Kopwe Aüselinga än Jiowa Öüröür mi Fataffatöch?

“Iei ewe al oupwe aleni.”​—AIS. 30:21.

1, 2. Met Setan a fokkun mochen föri, iwe ifa usun än Kot we Kapas a älisikich?

EFOCH esissil woon eü ooch mi mwääl ia a ffot ie a tongeni orukakolo me atoto ngonuk feiengaw. Anchangei pwe emön chienom a öüröürak pwe emön mi kirikiringaw a ämweta ewe esissil pwe a mochen ekkewe chon säi repwe mworukolo. Kopwe fiti ena öüröür?

² Setan a usun ena mwän mi kirikiringaw a mochen erikikichelo. (Pwar. 12:9) Meinisin ekkewe etipetip mi ngaw sia pworaus woor lon ewe lesen mwan ra feito seni Setan pwe epwe erikikich seni ewe alen manau esemuch. (Mt. 7:13, 14) Sipwe kilisou ngeni Kot pun a öüröürakich usun än Setan otuputup. Iei, sipwe pworaus woon pwal ülüngät än Setan etipetip mi ngaw. Lupwen sia käeö ifa usun än Kot we Kapas a älisikich le tümünü pwe site rukolo, anchangei pwe Jiowa a tattapweikich me äiti ngenikich ewe al mi pwüng, me erä: “Iei ewe al oupwe aleni.” (Ais. 30:21) Ach ekieki än Jiowa kewe öüröür mi fataffatöch epwe apposa letipach le aüselinger.

Kosap Fiti ekkewe “Chon Afalafal Chofona”

3, 4. (a) Pwata ekkewe chon afalafal chofona ra usun ekkewe ito mi pöön? (b) Ekkewe chon afalafal mi chofona ra kan feito mi ia, nge met ra mochen föri?

³ Anchangei pwe itä ka lo woon eü töö nge ka fokkun kaka. Iwe ka küna eü ito me fetäl ngeni pwe kopwe ka. Nge, a ifa me lichippüngum lupwen ka küna pwe mi pöön ewe ito! Ekkewe chon afalafal chofona ra usun ekkewe ito mi pöön. Ekkewe aramas mi lüküür pwe a nom rer konikin ewe enlet repwe fokkun lichippüng. Jiowa a nöünöü aposel Paul me Piter le öüröürakich usun ekkewe chon afalafal mi chofona. (Älleani Fofor 20:29, 30; 2 Piter 2:1-3.) Iö kkan? Paul me Piter ra äiti ngenikich ia ekkena chon afalafal mi chofona ra feito me ie me ifa usun ra otupu aramas.

⁴ Iei alon Paul ngeni ekkewe elter lon mwichefelin Efisus: “Ekoch me lon ämi we mwich repwe eäni kapas chofona.” Nge Piter a mak ngeni chienan kewe Chon Kraist: “Epwe pwal wor chon afalafal chofona leimi.” Iwe, ia ra feito me ia ekkena chon afalafal chofona? Ra tongeni feito me lon ewe mwichefel. Iir ekkewe chon rikilo. * Met ra mochen föri? Paul a erä pwe lupwen ra pöütaalo än Jiowa mwicheich, ra pwal mochen “atokala ekewe chon lükü Jises pwe repwe etiir.” Ekkena chon afalafal chofona rese küt nöür chon käeö me lükün ewe mwichefel, nge ra achocho le angei nöün Jises kewe chon käeö pwe repwe etiir. Jises a erä pwe ekkena chon rikilo ra usun wolif mi ocheei ekkewe siip. Ra mochen atai lüküen chon ekkewe mwichefel pwe repwe likitalo ewe enlet.​—Mt. 7:15; 2 Tim. 2:18.

