Familien Chon Kraist, ‘Oupwe Mmolnetä’

“Oupwe molotä, pun Nöün Aramas epwe war lon eu otun ousap ekieki ngeni.”​—LUK. 12:40.

1, 2. Pwata sipwe lefareni än Jises pesepes pwe ‘sipwe mmolnetä’?

“LUPWEN Nöün Aramas epwe war lon lingan” me äimufeseni aramas, kopwe fet me om famili, oupwe küna manau? (Mt. 25:31, 32) Pokiten epwe fis ei lon ewe atun sisap fen ekieki, a ifa me watteen lamoten ach sipwe lefareni än Jises kapasen fön pwe ‘sipwe mmolnetä’!​—Luk 12:40.

² Lon ewe lesen mwen ei sia käeö ifa usun chon ewe famili repwe apwönüetäöchü en me wisan pwe iir meinisin repwe nennelo lon ar angang ngeni Kot. Nge iei sipwele käeö pwal ekkoch mettoch ren ifa usun sipwe älisatä pöchökkülen ach famili lon pekin lükü.

Tümünü Pwe Mesom Epwe ‘Mürinnö’

3, 4. (a) Met familien Chon Kraist repwe tümünüür seni? (b) Met weween mesach epwe ‘mürinnö’?

³ Ren än ekkewe famili repwe mmolnetä fän iten warotoon Kraist, mi lamot repwe tümünüür  seni ekkewe minen erikirik mi tongeni erikiirelo seni ar fel ngeni Jiowa. Pokiten mochenian pisek ina eü ssär a fen ssärei chommong famili, ekieki alon Jises pwe sipwe tümünü mesach pwe epwe ‘mürinnö.’ (Älleani Mattu 6:22, 23, TF.) Usun chök eü lamp mi asarama alach pwe sisap chapelo, met sia afota ‘mesen letipach’ woon epwe tongeni asaramakich me älisikich pwe sisap turulo.​—Ef. 1:18.

⁴ Pwe mesach epwe künaöchü, mi lamot epwe nengeniöchü ekkewe mettoch a mochen küna. Lon kapas äwewe a pwal ina usun mesen letip. Mesen letipach a mürinnö ika sia chök nengeniöchü eü chök mettoch. Sipwe afota mesach woon ekkewe mettoch mi weneiti ach fel ngeni Kot, lap seni ach sipwe akkomwa lon manauach chei pisek are kon lien aüreki tümünün ach famili lon pekin aion. (Mt. 6:33) Weween sipwe menemenöch ren met a nom rech me akkomwa lon manauach ach angang ngeni Kot.​—Ipru 13:5.

5. Ifa usun emön säräfö a pwäratä pwe a afota ‘mesan’ woon an angang ngeni Kot?

⁵ A ifa me öchün ika ekkewe nau ra käit le tümünü meser pwe epwe mürinnö! Ekieki pworausen emön nengnginin Itiopia. A kon tipatchem lon an we sukul pwe lupwen a sochungio a wor nöün scholarship an epwe sopwelo an sukul. Iwe nge, ese etiwa pokiten mesan a nefotofot woon an angang ngeni Jiowa. Ekiselo mwirin, a suuk ngeni an epwe angang, peioffun lon eü maram $4,200, ena ükükün moni a fokkun watte lon fönüan na. Nge ‘mesen’ neminna a chök ännefota an we angangen pioneer ina pwata ese etiwa ena angang. Ese fen mwo eisini seman me inan ika epwe eäni ewe angang are esap. Met meefien seman kewe me inan lupwen ra silei met a föri? A ifa me watteen ar pwapwa me mwareiti!

6, 7. ‘Sipwe mammasa’ le tümünükich seni menni feiengaw?

⁶ Alon Jises kewe lon Mattu 6:22, 23 a pwal eü kapasen öüröür usun tipemmong. Ewe Paipel a nöünöü ekkewe kapas ‘mas mi mürinnö’ me ‘ mas mi ngaw.’ Ewe ‘mas mi ngaw’ a wewe ngeni tipemmong are lolowo. (Mt. 6:23, NW ftn.) Ifa meefien Jiowa usun tipemmong? Paipel a erä: “Esap pwüng pwe sokopaten föförün lisowu ika mocheisou ika tipemong epwe fen mwo nge fis ika föü lefilemi.”​—Ef. 5:3.

