Akkawora Asor ngeni Jiowa ren Unusen Letipach

“Meinisin mine oua föri, oupwe angang ngeni ren unusen letipemi usun itä nge oua angang ngeni ach Samol.”​—KOL. 3:23.

PPII IKA KA SILEI PÖLÜWEN EKKEEI KAPAS EIS:

Ifa usun sipwe tongeni asamolu Jiowa lon ach kewe föfför rän me rän?

Met sokkun asor sia kan akkawora lon ach fel ngeni Kot?

Met sokkun mettoch sia tongeni ffang ngeni Jiowa?

1-3. (a) Pokiten Jises a eäni asor manauan, itä weween pwe Jiowa ese chüen mochen sipwe eäni ekkoch sokkun asor ngeni? Äweweei mwo. (b) Eli sipwe eäni menni kapas eis usun ach kewe asor?

 LE MANAUEN ekkewe aposel, Jiowa a affata ngeni nöün kewe aramas pwe än Jises we asorun möön kepich a amoielo are aükatiw ewe Allükün Moses. (Rom 10:4; Kol. 2:13, 14) Jiowa ese chüen alamota ekkewe asorun man me met kewe chon Jus ra akkawora ren fitepükü ier. Ewe Allük a fen apwönüetä wisan we, wisen ‘chon emmwen ngeni Kraist.’​—Kal. 3:24.

² Esap weween pwe Chon Kraist rese chüen ekieki usun ewe mettoch asor. Nge aposel Piter a mak usun lamoten ar repwe “iseta asor mi fich . . . o mi apwapwai Kot ren Jises Kraist.” (1 Pit. 2:5, TF) Pwal och, aposel Paul a affata pwe iteiten kinikinin manauen emön Chon Kraist mi fen fangolo manauan ngeni Kot a usun “eü asor.”​—Rom 12:1.

³ Sia akkawora asor ngeni Jiowa atun sia fang ngeni are pennüküolo ekkoch mettoch pwe sipwe amürinnöölo ach angang ngeni. Seni minne sia fen käeö usun ekkewe asor chon Israel ra awora, ifa usun sipwe tongeni wesewesen silei pwe Jiowa a pwapwaiti ach kewe asor?

ACH KEWE ASOR ITEITEN RÄN

4. Met sipwe chechchemeni usun ach kewe angang me föfför rän me rän?

⁴ Eli epwe weires ach sipwe weweiti ifa usun föfförüch kewe rän me rän ra riri ngeni ach äkkeäni asor ngeni Jiowa. Usun itä angang lon imw, käeö lon sukul, angang fän iten tufichin manauach, lo sitowa, me met kewe rese kküü ach riri ngeni Jiowa. Nge ika ka fen fangolo manauom ngeni Jiowa are  ekiekin föri ena ekiselo, iwe, a lamot om kopwe chechchemeni pwe föfförum kewe rän me rän repwe wesewesen tongeni amürinnööi are angawa om riri ngeni i. Kich Chon Kraist lon ükükün 24 aua iteiten rän, iwe, a lamot ekkewe kapasen alongolongun allük lon Paipel repwe emmweni meinisin kinikinin manauach. Ina minne, Paul a pesekich: “Meinisin mine oua föri, oupwe angang ngeni ren unusen letipemi usun itä nge oua angang ngeni ach Samol, nge sap ngeni aramas.”​—Älleani Kolose 3:18-24.

5, 6. Met epwe älisikich le filaatä met sokkun fout sipwe fouteni me met sokkun föfför sipwe eäni?

⁵ Ach kewe sokkopaten angang rän me rän esap pwal iir kinikinin ach angang ngeni Kot. Iwe nge, än Paul pesepes pwe sipwe angang ngeni Jiowa ren ‘unusen letipach’ a amwökütükich le ekieki usun föfförüch fansoun meinisin. Iwe, met sia käeö seni ena? Föfförüch, foutach, me üfach ra fich ngeni Chon Kraist fansoun meinisin? Are lon föfförüch kewe rän me rän, sia säw le pwääri pwe kich Chon Pwäraatä Jiowa pokiten napanapen föfförüch are üfach? Sisap mut ngeni ena mettoch an epwe fis fän eü! Sisap mochen föri met epwe eitengawa iten Kot we.​—Ais. 43:10; 2 Kor. 6:3, 4, 9.