5. Ifa usun ekkewe chon afalafal chofona ra otupu aramas?

⁵ Ifa usun ekkewe chon afalafal chofona ra otupu aramas? Ra fokkun tipatchem solä ren ar ännif le “atolonga” ar afalafal chofona lon  ewe mwichefel usun chök än ekkewe furio ännifalong pisek ese mumutä ar repwe tolong lon eü fönü. Ra pwal aronga “pworaus ra püsin afisätä.” Weween ra apasa och pworaus usun itä mi enlet nge a mwaken, ra usun chök ekkewe furio mi föri tipitipin moni me mwakenetä pwe ina wesewesen moni. Ra äeä “föförün likatuputup” me “awewemwäli” ekkewe wokisin lon än Kot Kapas pwe aramas repwe lükü ar ekiek. (2 Pit. 2:1, 3, 13; 3:16) Ekkewe chon rikilo rese tongekich. Ika sia fitiir, iwe sipwe riki seni ewe alen manau esemuch.

6. Ifa ewe öüröür mi ffat seni Paipel usun ekkewe chon afalafal chofona?

⁶ Ifa usun sipwe tümünü seni ekkewe chon afalafal chofona? Ewe Paipel a affata met sipwe föri. (Älleani Rom 16:17; 2 Jon 9-11.) A ffat alon Paipel ei pwe, “Ousap chiechi ngeniir.” Ekkoch afföün Paipel ra afföüni ena mwuten kapas ngeni “kul seniir,” me “imulo seniir!” Ewe kapasen öüröür seni Paipel a usun än emön tokter öüröürak om kopwe imulo seni emön chon semwen pwe ete uruk me ka tongeni mälo. Ka weweiti än ewe tokter kapasen öüröür, iwe kopwe fokkun älleasochisi. Iwe, lon kapas äwewe, ekkewe chon rikilo ra pwal semwen, nge ra mochen aramas repwe pwal semwen me eäni ar ekiek mi mwääl. (1 Tim. 6:3, 4) Jiowa, ewe Tokter mi lap seni meinisin a erenikich pwe sipwe tümünükich seni ekkena chon rikilo. Sia weweiti alon, nge sia tipeppos le unusen aüselinga an öüröür?

7, 8. (a) Met sipwe föri pwe sipwe ü ngeni ekkewe chon afalafal chofona? (b) Pwata sia fokkun üppos le ü ngeni ekkewe chon afalafal chofona?

⁷ Met sipwe föri pwe sipwe ti senikich ekkewe chon afalafal chofona? Sisap etiwer lon imwach are kapong ngeniir. Sisap pwal älleani nöür kewe puk, katol ar prokram lon TV, woon computer are walong meefiach usun met ra makkeei lon Internet. Pwata sia fokkun üppos le ü ngeniir? Pokiten ach tong. Sia tongei ewe “Kot mi allükülük,” ina minne sise pwapwaiti ar afalafal mi orukoruk mi ü ngeni an we Kapas mi let. (Kölf. 31:5; Jon 17:17) Sia pwal tongei än Jiowa we mwicheich, ewe a äitikich ewe enlet mi amwarar usun iten Jiowa we, weween itan, än we kokkot ngeni fönüfan, napanapen ekkewe mi mälo, me ewe äpilükülükün manausefäl. Ka chechchemeni om pwapwa lupwen ka kerän silei ekkeei pworaus mi enlet me pwal ekkoch mi aüchea? Iwe, kosap mut ngeni äitien ekkewe chon afalafal chofona ar repwe erikukolo seni ewe mwicheich a fen äiti ngonuk ewe enlet.​—Jon 6:66-69.

⁸ Ese lifilifil met ekkewe chon afalafal chofona ra apasa, nge sisap fokkun aüselinger! Pun pwata sipwe aüselinga chokkewe mi usun chök ito mi pöön nge sipwe chök lichippüng ren? Nge sipwe chök tuppwöl ngeni Jiowa me an we mwicheich pwe esap fän eü a elichippüngükich nge a kan ngenikich ewe watteen konik mi enlet o limöch seni än Kot we kapas.​—Ais. 55:1-3; Mt. 24:45-47.

Kosap Lükü “Ekewe Tutulap” Chofona

9, 10. Ifa än Paul we kapasen öüröür ngeni Timoti usun “ekewe tutulap” chofona? Ikkefa ekkewe tutulap chofona Paul a ekieki usur?

