Ka kan Pwäppwäraawu Lingen Jiowa lon Manauom?

“Sia pwarano ningen ewe Samol.”​—2 KOR. 3:18, Ewe Kapasen God.

IFA USUN KOPWE PÖLÜWENI?

Ifa usun sia tufichin pwäraawu lingen Jiowa inaamwo ika kich mi tipis?

Ifa usun ach kewe iotek me ach fiffiti än Chon Kraist kewe mwich repwe älisikich le pwäraawu lingen Kot?

Met epwe älisikich le ekkelingaalo Jiowa?

1, 2. Pwata sia tongeni ekieki pwe a tufich ach sipwe äppirü napanapen Jiowa kewe?

 ESE mwääl, sia kan mwiri inach kewe me semach. Eli sia fen rongorong än emön apasa ngeni emön ät, ‘Ka mmen mwiri semom we.’ Are ngeni emön nengngin, ‘Ka ächchemaato inom we.’ Fän chommong, semirit ra kan äkkäppirü semer kewe me iner. Nge kich, sia tongeni äppirü Semach we Jiowa lon läng? Inaamwo ika sise tongeni küna, nge sia tongeni käeö seni napanapan kewe mi amwarar ren ach nennengeni förian kewe, käeö an we kapas, me ekilonei minne sia käeö, nge äkkäeüin minne Nöün we Jises a apasa me föri. (Jon 1:18; Rom 1:20) Sia tongeni äppirü napanapen Jiowa kewe, iwe, ren ach föri ena, sipwe pwäraawu lingan.

² Me mwen Jiowa a föratä aramas, a fen silei pwe repwe tufichin föri letipan, äppirü napanapan kewe, me elingaalo i. (Älleani Keneses 1:26, 27.) Pokiten kich chon Kraist, sipwe äppirü napanapen ach we Kot. Ika sia föri ena, sipwe fokkun pwapwa ren ach wisen pwäppwäraawu lingan, ese lifilifil ika kich chon ia, are met ach lewo, are ükükün ach fiti sukul. Pwata? Pun, “Kot esap lifilifil aramas, nge a etiwa aramas mi niuokusiti i o föri mine a pwüng seni ekewe mwü meinisin.”​—Fof. 10:34, 35.

3. Met sia meefi lon ach angang ngeni Jiowa?

³ Ekkewe Chon Kraist mi kepit ra pwäraawu lingen Jiowa. Ina popun ewe aposel Paul, emön me lein ekkewe mi kepit, a makkeei. “Kich meinisin sia pwarano [usun chök kilasen ori, NW] ningen ewe Samol non mesach rese pwönupwöuno, . . . a awinikicheno ngeni pwisin nikinikin, non ew sokkun ning.” (2 Kor. 3:18, KG) Paul a kapas usun ewe atun Moses a feitiw seni ewe chuuk Sinai o uwei ekkewe Engol Allük. A saramaram  woon mesen Moses pokiten ra kapasfengen me Kot. (Eks. 34:29, 30) Inaamwo ika ese saram woon mesen Chon Kraist usun chök Moses, nge aramas ra tongeni küna ewe wopwapwa chapur ra meefi atun ra fos usun Jiowa, napanapan kewe, me minne a tipeni fän iten aramas. Ese lifilifil ika kich chon ewe mwich mi kepit are ekkewe ekkoch siip nge sia usun eü kilasen ori, weween sia pwäraawu lingen Jiowa lon manauach me pwal lon ach angangen afalafal. (2 Kor. 4:1) Ka kan pwäraawu lingen Jiowa ren om manaueni ewe manau mi apwapwaai i me ren om fiffiti ewe angangen afalafal?

SIA TIPENI LE PWÄRAAWU LINGEN JIOWA

4, 5. (a) Met sokkun fiu sia eäni, usun chök Paul? (b) Ifa usun tipis a efeiengawakich?

⁴ Kich nöün Jiowa chon angang, iwe sia tipeni le pwäraawu lingan lon mettoch meinisin sia föri. Nge fän chommong, sia föri minne mi mwääl, inaamwo ika sia mochen föri minne mi pwüng. A pwal ina usun än Paul osukosuk. (Älleani Rom 7:21-25.) A äweweei met popun a weires ngenikich ach sipwe fiffiu ngeni mocheniangawach: “Aramas meinisin ra tipis, o rese mo tori ewe lingen Kot.” (Rom 3:23, TF) Pokiten Atam a tipis, meinisin aramas ra uputiw fän nemenien tipis, usun itä tipis a usun emön king mi kirikiringaw a nemeni aramas.​—Rom 5:12; 6:12.

