Ka Fen Tolong lon än Kot Asösö?

“Än Kot kapas a manau o manaman.”​—IPRU 4:12.

1. Ikenäi ifa usun sipwe tolong lon än Kot we asösö? Pwata epwe weires ach sipwe älleasochis?

LON ewe lesen mwan, sia fen käeö pwe kich mi tongeni tolong lon än Kot asösö ika sia älleasochisi i me älisatä an we kokkot. Nge fän ekkoch a weires ach sipwe föri ena. Äwewe chök, lupwen sia käeö pwe Jiowa a mochen sipwe ükütiw le föri och mettoch sia pwapwaiti, eli epwe weires ach sipwe mwittir älleasochisi. Ika ina, mi lamot sipwe käeö ach sipwe tipemecheres le “alleasochis.” (Jem. 3:17) Lon ei lesen, sipwe pworaus woon ekkoch mettoch repwe pwäratä ika sia wesewesen tipemecheres le älleasochis fansoun meinisin.

2, 3. Met sipwe sopwelo le föri pwe sipwe apwapwaai Jiowa?

² Ka tipemecheres le älleasochisi än Paipel kewe kapasen fön? Än Kot we Kapas a erä pwe Kot epwe ionifengeni wöün fönüfan meinisin. (Akai 2:7) Weween Kot a filatä aramas mi aüchea me ren pokiten ar tongei minne mi pwüng. Nge lupwen sia kerän käeö Paipel, lap ngenikich sia föri minne mi mwääl. Iwe nge, ach tong ngeni Kot me Nöün we a amwökütükich le föri watteen  siwil lon föfförüch pwe sipwe apwapwaai I. Iwe, fän ach tittingor än Jiowa älillis me achocho le ekkesiwili manauach, sia tongeni papatais me küna an chen.​—Älleani Kolose 1:9, 10.

³ Nge kich sia chüen tipis. A chüen lamot ach sipwe föri siwil lon manauach me achocho le föri minne mi pwüng. Jiowa a alükülükükich pwe epwe efeiöchü ach achocho me ach tipeppos le apwapwaai letipan.

Lupwen a Lamot Kapasen Fön

4. Ikkefa ülüngät alen ach sipwe angei fön seni Paipel?

⁴ Mwen sipwe angang woon ach apwangapwang, mi lamot sipwe silei met ekkena. Eü afalafal mi katowu lon mwich are eü pworaus lon nöüch kewe puk epwe tongeni pwär ngenikich ach kewe apwangapwang. Nge ika sise fen aüselingöch ngeni met sia rongorong lon mwich are apwönüetä ekkewe fön lon nöüch kewe puk, Jiowa mi tongeni nöünöü pwiich kewe Chon Kraist ar repwe apwüngükich fän mosonoson.​—Älleani Kalesia 6:1, NW. *

5. Ifa usun napanapach fän ekkoch ika emön a apwüngükich, me pwata ekkewe elter repwe chüen achocho le älisikich?

⁵ Ese mecheres ach sipwe etiwa fön seni aramas rese unusöch, inaamwo ika ra fönökich fän tong me süföl. Nge Kalesia 6:1 a affata pwe Jiowa a allükü ngeni iir kewe mi äsimaü ar repwe “achocho” le apwüngükich “fän mosonoson.” Ika sia etiwa, iwe epwe lapolo än Jiowa aücheanikich. Pwüngün, lon ach iotek sia kan ereni pwe sise unusöch me sia kan mwämmwäällilo. Iwe nge, ika emön a äiti ngenikich ach apwangapwang, eli sia künetipingen ren minne sia föri, ekisikisaalo ach mwääl, tipimwääl ngeni ewe chon fönökich pwe a oputakich me sia oput napanapen an fönökich. (2 King 5:11) Eli sia song ren, äkkäeüin ika an fön a weneiti och mettoch sise fokkun mochen rongorong usun, äwewe chök ren föfförün chon le imwach, foutach, limelimen inisich, are minen kunou sia pwapwaiti nge Jiowa a oput. Iwe, pokiten sia song, a ifa me lichippüngüch me pwal ewe a fönökich! Iwe, lupwen sia mosonosonolo, fän chommong sia etiwa an fön pwe mi fen weneitikich.

