Ineet ewe Maunen Armaketon epwe War?

“Üa küna eu mwich mi fokun chocho, esap wor eman aramas a tongeni aleaniir. Ra feito seni sokopaten mwich, ainang, mwü me kapas meinisin . . . ir chokewe mi towu seni riaföü mi lapalap.”​—PWÄRÄTÄ 7:9, 14.

IEI ewe atun a fen mmolnetä fän iten ewe maunen Armaketon. Ifa usun?

A fen wor eü mwichen aramas woon unusen fönüfan mi angang ngeni Jiowa me etipeeüfengeni manauer ngeni än Paipel kewe emmwen mi tekia usun minne mi pwüng me mwääl. Ren än Kot älillis, chommong aramas seni mwu meinisin, einang me fos ra tipeeüfengen me wiliti eü mwichen pwipwi mi tongfengen. Ena esin pwipwifengen a pwä lein Chon Pwäraatä Jiowa.​—Jon 13:35.

Ekiselo chök, Setan epwe emwichafengenni nöün kewe sounfiu le poputääni an angangen ü ngeni mi lap seni meinisin woon ekkewe aramas mi kinamwe, nge usun itä esor chon tümünüür. (Isikiel 38:8-12; Pwarata 16:13, 14, 16) Ifa usun kopwe lükülük ren ena pworaus? Ewe Paipel a tichikin apworausa ekkewe pworaus pwe epwe älisikich le silei ineet ewe maunen Armaketon epwe war. Chommong me lein ekkeei pworaus ra fen pwönüetä.

Ekkewe Mettoch Sia Fen Küna Pwönütäär

Nöün Jises kewe chon käeö ra eisini ifa usun aramas repwe silei ineet epwe poputä “ewe fansoun sopolan.” (Mattu 24:3) Jises a pölüweniir ren an apasa usun eü fansoun lupwen “einang epwe u ngeni einang, pwal mu ngeni mu; o lengita me chechech epwe fis ekis me ekis.” Mwirin a apasa: “Ekkeei mettoch a chok poputan riaffou.” (Mattu 24:7, 8, TF) Ewe aposel Paul a äweweei pwe ei fansoun, ikkena “ekewe ränin lesopolan,” me ekkena rän repwe “fansoun weires.” (2 Timoti 3:1) Kese le fen küna pwe ekkena oesini ra fen fiffis ikenäi?

Pwata a fokkun weires ei fansoun? Ewe aposel Jon a erenikich ewe popun. A oesini  pwe mwökütükütün Setan me nöün kewe chonläng mi ngaw repwe fis woon chök fönüfan lon fansoun “mochomoch.” Lon ena fansoun Setan “a fokun lingeringer.” (Pwarata 12:7-12) Kese meefi pwe ikenäi, aramas woon unusen fönüfan ra kan nisossong me akkachofesä?

Jises a pwal apasa pwe atun ena fansoun mi fokkun weires, epwe fis eü angang mi amwarar. A erä: “Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.” (Mattu 24:14) Ikenäi, lon lap seni 235 fönü, Chon Pwäraatä Jiowa ra afalafala ewe kapas allim usun Mwuun Kot lon lap seni 500 fosun fönüfan. Ra föri ekkewe ruu puken äweween Paipel mi kon chöüfetäl woon fönüfan seni ekkewe puk meinisin, weween Ewe Leenien Mas me Awake! Ekkewe Chon Pwäraatä ra pwal afföüni ewe Paipel lon orun 100 fosun fönüfan. Ar angang a fis ren än aramas tipemecheres le föri ewe angang, nge ese wor peioffur me a fis pokiten än aramas asor seni letiper. Itä ei angangen afalafal mi amwarar ina pwönüetään än Jises oesini?

Ewe Paipel a pwal äweweei ekkewe mettoch repwe akkomw fis mi kküü fisitään ewe maun lefilen Jiowa Kot me chokkewe mi ü ngeni. Nengeni ekkeei ülüngät oesini kopwele küna pwönütäär.

Ekkewe Mettoch Kopwele Küna Pwönütäär Ekiselo Chök

Oesini 1. Ewe Paipel a apasa pwe ekkewe mwu repwe aronga eü esilesilen “kinamwe o nükünüköch” mi kkolo aüchean. Eli repwe ekieki pwe ra tongeni ataweei ekkewe osukosuk watte. Iwe nge, ekkewe mettoch repwe tapwoto mwirin ei resap efisi kinamwe.​—1 Tesalonika 5:1-3.

Oesini 2. Mwirin, sokkopaten mwu repwe mwöküt le ü ngeni ekkewe mwicheichen lamalam woon fönüfan. Lon ewe Paipel, ekkena mwu ra liosutiw ren emön manmwocho, nge ekkewe lamalam chofona woon fönüfan ra liosutiw ren emön fefin mi wawa emön manmwocho. (Pwarata 17:3, 15-18) Ena manmwocho epwe föri met Kot a mochen epwe föri ren an epwe ataielo ekkewe lamalam mi chofonatä le erä pwe ra tupuni Kot.

Lon kapas äwewe, ewe aposel Jon a erä: “Nge ekewe engol mächä ka küna, pwal ewe manmwacho repwe oput ewe fin lisowu. Repwe angei seni mettochun meinisin o likiti neminewe lon an selela. Repwe ochei fitukan o kenala ren ekkei. Pun Kot a atolonga lon letiper pwe repwe apwönüetä an ekiek.”​—Pwarata 17:16, 17.

Oesini 3. Mwirin än Setan unusen atai lamalam chofona, epwe amwichafengeni ekkewe mwu le maunei nöün Jiowa Kot kewe aramas.​—Pwarata 7:14; Mattu 24:21.

Ifa usun Epwe Kküü Manauom?

Ika kese mwo käeöfichi ewe Paipel, neman kopwe tipemwaramwar le lükü pwe ekkena mettoch sia pworaus usur repwe fis. Nge mei wor popun mi mürinnö kopwe lükü pwe ekkena mettoch repwe tichikin pwönüetä me repwele fis lon mwachkkan. Ekkewe chommong oesini lon Paipel ra fen pwönüetä ra alükülükükich. *

Pwata kese awora fansoun le ppii ika pwata Chon Pwäraatä Jiowa ra lükü pwe ewe “maun lon ewe rän mi lap än Kot ewe mi Unusen Manaman” a arapoto, me ewe popun kosap niuokkusiti ena rän. Tingorer le äwewe ngonuk met ewe Paipel a mochen kopwe föri pwe kopwe nom lein chokkewe Jiowa Kot epwe tümünüür. (Pwarata 16:14) Eli met kopwe käeö epwe siwili om ekiek fän iten mwachkkan.

[Ekis Pwóróus lón pekin taropwe 8]

Itä än Chon Pwäraatä Jiowa angang, a ina pwönüetään än Paipel oesini?