⁷ Eli epwe mecheres ach sipwe esilla ika emön a tipemmong nge a weires ach sipwe küna ika kich pwisin mi tipemmong. Ina minne, sia tipatchem ika sipwe älleasochisi än Jises ei fön, “Oupwe mamasa o tümwünüöchükemi seni sokopaten mochenia meinisin.” (Luk 12:15) Ren ach sipwe apwönüetä ena a lamot pwe sipwe pwisin etittina met letipach a ännefota. Familien Chon Kraist repwe ekiekiöchü ewe fansoun ra äeä me moni ra nöünöü fän iten kunou me achommonga pisek.

8. Lupwen sia mööni pisek, ifa usun sipwe pwäratä mirit?

⁸ Lupwen sia mööni och pisek sise chök ekieki ika mi naf nöüch moni le mööni nge sia pwal ekieki ekkeei mettoch: ‘Epwe wor ai fansoun le äkkäeä me tümünü ei pisek? Ifa ttamen ai upwe käeö äeään ei pisek?’ Ämi kana kükkün me säräfö, ousap lükü ekkewe chon advertise ra ämmeef ngenikemi pwe a mmen lamot ämi oupwe chök pipisekini ekkan pisek mi mömmong. Oupwe tümünüöch. Pwal och ekieki ika om akkangei pisek a tongeni älisi om famili le mmolnetä fän iten warotoon Kraist. Eäni lükülük woon än Jiowa ei pwon: “Ngang üsap fokun likituk, üsap pwal tümwününgau ngonuk.”​—Ipru 13:5.

Achocho Ngeni ekkewe Angang fän iten Kot

9. Ifa usun än ewe famili achocho ngeni ekkewe angang fän iten Kot epwe älisiir?

⁹ Ewe famili ra pwal tongeni isetiw minne  repwe föri lon ar angang ngeni Kot me achocho le tikeriir. Ina met epwe pwal apöchökküla ar lükü me älisatä ar riri ngeni Kot. Ar föri ena epwe tongeni älisiir le silei ifa ükükün ar feffeitä lon ar mochen apwapwaai Jiowa me epwe pwal älisiir le mirititi met repwe akkomwa lon manauer.​—Älleani Filipai 1:10.

10, 11. Met om famili a achocho ngeni iei me met oua pwal ekiekin tikeri lon mwach?

¹⁰ Ewe famili a tongeni achocho le föri och mettoch repwe tongeni mwittir apwönüetä, nge mi chüen atoto watteen feiöch. Äwewe chök, än ewe famili föri ewe lesenin rän iteitan. Lupwen ra uwawu meefier, iwe, a atufichi ewe möküren famili le silei ükükün alolloolun ar tongei Kot. Ar achocho le äkkälleafengen ewe Paipel epwe pwal tongeni elipwäköchüolo ekkewe semirit lon ar ällea me weweiti ewe Paipel. (Kölf. 1:1, 2) Pwal och, pwata chon ewe famili rese achocho le amürinnölo ar iotek? A pwal fokkun öch ika repwe achocho le ämääraatä napanapen Kot kewe. (Kal. 5:22, 23) Pwal kütta ifa usun chon ewe famili repwe pwäratä tong ngeni chokkewe ra chuuriir lon ewe angangen afalafal. Ika ewe famili a angangfengen lon ekkeei mettoch, iwe epwe älisi ekkewe semirit le sile tong me ese mwääl epwe lapolo ar mochen wiliti emön regular pioneer are misineri.

¹¹ Pwata kese ekieki met en me om famili oupwe achocho ngeni? Oua tongeni alapalo ämi fansoun le fiti ewe angangen afalafal? Oua tongeni achocho pwe oupwe pwora le afalafal woon fon, woon al are lon leenien business? Are oua tongeni mwöküt ngeni eü leeni mi osupwangen chon afalafal ie? Emön leimi a tongeni käeö eü fosun ekis pwe epwe afalafal ngeni ekkewe chon ekis?