⁵ Met weween tipis? A wewe ngeni mettoch meinisin mi ü ngeni napanapen Jiowa kewe, letipan, me an kapasen emmwen fän itach. Tipis a atai än emön riri ngeni Kot. A eppetikich le pwäppwäraawu lingen Kot, usun chök emön chon nikäppich a tongeni rikilo föünan seni ewe mettoch epwe peki. Fän ekkoch sia tipis pokiten sia filatä, nge fän ekkoch sia tipis pokiten sia mwäällilo. (Num. 15:27-31) A pöchökkül etipetipaen tipis woon aramas, me a tongeni äimurolo seni ewe Chon Föriir. (Kölf. 51:5; Ais. 59:2; Kol. 1:21) Lape ngeni aramas ra manaueni och sokkun manau mi unusen äimurolo seni Kot, iwe a pöüt seniir ewe feiöchün pwäraawu lingen Kot. Esor och mettoch a tongeni efeiengawa aramas lap seni tipis.

6. Pwata sia tufichin pwäraawu lingen Jiowa inaamwo ika sia chüen tipis?

⁶ Inaamwo ika sia uputiw lon tipis, nge Jiowa a ngenikich eü äpilükülük. (Rom 15:13) Lupwen Jiowa a fangolo Jises usun eü möön kepich a atufichikich le ngase seni tipis. Pokiten sia eäni lükü woon ena möön kepich, sise “chuen nonom fän nemenien tipis,” nge sia tongeni pwäraawu lingen Jiowa me chiechi ngeni. (Rom 5:19; 6:6; Jon 3:16) Ika sia chichchiechi ngeni Kot, sia tongeni lükülük pwe i epwe efeiöchükich iei mwo. Pwal lon mwachkkan, epwe aunusöchükichelo me ngenikich manau esemuch. A ifa me feiöchüch pwe Kot a meefi pwe sia tongeni pwäraawu lingan, inaamwo ika sia chüen tipis!

MET A ÄLISIKICH LE PWÄRAAWU LINGEN JIOWA?

7. Met a lamot ach sipwe mirititi ika sia mochen pwäraawu lingen Kot?

⁷ Pokiten kich sia tittipis, a wor ach apwangapwang. Ika sia mochen pwäraawu lingen Kot, mi lamot emön me emön kich epwe silei pwisin an kewe apwangapwang. (2 Kron. 6:36) Mi lamot ach sipwe mirititi pwe a nom rech ekkena apwangapwang, me mwirin sipwe ü ngeniir pwe sipwe tongeni elinga Kot. Äwewe chök, ika sia tipis ren ach kakkatol sasingin kapasingaw, mi lamot ach sipwe mirititi pwe a lamot ngenikich älillisin ekkewe elter, me mwirin tingor ar älillis. (Jem. 5:14, 15) Ina ewe äkkäeüin mettoch sipwe föri ika sia wesewesen mochen elinga Kot. Mi lamot ach  sipwe ekketittina pwisin kich ika sia manaueni ewe manau Jiowa a kütta senikich. (SalF. 28:18; 1 Kor. 10:12) Ese lifilifil met sokkun apwangapwang a nom rech, nge mi lamot ach sipwe ükkü ngeniir pwe sipwe tongeni pwäraawu lingen Kot.

8. Met a lamot ach sipwe föri inaamwo ika sise unusöch?

⁸ Jises chök ewe emön aramas mi unusen apwapwaai Kot me pwäraawu lingan. Inaamwo ika sise usun Jises ren an unusöch, nge mi lamot ach sipwe öttüres le äppirü i. (1 Pit. 2:21) Jiowa ese chök aücheani ach feffeitä le ü ngeni ach kewe apwangapwang, nge a pwal aücheani ach kewe achocho, iwe epwe efeiöchü ach kana achocho le elinga i.

9. Ifa usun ewe Paipel a tongeni älisikich le angangöchülo le pwärawu lingen Kot?

⁹ Ewe Paipel a tongeni asaramakich pwe sipwe tongeni angangöchülo le pwärawu lingen Kot. Mi lamot ach sipwe käeöfichi ewe Paipel me ekilonei minne a apasa. (Kölf. 1:1-3) Ach älleani Paipel iteiten rän epwe älisikich le feffeitä lon ach manaueni manauen Chon Kraist. (Älleani Jemes 1:22-25.) Minne sia käeö seni Paipel a apöchökküla ach lükü me apposakich le tii senikich tipis watte me sipwe apwapwaai Jiowa.​—Kölf. 119:11, 47, 48.