6. Ifa usun än Kot kapas a tongeni pwäri mochenin me “ekiekin letipen aramas”?

⁶ Ewe wokisin lon Ipru 4:12 ei lesen a longolong woon, a äiti ngenikich pwe ewe kapasen Kot mi “manaman,” a tongeni siwili manauen aramas. A älisikich le föri och siwil lon manauach mwen ach papatais me pwal mwo nge mwirin ach papatais. Paul a pwal makkeei lon nöün we taropwe ngeni chon Ipru pwe än Kot we kapas a pwäri mochenin me “ekiekin letipen aramas.” (Ipru 4:12) Weween lupwen sia weweöchüti än Kot we kokkot fän itach, föfförüch epwe pwäratä met enletin masouen letipach. Iwe, fän ekkoch mi wor sokkofesenin napanapach mi pwä ngeni aramas me met a wesewesen nonnom lon letipach? (Älleani Mattu 23:27, 28.) Ekieki met kopwe föri lon ekkeei napanap sipwele pworaus usun.

Fitipacheiti Feffeitään än Jiowa we Mwicheich

7, 8. (a) Pwata ekkoch chon Jus Chon Kraist ra chüen apwönüetä ekkoch kinikinin ewe Allük? (b) Pwata sia tongeni apasa pwe ra ü ngeni än Kot kewe kokkot?

⁷ Chommong leich sia silei masouen Än Salomon Fos 4:18: “Ewe al ekewe chon pwung ra fetal won a usun chok saramen unumweeran mi chok sasaramala tori a unusen ranila.” Weween pwe föfförüch me  ach weweiti än Kot kewe kokkot epwe mümürinnölo.

⁸ Sia fen pworaus lon ewe lesen mwan pwe mwirin mäloon Jises, chommong chon Jus Chon Kraist ra chüen fiti ewe Allükün Moses. (Fof. 21:20) Inaamwo ika Paul a äweweöchü pwe Chon Kraist rese chüen nom fän ewe Allük, nge ekkoch ra tunalo an äwewe. (Kol. 2:13-15) Eli ekkoch ra meefi pwe repwe chüen apwönüetä ekkoch kinikinin ewe Allük pwe aramas resap eriäfföür. Nge Paul a affata ngeniir pwe resap tongeni tolong lon än Kot asösö ika ra chüen ü ngeni än Kot kewe kokkot. * (Ipru 4:1, 2, 6; älleani Ipru 4:11.) Pwe Jiowa epwe pwapwaitiir, a lamot repwe mirititi pwe Jiowa a fen siwili napanapen än nöün kewe aramas repwe fel ngeni.

9. Itä epwe ifa meefiach lupwen ewe chon angang mi alükülük o tipatchem a siwili äweween ekkoch wokisin lon Paipel?

⁹ Ikenäi, fän ekkoch än Jiowa we mwicheich a äweweei och pworaus seni Paipel nge mi sokkolo seni met sia fen pin silei. Itä sisap osukosuk ren ena, nge epwe fen pöchökkülelo ach lükülük woon ewe chon angang mi alükülük o tipatchem. Chon ewe Mwichen Sou Pwüngüpwüng, ewe a tupuni ewe chon angang mi alükülük o tipatchem, rese pireir le siwili äweween ekkoch pworaus mi enlet ika ra küna pwe a lamot repwe affataöchü are äwena. A lamot ngeni ena mwichen chon angang epwe älisatä än Jiowa kokkot nge esap ekieki an ekkoch esiit pokiten an siwili och äweween Paipel. Iwe, met meefiom lupwen a siwil äweween ekkoch wokisin lon Paipel? Sisap usun chök ekkewe Farisi, lon kapas äwewe, ra sani ewe wain mi mes lap seni ewe wain mi fö, ewe mi wewe ngeni äitien Jises kewe.​—Älleani Luk 5:39.

10, 11. Ifa ewe lesen sia tongeni käeö seni föfförün ekkoch Chon Käeö Paipel lupwen a wor pesepes ar repwe fiti sokkopaten angangen afalafal?

¹⁰ Sipwe ppi pwal eü pworaus. Orun ipükü ier loom, ekkoch Chon Käeö Paipel, chon afalafal mi sipeöch, ra meefi pwe ra tongeni apwönüetäöchü wiser ren ar eäni afalafal lon mwich lein aramas mi pwapwaiti ewe enlet. Ra pwapwaiti le eäni afalafal me ekkoch leir ra sani än aramas mwareiti angöchür. Iwe nge, mwirin a ffatolo pwe letipen Jiowa nöün kewe aramas resap chök eäni afalafal lon mwich nge repwe pwal föri sokkopaten angangen afalafal kapachelong imw me imw. Ekkoch chon afalafal mi lipwäköch rese mochen föri ena. Inaamwo ika me lükün usun itä iir mwän mi äsimaü me tongei Jiowa, nge ren föfförür ar rese mochen fiti ena kokkot a pwäratä pwe rese enletin tongei. Sia silei pwe Jiowa ese pwapwa ren föfförür. Ra towu seni ewe mwicheich.​—Mt. 10:1-6; Fof. 5:42; 20:20.