⁹ Fän ekkoch a mecheres ach sipwe esilla pwe a mwääl leenien ewe esissil woon ewe ooch pun emön a ämweta, nge fän ekkoch, a weires. A pwal ina usun än Setan kewe pworaus mi chofona, fän ekkoch sia mwittir esilla, fän ekkoch sise. Aposel Paul a öüröürakich usun eü me lein än Setan kana minen otuputup, ina “ekewe tutulap.” (Älleani 1 Timoti 1:3, 4.) Met ekkena tutulap, me ifa usun sipwe tümünükich seniir? A lamot sipwe silei pölüwen ekkeei kapas eis pwe sipwe chök feffetäl woon ewe alen manau esemuch.

¹⁰ Än Paul kapasen öüröür usun ekkewe tutulap chofona a mak lon nöün we äechöön taropwe ngeni Timoti, emön elter mi wisen tümünü limöchün ewe mwichefel me älisi  pwiin kewe chon lükü le amwöchü ar tuppwöl. (1 Tim. 1:18, 19) Paul a nöünöü ewe kapasen Krik fän iten “tutulap” mi wewe ngeni “och kapas chofona” are “pworaus mi chök kefisitä.” Me ren ewe puk The International Standard Bible Encyclopaedia, tutulap a wewe ngeni eü pworaus lon lamalam nge ese wesewesen. Eli Paul a ekieki usun än ekkewe lamalam pworaus mi chofona nge mi amwasangasang, iwe, ra luki aramas le eis usun ekkewe mettoch mi lamotongaw me asolapa ar fansoun le kütta pölüwer. * (Ppi ewe pworaus fan.) Setan a äeä ekkeei tutulap are än lamalam pworaus mi chofona pwe epwe erikalo aramas seni minne mi wesewesen lamot. A ffat än Paul we kapasen fön: Kosap aüselinga ekkewe tutulap!

11. Ifa usun Setan a äeä lamalam chofona le otupwalo aramas? Menni kapasen öüröür sipwe aüseling ngeni?

¹¹ Ikkefa ekkoch tutulap mi tongeni otupwalo aramas mi tümününgaw? Sia tongeni erä pwe ikkena “ekkewe tutulap” a tongeni weneiti än lamalam afalafal mi okullukich seni ewe kapas mi enlet. (2 Tim. 4:3, 4) Setan a tipin “eman chon längin saram” me a tipatchem le äeä lamalam chofona le otupwalo aramas. (2 Kor. 11:14) Äwewe chök, ekkewe tipitipin lamalamen Kraist ra eäni afalafal chofona usun ülümön Kot lon emön, ekkeei ell, me och mettoch mi chüen manau mwirin mäloon emön. Ra pwal apöchökküla ekkewe ränin pin ren Krismas me Easter, usun itä met ra föri mi apwapwaai Kot, nge ra wesewesen feito seni fel ngeni kot chofona. Ika sia aüselinga än Kot öüröür pwe sipwe äimukichelo seni lamalam chofona me sisap “atapa och mettoch mi limengau,” iwe, sise tongeni tupulo ren ekkewe tutulap chofona.​—2 Kor. 6:14-17.

12, 13. (a) Ikkefa ekkewe pworaus chofona Setan a apöchökküla me ifa enletin ekkena pworaus? (b) Ifa usun sipwe tümünükich seni än Setan kewe tutulap?

