Met Ena Mwuun Kot?

“Ei kapas allim usun ewe mu . . . ”​—MATTU 24:14, TF.

ÄN JISES we Afalafal mi iteföülo woon ewe Chuuk, a äiti ngeni aramas eü iotek mi pachelong eü tingor ngeni Kot: “Mwum epwe war.” Chommong ra amwöchünnükü ena iotek me epinipini. Eü puken äwewe a erä, “iei ewe äkkäeüin iotek Chon Kraist meinisin ra äkkeäni lon ar fel.” Nge, chommong mi äkkeäni ena iotek rese silei weween ena Mwu are met epwe apwönüetä.​—Mattu 6:9, 10.

Nge ese ämäirü pwe än ekkewe nöüwisin tipitipin lamalamen Kraist äweween ewe Mwu a orukoruk, ese fataffatöch me a ü fengen. Emön a makkeei pwe än Kot Mwu eü “efisien manamanen Kot, . . . än aramas meefi än Kot nonnom rer . . . me aramas ra küna amanauer ren.” Pwal emön a äweweei pwe ewe kapas allim usun ewe Mwu eü “kapasen käit fän iten lamalam.” Me ewe Catechism of the Catholic Church a erä: “Ewe mwun Kot ina ekkewe napanap pwüng, kinamwe me pwapwa lon ewe Ngün mi Fel.”

Kopwe tongeni küna weween mi fataffatöch lon pekin taropwe 2 lon ei puk. A mak: “Än Kot we Mwu, wesewesen eü nemenem lon läng, epwele amoielo minne mi ngaw meinisin me siwili ei fönüfan ngeni eü paratis.” Sipwe ppii ifa usun ewe Paipel a äweweei.

Ekkewe Sou Nemenemen Unusen Fönüfan Lon Mwach Kkan

Eü mwu ina eü nemenem fän emön king. Nge Kingen Mwuun Kot, ina i Jises Kraist mwirin an we manausefäl. Kot a aküna ngeni Taniel ren eü längipwi än Jises wiliti King, a makkeei: “Mürin üa küna me lon künaei lepwin eman a feito me lon kuchun läng, a usun chök lapalapen eman nöün aramas [Jises]. Iwe, ra emwenato ren Kot ewe mi nom seni me lomlom, pwe epwe nom fän mesan. Iwe, a angei an nemenem me lingan me mwün, pwe aramasen fanü me mwü, pwal aramas mi eäni sokopaten fos repwe angang ngeni. An nemenem epwe nom tori feilfeilachök, esap tongeni wesila, nge mwün esap tongeni tala.”​—Taniel 7:13, 14.

Ewe Puken Taniel a pwal affata pwe Kot epwe anüküchara ena Mwu, esap fokkun talo me epwe arosalo mwuun aramas meinisin. Lon Sopwun 2 a apworausa än ewe kingen Papilon ttan seni Kot. A küna ewe watteen ululun aramas mi liosuetä tettelin ekkewe mwuun fönüfan mi pöchökkül ar  nemenem. Taniel a äweweei ena ttan. A makkeei pwe le sopwoloon ekkewe rän “ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.”​—Taniel 2:28, 44.

Jises esap chök äläemön le nemenem lon ena Mwu. Lupwen a afalafal woon fönüfan, a alükülükü nöün kewe aposel mi tuppwöl pwe iir me ekkewe ekkoch repwe manausefälitä lon läng me mommot woon leenien motun king. (Luk 22:28-30) Ekkena motun king esap wesewesan pun Jises a erä pwe ewe Mwu epwe nonnom läng. Paipel a äweweei pwe chienen Jises le nemenem repwe feito seni “ainang me kapas me mwü me sokopaten aramas meinisin.” Repwe “eu mwün souasor, . . . nge repwe nemenem won fanüfan.”​—Pwarata 5:9, 10.

Pwata Pworausen ewe Mwu A Mürinnö

Nengeni pwe Jises a angei wisan pwe epwe nemeni aramas seni sokkopaten “ainang me kapas me mwü” me chienan kewe repwe eti le king me “nemenem won fanüfan.” Nge, iö kewe repwe nonnom fän nemenien ena Mwu? Chokkewe mi etiwa ewe kapas allim mi ekkesilefeil lon ei fansoun. Pwal pachelong chokkewe repwe manausefäl woon fönüfan me repwe eäni ewe äpilükülükün manau esemuch.

Ewe Paipel a äwewefichi ekkewe feiöch aramas repwe pwapwaiti fän än Kot Mwu. Ikkeei ekkoch leir:

“A aükätiu maun won unusen fanüfan, a kupi ekewe likapich o pwülü ekewe siles, a fisi ngeni ekkei ekewe wokenin maun.”​—Kölfel 46:9.

“Repwe aüetä imwer o nonom lon, repwe pwal fotuki irän wain o ochei uan. Esap fis pwe repwe aüetä imwer, nge eman lükür epwe nom lon. Esap pwal fis pwe repwe fotuki irä, nge eman lükür epwe mongö seni.”​—Aisea 65:21, 22.

“[Kot] epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”​—Pwarata 21:3, 4.

“Mürin, mesen chon mesechun repwe nela, nge selingen chon selingepüng repwe sukula, chon pechemä repwe mwetemwet usun eman chia, nge ekewe chon awemwöch repwe köl fän mweireir.”​—Aisea 35:5, 6.

“Epwe war ewe fansoun lupwen ekewe sotup meinisin repwe rong mwelian [Jises] o towu seni peiaser: Chokewe mi föri föför mürina repwe manausefäl o küna manau.”​—Jon 5:28, 29.

“Ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.”​—Kölfel 37:11.

Pwüngün, enletin kapas allim ekkeei! Pwal eü pwönütään ekkewe oesini a pwäratä pwe a arapakkan nemenemen ena Mwuun Kot fän pwüng epwele pwönüetä woon unusen fönüfan.