‘Oupwe Tümünü ewe Mwichen Siip Kot A Ngenikemi’
‘Oupwe Tümünü ewe Mwichen Siip Kot A Ngenikemi’
‘Oupwe tümünü ewe mwichen sip Kot a ngenikemi ren unusen letipemi, nge esap me lükitipemi.’—1 PIT. 5:2.
1. Pwata Piter a mochen apöchökküla pwiin kewe Chon Kraist lupwen a mak taropwe ngeniir?
A FOKKUN fich nöün ewe aposel Piter we äechöön taropwe mi apöchökküla chienan kewe chon lükü, pokiten ekiselo mwirin King Nero a eriäfföü ekkewe Chon Kraist lon Rom. Pwal och, ewe Tefil a “fetalfeil” me kükkütta ekkewe Chon Kraist epwe oromaalo. Pwe repwe ü ngeni, a lamot repwe ‘ammolneeretä o mammasa’ me ‘atekisonaretiw fän pöün Kot mi manaman.’ (1 Pit. 5:6, 8) A pwal lamot repwe tümünü ar tipeeüfengen. A mmen efeiengaw ngeniir ika repwe ‘küfengeniir o ocheifengeniir,’ pun ra tongeni ‘arosafengeniir.’—Kal. 5:15.
2, 3. Sia mammaun ngeni iö me ifa ewe lesen sipwele käeö?
2 Ikenäi, a pwal ina usun nonnomuch. Ewe Tefil a kükkütta ewe atun epwe oromaakichelo. (Pwar. 12:12) Ekiselo chök epwe fis “riaffou lapalap, usun chok esaamo fis seni le poputan fonufan tori ikenai, o esap pwal usun chok mwirin.” (Mt. 24:21, TF) A lamot sipwe tümünü usun ekkewe Chon Kraist loom pwe ete wor fiufengen lefilach. An epwe fis ena, fän ekkoch a lamot älillisin ekkewe elter mi lipwäköch.
3 Sipwe nengeni ifa usun ekkewe elter ra tongeni alapaalo ar aücheani wiser le tümünü nöün Kot “mwichen sip” (1 Pit. 5:2) Iwe mwirin, sipwe pworaus woon ifa usun repwe föri ei angangen tümün fän pwüng. Lon ewe lesen mwirin ei, sipwe pwal käeö ifa usun ewe mwichefel a tongeni ‘meniniti ätekewe mi angang ngeni, ir mi emweni o öüröüra’ ewe mwichen siip. (1 Tes. 5:12) Ach käeö ekkeei mettoch epwe älisikich ach sipwe üppos le ü ngeni ewe äkkäemönün Chon Oputakich pun sia mirititi pwe i ewe sia mammaun ngeni.—Ef. 6:12, TF.
Tümünü Nöün Kot Siip
4, 5. Itä epwe ifa ekiekin ekkewe mwän mi äsimaü usun ewe mwichen siip? Äweweei mwo.
4 Piter a pesei chienan kewe mwän mi äsimaü ar repwe eäni än Kot ekiek usun ekkewe siip Kot a ngeniir repwe tümünüür. (Älleani 1 Piter 5:1, 2.) Inaamwo ika Piter a iteüöch usun chök ürelap lon ewe mwichefel nge ese fos ngeniir usun itä i a samol wor, nge a fönör usun i chiener elter. (Kal. 2:9) Ikenäi, ewe Mwichen Sou Pwüngüpwüng a fönöü ekkewe elter ar repwe apwönüetä wiser mi chou le tümünü nöün Kot kewe siip, nge napanapen ar fön a usun chök än Piter.
5 Ewe aposel a mak ngeni ekkewe mwän mi äsimaü ar repwe ‘tümwünü ewe mwichen sip Kot a ngeniir.’ A fokkun lamot repwe mirititi pwe ekkewe siip nöün Jiowa me Jises Kraist. Ekkewe elter repwe wisen pölüwen ngeni Kot ifa usun napanapen ar tümünü nöün kewe siip. Äwewe chök, emön chienom a tingoreok om kopwe nikiniki nöün kewe atun a säi. Iwe itä kosap fokkun tümünüöchüür me amöngööniir? Ika emön lein ekkewe semirit a semwen, itä kosap aünü säfei are chuuri tokter? Pwal ina chök usun, ekkewe elter lon mwichefel repwe “chon masen ewe mwichefelin Kot, i a möni ren chaan püsin Nöün we.” (Fof. 20:28) Ra ekieki pwe emön me emön siip Kot a mööni ren chan Jises Kraist we mi aüchea. Pokiten ekkewe elter repwe wisen pölüwen ngeni Kot, iwe ra amöngööni me tümünü ekkewe siip.