⁶ Sipwe käeö ifa usun ach mochen angang ngeni Jiowa ‘ren unusen letipach’ a nemeni ekiekich me föfförüch lon sokkopaten kinikinin manauach. Lon ach käeö, chechchemeni mwo pwe ekkewe asor chon Israel ra mwe ngeni Jiowa repwe fokkun echipwör.​—Eks. 23:19.

IFA USUN A WENEITI MANAUOM

7. Met a kapachelong lon ach fangolo manauach ngeni Kot?

⁷ Lupwen ka fangolo manauom ngeni Jiowa, a fokkun öch filiom na. Ka pwonei pwe kopwe äeä unusen manauom lon an angang. A wewe ngeni om kopwe akkomwa i lon kinikinin manauom meinisin. (Älleani Ipru 10:7.) Esor tipemwaramwar pwe lupwen ka achocho le käeö ekiekin Jiowa usun och mettoch me etipeeüfengeni om kewe föfför ngeni letipan, a echipwör mwiriloon. (Ais. 48:17, 18) Kich eü mwichen aramas mi fel me pwapwa pokiten ach äkkäppirü Jiowa, ewe Emön mi ekkemiritikich.​—Lif. 11:44; 1 Tim. 1:11, NW.

8. Pwata a lamot ach sipwe chechchemeni pwe än chon Israel kewe asor mi pin me ren Jiowa?

⁸ Ekkewe asor chon Israel ra awora mi pin me ren Jiowa. (Lif. 6:25; 7:1) Ewe kapasen Ipru mi afföwü ngeni “pin” a wewe ngeni och mettoch mi käimulo are kefilitä fän iten chök Kot. Ika sia mochen pwe Jiowa epwe pwapwaiti ach kewe asor, sipwe ikkimulo seni mettoch meinisin mi limengaw lon ei fönüfan.  Sisap tongei ekkewe mettoch Jiowa a oput. (Älleani 1 Jon 2:15-17.) A wewe ngeni ach sipwe tii senikich sokkun föfför are chiechi mi tongeni elimengawa manauach mwen mesen Kot. (Ais. 2:4; Pwar. 18:4) Sisap pwal nennengeni are akkanchangei mettoch mi ngaw are limengaw.​—Kol. 3:5, 6.

9. Pwata a lamot än Chon Kraist föfför ngeni aramas?

⁹ Paul a pesei chienan kewe chon lükü: “Ousap manlükala ämi oupwe föri föför mi öch o alilisfengen lefilemi, pun ena sokun asor Kot a pwapwa ren.” (Ipru 13:16) Ika sia föfföröch me äkkälisi aramas, iwe, ach kana föfför repwe usun chök asor mi ketiw me ren Jiowa. Ach chchüngü aramas ren tong a ännetatä pwe kich chon Kraist mi enlet.​—Jon 13:34, 35; Kol. 1:10.

ASOR LON ACH FEL NGENI KOT

10, 11. Met meefien Jiowa usun ach angangen afalafal me ach fel ngeni i? Met epwe amwökütükich le föri?

¹⁰ Ren ach ‘pwäraatä ach apilüköch,’ ina eü alen ach föfför mürinnö ngeni aramas. Ka kan achocho le afalafal ükükün om tufich? Paul a apasa pwe sipwe “iseta ach asoren mwareiti Kot, iei ewe asor: uwan tinauach mi mwareiti [iten Kot].” (Ipru 10:23; 13:15, TF; Osea 14:2) Sipwe ekieki usun ewe ükükün fansoun sia äeä le afalafala ewe kapas allim, me ifa usun sipwe tongeni amürinnöölo napanapen ach afalafal. Chommong kinikin lon ach mwich itan Käitin Chon Afalafal ra tongeni älisikich. Nge sipwe wesewesen chechchemeni pwe ach angangen afalafal, ina ‘eü asorun mwareiti Kot,’ me eü kinikinin ach fel ngeni. Ina popun, a lamot ach angang epwe wenewenen echipwör. Pwüngün pwe a sokkofesen nonnomun emön me emön, nge fän chommong, ach ekiek me memmeef usun ach angang ngeni Jiowa a kan nemeni ewe ükükün fansoun sia äeä le afalafal.

¹¹ Jiowa a allükü ngenikich ach sipwe awora fansoun le fel ngeni lon imwach me pwal lon ewe mwichefel. Inaamwo ika esap wisach ach sipwe älleasochisi ewe allükün Sapat are säi ngeni Jerusalem le feffel, nge sia tongeni käeö ekkoch lesen seni ekkena allük. Iteiten rän, a wor ach angang mi sokkopat, nge Kot a mochen ach sipwe awora fansoun le käkkäeö Paipel, ikkiotek, me fiffiti mwich. Wisen möküren famili ar repwe käeö Paipel ngeni chon le imwer kewe.  (1 Tes. 5:17; Ipru 10:24, 25) Ina minne, epwe mürinnö ach sipwe pwisin eisinikich, Upwe tongeni amürinnöölo ai feffel ngeni Kot?