10. Ifa usun iotek a älisikich le angangöchülo lon ach angang ngeni Jiowa?

¹⁰ Ika sia mochen pwäraawu lingen Kot, a lamot sipwe “iotek fansoun meinisin.” (Rom 12:12) Sipwe iotek pwe Jiowa epwe älisikich le angang ngeni lon eü napanap epwe pwapwa ren. Sipwe tingor an manaman mi fel, tingor pwe epwe apöchökküla ach lükü, tingor ach pöchökkül fän sossot, me tingorei an epwe älisikich le lipwäköchülo lon ach asukula aramas ewe Paipel. (Mt. 6:13; Luk 11:13; 17:5; 2 Tim. 2:15) Mi lamot sipwe lükülükü älillisin Semach we Jiowa, usun chök emön semirit mi lükülükü seman we. Ika sia tingorei Jiowa an epwe älisikich pwe sipwe lipwäköchülo lon an angang, sia tongeni lükülük pwe epwe älisikich. Sisap fokkun ekieki pwe sia aosukosuka! Lon ach iotek, sipwe mwareiti, kilisou ngeni, kütta emmwen, äkkäeüin lon fansoun weires, me tingorei an epwe älisikich le elingaalo i lon ach angang.​—Kölf. 86:12; Jem. 1:5-7.

11. Ifa usun ach kewe mwich ra älisikich le pwäraawu lingen Kot?

¹¹ Kot a ewisa ngeni ewe “chon angang mi allükülük o tipachem” ar repwe wisen tümünü nöün kewe siip mi aüchea. (Mt. 24:45-47; Kölf. 100:3) Ena mwich mi alükülük ra mochen älisikich meinisin le pwäraawu lingen Jiowa. Ra föri ena ren ar akkota ach kewe mwich. Ach kana mwich ra älisikich le föri siwil lon manauach me amürinnölo napanapach, napanapen Chon Kraist, usun chök emön chon tete a tongeni siwili napanapen üfach pwe sipwe nikiniköch. (Ipru 10:24, 25) Ina popun, sipwe warekkäi ngeni ach kewe mwich. Ika sia fen eöreni le mmang ngeni ach kewe mwich, sisap feiöch seni unusen ekkewe älillis mi fen kawor.

OUSIPWE ÄPPIRÜ KOT

12. Ifa usun sipwe äppirü Kot?

¹² Ika sia mochen pwäraawu lingen Jiowa, a lamot sipwe “apirü i.” (Ef. 5:1) Ach eäni ekiekin Jiowa, ina alen ach sipwe äppirü i. Ika sia föri minne chök sia mochen, nge ese tipeeü ngeni ekiekin Kot, sia süfölüngaweiti me sipwe pwisin tipis ngenikich. Pokiten sia nonnom lon än Setan ei otot, sipwe fokkun achocho le oput minne Jiowa a oput me tongei minne a tongei. (Kölf. 97:10; 1 Jon 5:19) Sipwe fokkun lükülük pwe a wor eü chök napanap mi pwüng sipwe angang ngeni Kot lon, ina ach föri mettoch meinisin pwe epwe ling ren.​—Älleani 1 Korint 10:31.

13. Pwata sipwe oput tipis? Met sipwe föri ika sia oput tipis?

 ¹³ Jiowa a oput tipis, iwe sipwe pwal ina usun. Ika sia oput tipis sipwe atowauakichelo ükükün ach tufich seni mettoch meinisin repwe tongeni efisi ach föri tipis. Äwewe chök, sipwe tümünükich seni ekkewe mettoch mi apöchökkülatä angangen chon rikilo. Ekkewe chon rikilo rese elinga Kot. (Tut. 13:5-9) Ousipwe unusen tümünükich seni ekkewe chon rikilo are chokkewe mi erä pwe iir chienach chon Kraist nge rese elingaalo Kot. Sisap chiechi ngeniir inaamwo ika iir chon ach famili. (1 Kor. 5:11) A lamot mwääl ach achocho le pwäri mwäällin ekkewe chon rikilo, me pwal ekkewe mi esiita än Jiowa we mwicheich. Sisap pwal mwo nge mochen ekis silei alor kewe lon nöür kewe puk me woon ewe Internet, pun ika sia föri ena epwe tongeni atai ach riri ngeni Jiowa.​—Älleani Aisea 5:20; Mattu 7:6.

14. Ifa eü me lein ekkewe mettoch mi lamot seni meinisin sipwe äppirü Jiowa lon? Pwata?

¹⁴ Ach pwäraatä tong ina eü me lein ekkewe mettoch mi lamot seni meinisin ach sipwe äppirü Jiowa lon. (1 Jon 4:16-19) Ina minne, ewe tong sia eäni lefilach a ännetatä pwe kich nöün Jises chon käeö me nöün Jiowa chon angang. (Jon 13:34, 35) Pokiten sise unusöch, fän ekkoch a weires ach sipwe pwäraatä tong. Nge sipwe achocho le eäni tong iteitan. Ach  achocho le pwäri tong me eäni napanapen Chon Kraist epwe älisikich le tii senikich tipis me angangen kirikiringaw.​—2 Pit. 1:5-7.