6. Ifa wisen ekkewe chon masen siip loom?
6 Anchangei wisen ekkewe chon masen siip loom. Ra likiitü fän pwichikkaren akkar le rän me patekichin lepwin ren ar repwe tümünü ekkewe siip. (Ken. 31:40) Ra pwal mwo nge mmolnetä le mälo fän iten ekkewe siip. Ewe alüwöl Tafit, emön chon masen siip a seläni nöün kewe siip seni ekkewe manmwocho usun chök laion me pear. Iei alon Tafit usun, “üa turufi ölüsan, üa fiu ngeni o niela.” (1 Sam. 17:34, 35) Mwa met me pworaan pun ewe manmwocho a tongeni kküü! Nge ese niu le seläni ekkewe siip.
7. Lon kapas äwewe, ifa usun ekkewe elter ra weitawu ekkewe siip seni le awen Setan?
7 Ikenäi, a lamot ekkewe elter repwe tümünü seni än Tefil mi usun laion mauner. Weween repwe pwora le weitawu ekkewe siip seni le awen ewe Tefil. Ren än ekkewe elter turufi ölüsan ewe manmwocho lon kapas äwewe, iwe ra tongeni seläni ekkewe siip. Ra pwal tongeni äweweei ngeni ekkewe mi nom fän sossot rese lien tümünü, efeiengawen än Setan kewe ssär. (Älleani Juta 22, 23.) Ekkewe elter rese tongeni sopwöch me lükün än Jiowa älillis. Fän tong, ra tümünü emön siip mi feiengaw, filiti kinäsan me epiti ren oil mi ekinamwe, ina ewe Kapasen Kot.
8. Ekkewe elter repwe emmwenalo ia ekkewe siip, me ifa usun?
8 Ewe wesewesen chon masen siip a pwal emmweni ekkewe siip ngeni ekkewe mälämäl mi arawaraw me konik mi lüa. Pwal ina usun chök, ekkewe elter ra emmweni ekkewe siip ngeni ewe mwichefel, peseer le fiffiti mwich iteitan pwe repwe mötülo me angei “mongö lon fansoun fich.” (Mt. 24:45) Eli a lamot repwe awora watteen fansoun le älisi ekkewe mi apwangapwang le etiwa ewe möngö seni ewe Kapasen Kot. Eli, emön siip mi mwälechelo a mochen liwiniti ewe mwichefel. Ina popun ekkewe elter resap eniwa, nge fän tong repwe äwewe ngeni än Paipel kapasen emmwen me äiti ngeni ifa usun epwe apwönüetä lon manauan.
9, 10. Ifa usun ekkewe elter ra tümünü ekkewe mi apwangapwang lon ar lükü?
9 Lupwen ka semwen, ka sani le chuuri met sokkun tokter? Emön mi chök atapwal ese kon lien aüseling meefiom nge mwittir erenuk ewe esin säfei kopwe ünümi? Are kopwe chuuri emön mi aüselingöch ngonuk, äweweei eli ewe popun ka semwen me ekkewe säfei ka tongeni sotuni?
10 Pwal ina usun, ekkewe elter ra tongeni aüselingöch ngeni ewe mi apwangapwang me älisi le amoielo kiläsan, iwe usun ra “epiti ngeni lö seni föün olif fän iten ach we Samol.” (Älleani Jemes 5:14, 15.) Usun chök och säfei lon Kiliat, än Kot we kapas a tongeni ekinamwei emön mi semwen. (Jer. 8:22; Is. 34:16) Lupwen ewe emön mi apwangapwang a apwönüetä ekkewe emmwen lon Paipel, iwe a tongeni pöchökkülsefäl. Ewer, ekkewe elter repwe älillisöch ika ra aüselinga meefien emön siip mi semwen me iotekfengen.
Sap ren Lüküntipemi, nge Seni Unusen Letipemi
11. Met a amwökütü ekkewe elter ar repwe tümünü nöün Kot siip ren unusen letiper?
11 Mwirin, Piter a ächema ngeni ekkewe elter ifa usun repwe föri ar angang. Repwe tümünü nöün Kot siip ‘ren unusen letiper, nge esap me lüküntiper.’ Met a amwökütüür le tümünü pwiir kewe ren unusen letiper? Iwe, met a amwökütü Piter le tümünü me amöngööü nöün Jises kewe siip? An tong ngeni ewe Samol. (Jon 21:15-17) Pokiten tong, ekkewe elter “resap chüen manau fän püsin iter, nge repwe chök manau fän iten ewe mi mäla o manausefäl fän iter.” (2 Kor. 5:14, 15) Ei tong, pwal ar tong ngeni Kot me pwiir kewe a amwökütü ekkewe elter le awora ar pöchökkül, tufich me fansoun le angang fän iten ekkewe siip. (Mt. 22:37-39) Ra fangolo manauer ren unusen letiper, nge esap me lükün tiper.
