“Iei Manau Esemuch”
“Iei Manau Esemuch”
“Iei manau esemuch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.”—JOHANNES 17:3.
SILE a tongeni atoto manaw. Lupwen Nouhou, emén semirit engol maraman a semmwen, inan we chón angangen public health lón Niger a silei met epwe féri. A nofitifengeni och konik mi liméch ngeni salt me suke me a aúnú ngeni néún we mi pwas lón inisin. Me ren ewe UNICEF, ewe ofesin túmúnún semirit, a erá pokiten neminna “a mwittir mwékút me pwal álillisin ewe public health, iwe néún we a chikar.”
Ewe sile seni Paipel a pwal tongeni atoto manaw. Ewe áeménún sou makken Paipel Moses a erá: “Pun ei allük [án Kot we kapas] esap fos pön ngenikemi, nge i fen manauemi. Oupwe aleasochisi pwe oupwe manauatam.” (Tuteronomi 32:47) Ewe Paipel a wesewesen tongeni attamaaló manawach? Ifa usun a tongeni atoto manaw?
Ekkewe nimu pwóróus mwen ei, ra fen pwáraatá pwe ese pwal wor eú puk me lúkún ewe Paipel ren alúkúlúkún an kewe oesini, pwóróusen uruwo, pwóróus mi tipeeú ngeni science, an unusen tipeeúfengen me an álilliséch ngeni manawen aramas. A ffat pwe a kkóló aúchean ewe Paipel. Ina popun, lupwen Paipel a apasa pwe a tongeni emmwenuk ngeni manaw esemuch, iwe itá kosap fen etittinafichi masouan?
Ám aua peseok om kopwe káé ifa usun ewe sile mi enlet lón Paipel a tongeni atoto kinamween letip iei me pwapwa lón mwachkkan. Chón Pwáraatá Jiowa repwe pwapwa le áiti ngonuk ifa usun kopwe angei ena sile.
