Met Sipwe Föri Fän Ekkewe Feiengaw Watte

Met emön epwe tongeni föri pokiten an a lallapolo me wakkattelo feiengaw seni taifun, chchechin fönü, söön me met kkan? Sipwe ppii ekkewe mettoch sia tongeni föri.

Sü seni ikewe kopwe tongeni feiengaw me ie. Ewe Paipel a apasa: “Eman aramas mi mirit a küna ewe feiengau mi feito o opola, nge ekewe chon wewemang ra chök feilong lon o feiengau.” (Än Salomon Fos 22:3) Ei kapasen fön mi tipächem a tongeni weneiti ekkewe feiengaw watte. Ika a kawor öüröür usun an epwe fis taifun, pummongun konik, loo watte, püngün volcano, sipwe tipächem ika sia sü seni ewe leeni mi efeiengaw me lo ngeni ewe leeni mi tümün. Manau a aüchea lap seni imw are pisek.

Ren ekkoch, eli repwe filatä ar resap nom lon eü leeni mi kan fiffis ekkewe feiengaw watte ie. Emön meilap a apasa: “Lap ngeni ekkewe feiengaw watte repwe kan tongeni fis lon chök ekis kinikinin woon ei fönüfan, me ika epwe wor ekkewe feiengaw mi fokkun watte repwe chök tottori ekkena leeni.” A tongeni fis ei lon ekkewe leeni mi arap ngeni orosset are a säät pwülün. Ika mi tufich om kosap nom lon ekkena esin leeni are ka tongeni mwöküt ngeni ikewe mi tümün ie, iwe neman epwe kükkünülo om kopwe tongeni küna weires seni ekkena feiengaw watte.

Akkota met kopwe föri. Inaamwo ika ka fokkun tümünü pwe kosap küna feiengaw, nge kopwe chüen tongeni feiengaw seni ekkewe osukosuk mi chök weiweitä. Epwe mecheres om kopwe likiitü fän ekkeei feiengaw ika pwe ka fen mmolnetä me mwan. A pwal tipeeü ngeni ewe kapasen öüröür lon Än Salomon Fos 22:3, ewe sia fen pworaus usun me mwan. Ka fen ammolnatä om pwotoun pisek mi lamot fän iten osukosuk mi weiweitä? Ka pwal tongeni walong lon ena pwotou ekkewe säfei are pisek mi mwittir älisi emön mi feiengaw, konik, ekkewe sokkun möngö esap mwittir ngaw, me ekkewe taropwe mi lamot. Ina ewe pesepes seni ewe puk 1-2-3 of Disaster Education. A pwal öch ika en me om famili oupwe pworausfengen woon ekkewe sokkopaten feiengaw watte repwe tongeni fis me met oupwe föri lon eü me eü feiengaw.

Akkamwöchü om ririöch ngeni Kot. Ena sokkun riri epwe älisikich fansoun meinisin. Ewe Paipel a apasa pwe Kot i “ewe Sam mi umöumoch, ewe God ach aninnis meinisin ra feito seni! I a anisi kich non ach riaffou meinisin.” Pwal eü wokisin a apasa pwe Kot a “apwapwai ekkewe ra netipechou.”​—2 Korint 1:3, 4; 7:6, Ewe Kapasen God.

Pwüngün, Kot a fokkun silei met a fiffis ngeni chokkewe mi lükülük woon i. I emön Kot mi tong me a apöchökkülakich lon sokkopaten napanap. (1 Jon 4:8) Iotek fän iten än Kot we manaman mi fel, ina met epwe älisikich fansoun meinisin, nge  sap ewe esin iotek fän iten än Kot epwe föri eü manaman le mwittir angasakichelo. Ewe manaman mi fel a tongeni ächema ngeni iir kewe mi küna riäfföü ekkewe wokisin lon Paipel mi tongeni aururuur me ekinamwer. Enlet, nöün Kot kewe chon angang mi tüppwöl ra tongeni meefi meefien Tafit, ewe kingen Israel loom, ewe mi apasa: “Inaamo ika upwe fefetal lon lemonun chukun nurun malo, nge usap niueiti och mi ingau; pun ka nonnom rei; aurom me wokum ra achipaei.” Kölfel 23:4, TF.

Ekkewe Chon Kraist ra älillisfengen. Lon fansoun ekkewe aposel, ewe soufos Chon Kraist itan Akapus a erä pwe “eu mailengita epwe tori unusen fanüfan. (Ei a fis lon mwün Sisar Klautius.)” Ena lengita a tori chommong nöün Jises kewe chon käeö lon Jutea. Iwe, met ekkewe Chon Kraist lon ekkoch leeni ra föri lupwen ra rongorong met a fis ngeni pwiir kana? Iei met Paipel a apasa: “Ekewe chon lükü Jesus ra tipeeufengen, pwe än eman me eman leir alilis won ükükün an tongeni epwe titila ngeni pwiir kewe chon lükü mi nom lon Jutea.” (Fofor 11:28, 29) Ra pwäraatä ar tonger ren ar awora ngeniir met ra osupwangan.

Nöün Kot kewe chon angang ra pwal föri ena lupwen a fis ekkewe feiengaw mi fokkun watte ikenäi. Chon Pwäraatä Jiowa ra sillelo ren ar älisi pwiir kewe chon lükü. Ren chök äwewe, lupwen a tori Chile ewe chchechin fönü mi fokkun pöchökkül lon ewe February 27, 2010, Chon Pwäraatä Jiowa ra mwittir awora älillis ngeni chokkewe mi feiengaw. Karla, ewe a puulo imwan ren eü loo watte, a apasa: “A fokkun aururuei me apöchökkülaei ai küna pwe sorotään chök ena atun, pwii kewe Chon Pwäraatä ra waroto seni ekkoch leeni pwe repwe älisikem. A ffat pwe Jiowa a aururukem ren kirekiröchün ekkena chon etto älisikem. Ua meefi än Jiowa tong me tümün.” Seman we chinnap, esap i emön Chon Pwäraatä Jiowa, a küna ar awora älillis. Iwe a apasa: “A fokkun sokkolo ekkeei aramas seni chon ai we lamalam ua fiti ren fite, fite ier.” Met a küna a achüngü letipan le tingorei Chon Pwäraatä Jiowa ar repwe käeö ngeni ewe Paipel.

Ach nom ren chokkewe mi tongei Kot epwe fokkun tongeni älisikich fän weires.

[Sasing lon pekin taropwe 6]

Ka fen ammolnatä om pwotoun pisek mi lamot fän iten osukosuk mi weiweitä?

[Sasing lon pekin taropwe 7]

Iotek fän iten än Kot we manaman mi fel nge esap ren an epwe mwittir pwäkini ach osukosuk, ina met epwe älisikich

[Sasing lon pekin taropwe 7]

Ekkewe Chon Kraist ra älillisfengen pwe repwe likiitü fän ekkewe feiengaw watte

[Sasing lon pekin taropwe 7]

“Ua meefi pwe Kot a tümünüei me tongeiei”