¹² Setan a apöchökküla pwal ekkoch pworaus chofona mi tongeni otupukich ika sise tümünü. Äeüin chofona: Föri pwisin mochenum. Apwüngalo pwisin minne mi pwüng me mwääl. Reitio, TV, computer, me met kan ra kan achöü ena esin ekiek, ina popun a mecheres ach sipwe poputä le eäni me fiti mocheniaingawen fönüfan. Nge ren enletin a fokkun lamot ngenikich än Kot emmwen usun minne mi pwüng me mwääl. (Jer. 10:23) Oruuen chofona: Kot esap angolong lon mwökütükütün fönüfan. Ei ekiek a appöchökküla aramas le küttä pwapwaar iei chök, nge rese ekieki usun mwaach kkan are ifa usun repwe apwapwaai Kot. Ika sia eäni ena ekiek, iwe, sisap “mwökütöch me lipwäköch”  lon ach angang ngeni Kot. (2 Pit. 1:8) Nge ren enletin, arapakkan Jiowa epwele siwili ei fönüfan nge mi lamot sipwe mammasa. (Mt. 24:44) Aülüngätin chofona: Kot ese chchüngükich. Sipwe fangetä ika sia lükü ei pworaus mi chofona pun sipwe meefi pwe ese fichiitikich än Kot tong. Nge ren enletin Kot a fokkun tongei me aücheani emön me emön chon fel ngeni.​—Mt. 10:29-31.

¹³ Mi lamot sipwe tümünü ach sisap eäni än ei fönüfan ekiek pun fän ekkoch usun itä mi fen öch. Nge sipwe chechchemeni pwe Setan a fokkun tipatchem solä. Ina minne, sipwe aüselinga än Paipel kewe öüröür pwe site tupulo ren än Setan kewe tutulap are ekkewe “pworaus aramas ra afisätä.”​—2 Pit. 1:16.

Kosap “Aleasochis Ngeni Satan”

14. Ifa än Paul öüröür ngeni ekkewe fefin mi mä pwülüwer nge ra ier kükkün? Pwata sipwe pwal aüselinga alon kana?

¹⁴ Anchangei pwe itä a mak woon eü esissil “Iei ewe Al ngeni Setan.” Iö leich epwe fiti ena esissil? Paul a öüröürakich ren ifa usun Chon Kraist repwe tongeni tokolo o älleasochis ngeni Setan. (Älleani 1 Timoti 5:11-15.) A kapas usun ekkewe fefin mi mä pwülüwer nge ra ier kükkün, nge ewe kapasen emmwen a weneitikich meinisin. Eli ekkena fefin rese fen ekieki pwe ra fen fitaalo Setan, nge föfförür a pwäratä pwe ra fiti. Ifa usun sipwe tümünü pwe sisap tup le fitaalo Setan? Sipwe etittina än Paul kewe öüröür usun luapas mi efeiengaw.

15. Met Setan a mochen föri, me ikkefa än Setan kewe otuputup me ren Paul?

¹⁵ Setan a mochen sipwe ükütiw le afalafala ewe kapas allim. (Pwar. 12:17) A mochen sipwe asolapa ach fansoun le föri minne mi lamotongaw are minne epwe etipefesenikich. Paul a affata ekkoch än Setan kewe minen otuputup, eü me leir, asolapalo fansoun le einimweifeil. A mecheres ach sipwe asolapa ach fansoun le kunou ren chienach, akkasosfetäl, kökköfetäl lon CB are textfetäl usun pworaus mi lamotongaw. Paul a pwal kapas usun “luapas.” Fän ekkoch, lüapas a tongeni weneiti kapasen pweni, ren än emön fosongaw usun emön, iwe a efisi fitikoko lefiler. (SalF. 26:20) Ekkewe chon pweni ra äppirü Setan inaamwo ika rese silei. * Paul a pwal kapas usun “fosolong lon än eman angang.” Ese wor popun sipwe tikilong lon än ekkoch angang pun ach föri ena epwe erikikich seni wisach we me ren Kot, ewe angangen afalafal. Ika sia ükütiw le afalafal, iwe sia poputä le fitaalo Setan me wiliti chon ü ngeni Kot pun sise tongeni angang ngeniir me rüüemön.​—Mt. 12:30.

