3 Kot Mi Kirikiringaw—Itä Mi Pwüng Ena?
3 Kot Mi Kirikiringaw—Itä Mi Pwüng Ena?
Eli, iei met ka fen rongorong: “Kot a chechchemeni meinisin tipisin aramas me a kan apwüngüür ren an eriäfföür lon ewe ekkein ell tori feilfeilo.”
“Kot a apwüngü chon tipis ren an aworato taifun, söön, loo watte, chchechin fönü me met kkan.”
Ifa äitien ewe Paipel: Oruuen Piter 3:9 a apasa pwe Jiowa “esap mochen pwe eman epwe pöütmwälila, nge a fen mochen pwe meinisin repwe ekieksefäl.” Kot ese ännefota ach kewe mwääl, nge a ännefota napanapach kewe mi mürinnö. I “a nenengeni unusen fanüfan, pwe epwe apöchöküla chokewe mi fang ngeni unusen letiper.”—2 Kronika 16:9.
Ewe afalafal pwe aramas repwe riäfföü tori feilfeilo lon ekkein ell ese pop seni ewe Paipel. A fokkun änioput me ren Kot. A apwüngü ekkewe aramas mi fokkun ngaw ren an esap ngeniir ewe liffangen manau esemuch. (Jeremaia 7:31; Rom 6:7) Esap efisien Kot taifun, söön, loo watte, chchechin fönü me met kkan. Ekkeei mettoch ra chök weiweitä le fis me feiengaw a tori aramas meinisin.
Om silei ewe enlet epwe älisuk: Sia tongeni akkarap ngeni Kot ika pwe sia mirititi pwe I a “amusala tipis” me ese mwittir liwini ngeni aramas föfföringawer. (Kölfel 86:5) Ekkoch ra angang ngeni Kot pokiten chök ra meefi mengiringir are niuokkusiti än Kot kapwüng. Nge kich sisap ina usun, sipwe angang ngeni Jiowa pokiten sia tongei i. Ena esin tong a apöchökkülakich me a amwökütükich le föri ükükün ach tufich le apwapwaai i.—Mattu 22:36-38; 1 Jon 5:3.
Inaamwo ika Kot a mochen pwe aramas meinisin repwe föri minne mi mürinnö, nge a silei pwe chommong resap mochen föri ena. Ika esap apwüngü ekkewe aramas mi föri minne mi ngaw, iwe epwe usun chök ekkewe nöüwisin fönüfan mi awora allük nge rese apöchökküla me ra mut ngeni pwüngüngaw me riäfföü an epwe chök lallapolo. (Än Salomon Afalafal 8:11) Ach silei pwe Kot esap mut ngeni föfföringaw an epwe nom tori feilfeilo, a ngenikich äpilükülüköch fän iten mwach kkan. Kot a pwonei pwe epwe nielo chokkewe mi chüen föfföri minne mi ngaw pwe “ekewe chon tipetekison” repwe tongeni pwapwaiti ewe manau esemuch woon fönüfan usun met a fen aotalo me lepoputään.—Kölfel 37:10, 11, 29. *
[Pwóróus fan]
^ par. 7 Ren an epwe lapolo om silei ifa usun Kot epwe siwili ei fönüfan ngeni paratis, ppii ewe puk Met ewe Paipel A Wesewesen Apasa? lon sopwun 3 me 8.
[Ekis Pwóróus lón pekin taropwe 6]
Itä Kot a mochen sipwe fel ngeni pokiten chök sia niuokkusiti an kapwüng?
[Credit Line lon pekin taropwe 6]
Engravings by Doré