12. Ifa usun ekkewe möküren famili repwe älisi ar famili le äsimaüolo lon ar lükü?

¹² Ika en möküren ewe famili, kopwe nengeni met om famili a tongeni angang woon pwe oupwe äsimaüolo lon ämi lükü. Mwirin titchikietiw minne oupwe achocho ngeni nge itä epwe wor ämi tufich le tikeri. (SalF. 13:12) Pwüngün, ach angang woon ekkeei mettoch epwe lamot fansoun. Ina popun, ewe fansoun oua eäni le katol TV, pwata ouse äeä lon ämi angang ngeni Kot. (Ef. 5:15, 16) Angang weires le tikeri met ka isetiw fän iten om famili. (Kal. 6:9) Ika eü famili a achocho lon ar angang ngeni Kot, iwe, “aramas meinisin repwe küna” ar feffeitä.​—1 Tim. 4:15.

Föfföri ewe Famili Fel

13. Ifa ewe siwil a fis lon kokkotun än ewe mwichefel kewe mwich, me ikkefa ekkewe kapas eis sipwe ekieki?

¹³ Ewe siwil lon kokkotun ach kewe mwich a poputä lon January 1, 2009 a älisi ekkewe famili ar repwe ‘mmolnetä’ ngeni warotoon ewe Nöün aramas. Ese chüen imulo ewe rän fän iten ewe Puk Study nge a chök kochu ngeni ewe rän a fis ewe Sukulen Afalafal me Service Meeting. Ei siwil a suuk ngeni familien Chon Kraist ar repwe apöchökküla ar lükü ren ar akkota eü rän iteiten wiik fän iten ar famili fel. Pokiten a fen poputä me ineet ei kokkot, iwe, sipwe pwisin eisinikich: ‘Ua kan äeä ewe fansoun mi kawor fän iten ai famili fel are ai pwisin käeö Paipel? Ua fen küna feiöch ren ewe popun an a fför ei kokkot?’

14. (a) Ifa ewe äkkäeüin popun ewe Famili Fel are pwisin käeö epwe fis iteitan? (b) Pwata a mmen lamot ach sipwe akkota eü rän fän iten käeö?

¹⁴ Ewe äkkäeüin popun sipwe föfföri ewe Famili Fel are pwisin käeö pwe sipwe tongeni arap ngeni Kot. (Jem. 4:8) Lupwen sia awora fansoun le käeö Paipel iteitan, me lapolo sileach usun ewe Chon Förikich, ach riri ngeni epwe pöchökkülelo. Ewin ach akkarap ngeni Jiowa, ewin pöchökküleloon ach tongei i ‘ren unusen lelukach, ren unusen ekiekich pwal ren unusen tufichich.’ (Mark 12:30) Sia fokkun mochen älleasochisi Kot me äppirü  i. (Ef. 5:1) Ach föri ewe Famili Fel iteitan ina ewe kii epwe älisi meinisin chon ewe famili ar ‘repwe mmolnetä’ lon är witiwiti ewe “riaffou lapalap.” (Mt. 24:21, TF) Famili Fel a mmen lamot pwe ewe famili epwe küna manau.

15. Ifa usun ewe Famili Fel epwe kküü meefien chon ewe famili lefiler?

¹⁵ A pwal wor eü popun a fis ewe kokkotun Famili Fel, ren än chon ewe famili repwe ririfengen lefiler. Ar pwoppworausfengen usun ewe Paipel iteiten wiik epwe kküü meefien emön me emön chon ewe famili lefiler. A ifa me pacheöchfengenin ekkewe pwüpwülü lupwen ra rongorong meefien pwülüwer atun ra uwawu fän pwapwa lon ar käeöfengen ewe Paipel! (Älleani Än Salomon Afalafal 4:12.) Än ekkewe sam, in me nau käeöfengen, ese mwääl epwe pinüküfengeniir lon tong, ewe mi “aunusochualo mettoch meinisin.”​—Kol. 3:14, TF.

