Tümünü ewe Napanap mi Pwüng lon ewe Mwichefel

“Ümöümöchün ach Samol Jesus Kraist epwe nonom remi [“pokiten oua pwäraatä ewe napanap mi pwüng,” NW].”​—FIL. 4:23.

IFA USUN SIPWE ÄLISI EKKEWE EKKOCH LON EWE MWICHEFEL AR REPWE EÄNI NAPANAP MI PWÜNG . . .

lupwen sia chiechi ngeni pwiich kewe?

ren ach mwasangasang lon ewe angangen afalafal?

ren ach ereni ekkewe elter usun eü tipis mi chou sia fen silei emön a föri?

1. Pwata Paul me Jises Kraist ra mwareiti ekkewe mwichefel lon Filipai me Tiatira?

 EKKEWE Chon Kraist lon Filipai lon fansoun ekkewe aposel ra wöüngaw. Nge ra kisäseü me fokkun tongei pwiir kewe. (Fil. 1:3-5, 9; 4:15, 16) Ina ewe popun Paul a ereniir: “Ümöümöchün ach Samol Jesus Kraist epwe nonom remi [pokiten oua pwäraatä ewe napanap mi pwüng, NW].” (Fil. 4:23) Pokiten ekkewe Chon Kraist lon Tiatira ra pwal pwäraatä ena sokkun napanap are ekiek, iwe, Jises Kraist a ereniir: “Üa silei om kewe föför. Üa silei om eäni chen, om allükülük, om angang me om mosonotam. Üa silei pwe mine ka föri iei a lapala seni mine ka föri me lepoputän.”​—Pwar. 2:19.

2. Ifa usun ewe napanap sia eäni epwe kküü ewe napanap mi pwälo lon ach we mwichefel?

² Ikenäi eü me eü mwichefelin Chon Pwäraatä Jiowa ra kan pwäraalo eü napanap are ekiek. Ekkoch ra sillelo ren ar pwäraatä ümöümöch me tong. Ekkoch ra fokkun tinikken le älisatä ewe angangen afalafal me angangen pioneer. Lupwen sia achocho le ämääraatä ewe napanap mi mürinnö, iwe, sia älisatä ewe napanap mi pwüng me ewe tipeeü lon ewe mwichefel. (1 Kor. 1:10) Lupwen ekkoch lon ewe mwichefel ra eäni napanap mi ngaw, eli epwe tongeni etipetipa chon ewe mwichefel ar repwe akükkünaalo ar angang ngeni Kot, ar resap kon mwasangasang le afalafal, me pwal mwo nge mut ngeni tipis mi chou an epwe fis. (1 Kor. 5:1; Pwar. 3:15, 16) Ifa ewe napanap a kon pwälo lon om we mwichefel? Ifa usun ka tongeni apöchökkülatä ewe napanap mi mürinnö lon ewe mwichefel?

 ÄLISATÄ EWE NAPANAP MI PWÜNG LON EWE MWICHEFEL

3, 4. Ifa usun sipwe mwareiti Jiowa lon ewe mwichefel?

³ Tafit, emön me lein ekkewe chon makkeei köl fel a köl ngeni Jiowa: “Üpwe kilisou ngonuk lon ewe mwichelapen noum aramas, üpwe mwareituk me lein ewe mwicheichen aramas.” (Kölf. 35:18) A mwareiti Jiowa lupwen a nom lein nöün Kot kewe chon angang. Iteiten wiik lon ach kewe mwich a suuk ngenikich ach sipwe pwäraatä ach tinikken me lükü ren ach uwawu meefiach, äwewe chök lon ewe Käeöön Ewe Leenien Mas. Sipwe pwisin eisinikich: Ua uwawu meefiei lon ekkewe mwich ükükün ai tongeni? Ua ammolnatäöchü pwe ai memmeef epwe öch? Ika ngang möküren ewe famili, ua älisi nei kewe mwen ewe mwich le ammolnatä me äiti ngeniir ar repwe uwawu meefier lon pwisin ar fos?