12. Ifa ükükün än aposel Paul fangolo pwisin i fän iten ekkewe siip?
12 Ifa ükükün ekkewe elter repwe angang fän iten ekkewe siip? Ra äppirü aposel Paul usun än äppirü Jises. (1 Kor. 11:1) Paul a fokkun chüngü pwiin kewe lon Tesalonika, iwe, i me chienan kewe ra pwapwa le fang ngeniir ‘sap chök ewe Pworausen Manau seni Kot, nge pwal püsin manauer.’ Ra angepwetete ngeniir “usun eman in a tümwünü püsin nöün.” (1 Tes. 2:7, 8) Paul a weweiti meefien emön inelap mi nöükis. Epwe föri mettoch meinisin kapachelong an epwe pwata lukenipwin pwe epwe amöngööni nöün kewe.
13. A lamot ekkewe elter repwe itepök me rüüepek lon met?
13 A lamot ekkewe elter repwe itepök me rüüepek lon wiser ngeni ewe mwichefel me wiser ngeni pwisin ar famili. (1 Tim. 5:8) Ewe fansoun ra äeä fän iten ewe mwichefel a mmen aüchea pwe itä ina repwe äeä fän iten ar famili. Ra tongeni eitepökü me rüüepek wiser kana ren ar etiwa ekkoch le fiti ar Famili Fel fän ekkoch. Lon ekkewe ier, Masanao, emön elter lon Japan a etiwa ekkoch nipich me ekkewe semer rese fitiir lon ar lükü. Lo, lo, lo, ekkoch leir ra pwal wiliti elter me äppirü än Masanao leenien äppirü mi mürinnö.
Sap Ren Mochenian Moni nge seni Wesewesen ämi Mochen
14, 15. Pwata ekkewe elter repwe tümünü seni ewe ekiekin “chök mochen angei liwin,” me ifa usun ra tongeni äppirü Paul?
14 Piter a pwal pesei ekkewe elter le tümünü ekkewe siip ‘sap fänäsengesin ar chök mochen angei liwin, nge seni wesewesen ar mochen föri ewe angang.’ Ekkewe elter ra äeä watte fansoun le föri wiser nge rese ekiekin angei peiof. Piter a küna lamoten an epwe öüröüra chienan kewe elter usun efeiengawen ar “chök mochen angei liwin” lupwen ra tümünü ekkewe siip. A pwälo ena ren ekkewe nöüwisin lamalamen “Papilon mi lapalap” mi pisekisekilo nge ekkewe chon fiti ena lamalam ra wöüngaw. (Pwar. 18:2, 3) Ina popun, a lamot ekkewe elter repwe tümünü seni ena sokkun ekiek.
15 Paul a isetiw leenien äppirü mi mürinnö fän iten ekkewe elter. Inaamwo ika i emön aposel me a tongeni epwe eü minen ‘aweires’ ngeni ewe mwichefelin Tesalonika pwe repwe atufichi, nge i ese ‘mongö ika ese isetiu liwinin.’ Nge a “achocho le angang lerän me lepwin fän weires.” (2 Tes. 3:8) Chommong ekkewe elter ikenäi, kapachelong ekkewe elter mi säifetäl ra isetiw eü leenien äppirü ren ei mettoch. Ra etiwa än pwiir kewe chon lükü awasölaöchür, nge rese ‘aweiresiir.’—1 Tes. 2:9.
16. Met weween än ekkewe elter tümünü siip ‘seni wesewesen ar mochen föri ewe angang’?
16 Ekkewe elter ra tümünü ekkewe siip ‘seni wesewesen ar mochen föri ewe angang.’ A pwälo ren ar pennüküolo minne a nom rer pwe repwe älisi ekkewe siip. Iwe nge, esap weween pwe ra eriäni ekkewe siip le angang ngeni Jiowa, are peseer le angang ngeni Kot fän ewe ekiekin akkuffengen. (Kal. 5:26) Ra mirititi pwe emön me emön siip mi kkolo aüchean. Ra wenewenen mochen älisiir pwe repwe angang ngeni Jiowa fän pwapwa.
