Ifa usun kopwe Äweweei ewe Mettoch Mwelele?

MWELELE a kan äweiresi aramas. Weween pwe a nafangawelo möngö, konik, gas, imw, älillis seni pioing me sukul. Ei osukosuk a kküü eü billion aramas, ükükün chokkewe mi mwelele a löllö ngeni chochoon chon Canada, Merika me meinisin chon lon Öörün Merika. Iwe nge, chommong aramas lon ekkoch fönü mi wöüöch rese silei emön mi mwelele. Iei sipwele ppi ekkoch pworaus.

Mbarushimana emön mwän iir me pwülüwan me nimmön nöür ra nonnom Rwanda, Afrika. Nöün we owonumönün a mälo ren ewe semwen malaria. A apasa: “Semei we a kini fönüan lon wonu kinikin, iwe, a eineti ngeni emön me emön leim. Fönüei a kükkün me ese naf ina popun ngang me ai we famili aua mwöküt ngeni lein telinimw. Äm angang me pwülüwei we aua kan kekki tuken faü me ppi. Imwem we ese wor asammwachoon. Aua kan etiit äm konik seni eü ito ren ewe imwen polis. Fän chommong aua chök möngö fän eü lon eü rän, nge ika äüse angang ese wor enem unusen rän. Ika ese wor enem ua chök lo seni leimw pun use tongeni likiitü le rongorong än nöüm kewe kechiwen ar echik.”

Victor me Carmen ra kan fför suus. Iir me nöür kewe nimmön ra nonnom lon Bolivia. Ra kamö ruumwer lon eü imw a minen loom, a nnich osun me ese wor fiifi. Victor a pwisin föri än nöün we nengngin chepel epwe äeä lon sukul pokiten a nafangaw chepelin ewe sukul pun ra kon chommong. Ekkeei pwüpwülü ra kan fetäl wonu mwail pwe repwe oos ar ömwüchüün kuk. Carmen a apasa: “Ese wor äm imwen ngaselo iwe aua kan pweretiw ren eü chanpupu ikewe ia chon ena leeni ra kan tütü me koturulo käpich ie. Ekkewe semirit ra pwal mwo nge semwen.”

Francisco me Ilidia ra nonnom Mozambique lon eü leeni mi towau seni telinimw. A wor nimmön nöür nge emön me leir a mälo ren ewe semwenin nikken me mwirin än chon ewe pioing rese etiwa an epwe säfei. Ekkeei pwüpwülü ra kan fotuki rice me kammwü lon fönüer we mi kükkün me a naföch fän iten ülüngät maram. Iei alon Francisco: “Fän ekkoch ese püng rän are a wor chon solääni uwaan äm atake, iwe ua kan amömö iich fän iten pisekin  fförün imw, iwe a wor ekis nöüm moni. Aua kan oos ömwüch lon ewe leeni ruu awa ttamen äm fetäl ngeni. Äm me pwülüwei we aua kan ossei ruu pinük iteiten rän, eü fän iten kukun enem me eü aupwe eäni amömö.”

Chommong ra ekieki pwe a wor och mettoch mi mwääl me pwüngüngaw lon ei fönüfan pwe nonnomun emön me lein fümön aramas ra usun chök nonnomun Mbarushimana, Victor, me Francisco, nge fite billion aramas ra wöüöch. Ekkoch ra sotuni le pwäkini ei osukosuk, iwe sipwele ppi ar achocho me äpilükülük lon en lesen mwirin ei.

 [Sasing lon pekin taropwe 2, 3]

Carmen me rüüemön nöün kewe ra etiit konik lon ewe chanpupu