⁴ Sia tongeni pwäraatä pwe letipach mi nüküchar, weween mi tipeppos le föri minne mi pwüng, ren napanapen ach köl lon ekkewe mwich. Tafit a erä: “Kot, letipei mi nukuchar, letipei mi chok nukuchar! Upwe kokol, o upwe pwal foruta kol!” (Kölf. 57:7, TF) Ekkewe köl sia eäni lon ach kewe mwich a suuki ngenikich ach sipwe ‘kokol’ ngeni Jiowa fän ewe letip mi nüküchar. Ika sise kon lien sile ach kewe köl, eli sipwe käkkäeö atun ach famili fel. Sia mochen usun ewe sou makkeei köl fel, ewe a erä: “Üpwe köl ngeni ewe Samol mi Lapalap lon ränin manauei meinisin. Üpwe kölün mwareiti ai Kot lupwen ai manau.”​—Kölf. 104:33.

5, 6. Ifa usun sipwe awasölai me kisäseü ngeni aramas, iwe, ach föri ena epwe älisatä ewe mwichefel le föri met?

⁵ Lupwen sia awasölai pwiich kewe, sia pwal apöchökküla ewe tong lon ewe mwichefel. Lon ewe säingoon sopwun lon nöün Paul we taropwe ngeni chon Ipru, a makkeei: “Oupwe achocho ne tong fengen. . . . Oupwe chechchemeni pwe oupwe etiwa ekkewe wasöna non imwemi.” (Ipru 13:1, 2, Ewe Kapasen God) Sia tongeni awasölaöchü ekkewe chon angang full-time lon ewe mwichefel, äwewe chök ewe elter mi säifetäl me pwülüwan, chon angangen Bethel, pioneer me met kkan, ren ach etiwer ach sipwe möngöfengen. Fän ekkoch, lon ach famili fel are möngöfengen, sia pwal tongeni etiwa chokkewe mi mä seniir pwülüwer, ekkewe famili ese nom ngeniir semer are iner, me pwal ekkoch.

 ⁶ Paul a ereni Timoti an epwe apöchökküla ekkewe ekkoch “pwe repwe föri mine a mürina, pwe repwe pisekisek lon ar föför mürina, repwe kichiöch o mochen alisi aramas. Ren ei repwe iseis fän iter och wöü epwe eu longolong mi nükünük fän iten ewe fansoun epwe feito. Mürin repwe angei ewe manau, iei ewe enletin manau.” (1 Tim. 6:17-19) Paul a pesei pwiin kewe ar repwe ämääraatä kisäseü. Pwal mwo nge lon ei fansoun a weires fetälin moni, sia chüen tongeni kisäseü. Äwewe chök, ika a wor woom taraku, eli ka tongeni uwei ekkewe ekkoch ngeni mwich are afalafal. Nge ren chokkewe mi fen küna ekkena sokkun älillis, ifa usun repwe pwäraatä kilisou me älisatä ena sokkun napanap mi pwüng lon ewe mwichefel? Ra tongeni awora monien älillis fän iten tümünün ewe waa me möön kääs mi kan mömmongolo. Sia pwal tongeni alapaalo ach chiechi ngeni pwich kewe pwe repwe meefi pwe sia tonger. Lupwen sia föfföröch “akaeuin ngeni chokewe mi nom lon ewe familien chon lükülük,” me äeä ach fansoun me tufich le älisiir, iwe a lapolo ach tonger, me sia älisi ekkoch lon ewe mwichefel ar repwe eäni eü napanap mi mürinnö.​—Kal. 6:10.

