Met Ekkoch Aramas Ra Apasa usun Armaketon?

“Ra achufengeni ekewe king lon ewe leni mi iteni lon kapasen Ipru Armaketon.”​—PWÄRÄTÄ 16:16.

MET ka ekieki atun ka rong ewe kapas “Armaketon”? Eli kopwe eliosu eü feiengaw mi lapalap. Inaamwo ika ena kapas a chök mak fän eü lon ewe Paipel, nge fän chommong sia kan rongorong ena kapas woon pworausen fönüfan me seni ekkewe nöüwisin lamalam.

Itä ekkewe lükü mi chöüfetäl usun Armaketon ra tipeeü ngeni met ewe Paipel a apasa? A lamot pölüwen ena kapas eis. Pwata? Pokiten ewe enlet usun Armaketon a tongeni angasakolo seni niuokkus mi lamotongaw, apöchökküla om äpilükülük fän iten mwachkkan, me amürinnölo om ekiek usun Kot.

Sipwe etittina ülüngät kapas eis, me alöllöfengeni ekkewe lükü mi chöüfetäl usun Armaketon ngeni met ewe Paipel a wesewesen apasa.

 1. ITÄ ARMAKETON EFISIEN ARAMAS?

Fän chommong ekkewe sou makken simpung me sou kütta pworaus ra nöünöü ewe kapas “Armaketon” le äweweei ekkewe feiengaw watte aramas ra efisi. Äwewe chök, ra fen apasa pwe ekkewe äeüin me oruuen maunen fönüfan ina ewe Armaketon. Mwirin ekkena maun, aramas ra lolilen pwe Merika me Russia repwe maunfengen ren kensi pakutang mi kon ssenük pöchökkülan. Ena sokkun maun, aramas ra kan erä pwe eü Armaketon mi fis ren kensi pakütang mi kon ssenük pöchökkülan. Ikenäi sou kütta pworaus ra niuokkus pwe limengawen fönüfan epwe tongeni efisi siwil mi fokkun watte epwe kküü ewe äsepwäl (weather) lon fönüfan. Ina popun ra kan öüröüra aramas ren eü Armaketon epwele fis ren siwilin weather.

Met weween alon aramas kana: Ra erä pwe aramas chök ra tongeni apwüngalo met epwe fis ngeni fönüfan me meinisin mi manau woon. Ika mwuun fönüfan rese tongeni pwäkini ekkewe osukosuk, iwe, fönüfan epwe ta tori feilfeilo.

Minne ewe Paipel a apasa: Kot esap mut ngeni aramas ar repwe ataielo fönüfan. Ewe Paipel a alükülükükich pwe Jiowa * ese föri ei fönüfan pwe “epwe kotongau, nge a föri pwe lenien aramas.” (Aisea 45:18) Kot epwe “afeiengaua chokewe mi afeiengaua fanüfan,” nge esap mut ngeni aramas ar repwe unusen angawalo fönüfan.​—Pwarata 11:18.

2. ITÄ ARMAKETON INA EÜ FEIENGAW WATTE?

Ekkewe sou makken simpung ra nöünöü ewe kapas “Armaketon” fän iten ekkewe feiengaw watte choweän, taifun, chechchechin fönü, lo watte, me met kkan. Äwewe chök, lon ewe 2010, eü repot a fos usun “‘Armaketon’ lon Haiti.” A äweweei woon ewe riäfföü, kata me mälo mi fis ren ewe chechchechin fönü mi kon watte a atatakkisi ena fönü. Sou för repot me sou för kachito ra äweweei pwe ewe kapas “Armaketon” ese chök weneiti ekkewe feiengaw watte ra fen fis, nge epwe pwal weneiti ekkewe ra niueiti ar repwe fis. Äwewe chök, ra nöünöü ewe kapas “Armaketon” le äweweei usun met ra ekieki epwe fis fansoun eföü fau mi föümmong seni läng epwe kküü fönüfan.

Met weween alon aramas kana: Ra erä pwe Armaketon ina eü feiengaw ese lifilifil ineet epwe fis, ewe epwe efisi ninniiloon ekkewe aramas esor tipisiir. Kese tongeni föri och mettoch pwe kopwe pwisin tumunuk seni.

Minne ewe Paipel a apasa: Armaketon esap ina eü feiengaw ese lifilifil ineet epwe fis, me esap efisi mäloon ese lifilifil aramas, nge epwe chök arosalo ekkewe mi ngaw. Ewe Paipel a pwonei pwe ekiselo chök “ekewe aramasangau resap chüen nom. Inamwo are kopwe küttafichiir lon lenier, nge resap nom ikenan.”​—Kölfel 37:10.

3. ITÄ KOT EPWE ATAIELO EWE FÖNÜFAN LON ARMAKETON?

Chommong aramas mi achocho lon lamalam ra lükü pwe epwe wor eü säingoon fiu lefilen minne mi öch me minne mi ngaw, iwe epwe ina sopwoloon ach ei fönüfan. Eü repot lon Merika a apasa pwe 40 percent aramas mi mwukolo ra lükü pwe ei fönüfan epwe sopwolo atun “ewe maun lon Armaketon.”

Met weween alon aramas kana: Ra erä pwe esap weween pwe aramas repwe manau woon fönüfan tori feilfeilo chök, me Kot ese föratä ewe fönüfan pwe epwe nom feilfeilo. Kot a föratä  aramas pwe repwe ekis manau, mwirin repwe mälo.

Minne ewe Paipel a apasa: Ewe Paipel a affata pwe Kot a “anükätiu fanüfan won longolongun kewe, pwe esap fokun mwökütüküt tori feilfeilachök.” (Kölfel 104:5) Pwal iei alon Paipel usun chokkewe repwe älemwiri fönüfan: “Ekewe chon pwüng repwe fanüeni ewe fanü o nonom won tori feilfeilachök.”​—Kölfel 37:29.

A ffat pwe ewe Paipel ese tipeeü ngeni än aramas kewe lükü mi chöüfetäl usun Armaketon. Iwe, ifa ewe pworaus mi enlet usun Armaketon?