Ewe Paipel A Álilliséch Lón Ei Fansoun

“Om kapas eu lamp a aiti ngeniei ia üpwe ipwela ie, a pwal asarama alei.”​—KÖLFEL 119:105.

IFA USUN EWE PAIPEL A SÓKKÓLÓ? Aramas ra ekieki pwe a amwarar ekkóch puk, nge sap minne ekkena puk ra awora kapasen emmwen ngeni manawen aramas. Pwal och, a lamot ekkewe puken káit repwe sissiwil pwe epwe makolóng ekkewe mineféén pwóróus. Nge ewe Paipel a apasa pwe “meinisin mine a mak lon ekewe Toropwe mi Pin a mak fän iten ach sipwe kaiö seni.”​—Rom 15:4.

PISEKIN ÁNNET: Inaamwo ika ewe Paipel esap eú puken emmwen lón pekin sáfei, nge a masou ren ekkewe kapasen fén fán iten péchékkúlen inis me échún pekin memmeef. Áwewe chék, a erá pwe “eu letip mi kinamwe a awora pöchökülen inis.” (Än Salomon Fos 14:30) Pwal iei an éúréúr: “Eman mi püsin imwüla a chök kütta an mochen, a ü ngeni meinisin mine aramas ra ekieki pwe a pwüng.” (Än Salomon Fos 18:1) Nge a pwal erá pwe “sia feiöch ren ach fang lap seni ach angei mettoch.”​—Föför 20:35.

MET SOU KÁÉ RA PWÁRAATÁ: Kinamween letip, ririéchún chiechi me kisáseú ra tongeni amúrinnéló péchékkúlen inisum. The Journal of the American Medical Association a repotei: “Ekkewe mwán ra lal me púchér atun ra song, a tongeni lapoló an epwe toriir stroke lap seni chókkewe mi nemeni ar song.” Lón Australia a wor eú káé úkúkún 10 ier usun ekkewe chinnap, a erá pwe “chókkewe mi chichiechi ngeni aramas me wor ié kewe ra kon pwipwiéch ngeni,” ra tongeni manawattam. Lón 2008, ekkewe sou kútta pwóróus lón Canada me Merika ra kúna pwe aramas mi “néúnéú néúr moni fán iten ekkóch ra pwapwa lap seni ar néúnéú fán iter pwisin.”

MET KA EKIEKI? Kopwe lúkúlúk wóón pwal eú puk mi mak lap seni 2,000 ier lóóm an epwe emmwenuk fán iten péchékkúlen inisum? Are ewe chék Paipel mi kkóló aúchean?

[Ekis Pwóróus lón pekin taropwe 8]

“Ewe Paipel a kon amwarar ngeniei . . . pokiten a fókkun éch an kewe éúréúr usun túmúnún inis me ekiek.”​—HOWARD KELLY, M.D., EMÉN ME LEIN CHÓKKEWE MI POPUTÁÁNI EWE JOHNS HOPKINS UNIVERSITY SCHOOL OF MEDICINE