Itä Kot A Apwüngükich?

“Inaamwo ika ua tongei chokkewe mi feiengaw, nge ai lükü iei eü kapwüng seni Kot.” Ina alon emön nöüwisin mwu mi iteföülo lon Japan mwirin ewe chchechin fönü mi fokkun watte (ükükün pöchökkülan 9.0) me ewe loo watte ra fis fän ewe March 2011.

Lupwen lap seni 220,000 aramas ra mälo lon ewe chchechin fönü lon Haiti fän ewe January 2010, emön mi iteföülo chon afalafal woon TV a erä pwe pokiten ekkewe aramas ra föri eü “etipeeü ngeni Setan,” iwe, a lamot ar repwe “kul ngeni Kot.”

“Kot a mochen pwe mwelien letipach epwe emmwenikich sefäl, pwe usun itä a fen mälo.” Ina alon emön patere lon Manila, Philippines lupwen ekkewe 79 aramas mi mälo ren än ewe mwichen aramas mi tarangarangfeil ipwerir. Eü simpung lon ena fönü a erä pwe “rüwe me eü persentin aramas ra lükü pwe Kot a pwärawu an song ngeni aramas ren an efisi söön, taifun me pwal ekkoch feiengaw watte,” mi kan atatakkisi ena fönü.

SENI loom, loom, aramas ra lükü pwe Kot a apwüngü aramas mi ngaw, ren an efisi taifun, chchechin fönü, söön, me met kkan. Lon ewe ier 1755, mwirin mäloon 60,000 aramas ren ewe chchechin fönü, kkar me loo watte mi fis Lisbon, Portugal, emön sou ääk mi iteföülo itan Voltaire a eis: “Itä a kon watte mocheniaingawen aramas lon Lisbon lap seni lon Paris, ikewe ia mocheniaingawen tipis a chöüfetäl ie?” Ren enletin, chommong aramas ra kan ekieki ika Kot a äeä ekkewe feiengaw watte le apwüngü aramas. Lon chommong fönü ra erä pwe ekkena sokkun feiengaw watte, ina än Kot kewe angang.

Iwe, sipwe pwisin eisinikich: Itä Kot a wesewesen äeä ekkewe feiengaw watte le apwüngü aramas? Ekkeei feiengaw watte ra kerän fis mi akkatapw, iir än Kot kapwüng?

Ekkoch aramas ra mwittir tipimwääl ngeni Kot, popun pun ra erä pwe a wor pworaus lon Paipel usun än Kot atoto kata ren an äeä püngüchoun rän, ekkei, me sätifesenin pwül. (Keneses 7:17-22; 18:20; 19:24, 25; Numperis 16:31-35) Iwe nge, ika sipwe etittina eü me eü ekkena pworaus lon Paipel, ra pwäraatä pwe mi wor ülüngät mettoch mi ännetatä pwe eü kata a feito seni Kot. Äeüin, lon meinisin ekkeei pworaus lon Paipel a kawor kapasen öüröür me mwen ar repwe fis. Oruuan, eü kata seni Kot mi lifilifil, pun iir kewe chök mi fokkun ngaw are chokkewe rese älleasochisi kapasen öüröür ra mälo. Nge ren ekkewe feiengaw watte ikenäi, aramas mi ngaw fengen me ekkewe mi öch ra mälo. Aülüngätin, Kot a awora eü alen ngaselo fän iten ekkewe mi pwüng.​—Keneses 7:1, 23; 19:15-17; Numperis 16:23-27.

Ese wor pisekin ännet mi ännetatä pwe ekkewe chommong feiengaw watte mi eriäfföü aramas ikenäi, iir efisien Kot. Iwe nge, pwata a lallapolo fisitään ekkewe feiengaw watte? Met sipwe föri ren fisitään ekkena feiengaw watte? Epwe wor fansoun ar resap chüen fis? Kopwe küna pölüwen ekkeei kapas eis lon ekkewe lesen mwirin ei.