15. Epwe ifa föfförüch ngeni aramas ika sia tonger?

¹⁵ Tong a amwökütükich le föri met mi mürinnö fän iten aramas. (Rom 13:8-10) Äwewe chök, ika eü pean pwüpwülü ra tongfengen, iwe repwe chök pwäpwäraatä tüppwöl lefiler. Ika sia tongei ekkewe elter me süföliti ar angang, iwe sipwe älleasochis ngeniir me anomukich fän emmwenier. Ekkewe semirit mi tongei semer kewe me iner ra süfölitiir, ra älleasochisiir, me rese kapas mi ngaw usur. Ika sia tongei aramas, sisap ekieki pwe sia lap seniir me fos ngeniir fän süfölüngaw. (Jem. 3:9) Ekkewe elter mi tongei nöün Kot kewe siip repwe kirekiröch ngeniir.​—Föf. 20:28, 29.

16. Ifa usun ach pwäraatä tong epwe älisikich lon ach angangen afalafal?

¹⁶ Tong epwe pwälo lon napanapen ach föri ewe angangen afalafal. Pokiten sia kon tongei Jiowa, sisap letipengaw ren än aramas rese mochen aüseling ngenikich me rese etiwa ach afalafal. Nge sipwe fen sopwelo le akkafalafala ewe kapas allim. Sipwe mmolnöch lon ewe angangen afalafal me achocho le lipwäköchülo usun emön senseen än Kot we Kapas. Ika sia wesewesen tongei Kot me aramas, sisap chök afalafal fän asopwisek. Nge sipwe meefi pwe ewe angangen afalafal a aüchea, me sipwe föri fän chengel.​—Mt. 10:7.

PWÄPPWÄRAAWU LINGEN JIOWA

17. Ifa lamoten ach mirititi pwe tipis a eppetikich le pwäraawu lingen Kot?

¹⁷ Lape ngeni aramas rese mirititi choun ewe mettoch tipis, nge kich sia mirititi. Ren ena popun, sia silei pwe a lamot sipwe fiffiu ngeni ach päe ngeni tipis. Sia silei pwe mi lamot ach sipwe äkkäiti mwelien letipach pwe epwe älisikich le föri minne mi pwüng atun a kerän chök poputä ach mochen föri minne mi ngaw. (Rom 7:22, 23) Kich aramas sia apwangapwang, nge Kot a tongeni ngenikich ewe pöchökkül le föri minne mi pwüng fansoun meinisin.​—2 Kor. 12:10.

18, 19. (a) Met a atufichikich le sopwöch lon ach fiu ngeni Setan me nöün kewe chonläng mi ngaw? (b) Met sipwe tipeppos le föri?

¹⁸ Pokiten sia mochen elingaalo Jiowa, a lamot sipwe fiu ngeni Setan me nöün kewe chonläng mi ngaw. Sia tongeni akkufuur ren ekkewe ‘pisekin maun Kot a ngenikich.’ (Ef. 6:11-13) Setan a resin achocho le angei seni Jiowa ewe ling mi fich ngeni Jiowa chök an epwe eäni. A pwal angang weires le atai ach riri ngeni Kot. Ina popun a fokkun watte lichippüngün Setan lupwen chommong mwän, fefin, me semirit rese unusöch nge ra akkamwöchü ar tüppwöl ngeni Kot me elingaalo i. Iwe, ousipwe mwamwareiti Jiowa usun chök ekkewe chonläng mi erä: “Mi fich ngonuk, ach Samol o ach Kot, pwe kopwe angei ling o iteuoch o manaman, pun ka fen forata mettoch meinisin, o mettoch meinisin a fis o a nom ren letipom.”​—Pwar. 4:11.

¹⁹ Sipwe fokkun üppos le ekkelingaalo Jiowa. I a fokkun pwapwa atun a küna chommong nöün kewe chon angang mi föfföri ükükün ar tufich le äppirü i me pwäraawu lingan. (SalF. 27:11) Sipwe usun chök Tafit, ewe mi mwareiti Jiowa seni unusen letipan me kölü: “Üpwe alinga itom tori feilfeilachök.” (Kölf. 86:12) A ifa me mwötöresich atun sipwele unusöch lon ach pwäraawu lingen Jiowa me mwareiti itan feilfeilo! Iei met aramas mi älleasochis repwe tongeni föri. Nge en, ka pwäppwäraawu lingen Jiowa Kot iei fän ewe äpilükülük pwe ka tongeni sopwelo le föri tori feilfeilo?

[Ekkewe sasing lon pekin taropwe 31]

Ka kan pwäppwäraawu lingen Jiowa lon ekkeei napanap?