7. Ifa usun ach sisap apworausafetälei pworausen ekkoch epwe älisatä ewe napanap mi pwüng lon ewe mwichefel?

⁷ Chiechi me süföliti pworausen manauen aramas ra pwal apöchökküla ewe tong lefilen pwiich kewe. (Älleani Än Salomon Fos 18:24.) Ika emön chienach a apworausa ngenikich pwisin pworausan, kich chiechi mi enlet ika sise apworausafetälei. Ika pwich kewe ra pwäri alolloolun ekiekiir me meefier ngenikich nge ra lükülük pwe sisap achöüfetälei, iwe epwe pöchökkülelo ewe tong lefilach. Amwo sipwe älisatä tongfengen usun eü famili lon mwichefel ren ach sipwe emön chiechi mi tüppwöl me ese achöüfetälei pworausen chienach kewe.​—SalF. 20:19.

MWASANGASANG LON EWE ANGANGEN AFALAFAL

8. Met Jises a ereni ekkewe chon Laotisea? Pwata?

⁸ Jises a ereni ewe mwichefel lon Laotisea: “Üa silei om kewe föför, üa silei pwe kosap pat, kosap pwal pwich. Amwo kopwe pat ika pwich. Nge pokiten ka nom lefilen pat me pwiich, iei mine üpwe kusufukowu seni lon awei.” (Pwar. 3:15, 16) Ekkewe chon Laotisea rese tinikken le föri wiser wisen Chon Kraist. Ei ekiek eli a pwal kküü ewe riri lefiler lon ewe mwichefel. Ina popun, Jises a fönör fän tong: “Üa apwüngü o amiriti chokewe meinisin üa tongeer. Iei mine kopwe achocho o aier seni om tipis.”​—Pwar. 3:19.

9. Ifa usun ach mwasangasang lon ewe angangen afalafal a kküü ewe mwichefel?

⁹ Ika sia mochen pwe ewe mwichefel epwe eäni ewe napanap mi pwüng, mi lamot sipwe tinikken are mwasangasang lon ach angangen afalafal. Eü popun a wor mwichefel, pwe sipwe kütta ekkewe mi letip wenechar me asukuler ewe enlet. Ina minne,  mi lamot sipwe äppirü Jises me tinikken lon ei angangen föraalo chon käeö. (Mt. 28:19, 20; Luk 4:43) Ewin ach mwasangasang lon ewe angangen afalafal, ewin pöchökküleloon ach tipeeüfengen usun “chon angangen Kot mi akangangfengen.” (1 Kor. 3:9, TF) Lon ewe angangen afalafal, lupwen sia küna än pwich kewe ännetatä ar lükü me pwäraatä tong ngeni Jiowa me ewe enlet, iwe, a lapolo ach tonger me süfölitiir. Pwal och, ach angangfengen a efisatä tipeeüfengen lon ewe mwichefel.​—Älleani Sefanaia 3:9.

10. Ifa usun ach achocho le lipwäköchülo lon ach angangen afalafal a kküü chon ewe mwichefel?

¹⁰ Ach achocho le lipwäköchülo lon ewe angangen afalafal epwe pwal kküü ekkewe ekkoch. Ika sia äfänniöchü chokkewe sia afalafal ngeniir me achocho le angangöchülo le achchüngü letiper, iwe epwe lapolo ach mwasangasang lon ewe angangen afalafal. (Mt. 9:36, 37) Ika sia mwasangasang, chiechiach kewe repwe pwal mwasangasang. Jises a tiinaalo nöün kewe chon käeö ar repwe afalafal nge ra akkarüüemön, rese äkkäläemön. (Luk 10:1) Ei mettoch ese chök apöchökküler me asukuler nge a pwal amwasangasanger lon ewe angang. Sia fokkun pwapwa le mwinfengen me ekkewe chon afalafal mi mwasangasang! Ar mwasangasang a apöchökkülakich me älisikich le akkachocho lon ach angangen afalafal.​—Rom 1:12.