¹¹ Esap weween pwe mi mecheres ngeni ekkewe Chon Käeö Paipel mi tuppwöl ar repwe afalafal imw me imw, äkkäeüin atun ra kerän poputä. Iwe nge ra älleasochis. Lo, lo, lo ese chüen weires ngeniir me Jiowa a fokkun efeiöchüür. Met meefiom lupwen a wor pesepes pwe kopwe fiti pwal ekkoch sokkun angangen afalafal kesaamwo föri me mwan? Kopwe tipemecheres le älleasochisi ena pesepes?

Lupwen Emön Attongach a Likitalo Jiowa

12, 13. (a) Ifa ewe popun Jiowa a allükü pwe chon föri minne mi mwääl rese aier repwe katowu? (b) Ifa ewe sossot a kküü semen me inen ewe mi katowu, nge pwata a weires ngeniir?

¹² A ffat pwe sipwe tongeni apwapwaai Jiowa ika sia älleasochisi an emmwen usun ach sipwe limelimöch lon mettoch meinisin. (Älleani Taitos 2:14.) Nge a wor ekkoch fansoun epwe tongeni weires ngenikich le  älleasochis. Äwewe chök, eü pean pwüpwülü mi tuppwöl ngeni Jiowa, nge nöür we äkkäemönün ät a likitalo ewe enlet. A filatä an epwe “pwapwaesini pwapwan tipis mi epwe nonnom chok fansoun mochomoch,” lap seni an ririöch ngeni Jiowa me seman kewe me inan, iwe a katowu.​—Ipru 11:25, TF.

¹³ A ifa me letipetaan seman kewe me inan! Ra silei alon Paipel pwe “oute chiechi ngeni emon mi iteni pwich, are a fori lisou, are mochenia, are fel ngeni anumwal, are lalingau, are unupuch, are mocho; ousap eti ekkeei sokkun aramas le mongo.” A pwal apasa: “Oupwe asulo atewe mi ingau seni lefilemi.” (1 Kor. 5:11, 13, TF) Ra mirititi pwe ewe kapas “emon” lon ena wokisin a wewe ngeni chon ewe famili ese nonnom rer lon imwer. Nge pokiten ra fokkun tongei nöür we ät ra ekieki: “Mi lamot sipwe foffos ngeni nöüch we ät. Pun ifa usun sipwe älisi an epwe liwiniti Jiowa ika sise foffos ngeni?” *

14, 15. Met ekkewe sam me in repwe ekieki lupwen ra filatä ika repwe fos ngeni nöür we mi katowu?

¹⁴ Sia meefi riäfföün ekkena sam me in. Pun nöür ät a pwisin filatä an epwe föfföri minne mi mwääl me pöütaalo an chiechiöch ngeni seman, inan me chienan kewe chon lükü. Semen me inen ena ät ra mochen älisi nge sap minne a wor ar nemenem woon filian. Ina pwata ra kon riäfföü!

¹⁵ Met ekkeei sam me in repwe föri? Repwe älleasochisi ewe allük Jiowa a fokkun affata? Are repwe ekieki pwe esor ngawen ar foffos me chiechi ngeni nöür we ät mi katowu me künetipingen le erä pwe mi lamot pun ra fosfengen usun mettochun famili? Lupwen repwe filatä ika repwe fos ngeni are resap, mi lamot repwe ekieki meefien Jiowa usun minne repwe föri. Jiowa a mochen nöün kewe aramas repwe limelimöch me ewe mi katowu epwe aier me liwiniti ewe mwichefel. Ifa usun ekkewe sam me in Chon Kraist repwe eäni ekiekin Jiowa woon ei mettoch?

16, 17. Ifa ewe lesen sia käeö seni pworausen Aaron?

¹⁶ Aaron, pwiin Moses we a küna weires pokiten nöün kewe rüüemön mwän. Natap me Apihu ra eäni eü sokkun asor ngeni Kot nge ese allük ngeniir, iwe Jiowa a nirelo. Anchangei ükükün riäfföün Aaron ren ena. Iwe, a ina ükütiwen än Aaron chiechi me fos ngeniir pun ra mälo. Nge mi wor och mettoch mi äweiresi Aaron me an famili. Jiowa a ereniir: “Ousap atorongauei möküremi, ousap pwal kamwei üfemi pwe asisilen ämi letipeta, pwe ousap mäla, nge ewe Samol mi Lapalap esap pwal song ngeni unusen ewe mwichen aramas.” (Lif. 10:1-6) A ffat ewe lesen. Ach tongei Jiowa epwe pöchökkül seni ach tongei chon ach famili rese tuppwöl ngeni Jiowa.