Sap Nemenemengaw nge Oupwe Eü Leenien Äppirü
17, 18. (a) Fän ekkoch, pwata a weires ngeni ekkewe aposel le weweiti äitien Jises usun tipetekison? (b) Menni ekiek sia pwal tongeni eäni usun chök ekkewe aposel?
17 Usun met sia fen pworaus woon, ekkewe elter repwe chechchemeni pwe ekkewe siip ra tümünü esap pwisin nöür nge nöün Kot. Ra tümünü ar resap ‘nemenemengau ngeni chokewe mi nom fän ar tümwün.’ (Älleani 1 Piter 5:3.) Fän ekkoch, nöün Jises kewe aposel ra eäni ewe ekiek ese pwüng. Usun chök ekkewe nöüwisin mwu ra mochen eäni wis tekia.—Älleani Mark 10:42-45.
18 Ikenäi iir kewe mi “mochen wiseni ewe wisen soumasen mwichefel” repwe pwisin etittina ewe popun ra achocho ngeni ena wis. (1 Tim. 3:1) Repwe pwisin etittiner ika ra pwapwaiti ar chök nemenem woon ekkoch are iteföülo usun met ekkoch aposel ra pwal tipeni. Ika ekkewe aposel ra apwangapwang lon ei mettoch, iwe, ekkewe elter repwe fen mirititi lamoten ar repwe angang weires le pöön seniir ena ekiekin fönüfan.
19. Met ekkewe elter repwe chechchemeni atun ra tümünü ekkewe siip seni ekkewe minen efeiengaw?
19 Pwüngün, fän ekkoch a lamot ekkewe elter repwe äeä ar pwüng lon wiser le awora fön mi pöchökkül lon ar tümünü ekkewe siip seni ekkewe “wolif mwacho.” (Fof. 20:28-30) Paul a ereni Taitos: ‘Kopwe aea om pwüüng lon wisom, lupwen kopwe apöchöküla ar lükülük, pwal lupwen om kopwe apwüngüür.’ (Tait. 2:15) Inaamwo ika ekkewe elter repwe wisen apwüngü emön, nge ra tümünü pwe repwe pwäratä süföl ngeni emönnewe. Ra mirititi pwe ar fos ngeni fän pwetete epwe achüngü me amwökütü le aleni ewe alen tipatchem, lap seni ar repwe kapas pöchökkül ngeni.
20. Ifa usun ekkewe elter repwe äppirü Jises le isetiw eü leenien äppirü mi mürinnö?
20 Än Kraist leenien äppirü a achüngü ekkewe elter le tongei ekkewe siip. (Jon 13:12-15) A chüng letipach atun sia älleani ifa usun Jises a asukula nöün kewe lon ewe angangen afalafal me föraalo chon käeö. An tipetekison a amwökütü nöün kewe chon käeö le äppirü me ‘tipetekisonfengen lefiler, resap ekieki pwe ra mürina seni ekewe ekoch.’ (Fil. 2:3) Ikenäi, ekkewe elter ra pwal äppirü Jises, iwe ra pwal mochen ar repwe “eu lenien apirü ngeni ewe mwich.”
21. Menni feiöch ekkewe elter ra äpilükülükü?
21 Piter a asopwalo an fönöü ekkewe mwän mi äsimaü ren an apasa usun ewe pwon usun mwach kkan. (Älleani 1 Piter 5:4.) Ekkewe chon mas mi kepit repwe “angei ewe mwärämwär mi ling esap fokun aiolol” le eti Kraist lon läng. Ekkewe chon mas mi choni ekkewe ‘ekoch sip’ repwe küna feiöchün ar tümünü nöün Kot mwichen siip woon fönüfan fän nemenien ewe “Meilapen Chonmas.” (Jon 10:16) Sipwe käeö lon ewe lesen mwirin ei ifa usun sipwe älisi ekkewe chon mas mi kefilitä le emmweni ewe mwichen siip.
Enniwilin Pworaus
• Pwata a fich än Piter epwe fönöü chienan kewe elter le tümünü nöün Kot mwichen siip?
• Ifa usun ekkewe elter repwe tümünü ekkewe mi apwangapwang lon ar lükü?
• Met a amwökütü ekkewe elter le tümünü ewe mwichen siip Kot a ngeniir?
[Kapas Eis fán Iten ewe Lesen]
[Sasing lon pekin taropwe 23]
Usun chök ekkewe chon masen siip loom, mi lamot ekkewe elter ikenäi repwe tümünü ekkewe ‘siip’ Kot a ngeniir