KOSAP NGÜNÜNGÜNÜNGAW ARE AOPAALO TIPIS MI CHOU

11. Ifa ewe napanap ekkoch chon Israel ra eäni lon fansoun Moses we, iwe, a amwökütüür le föri met?

¹¹ Mwirin chök fitu wiik än Jiowa föratä Israel pwe epwe eü mwu, ra poputä le ngününgününgaw. Iwe, ra ü ngeni Jiowa me nöün kewe chon angang, Moses me Aaron. (Eks. 16:1, 2) Chökükkün chök lein ekkewe chon Israel ra sü seni Isip, ra tongeni tolong lon ewe Fönüen Pwon. Jiowa ese mut ngeni pwal mwo nge Moses an epwe tolong ren minne a föri pokiten än chon Israel ngününgününgaw. (Tut. 32:48-52) Met sipwe föri ikenäi pwe sipwe tümünü seni ach eäni ewe napanap mi ngaw?

12. Met a tongeni älisikich pwe sisap ngününgününgaw?

¹² Sipwe tümünü pwe site ngününgününgaw. Tipetekison me süföl ngeni chon emmwen epwe älisikich le tümünükich seni ena napanap. A pwal lamot sipwe filiöchü chienach kewe. Pun ika sia filingaw lon ach minen apwapwa are kon chiechi ngeni chienach chon angang are chon sukul rese tongei Jiowa, iwe, repwe tongeni eingawakichelo. Sipwe tipächem ika sia aükükü ach chiechi ngeni ekkewe chon ngününgününgaw are ekkewe mi lükülük woon pwisin ar tipächem.​—SalF. 13:20.

13. Pokiten etipetipaen ngününgününgaw, ikkefa ekkewe mettoch repwe tongeni fis lon ewe mwichefel mi tongeni atai ewe riri ngeni Jiowa?

¹³ Etipetipaen ngününgününgaw a tongeni efisi pwal ekkoch mettoch mi tongeni atai ewe riri ngeni Jiowa. Äwewe chök, ngününgününgaw a tongeni atai ewe kinamwe me tipeeü lon ewe mwichefel. Pwal och, än emön ngününgününgawa chienan kewe chon lükü ese chök eletipechour, nge a pwal tongeni turulong lon ewe tipisin lüapas me eitengawa aramas. (Lif. 19:16; 1 Kor. 5:11) Ekkoch chon ngününgününgaw lon ewe mwichefel le atun ekkewe aposel, “ra puratiu an ekkewe samol nemenem, o ra turunufasei ir ekkewe mi ling.” (Juta 8, 16, TF) Jiowa a wesewesen oput ena föfförün ngününgününgaw ngeni ekkena mwän mi wor wiser lon ewe mwichefel.

14, 15. (a) Met a tongeni fis ngeni ewe mwichefel ika sia mut ngeni eü tipis watte an epwe sopwosopwolo? (b) Met kopwe föri ika ka silei pwe emön a fen föri tipis mi chou nge a aopaalo?

¹⁴ Met kopwe föri ika ka silei pwe emön a  opalo an föfförün tipis, äwewe chök ren ünnüpuch, katol sasingin kapas mi ngaw are föfförün lisowu mwääl? (Ef. 5:11, 12) Ika sia mut ngeni ewe tipis mi chou an epwe sopwosopwolo, Jiowa a tongeni angei seni ewe mwichefel an we manaman mi fel. Ei mettoch epwe tongeni atai ewe kinamwe lon ewe mwichefel. (Kal. 5:19-23) Paul a ereni ekkewe Chon Kraist lon Korint lamoten ar repwe “atowu ewe issin lom.” Pwal ina chök usun ikenäi, mi lamot sipwe tümünü ewe mwichefel seni ekkewe mettoch mi ngaw pwe rete eingawalo ewe napanap are ekiek mi pwüng lon ewe mwichefel. Met ka tongeni föri le älisatä kinamwe lon ewe mwichefel?