16. Apworausa ifa usun ekkewe ülümön fin Kraist mi äsimaü ra feiöch ren ar akkota eü pwiin fän iten ar käeöön Paipel.

¹⁶ Nengeni ifa usun ekkeei ülümön fin Kraist mi äsimaü ra küna feiöch seni ewe pesepes ar repwe akkota eü pwiin fän iten käeöön Paipel. Ekkeei ülümön chinnap mi mä seniir pwülüwer ra chiechifengen ren fitu, fitu ier, nge esap iir märäär. Ra nonnom lon eü telinimw. Iwe, ra mochen alapalo ar chiechifengen nge repwe alamota ena fansoun ren ar fosfengen usun Paipel. Ina minne, ra akkota eü pwiin ar repwe chufengen me käeöfengen. Iwe, ra käeö ewe puk “Bearing Thorough Witness” About God’s Kingdom. (Esor lon fosun Chuuk.) Emön leir a apasa: “A mmen fokkun apwapwa äm käeöfengen, iwe, a kan lu seni eü aua. Aua sotun anchangei met a kan fis lon fansoun ekkewe aposel me pworaus woon met aupwe föri ika aua pwal nom lon na fansoun. Aua pwal apwönüetä lon äm angangen afalafal ekkewe mettoch aua käeö. Iwe, a lapolo äm pwapwa me uwaöch äm afalafal me föraalo chon käeö.” Minne ra föri a apöchökküla ar lükü me alapaalo ar pacheöchfengen. Ra apasa: “Aua aücheani ei kokkot.”

17. Met epwe tongeni älisatä sopwöchün ewe Famili Fel?

¹⁷ Nge en, ka pwal küna feiöch seni om akkota eü rän fän iten famili fel are pwisin käeö? Ika ese kan fis iteitan, kese tongeni küna feiöch seni ei kokkot. Emön me emön chon ewe famili epwe mmolnetä ngeni ewe käeö lon ewe kulok ra fen isetiw. Itä ekkewe mettoch mi lamot kisikis resap atai ena kulokun käeö. Pwal och, ekkewe lesen repwe käeö itä repwe älillisöch ngeniir. Met kopwe tongeni föri pwe ewe fansoun käeö epwe apwapwa? Föri pwe ena fansoun epwe kinamwe me asüföl, pwal napanapen ewe asukul epwe älillisöch ngeni ewe famili.​—Jem. 3:18. *

‘Nennelo’ me ‘Mmolnetä’

18, 19. Ifa usun ewe sile usun arapotoon waren ewe Nöün aramas epwe achüngük me om famili?

¹⁸ Ngangawoloon ei fönüfan a wesewesen pwäratä pwe seni ewe 1914, än Setan ei otot a nom lon ekkewe ränin le sopwoloon. A arapoto mölümölün ewe Armaketon. Ekiselo chök ewe Nöün aramas epwe war me föri än Jiowa kapwüng ngeni ekkewe mi ngaw. (Kölf.  37:10; SalF. 2:21, 22) Om silei ekkeei mettoch ese achüngük me om famili?

¹⁹ Ka kan älleasochisi än Jises pesepes pwe mesom epwe ‘mürinnö’? Chon fönüfan ra kan kütta wöü, iteföülo, are pöchökkülen nemenem, nge om famili a kan achocho le föri angangen Kot? A fisöch ämi Famili Fel are pwisin käeö Paipel? Ka fen küna sopwöchün ewe kokkot lon om famili? Usun met sia käeö lon ewe lesen mwen ei, ka kan apwönüetä wisom usun wisen emön mwän pwüpwülü, fin pwüpwülü are kükkün me säräfö pwe epwe älisi unusen om famili le ‘nennelo’? (1 Tes. 5:6) Ika ina, ka kan mammasaöchü le ‘mmolnetä’ ngeni warotoon ewe Nöün aramas.

[Pwóróus fan]

Met Ka Fen Käeö?

• Äweweei ifa usun familien Chon Kraist repwe ‘mmolnetä’ ren ar . . .

tümünü meser epwe ‘mürinnö.’

isetiw me achocho ngeni ekkewe angang fän iten Kot.

föfföri ewe Famili Fel.

[Kapas Eis fán Iten ewe Lesen]