Ifa Ekiekin Jesus Usun Politics?

EKKEWE sou makken puken Kapas Allim ra apwóróusa ekkóch fansoun Jesus a kúna sóssótun an epwe fiti mwékútúkútún mwúún fénúfan are politics. Áwewe chék, ekiseló mwirin án Jesus papatais lupwen a 30 ierin, ewe Tefil a ereni an epwe fang ngeni ewe wis sou nemenemen fénúfan. Mwirin, eú mwichen aramas ra pwal mochen seikaatá pwe epwe néúr king. Lón pwal eú fansoun, ekkewe aramas ra sótun eriáni pwe epwe penaatá politics. Met Jesus a féri lón ekkena atun? Sipwe nengeni ekkeei pwóróus.

Sou nemenemen fénúfan. Ekkewe puken Kapas Allim ra erá pwe ewe Tefil a mochen fang ngeni Jesus nemenemen “mwün fanüfan meinisin.” Ekieki úkúkún watteen feiéchún fénúfan ika Jesus a fen áeá péchékkúlen an nemenem usun emén sou nemenemen fénúfan! Emén mi enletin mochen álisi aramas me wesewesen lúkú manamanen politics, itá esap fen péén seni ei wis. Nge Jesus a péénaaló. (Mateus 4:8-11) Ese mwáál a wor popun mi aúchea an féri ena, pun i a enletin mochen álisi aramas.

King. Chómmóng pilóón Jesus kewe ra fókkun meefi pwe ra osupwangen emén king epwe pwákini ar kewe osukosuken tufichin manawer me osukosuken mwúún fénúer. Pokiten ra ingeiti lipwákéchún Jesus, ekkewe aramas ra mochen an epwe fiti politics. Met Jesus a féri? Aposel Johannes a apasa: “Jesus a silei pwe ra ekiekin feito o seikätä fän pöchökül pwe epwe ar king, iei mine a sü seniir o liwinsefälitä won ewe chuk.” (Johannes 6:10-15) A ffat pwe Jesus ese fókkun mochen angolong lón pekin politics.

Chón penaatá politics. Nengeni met a fis me mwen án Jesus epwe máló. Chón tapweló mwirin ekkewe Farisi, iir kewe ra sani le imuló seni mwúún Rom, me chiechien Herotes kewe, iir kewe mi peni mwúún Rom, ra fós ngeni Jesus. Ra echchimwa an epwe peni eú pekin. Ra eis ika mi pwúng án chón Jus repwe mééni ar takises ngeni Rom.

Markus a makkeei met Jesus a pélúwen ngeni, a erá: “‘Pwota oua sotuni le säreei? Oupwe uwato rei eföü moni silifer, pwe üpwe katol.’ Iwe, ra uwato eföü moni ren. Mürin Jesus a aisiniir, ‘Liosun iö me iten iö ei won ei moni?’ Ir ra pölüeni, ‘Liosun Sisar me itan.’ Mürin Jesus a üreniir, ‘Mi pwüng! Oupwe ngeni Sisar mine än  Sisar, nge oupwe ngeni Kot mine än Kot.’” (Markus 12:13-17) Iei án ewe puk itelapan Church and State​—The Story of Two Kingdoms áwewe usun meefien Jesus: “Ese mochen epwe wisen chón amanaw ren an epwe fiti politics nge a fókkun álefila minne án Sisar me minne án Kot.”

Sap minne Jesus ese áfánni án aramas osukosuk ren mwelele, nemenemengaw me pwúngúngaw. Ewe Paipel a affata pwe a wesewesen chúng letipen Jesus ren attongen ekkewe aramas lón an we fansoun. (Markus 6:33, 34) Nge Jesus ese sótun amóeló pwúngúngaw inaamwo ika ekkóch ra achocho le etipetipa an epwe angolong lón án aramas kewe osukosuk lón ena atun lón pekin politics.

Ekkeei pwóróus ra affata pwe Jesus ese fókkun mochen angolong lón mwékútúkútún politics. Nge ifa usun ekkewe Chón Kraist lón ei fansoun? Met itá repwe féri?