Káé seni án Kot we Kapas

Met Epwe Fis ngeni ekkewe Lamalam?

Lón ei lesen a wor ekkewe kapas eis neman ka fen eáni me epwe áiti ngonuk ia lón noum Paipel kopwe tongeni álleani pélúwer kewe. Ekkewe Chón Pwáraatá Jiowa repwe pwapwa le pwóróus ngonuk usun pélúwen ekkeei kapas eis.

1. Mi múrinné lamalam meinisin?

Lón ekkewe sókkópaten lamalam, mi wor ekkewe aramas mi letip wenechar ra mochen apwapwaai Kot. Kot a kúna ekkena aramas me chúngúúr. Nge a alólilen pun ekkóch aramas ra áeá lamalam ren ar apwénúetá ar ekiek mi ngaw. Me lóóm, ekkewe néúwisin lamalam ra pwal eriáfféwú ekkewe ra ú ngeniir. (2 Korint 4:3, 4; 11:13-15) Me ren ekkewe simpúng ikenái, ekkóch néúwisin lamalam ra apéchékkúla pekin furio, are álisatá maun, are kirikiringaw ngeni ekkewe semirit.​—Álleani Mateus 24:3-5, 11, 12.

Ewe Paipel a asukula pwe mi wor ruu sókkun lamalam, lamalam mi enlet me lamalam mi chofona. Lamalam mi chofona ese asukula ewe enlet usun Kot. Iwe nge, Jiowa Kot a mochen pwe aramas repwe silei ewe enlet usun i.​—Álleani 1 Timoty 2:3-5.

2. Met epwe fis ngeni ekkewe lamalam?

Kot ese mochen aramas repwe tupuló ren ekkewe lamalam mi erá pwe ra tongei nge rese asukula ewe enlet usun i. Ren enletin, chón fiti ekkena lamalam ra pacheri ei fénúfan, Satan ewe Tefil a nemeni. (James 4:4; 1 Johannes 5:19) Án Kot we Kapas a áweweei pwe ekkewe lamalam mi peni ekkewe mwúún aramas lap seni Kot ra usun emén fin lisowu. Ewe Paipel a eita ngeni ei fin lisowu “Papilon mi lapalap,” ei it a feito seni ewe telinimw me lóóm ia ewe lamalam chofona a poputá me ie mwirin ewe Noter lón fansoun Noa we. Ekiseló chék, Kot epwele asopwaló ekkewe lamalam mi otupu me eriáfféwú aramas.​—Álleani Pwärätä 17:1, 2, 5, 17; 18:8, 23, 24.

  3. Ifa usun Kot epwe atoto pwapwa ngeni aramasen unusen fénúfan?

Warotoon kapwúngún lamalam chofona ina kapas allim. Epwe eselipato ngaseló seni angangen eriáfféw wóón unusen fénúfan. Esap chúen fis fán eú pwe ekkewe lamalam chofona repwe otupu me etipefeseni aramas. Aramas meinisin repwe tipeeúfengen lón ar fel ngeni ewe chék Kot mi enlet.​—Álleani Aisea 11:9; Pwärätä 18:20, 21; 21:3, 4.

4. Met ekkewe aramas mi tipewenechar repwe itá féri?

Jiowa ese fen ménúkaaló ekkewe aramas mi tipewenechar mi nomofetál lón ekkewe lamalam mi chofona. Ikenái Jiowa a ionifengeni ekkena sókkun aramas ren an asukuler pwe repwe tipeeú.​—Álleani Mika 4:2, 5.

Jiowa a etiwa iir mi mochen angang ngeni i lón an we famili. Inaamwo ika márárich kewe me chienach kewe ra oput lupwen sia poputá le angang ngeni Jiowa, nge a watte ach feiéch. Sia feiéch pun sia wiliti chiechien Kot, pachelong lón mineféén famili mi tong, me eáni ewe ápilúkúlúkún manaw esemuch.​—Álleani Markus 10:29, 30; 2 Korint 6:17, 18.

Ren pwal ekkóch pwóróus, ppii sópwun 15 me 16 lón ei puk, Met ewe Paipel A Wesewesen Apasa?, férien Chón Pwáraatá Jiowa.

[Picture Credit]

The Complete Encyclopedia of Illustration​/J. G. Heck