¹⁷ Ikenäi, Jiowa ese mwittir nielo chokkewe mi atai an kewe allük. Fän tong a suuk ngeniir alen ar repwe aier seni ar föfförmwääl. Nge, epwe met meefien Jiowa ika ekkewe sam me in ra älleasolapa an allük me  foffos ngeni nöür mi katowu pun ra ekieki pwe a wor chommong popun ar repwe foffos ngeni?

18, 19. Ikkefa ekkewe feiöch epwe tori chon ewe famili ika ra älleasochisi än Jiowa öüröür usun ekkewe mi katowu?

¹⁸ Chommong mi fen pin katowu ra erä pwe ra liwiniti ewe mwichefel pokiten ar famili me chiener kewe tuppwöl ngeni Jiowa me rese foffos ngeniir. Emön föpwül a ereni ekkewe elter pwe met a älisi le siwili manauan, ina än mwongean we süföliti än Jiowa kokkot fän iten ekkewe mi katowu. A erä: “an mwongeei we tuppwöl le älleasochisi ekkewe emmwen lon Paipel a amwökütüei le liwinsefäl.”

¹⁹ Ina minne, met a lamot sipwe föri? Sipwe älleasochisi Jiowa lon mettoch meinisin. Fän ekkoch epwe weires ena pun sise unusöch. Mi lamot sipwe wesewesen lükü pwe napanapen än Jiowa pwäkini ach osukosuk, ina met epwe öchitikich fansoun meinisin.

“Än Kot Kapas a Manau”

20. Ipru 4:12 a weneiti menni ruu mettoch?

²⁰ Lupwen sia älleani Ipru 4:12 mi apasa “än Kot kapas a manau,” Paul ese fos usun ewe Paipel. * (Ppi ewe pworaus fan.) Ekkewe epwipwiin wokisin ra äiti ngenikich pwe a fos usun än Kot kapasen pwon. A affata pwe Kot esap tongeni mönükaalo minne a fen pwonei. Jiowa a alükülükü ena ren ewe soufos Aisea, a erä: “Ai kapas esap liwinto rei fän pön, pwe epwe afisätä mine üa tipeni o apwönüetä mine üa akünöü ngeni.” (Ais. 55:11) Ina minne, sipwe mosonottam lupwen sia meefi pwe usun itä a mmang än Jiowa apwönüetä an kewe pwon. Sipwe lükülük pwe Jiowa “a chök akangang” fän iten unusöchün pwönütään an kokkot.​—Jon 5:17.

21. Ifa usun Ipru 4:12 a tongeni apöchökküla ekkewe mi chinnap le sopwelo ar angang ngeni Jiowa?

²¹ Chommong lein ewe “mwich mi fokun chocho” ra fen tuppwöl le angang ngeni Jiowa ren fansoun langattam. (Pwar. 7:9) Rese fen ekieki pwe repwe chinnap lon ei otot mi ngaw, nge inaamwo rese fangetä me lichippüng. (Kölf. 92:14) Ra mirititi pwe än Kot we kapasen pwon mi manau me i a chüen akkangang fän iten pwönüetään. Pokiten än Kot kokkot a fokkun aüchea ngeni, sia apwapwaai lupwen sia pwäratä pwe sia pwal aücheani. Atun ei efisuen ränin än Jiowa asösö, a lükülük pwe epwe chök pwönüetä an kokkot me an we mwicheich epwe älisatä an kokkot. Nge en? Ka fen tolong lon än Kot we asösö?

[Ekkewe Pwóróus fan]

Ka Chechchemeni?

• Met a lamot sipwe föri pwe sipwe tolong lon än Kot asösö ikenäi?

• Lupwen sia weweiti met Kot a kütta senikich me ren ewe Paipel, ifa usun sipwe pwäratä pwe sia mochen apwapwaai Kot?

• Ineet atun epwe tongeni weires ngenikich le älleasochisi än Jiowa allük nge pwata a lamot sipwe chüen älleasochisi?

• Ipru 4:12 a weneiti menni ruu mettoch?

[Kapas Eis fán Iten ewe Lesen]

[Sasing lon pekin taropwe 31]

Ekkewe sam me in ra fokkun meefi riäfföü!