“Aleasochisi Ai kewe Kapas”

“Are oupwe aleasochisi ai kewe kapas, oupwe wesewesen nei chon kaiö. Oupwe silei ewe let, nge ewe let epwe angasakemi.”​—JON 8:31, 32.

Met Weween ena Wokisin: Än Jises “kapas” a wewe ngeni an kewe käit mi pop seni Kot. Iei alon: “Semei mi tinieito a allük ngeniei met üpwe apasatä, pwal met ititin fos üpwe nöünöü.” (Jon 12:49) Lon an we iotek ngeni Seman we Jiowa Kot lon läng, a erä: “Om kapas a let.” Fän chommong, a aloni alon Kot pwe epwe älisatä an kewe afalafal. (Jon 17:17; Mattu 4:4, 7, 10) Ina minne, Chon Kraist mi enlet ra ‘aleasochisi än Jises kewe kapas,’ are etiwa pwe mi “let,” än Kot we Kapas, ewe Paipel. Me ra chök alonga ar lükü me föfför woon ewe Paipel.

Ekkewe Chon Kraist Loom Ra Älleasochisi än Jises kewe Kapas: Ewe aposel Paul a äppirü Jises ren an süföliti än Kot we Kapas. A makkeei: “Ekewe Toropwe mi Pin meinisin ra pop seni . . . Kot.” (2 Timoti 3:16) A lamot ngeni ekkewe mwan mi kefilitä le asukula chiener kewe Chon Kraist ar repwe “kamwöchünük won ewe Kapasen Kot mi allükülük.” (Taitos 1:7, 9) Ekkewe Chon Kraist loom ra angei kapasen öüröür le ti seniir “tipachemen fanüfan mi aücheangau, a popu seni sokopaten uruwon lom aramas ra aiti ngeni aramas, . . . nge esap pop seni Kraist.”​—Kolose 2:8.

Iö kewe Ra Älleasochisi än Jises kewe Kapas lon Ach Ei Fansoun? Iei met eü puk itan Katekis nöün ewe Lamalamen Katolik (Catechism of the Catholic Church) a apasa: “Chon Katolik rese chök lükü pwe Kot a pwäri ngeni aramas letipan seni ewe Paipel, nge ra pwal lükü pwe Kot a pwäri ngeni aramas letipan me ren än ar kewe lewo käit mi pin. Ina popun, chon Katolik ra lükü me menniniiti iir me ruu.” Me ren eü puk, emön nöüwisin lamalam seni Canada a eis ika pwata alon Jises kewe repwe tongeni emmweniir, nge ra fen minen loom. A apasa: “A kon mürinnö ach kewe akkot nge epwe apwangapwangolo ika sia akküü ngeni alon Jises me ewe Paipel.”

Iei met ewe New Catholic Encyclopedia a apasa usun Chon Pwäraatä Jiowa: “Ra unusen alonga ar lükü me föfför woon ewe Paipel.” Kkanoto chök, emön mwän a ereni emön chon afalafal mi sotun le fos ngeni pwe a esilla pun i emön Chon Pwäraatä Jiowa ren an nöünöü Paipel mwen an esaamwo fen apasa pwe i Chon Pwäraatä Jiowa.