12. (a) Ewe asorun kek mi pwokkus a löllö ngeni met lon ach ei fansoun? (b) Met sipwe föri pwe ach kewe iotek repwe usun ewe asorun kek mi pwokkus?

¹² King Tafit a köl ngeni Jiowa: “Ai iotek epwe wewe ngeni eu asoren apach mi pwokus me mwom.” (Kölf. 141:2) Epwe öch ach sipwe ekieki ika fän fite sia kan ikkiotek me met sia ikkioteki. Ewe puken Pwäraatä a apöpöfengeni “än ekewe chon pin iotek” me asorun kek mi pwokkus. A apasa pwe ekkewe iotek mi apwapwaai Jiowa ra kan feffeitä ren usun chök och pwoppwon mi pwokkus. (Pwar. 5:8) Lon Israel loom loom, a tichik allükün fförün ewe asorun kek mi pwokkus ra kan kekkeni woon än Jiowa we rongen asor. Jiowa epwe chök pwapwaiti ewe asorun kek ika napanapen än aramas asoresini a tipeeü ngeni ekkewe allük mi fen affatetiw. (Eks. 30:34-37; Lif. 10:1, 2) Iwe, pwal ina chök usun, ika sia anapanapa ach kewe iotek me ren met Jiowa a äiti ngenikich me ekieki pwe iotek a pin, sia tongeni lükü pwe Jiowa epwe aüseling ngeniir.

SIA FANGAFANGÖCH ME SIA AKKANGEI

13, 14. (a) Met Epafrotaitos me ewe mwichefel lon Filipai ra föri fän äsengesin Paul? Met meefien Paul usun? (b) Ifa usun sipwe tongeni äppirü föfföröchün Epafrotaitos me chon Filipai?

¹³ Ewe moni sia liffangolo le älisi ewe angangen afalafal woon unusen fönüfan a usun eü asor, ese lifilifil ika a watte are kükkün. (Mark 12:41-44) Le manauen ekkewe aposel, ewe mwichefel lon Filipai a tiinaalo Epafrotaitos ngeni Rom pwe epwe älisi Paul. Epafrotaitos a uwei och moni pwe eü liffang seni ena mwichefel. Esap ina ewe äkkäeüin fansoun chon Filipai ra pwäraatä kisäseü ngeni Paul. Fän kirekiröch, ra tiinaalo ngeni Paul ena liffang pun rese mochen an epwe lolilen usun tufichin manauan, nge ra mochen pwe epwe äeä an fansoun lon ewe angangen afalafal. Met ekiekin Paul usun ena liffang? A apasa pwe a “usun chök eu asor ngeni Kot mi poöch, eu lifang Kot a etiwa o pwapwa ren.” (Älleani Filipai 4:15-19.) Paul a enletin kilisou ren kirekiröchün chon Filipai, me Jiowa a pwal pwapwa ren.

¹⁴ Lon ei fansoun, Jiowa a pwal fokkun pwapwa ren met sia eäni asor fän iten ewe angangen afalafal woon unusen fönüfan. A pwal pwonei pwe ika sia kükkütta loom an we mwu, epwe awora ngenikich tufichin manauach me met a lamot fän iten an epwe pöchökkül ach lükü.​—Mt. 6:33; Luk 6:38.

PWÄPPWÄRAATÄ OM KILISOU

15. Ikkefa ekkoch mettoch ka kilisou ngeni Jiowa ren?

¹⁵ A wor chommong popun sipwe kilisou ngeni Jiowa. Iteiten rän sipwe apasa ach kilisou ngeni i ren an liffangen manau. A akkawora mettoch meinisin fän iten ach sipwe manau, äwewe chök, ren möngö, üf, imw, me ewe äsepwäl sia ngasangaseri. Sia pwal kilisou ren ach enletin silei ekkewe pworaus mi enlet lon Paipel pun ra awora ach lükü me äpilükülüköch ren mwachkaan. Ina minne, sipwe feffel ngeni Jiowa me akkawora asorun mwareiti pokiten i ewe Kot mi tekia seni meinisin me minne a föfföri fän äsengesich.​—Älleani Pwarata 4:11.

