinisin ar repwe fel ngeni Jiowa. Nge lupwen a wes ei angang lon fansoun mi fich me ren Kot, iwe epwe ina sopwoloon, usun met Jises a fen oesini. Nge, met epwe fis ngeni aramas me ei fönüfan?

[Sasing lon pekin taropwe 7]

Chon Pwäratä Jiowa ra esilefetälei ewe kapas allim woon unusen fönüfan