“Oupwe Tongfengen Lefilemi”

“Upwe ngenikemi eu alluk mi fo, pwe oupwe tongfengen lefilemi, usun chok ua tongeikemi, pwe ami oupwe tongfengen lefilemi. Epwe iei usun pwe aramas meinisin repwe sinei pwe ami nei chon kaeo, are mi wor ewe tong lefilemi.”​—JON 13:34, 35, TF.

Met Weween ena Wokisin: Kraist a ereni ekkewe chon tapwelo mwirin pwe repwe tongfengen lefiler usun chök an tonger. Ifa usun Jises a tonger? A tongei aramas meinisin, ese lifilifil ika iir chon ia are iir fefin are mwan. Än Jises tong a sokkolo watteen pwe ese eäni ekiekin aramas mi aapaap lon an we fansoun. (Jon 4:7-10) Tong a amwökütü Jises an epwe pennüküolo an fansoun, pöchökkül, me kinamween manauan ren an epwe älisi aramas. (Mark 6:30-34) Säingonoon, Kraist a pwäraatä an tong lon eü napanap mi kkolo aüchean. A apasa: “Ngang ewe chon mas mi öch. Ewe chon mas mi öch a fangala manauan fänäsengesin ekewe sip.”​—Jon 10:11.

Ekkewe Chon Kraist Loom a Wor Ar Tong Lefiler: Lon fansoun ekkewe aposel, Chon Kraist ra nöünöü ekkeei kapas lefiler, “pwiich” me “fefinach.” (Filemon 1, 2) Aramasen mwu meinisin ra ketiw lon ewe mwichefelin Chon Kraist pun ra lükü pwe “ese mo sokkofesen lefilen re Jus me re Kris, ewe chok Samol mi Samolun ir meinisin.” (Rom 10:11, 12, TF) Mwirin Pentikos 33 C.E., ekkewe chon käeö lon Jerusalem “ra amömöla fanüer me pisekir o ra ineti lefiler ewe moni ra angei won ükükün met eman me eman a osupwang ren.” Met popun? Pun chokkewe mi kerän papatais repwe tongeni nomwotiw lon Jerusalem me “likitü le kaeö seni mine ekewe soukünö ra aiti ngeniir.” (Fofor 2:41-45) Met a amwökütü ekkena chon käeö le föri ena? Kis seni 200 ier mwirin mäloon ekkewe aposel, Tertullian a aloni met aramas ra apasa usun ekkewe Chon Kraist, mi erä: “A ifa me watteen ar tongefengeniir . . . me a ifa me tipemecheresiir le mälo fän iten pwiir kewe.”

Iö kewe Ra Pwäri Tong Lefiler lon Ach Ei Fansoun? Eü puk usun uruwoon Rom, a erenikich pwe chokkewe mi erä pwe iir Chon Kraist seni me loom ra kon “eriäfföwüfengeniir lap seni ar küna eriäfföü seni ekkewe chon lükün.” Kkanoto chök, eü repot lon Merika a pwäri pwe chokkewe mi apasa pwe iir Chon Kraist, fen iir ra kan lifilifil ngeni aramas mi sokkolo ar lewo. Fän chommong, chokkewe mi fiti eü chök sokkun lamalam rese riri ngeni chiener kewe mi eäni ena sokkun lamalam lon pwal eü fönü, iwe rese mochen are rese tufichin älisi chiener kewe atun ra nom lon fansoun osupwang.

Lon ewe 2004, a wor rüänü taifun mi chök akkatapw ra tori Florida lon chök ruu maram. Mwirin, emön meilap lon Florida mi akkota minen älillis lon fansoun feiengaw watte a cheki ika chon ena leeni iir mi äeäöchü ar kewe minen älillis mi fen kawor. A erä pwe esor eü kümi mi kon kokkotöch me lükün ekkewe Chon Pwäraatä Jiowa, me a mut ngeniir ese lifilifil minen älillis mi lamot ngeniir. Pwal lon ewe ier 1997, eü kümiin Chon Pwäraatä Jiowa mi awora älillis lon pekin säfei, möngö, me üf ra säi ngeni eü fönü lon Afrika ren ar repwe älisi pwiir kewe Chon Kraist me ekkewe ekkoch mi lamot ngeniir älillis. Chiener kewe lon Iurop ra fen awora älillis ngeniir, nge kapachelapen ar älillis, eü million chala.