16. Ifa usun sia pwäraatä ach kilisou ren än Kraist we asorun möön kepich?

¹⁶ Ewe lesen mwen ei a pwääri pwe än Kraist asorun möön kepich, ina eü än Kot liffang mi aüchea ngeni aramas. Ena liffang a affataöchü ükükün watteen än Kot tongekich. (1 Jon 4:10) Ifa usun  sipwe pwäraatä pwe sia kilisou ren? Iei alon Paul: “Sia nom fän nemenien än Kraist we chen ngenikich, pun sia silei pwe eman aramas a mäla fän iten aramas meinisin, . . . A mäla fän iten aramas meinisin, pwe chokewe mi manau resap chüen manau fän püsin iter, nge repwe chök manau fän iten ewe mi mäla o manausefäl fän iter.” (2 Kor. 5:14, 15) Weween alon Paul pwe ika sia wesewesen kilisou ren minne Kot a föri, sipwe äeä manauach le asamolu Kot me nöün we. Sia pwäraatä ach tong me kilisou ngeni Kot me Kraist ren ach älleasochis, ach mochen afalafal me älisi aramas le wiliiti nöün Jises chon käeö.​—1 Tim. 2:3, 4; 1 Jon 5:3.

17, 18. Ifa usun ekkoch ra alapaalo ar asorun mwareiti Jiowa? Äweweei mwo.

¹⁷ Kopwe tufichin amürinnöölo om asorun mwareiti Kot? Mwirin än chommong pwiich kewe ekieki usun än Jiowa kewe föfför mürinnö fän äsengesiir, iwe, ra siwili nonnomur pwe repwe alapaalo ar fansoun le afalafal are föri pwal ekkoch angang lon än Jiowa we mwicheich. Ekkoch ra tufichin auxiliary pioneer eü ika pwal fitu maram iteiten ier, me pwal fitemön ra tufichin regular pioneer. Pwal ekkoch ra awora älillis le kaü ekkoch imw fän iten än Jiowa angang. Ikkena ekkoch asor mi tongeni pwäraatä watteen ach kilisou. Ika a pwüng ewe popun sia angang ngeni Kot, pwe sipwe pwäraatä ach kilisou ngeni, iwe, epwe pwapwaiti met sia föfföri fän itan.

¹⁸ A chchüng letipen chommong Chon Kraist pwe repwe pwäraatä ar kilisou ngeni Jiowa. Morena emön leir. Le kükkünün, i emön chon Katolik, nge a wor chommong an kapas eis usun Kot me weween än aramas manau woon fönüfan. A kütta pölüwen an kewe kapas eis lon pekin Katolik me seni ekkewe sou tipachemen Eisia. Nge a kerän pölüwöch an kewe kapas eis mwirin chök an poputä le käeö Paipel ren älillisin Chon Pwäraatä Jiowa. Morena a mmen kilisou ngeni Jiowa ren met a käeö lon Paipel pun a atoto ngeni pwapwa mi enlet. Ina minne, a mochen pwäraatä an kilisou ngeni ren an äeä unusen an pöchökkül lon an angang ngeni. Mwirin chök an papatais, a auxiliary pioneer iteiten maram, iwe, lupwen a siwil nonnomun, a poputä le regular pioneer. A fen 30 ier ra lo, me Morena a chüen pioneer tori iei.

19. Ifa usun kopwe tongeni alapaalo om kewe asor ngeni Jiowa?

¹⁹ Chommong nöün Jiowa kewe chon angang rese tongeni pioneer pokiten nonnomur. Ese lifilifil met sia tufichin föri lon än Jiowa angang, nge kich meinisin sia tongeni awora asor mi apwapwaai i. Sipwe tongeni apwönüetä än Paipel kewe kapasen alongolongun allük lon ach kewe föfför me chechchemeni pwe sia tupuni Jiowa fansoun meinisin. A lamot sipwe wesewesen lükülük pwe Kot epwe apwönüetä minne a akkota seni le poputään. Sia älisi chöüfetälin ewe kapas allim ren ach kewe angang mi mürinnö. Sia kan pwäppwäraatä pwe sia enletin kilisou ren mettoch meinisin Jiowa a föfföri fän itach. Ina minne, sipwe sopwelo le ffang ngeni Jiowa ach kewe asor ren unusen manauach.

[Ekis Pwóróus lón pekin taropwe 27]

Met meefiom lupwen ka ekieki usun mürinnöön Jiowa?

[Sasing lon pekin taropwe 25]

Ka achocho le pwäraatä ewe enlet iteitan ükükün om tufich?