16. Met sipwe föri pwe sisap fitaalo Setan?

¹⁶ Ika sia aüselinga än Paipel fön, iwe, sisap fitaalo Setan. Ikkeei ekkoch än Paul kapasen fön. “Alapalafochei ämi achocho lon ewe angangen ach Samol.” (1 Kor. 15:58) Ach ekitekit lon angangen Kot epwe tümünükich seni tanechepwak are angang mi asolapa ach fansoun. (Mt. 6:33) Eäni “sokun kapas mi afefetai aramas.” (Ef. 4:29) Sipwe tipeppos pwe sisap aüseling ngeni lüapas mi efeiengaw me sisap achöüfetälei. * Apöchökküla ach lükülük me süföl ngeni chienach chon lükü. Iwe, sipwe eäni sokkun fos mi aüfichiiretä lap seni eletipengawer. “Achocho ngeni . . . en  me püsin föri an angang.” (1 Tes. 4:11) Sipwe afaani aramas nge süföliti meefier pwe eli rese mochen fosun me pwäri mettoch lon manauer. Chemeni pwe sisap etikalong pwisin meefiach woon ekkewe mettoch ürürün pwisin iir repwe filatä.​—Kal. 6:5.

17. (a) Pwata Jiowa a öüröürakich ren ekkewe mettoch sisap föri? (b) Met sipwe üppos le föri?

¹⁷ A ifa me kilisouch pwe Jiowa a affata ngenikich ekkewe mettoch sisap föri! Sipwe chechchemeni pwe än Jiowa keei kapasen öüröür sia käeö iei pwal lon ewe lesen mwan ra pwäraalo an tongekich. A mochen tümünükich seni riäfföü mi feito seni ach fitaalo än Setan kewe minen otuputup. Ewe al Jiowa a mochen sipwe fetäl woon a chökükkün, nge a emmwenikich ngeni manau esemuch. (Mt. 7:14) Amwo sipwe üppos le aüselinga än Jiowa ei kapasen öüröür: “Iei ewe al oupwe aleni.”​—Ais. 30:21.

[Ekkewe Pwóróus fan]

Ifa Om Memmeef?

Ifa usun kopwe pwisin apwönüetä ekkewe kapasen öüröür lon ekkeei wokisin?

• 2 Piter 2:1-3

• 1 Timoti 1:3, 4

• 1 Timoti 5:11-15

[Kapas Eis fán Iten ewe Lesen]

[Pwoor/Sasing lon pekin taropwe 18]

 Achangafetälei ekkewe Ünen Machang

Eü än chon Jus tutulap loom, mi äweweöchü ngawen än emön lüapasfetäl. Iei menlapen ei pworaus.

Emön mwän mi lüapas a achöüfetälei eü pworaus chofona usun ewe mwän mi tipatchem lon ewe sopw. Mwirin, ena chon lüapas a mirititi ngawen met a föri, iwe, a omusomus ngeni ena mwän. A ereni ena mwän mi tipatchem pwe epwe föri met chök i a mochen epwe föri. Iwe, ewe mwän mi tipatchem a ereni: Kopwe attomwa eü pillu mi fför seni ünen machang me achangafetälei. Ena chon lüapas ese weweiti alon ena mwän, nge a chök föri. Mwirin, a liwiniti ewe mwän mi tipatchem me ereni: “Iwe, iei ka omusaalo ai tipis?” Ena mwän mi tipatchem a erä: “Iwe, kele mwo ionisefälli ekkewe ünen machang.” Ewe chon lüapas a erä: “Epwe ifa usun nge ra fen parasfetäl ren ewe äsepwäl?” Ewe mwän mi tipatchem a erä: “Weiresin om ionisefäl ekkewe ünen machang pwal ina usun weiresin om kopwe äwenasefäli ewe pworaus ka fen achöüfetälei.”

A ffat ewe lesen. Sisap tongeni angeisefäli minne a fen towu seni aüach me eli sisap tongeni amoielo kinasen met sia fen apasa. Ina minne, me mwen ach sipwe uwokükü och pworaus, chechchemeni pwe ach kapas a usun chök ekkewe ünen machang mi changefetäl lon äsepwäl.

[Sasing lon pekin taropwe 16]

Ifa usun ekkoch ra etiwa chon rikilo lon imwer?