¹⁵ Usun met sia fen pworaus usun, a lamot sipwe süföliti pworausen manauen ekkewe ekkoch, äkkäeüin ika ra pwär ngenikich meefier me ekiekiir fän lükülük. A mwääl me osüfölüngaw ach sipwe apworausafetälei pworausen ekkewe ekkoch! Iwe nge, ika emön a fen föri eü tipis watte, a lamot ekkewe elter lon mwichefel repwe silei usun. Me ren ewe Paipel wiser ar repwe tümünü ei sokkun osukosuk. (Älleani Lifitikos 5:1.) Ina popun ika sia silei pwe emön pwiich a föri eü tipis watte, sipwe pesei le fos ngeni ekkewe elter me tingor ar älillis. (Jem. 5:13-15) Nge ika mwirin och fansoun mi üküköch, nge ese fos ngeni elter, iwe sipwe wisen fos ngeniir.

16. Ifa usun sia tümünü ewe mwichefel ren ach ereni ekkewe elter och tipis mi chou sia fen silei pwe emön a föri?

¹⁶ Itä aramas repwe meefi nükünüköch me lon än Chon Kraist mwichefel, ina minne a lamot sipwe tümünü nükünüköchün ren ach ereni ekkewe elter ika emön a fen föri eü tipis watte. Ika ekkewe elter ra älisi ewe mi tipis le weweiti choun an tipis, an epwe aier me etiwa ewe emirit, iwe ewe chon tipis esap chüen eingawalo ewe napanap are ekiek mi pwüng lon ewe mwichefel. Nge met epwe fis ika ewe chon tipis ese aier me ese etiwa ewe älillis seni ekkewe elter? Epwe katowu. An katowu seni ewe mwichefel epwe amoielo an we etipetip mi ngaw. Iwe, ekkewe elter ra tümünü ewe napanap are ekiek mi pwüng lon ewe mwichefel. Lon 1 Korint 5:5, NW, a apasa: “Oupwe äsechalo ätei ngeni Setan pwe oupwe amoielo an etipetip mi ngaw pwe ewe napanap are ekiek lon ewe mwichefel epwe küna tümün lon fansoun ränin ewe Samol.” Meinisin kich ika sia silei pwe emön a föri och tipis watte, sipwe ereni ekkewe elter me älleasochisi ar emmwen. Ükükün ach tufich sipwe achocho le föri minne epwe öchiti pwich kewe me tümünü ewe mwichefel.

TÜMÜNÜ EWE TIPEEÜFENGEN

17, 18. Met epwe älisikich le amwöchü ach tipeeüfengen lon ewe mwichefel?

¹⁷ Nöün Jises kewe chon käeö loom ra älisi ewe mwichefel le tipeeüfengen ren ar “kaeö seni mine ekewe soukünö ra aiti ngeniir.” (Fof. 2:42) Ra aücheani minne ekkewe mwän mi äsimaü ra äiti ngeniir seni Paipel. Pwal ina chök usun ikenäi, ewe mwichefel a küna älillis le tipeeüfengen pokiten ekkewe elter ra älleasochisi än ewe chon angang mi alükülük o tipächem emmwen. (1 Kor. 1:10) Lupwen sia älleasochisi än Jiowa we mwicheich kapasen öüröür seni Paipel, me fiti än ekkewe elter emmwen, sia pwäraatä pwe sia ‘fokun achocho le tümwünü ach tipeeufengen . . . ren ewe kinamwe mi rifengenikich.’​—Ef. 4:3.

¹⁸ Sipwe föri ükükün ach tufich le äkkälisatä me tümünü ewe napanap me ekiek mi pwüng lon ewe mwichefel. Ika sia föri ena, sipwe tongeni lükülük pwe “ümöümöchün ach Samol Jesus Kraist” epwe nonnom ren ewe napanap sia pwäraatä.​—Fil. 4:23.

[Sasing lon pekin taropwe 24]

Ka älisatä ewe napanap mi pwüng lon ewe mwichefel ren om ammolnatäöchü om kewe memmeef?

[Sasing lon pekin taropwe 25]

Älisatä napanap mi pwüng ren om silefichi ekkewe köl